Ba me filisa Polo na Roma

Polo me manisa nzyetolo ya yandi ya tatu ya kusamuna na Yeruzalemi. Kuna, ba kangaka yandi mpe ba tulaka yandi na boloko. Na mpimpa mosi na kimona-meso, Yesu zonzaka na yandi: ‘Nge ke kwenda na Roma mpe nge ke samuna kuna.’ Ba katulaka Polo na Yeruzalemi mpe ba nataka yandi na Sezarea. Kuna yandi salaka bamvula zole na boloko. Ntangu ba vanda sambisa yandi na mfumu Festuse, Polo zonzaka na yandi: ‘Mu zola ti Sezare sambisa munu na Roma.’ Festuse zonzaka na yandi: “Nge me lomba ba sambisa nge na sika ya Sezare, nge ke kwenda na sika ya Sezare.” Ba tulaka Polo na masuwa yina vanda kwenda na Roma mpe bakristo zole Luke na Aristarke kwendaka na yandi.

Na mubu, mupepe ya ngolo salamaka na kati ya bilumbu mingi. Bawu nyonso vanda kanisa ti ba ke kufwa. Kasi Polo zonzaka na bawu: ‘Mbazi mosi me zonza na munu na ndosi: “Polo kuvanda ve na boma. Nge ke kwenda na Roma mpe bantu nyonso yina ke na nge ke vuuka.” Na yawu, beno vanda na bukindi! Beto ke kufwa ve.’

Mupepe yango salaka bilumbu 14, mpe ba talaka ntoto na ntama. Ntoto yango vandaka kisanga (île) ya Malta. Masuwa kangamaka mpe ya mwanganaka, kasi bantu 276 yina vandaka na kati ya masuwa vuukaka. Ba ya nkaka sabaka mpe ba ya nkaka sadilaka bitini ya masuwa samu na kukuma na simu ya maza. Bantu ya Malta kipeke bawu mpe ba salaka tiya samu ba yotila.

Na manima ya bangonda tatu, basoda kumisaka Polo na Roma na masuwa ya nkaka. Ntangu ba kumaka na Roma, bampangi ya yandi bakristo kwizaka bwabana yandi. Ntangu yandi talaka bawu, yandi vutulaka matondo na Yehova mpe yandi kuzwaka bukindi. Ata ti ba kangaka yandi, ba pesaka yandi nzila ya kuvanda na yinzo ya kufutila mpe soda mosi vanda kengidilaka yandi. Yandi vandaka na yinzo yina bamvula zole. Bantu vanda kwizaka tala yandi mpe yandi vanda samunaka bawu mambu ya Kimfumu ya Nzambi mpe na yina me tadila Yesu. Polo vanda sonikaka mpe mikanda samu na bimvuka ya Aziya ya fioti mpe ya Zude. Ya tsyeleka Yehova sadilaka Polo samu na kumwangisa nsangu ya mbote na bantu ya makanda.