Polo na Timote

Timote vandaka ntwenya mosi ya kimvuka ya Listre. Tata ya yandi vandaka Mugreke mpe mama ya yandi Zwife. Mama ya yandi, Enise, mpe nkooko ya yandi Loyise longaka yandi mambu ya Yehova banda bumwana ya yandi.

Ntangu Polo salaka nzyetolo ya yandi ya zole samu na kusamuna, yandi kwendaka tala bampangi ya yandi na Listre. Yandi talaka ti Timote vanda zolaka mingi bampangi mpe ti yandi vanda zolaka kusadisa bawu. Polo bokilaka Timote na kukwenda na yandi na nzyetolo. Malembe-malembe, Polo sadisaka Timote na kukuma musamuni ya mbote mpe mulongi ya nsangu ya mbote.

Mpeve ya santu twadisaka Polo na Timote bisika nyonso ba vanda kwenda. Kilumbu mosi na mpimpa, na kimona-meso, bakala mosi zonzaka na Polo na kukwenda na Masedwane samu na kusadisa bawu. Na yawu, Polo, Timote, Silase mpe Luke kwendaka kuna samu na kusamuna mpe ba salaka bimvuka.

Na mbanza ya Tesalonika, bakento na babakala mingi kumaka bakristo. Kasi Bazwife ya nkaka vanda sala Polo na bampangi ya yandi kimbanda. Ba vukanaka na bantu ya nkaka mpe ba nataka bakristo ya nkaka na bamfumu ya mbanza. Ba zonzaka na ndinga ya ngolo: ‘Bantu yayi kele bambeni ya kimfumu ya Roma!’ Luzingu ya Polo na ya Timote kumaka na mpasi. Na yawu, kaka na mpimpa yina ba kimaka na Bere.

Bantu ya Bere sepelaka kuwa nsangu ya mbote, mpe mingi ya Bagreke na Bazwife kumaka bandimi. Kasi ntangu Bazwife ya nkaka ya Tesalonika kwizaka kuna, ba kotisaka muvusu na bwala. Na yawu, Polo kwendaka na Atene. Timote na Silase bikanaka na Bere samu na kukindisa bampangi yayi. Na manima, Polo filisaka Timote na Tesalonika samu na kusadisa bampangi yina ba vanda kwamisa mingi. Dyaka, Polo filisaka Timote na kwenda tala mpe kukindisa bimvuka mingi ya nkaka.

Polo zonzaka na Timote: ‘Ba yina nyonso ke zolaka kusadila Yehova, ba ke kwamisa bawu.’ Ba kwamisaka Timote mpe ba tulaka yandi na boloko samu na kiminu ya yandi. Kasi yandi vandaka na kilengi samu ya vandaka bweso ya kulakisa kukangama ya yandi na Yehova.

Polo zonzaka na bantu ya Filipi: ‘Mu ke na filisaka beno Timote. Yandi ke longa beno yinki zola zonza kutambula na matsyeleka mpe yandi ke sadisa beno na kisalu ya kusamuna.’ Polo zabaka ti yandi lenda tula ntima na Timote. Ba vandaka bandiku mpe ba salaka kintwadi na kati ya bamvula mingi.