KILESO 23

Mbotokolo—Mukanu mosi yina ke natina nge bambote mingi!

Mutindu ya ke na talanaka na mukanda

Yesu longá ti bilandi ya yandi fwana kuzwa mbotokolo. (Tanga Matayi 28:19, 20.) Kasi mbotokolo zola zonza yinki? Mpe yinki muntu me bonga kusala samu na kuzwa yawu?

1. Mbotokolo zola zonza yinki?

“Mbotokolo” me katuka na ndinga ya Grec, ya zola zonza “kudyamisa” na kati ya maza. Ntangu Yesu kuzwá mbotokolo, ba kotisaka yandi nyonso na maza ya Yordani, mpe na manima yandi “basikaka na maza.” (Marke 1:9, 10) Faso mosi mpe, ntangu bakristo ya tsyeleka ke kuzwá mbotokolo ba ke dyamisá mpe bawu na kati ya maza.

2. Ntangu muntu ke kuzwá mbotokolo yinki ya ke lakisaka?

Ya ke lakisá ti yandi me kukipesa na Yehova. Kasi wa’ faso muntu ke kukipesá na Nzambi? Tekila yandi kuzwa mbotokolo, yandi ke baka ntangu ya kusambila, ke zonza na Yehova ti yandi ke sadila kaka yandi luzingu ya yandi nyonso. Mpe kusala luzolo ya Yehova ke vanda mambu ya ntete na luzingu ya yandi. Yandi ke soola “kubika kubanza na mambu yina me tadila yandi mosi mpe [. . .] ke landa” malongi ya Yesu na kifwani ya yandi. (Matayi 16:24) Samu yandi me kukipesa na Yehova mpe me kuzwa mbotokolo, bundiku ya yandi na Yehova, mpe na bisadi ya yandi ke kuma dyaka ngolo.

3. Wapi bangolo muntu me lunga kusala samu na kuzwa mbotokolo?

Tekila nge kuzwa mbotokolo, nge me lunga kulongoka mingi na yina me tadila Yehova mpe kukulisa kiminu na yandi. (Tanga Baebre 11:6.) Na yawu, ntangu kuzaba ya nge na kiminu ya nge ke na kulá, luzolo ya nge na Yehova mpe ke kula. Ya tsyeleka nge ke tala na nge mosi ti nge ke banda kuzola kuzonzila mambu ya Yehova na bantu ya nkaka, mpe kulanda misiku ya yandi. (2 Timote 4:2; 1 Yoane 5:3) Ntangu muntu ke kuma ‘na luzingu ya kudedama na ntwala ya Yehova na kusalaka mambu yina ke sepelisaka yandi,’ yandi ke kuma na nsatu ya kupesa luzingu ya yandi na Yehova, mpe kuzwa mbotokolo.—Bakolose 1:9, 10.a

SOSA KUZABA MBOTE-MBOTE

Tala mambu yina mbotokolo ya Yesu lenda longa beto, mpe faso muntu lenda bongama samu na kubaka mbotokolo.

4. Mambu yina mbotokolo ya Yesu lenda longa beto

Tanga Matayi 3:13-17 samu na kuzaba mingi na yina me tadila mbotokolo ya Yesu. Mpe na manima beto zonzila byuvu yayi:

Yesu vandá kwandi mwana ya fioti ntangu yandi kuzwá mbotokolo?
Wa’ faso mbotokolo ya yandi salamaka? Ba tulaka yandi kaka maza na zulu ya yintu?

Na manima ya kuzwa mbotokolo, Yesu bandá kisalu ya mfunu yina Nzambi pesaka yandi na zulu ya ntoto. Tanga Luke 3:21-23 na Yoane 6:38, mpe na manima beto zonzila kyuvu yayi:

Na manima ya kuzwa mbotokolo, wapi kisalu Yesu tulá na kisika ya ntete na luzingu ya yandi?

5. Kukuma tii na mbotokolo ke ve mambu ya mpasi

Dikanisi ya kukipesa na Yehova mpe kuzwa mbotokolo lenda pesa beto boma. Kasi, ntangu kiminu ya nge ke kuma ngolo nge ke lenda na kubaka mukanu ya mfunu yayi. Samu na kutala bifwani ya ba yina salaka yawu, landa VIDEO.

VIDEO: Sala kindiku na Yehova (1:11)

Tanga Yoane 17:3 na Zaki 1:5, mpe na manima beto zonzila kyuvu yayi:

Yinki lenda sadisa muntu samu yandi bongama na kuzwa mbotokolo?

