KILESO 11

Yinki nge lenda sala samu na kuzwa bambote ya kutanga Biblia?

Mutindu ya ke na talanaka na mukanda

Kanisa mwa fioti: nge ke na lupangu ya nene yina ke ya kufuluka na matiti, mpe nge ke na zolá kukatula matiti yina. Kusala yawu lenda talana mpasi, kasi samu na kulenda nge ke banda kusala yawu fioti-fioti. Ya ke mpe faso mosi na yina me tadila kutanga Biblia. Samu na bantu mingi, kutanga Biblia ke kisalu ya nene. Nge lenda yufula: ‘Wapi mutindu mu lenda banda kisalu ya nene yayi?’ Kileso yayi ke lakisa beto faso ya kusala yawu. Mpe ya ke sadisa nge samu, malembe-malembe, nge sepela kutanga mpe kulongoka Biblia nge mosi.

1. Samu na yinki beto me bonga kutanga Biblia bilumbu nyonso?

Muntu yina ke tangá Biblia to “musiku ya Yehova” bilumbu nyonso, ke vanda na luzingu ya kilengi mpe bamambu nyonso yina yandi ke sala ke simba. (Tanga Nkunga 1:1-3.) Samu na kubanda nge lenda meka kutanga biblia kaka ba-minute fioti bilumbu nyonso. Mingi nge ke tanga Biblia, mingi nge ke sepela na kutanga yawu.

2. Yinki beto lenda sala samu na kuzwa bambote ya kutanga Biblia?

Samu na kuzwa bambote ya kutanga Biblia, baka ntangu samu na kukanisa mbote-mbote na yina nge ke tangaka. Tanga yawu mpe “yindula na yawu.” (Yosua 1:8, note ya yinsi ya paje) Ntangu nge ke tangaka, sosa kuzwa bamvutu na byuvu yayi: ‘yinki mambu yayi ke na longá munu na yina me tadila Yehova? Wa’ faso mu lenda sadila yawu na luzingu ya munu? Wa’ faso mu lenda sadila baverse yayi samu na kusadisa bantu ya nkaka?’

3. Yinki nge lenda sala samu na kuzwa ntangu ya kutanga Biblia?

Ya ke mpasi samu na mingi na kati ya beto na kuzwa ntangu ya kutanga Biblia. Sosa “kusadila mbote ntangu” ya nge. (Baefeze 5:16) Nge lenda vanda na ntangu mosi yina nge ke tangaka Biblia bilumbu nyonso. Bantu ya nkaka ke tangá Biblia na suka-suka. Ba ya nkaka ke tangaka yawu na midi. Mpe ba ya nkaka ke tangá Biblia na mpimpa tekila ba lala. Kasi na nge, wapi yina ke vanda ntangu ya mbote samu na kutanga Biblia?

SOSA KUZABA MBOTE-MBOTE

Longoka yina nge lenda sala samu na kuzwa bambote na kutanga ya nge ya Biblia. Tala wa’ faso nge lenda yidama na kulongoka ya nge ya Biblia.

Collage: Na kati ya mwa bantangu, mwana mosi ya bakala ke na longoká kuzola madya mosi ya malu-malu. 1. Yandi ke na sakanaka na madya. 2. Na manima ya mwa bantangu, yandi ke na kudyá yawu. 3. Na manima ya mwa bantangu dyaka, yandi ke na sepelá kudya madya yina. — Kaka mutindu beto ke longoká kuzola madya ya malu-malu, beto lenda longoka kuzola kutanga Biblia

4. Wa’ faso nge lenda tala kilengi na kutanga Biblia?

Samu na bantu ya nkaka ya ke mpasi na kubanda kutanga Biblia. Kasi beto lenda “kuma na nsatu ya ngolo” ya kutanga Biblia faso muntu yina ke sosá kuzola madya ya malu-malu. Tanga 1 Piere 2:2, mpe na manima beto zonzila kyuvu yayi:

Nge me kanisa ti si nge vanda na kifu ya kutanga Biblia konso kilumbu nge ke zola yawu mpe nge ke kuma na nsatu ya kutangaka yawu ntangu nyonso?

