Bambazi me pesa nsangu ti Yesu me butuka

Sezare Oguste mfumu ya kimfumu ya Roma pesaka musiku ti Bazwife nyonso vutuka na bwala ya bawu samu na kusonikisa bankumbu. Na yawu Yozefi na Maria kwendaka na Betelemi, kisika yina dikanda ya Yozefi butukaka. Na ntangu yina, Maria kumaka pene-pene na kubuta.

Ntangu ba kumaka na Betelemi, ba kuzwaka kisika ya kulala kaka na yinzo ya mameme. Ni kuna Maria butaka mwana ya yandi ya bakala, Yesu. Yandi fukaka yandi na bilele yina vandaka ve kilo mpe yandi tulaka yandi na kisika yina bibulu ke kudyaka.

Pene-pene ya Betelemi, ya vandaka na mivungi yina vanda kengidila mameme na ngaanda na mpimpa. Na mbala mosi, mbazi mosi ya Yehova basikilaka bawu mpe nsemo ya nkembo ya Yehova zungaka bawu. Mivungi yango kumaka na boma mingi, kasi mbazi zonzaka na bawu: ‘Beno kuvanda ve na boma. Mu ke na nsangu ya kilengi mingi. Bubu yayi Masiya me butama na Betelemi.’ Kaka na ntangu yina, bambazi mingi talanaka na zulu, mpe ba zonzaka: ‘Nkembo na Nzambi na mazulu, mpe kizunu na ntoto.’ Na manima bambazi zimbanaka. Yinki mivungi salaka?

Mivungi zonzaka bawu na bawu: ‘Beto kwenda malu-malu yayi na Betelemi.’ Na mbangu nyonso ba kwendaka na Betelemi, mpe ba kutaka Yozefi na Maria na mwana ya bawu na yinzo ya mameme.

Muntu nyonso vanda kamwa ntangu yandi vanda kuwa mambu yina mbazi zonzaka na mivungi. Maria vanda kanisa mingi na mambu yina mbazi zonzaka mpe yandi zimbanaka ata fioti ve yawu. Mivungi vutukaka kisika vandaka mameme ya bawu, mpe ba vutulaka Yehova matondo na bamambu yina ba talaka mpe ba kuwaka.