Mbazi ya Yehova bumbaka Ezekyase

Bwala ya Asiria bakaka kimfumu ya makanda 10 ya Izraele. Ntangu yayi Senakeribi mfumu ya Asiria, vandaka na nsatu ya kubaka kimfumu ya makanda zole ya Yuda. Yandi bandaka kubaka mosi na mosi ya bambanza ya bwala ya Yuda. Mbanza yina yandi vandaka na nsatu mingi ya kubaka vandaka Yeruzalemi. Kasi Senakeribi vanda zaba ve ti Yehova vanda bumba mbanza ya Yeruzalemi.

Ezekyase mfumu ya Yuda, futaka Senakeribi mbongo mingi samu yandi bika kunwanisa Yeruzalemi. Ata ti Senakeribi bakaka mbongo yina, yandi bikaka ve kufilisa basoda ya yandi ya ngolo na kunwanisa Yeruzalemi. Na Yeruzalemi, bantu vandaka na boma samu basoda ya Asiria vandaka dyaka ve ntama. Ezekyase zonzaka na bawu: ‘Beno kuvanda ve na boma. Bantu ya Asiria ke na ngolo, kasi Yehova ke pesa beto ngolo ya kulutila ya bawu.’

Senakeribi filisaka kinati-nsangu ya yandi Rabshake na Yeruzalemi samu na kuseka bantu ya mbanza yina. Rabshake telamaka na ngaanda ya mbanza mpe vanda zonza na ndinga ya ngolo: ‘Yehova ke lenda ve kuvuukisa beno. Ezekyase kuvuna ve beno. Ya ke ve na nzambi yina lenda vuukisa beno na maboko ya beto.’

Ezekyase lombaka na Yehova yinki yandi me lunga kusala. Yehova vutulaka: ‘Kuvanda ve na boma ya bamambu yina Rabshake ke na zonzaka. Senakeribi ke baka ve mbanza ya Yeruzalemi.’ Na manima, Ezekyase kuzwaka mikanda yina katukaka na Senakeribi. Mikanda yango vanda zonza: ‘Beno bika kusala yintu ngolo. Yehova ke lenda ve kuvuukisa beno.’ Ezekyase sambilaka: ‘Mulemvo Yehova, vuukisa beto samu bantu nyonso zaba ti kaka ni nge ke Nzambi ya tsyeleka.’ Yehova zonzaka na yandi: ‘Mfumu ya Asiria ke kota ve na kati ya mbanza ya Yeruzalemi. Mu ke bumba mbanza ya munu.’

Senakeribi vandaka na kundima ti ntangu fioti kaka me bikana, Yeruzalemi ke kuma ya yandi. Kasi na mpimpa mosi, Yehova filisaka mbazi ya yandi kisika yina basoda ya Senakeribi tulaka camp ya bawu na ngaanda ya mbanza. Mbazi yina kufwaka basoda 185 000! Basoda ya ngolo ya Senakeribi kufwaka. Samu yandi vandaka dyaka ve na kima ya nkaka ya kusala, yandi vutukaka na bwala ya yandi na nsoni. Yehova bumbaka Ezekyase na Yeruzalemi kaka mutindu yandi pesaka nsilulu. Kana nge vandaka na Yeruzalemi, nge zolaka tula kwandi ntima na Yehova?