A. Kento yayi ke na kukipesá na Nzambi na nzila ya lusambu.

B. Kento yango ke na kuzwá mbotokolo samu yandi kuma Mbangi ya Yehova. Ba me dyamisa yandi nyonso na kati ya maza.

Beto ke kukipesá na Yehova, ntangu beto ke zonzá na yandi ti beto ke sadila kaka yandi luzingu ya beto nyonso
Ntangu beto ke kuzwa mbotokolo, beto ke lakisa na meso ya bantu nyonso ti beto kukipesá na Nzambi

6. Mbotokolo ke salá ti beto kota na dikanda ya Yehova

Ntangu beto ke kuzwa mbotokolo, beto ke kota na dikanda ya Yehova ya yinza nyonso. Ata bisika yina beto kele, mpe bandinga yina beto ke zonzá, beto nyonso ke kwikilá na mambu mosi mpe ke landá misiku mosi. Tanga Nkunga 25:14 na 1 Piere 2:17, mpe na manima beto zonzila kyuvu yayi:

Wapi mutindu mbotokolo ke bongisá bundiku ya beto na Yehova mpe na bisadi ya yandi ya nkaka?

Collage: Mpangi ya beto ya kento yayi ke na kanisá na kilengi nyonso na bambote yina, kindiku ya yandi na bampangi na kati ya kimvuka me natina yandi. 1. Yandi ke na zonzá bamambu ya yandi na mpangi mosi. 2. Yandi ke na sadisá mpangi mosi ya kento ya kukula na kutambula. 3. Yandi ke na kudyaka kintwadi na bampangi ya nkaka. 4. Yandi na mpangi ya nkaka ya kento ke na samunaka. 5. Yandi ke na baká bafoto na lukutakanu mosi ya nene na bampangi zole ya bandinga ya nkaka.

BANTU YA NKAKA KE ZONZAKA: “Mu ke na boma ya kuzwa mbotokolo.”

Kana ya ke mpe makanisi ya nge, nge me kanisa kwandi ti mukanu ya kuzwa mbotokolo lenda natina nge bambote mingi?

NA BUNKUFI

Yesu longá ti bilandi ya yandi fwana kuzwa mbotokolo. Tekila muntu kuzwa mbotokolo, yandi me bonga kukulisa kiminu ya yandi na Yehova, kutumama na misiku ya yandi, mpe kukipesa na Yehova.

Mambu ya kusimba

Mbotokolo kele yinki, mpe samu na yinki ya ke mfunu?
Ntangu muntu ke kuzwá mbotokolo yinki ya ke lakisaka?
Yinki muntu me bonga kusala tekila yandi kukipesa na Yehova mpe kuzwa mbotokolo?

Sonika kilumbu yina kileso me manisa:

Yina nge lenda sala

Tala mambu yina ba me sonika na nsuka ya kitini 4 ya buku yayi, “Mu me bongama kwandi samu na kusamuna kintwadi na kimvuka?” mpe “Mu ke kwandi ya kubongama samu na kuzwa mbotokolo?,” samu na kutala mambu yina ke sadisa nge na mantwala.

Mambu ya nkaka ya kusala:

Your other goal

SOSA KUZABA DYAKA

Tala yinki zola zonza mbotokolo mpe yinki ya kele ve.

“Mbotokolo zola zonza Yinki?” (Tanga yawu na jw.org)

Tala dyaka mambu yina muntu me lunga kusala tekila yandi kuzwa mbotokolo.

“Luzolo na kifu ya kutondá Yehova ke nata nge na bateme” (Yinzo ya Kengidi, Mars 2020)

Tala faso bakala mosi baká na ntima nyonso mukanu ya kuzwa mbotokolo.

“ Ils voulaient que je découvre la vérité par moi-même ” (La Tour de Garde, 1^er Février 2013)

Tala samu na yinki mbotokolo ke mukanu mosi yina ke natina nge bambote, mpe faso nge lenda bongama samu na kubaka yawu.

“ Devrais-je me faire baptiser ? ” (Les jeunes s’interrogent. Réponses pratiques [Volume 2], chapitre 37)

a Kana muntu kuzwá mbotokolo na dibuundu yina yandi vandá, yandi me bonga dyaka kuzwa mbotokolo. Samu na yinki? Samu ti dibuundu yina ke longá ve matsyeleka ya Biblia.—Tala Bisalu 19:1-5 mpe Kileso 13.