Tala VIDEO yina ke na lakisá yinki nataka bantu ya nkaka, na kubanda kusepela na kutanga Biblia. Mpe na manima beto zonzila byuvu yina ke landa.

VIDEO: Faso bantwenya me longoka kuzola kutanga Biblia (5:33)

Na video, yinki vandá mpasi samu na bantwenya?
Yinki sadisá bawu na kutanga Biblia bilumbu nyonso?
Yinki sadisá bawu na kubanda kusepela na kutanga Biblia?

Mambu yina lenda sadisa nge:

Sosa Biblia yina ba me bangula mambu ya Nzambi na faso ya kele, mpe na faso bantu ke zonzá bubu yayi. Nge lenda sadila Traduction du monde nouveau yina kele na lumputu, mpe na kongo.
Banda kutanga bitini ya Biblia yina nge ke zolá mingi. Samu na kusala yawu nge lenda sadila kitini “Sepela na kutanga Biblia.”
Kuzimbana ve bitini yina nge me tanga. Samu na kusala yawu nge lenda sadila kitini “Landa lutangu ya nge ya Biblia” na kati ya buku yayi.
Sadila JW Library.^® Ya ke sadisa nge na kutanga Biblia to na kuwa yawu na téléphone ya nge to na appareil ya nkaka.
Sadila ba appendice yina kele na kati ya La Bible. Traduction du monde nouveau. Ya kele na bakarti, bizizi mpe kitini yina ke zonzila mbote-mbote mambu yina lenda vanda mpasi na kuzaba (Lexique).

5. Yidama samu na kulongoka ya nge ya Biblia

Tanga Nkunga 119:34, mpe na manima beto zonzila kyuvu yayi:

Samu na yinki ya ke mbote nge sambila tekila nge tanga Biblia to nge yidama na kulongoka ya nge ya Biblia?

Wa’ faso nge lenda kuzwa bambote ntangu nyonso nge ke longokaka Biblia? Tekila beto longoka kileso mosi, nge lenda sala mambu yayi samu na kuyidama na kulongoka ya nge ya Biblia:

Tanga baparagrafe ya kitini ya ntete ya kileso.
Tanga baverse na kati ya Biblia ya nge, mpe sosa kuzaba yinki ya ke na longá beto na kileso yayi.
Tula kidimbu na kisika yina ke na pesá mvutu na konso kyuvu. Ya ke sadisa nge ntangu nge ke longoka kileso na mulongi ya nge.

Collage: Kento mosi ke na kubamaka samu na kulongoka ya yandi ya Biblia. A. Yandi ke na tangaka paje ya ntete ya kileso. B. Yandi ke na tangá baverse yina ba me sonika na buku, na kati ya Biblia ya yandi. C. Yandi ke na tulá kidimbu na mambu ya mfunu ya kileso.

Nge me zaba yawu?

Bambangi ya Yehova me sadila babiblia mingi. Kasi ba ke zolá mingi La Bible. Traduction du monde nouveau samu ya ke zonzá mambu ya Nzambi na faso ya kele mpe ba me sonika yawu na faso yina ke ve mpasi na kubakula. Na kati ya yawu ke na nkumbu ya Nzambi.—Tala na “Bambangi ya Yehova ke kwandi na Biblia ya bawu mosi?” (Tanga yawu na jw.org)

BANTU YA NKAKA KE ZONZAKA: “Kulongoka Biblia ke kisalu ya mpasi. Mu ke na bamambu mingi ya nkaka ya kusala.”

Nge me kanisa yinki?

NA BUNKUFI

Samu nge kuzwa bambote ya kutanga Biblia, vanda na ntangu mosi samu na kutanga yawu konso kilumbu, sambila ntangu nge ke tangaka yawu, mpe yidama tekila kulongoka ya nge ya Biblia.