Samu na yinki mu me fwana kukipesa na Nzambi mpe kuzwa mbotokolo?

Kukipesa na Yehova, ni kuzonza na yandi na lusambu ti nge ke sadila kaka yandi luzingu ya nge nyonso, mpe nge ke tula luzolo ya yandi na kisika ya ntete na luzingu ya nge. (Nkunga 40:8) Na manima ya kusala yawu, nge ke kuzwa mbotokolo. Ntangu nge ke sala faso yina, nge ke lakisa na meso ya bantu nyonso ti nge me kukipesa na Yehova. Mukanu ya kukipesa na Yehova ke mambu ya kulutila mfunu na luzingu ya muntu. Mukanu ya mfunu yayi ke soba luzingu ya nge. Na yawu yinki lenda pesa nge nsatu ya kubaka mukanu yayi?

1. Yinki ke pesá muntu nsatu ya kupesa luzingu ya yandi na Yehova?

Ni luzolo ya beto na Yehova ke natá beto na kukipesa na yandi. (1 Yoane 4:10, 19) Biblia ke zonzá: “Nge fwana kuzola [Yehova] Nzambi ya nge na ntima ya nge nyonso, na mwela ya nge nyonso, na mayela ya nge nyonso, mpe na ngolo nyonso ya nge.” (Marke 12:30) Beto ke lakisá ti beto ke zolá Nzambi kaka ve na mambu yina beto ke zonzá, kasi mpe na mambu yina beto ke salaka. Mutindu luzolo ke natá kento na bakala na kukwelana, mutindu mosi mpe, luzolo ya beto na Yehova ke natá beto na kupesa yandi luzingu ya beto, mpe na kuzwa mbotokolo.

2. Wapi bambote Yehova ke pesá na Bambangi ya yandi yina kuzwá mbotokolo?

Ntangu nge ke kuzwa mbotokolo, nge ke kota na dikanda ya Yehova yina ke na kilengi. Nge ke tala na nge mosi luzolo ya yandi na luzingu ya nge na bafaso mingi, mpe ya ke sala ti nge kuma dyaka pene-pene na yandi kulutila bubu yayi. (Tanga Malaki 3:16-18.) Na kusalá faso yayi, Yehova ke vanda ve kaka Tata ya nge, kasi nge ke kuzwa mpe dikanda ya kimpeve yina ke zolaka yandi, mpe ke zolá nge na yinza nyonso. (Tanga Marke 10:29, 30.) Kasi tekila nge kuzwa mbotokolo, ya ke na bamambu nge me lunga kusala. Na yawu nge ke na nsatu ya kulongoka na kuzaba Yehova, kuzola yandi mpe kukwikila na mwana ya yandi. Na manima ya kusala nyonso yayi, nge ke pesa luzingu ya nge nyonso na Yehova. Kana nge sala bamambu nyonso yayi, mpe kuzwa mbotokolo, nge lenda kuzwa bweso ya kusepela na luzingu ya ntangu nyonso. Ni na yawu Biblia ke zonzá: “Mbotokolo . . . ke na vuukisaka beno ntangu yayi.”—1 Piere 3:21.

SOSA KUZABA MBOTE-MBOTE

3. Beto nyonso fwana kusoola nani beto ke sadila

Na Izraele ya ntama, bantu ya nkaka vanda kanisá ti ba lenda sambila na mbala mosi, Yehova na nzambi ya luvunu yina ba vanda bokilá Baale. Kasi Yehova fidisá mbikudi ya yandi Eliya, samu na kusadisa bawu na kusoba mutindu ya bawu ya kukanisa. Tanga 1 Bamfumu 18:21, mpe na manima beto zonzila kyuvu yayi:

• Wapi mukanu bana ya Izraele zolá baka?

Mutindu bana ya Izraele, beto mpe me fwana kusoola nani beto ke sadila. Tanga Luke 16:13, mpe na manima beto zonzila byuvu yayi:

• Samu na yinki beto lenda sambila ve na mbala mosi Yehova mpe kima to muntu ya nkaka?

• Wa’ faso beto lenda lakisa na Yehova ti beto me soola kusambila kaka yandi?

4. Kanisa mbote-mbote na luzolo yina Yehova ke na yawu samu na nge

Yehova pesá beto makabu mingi ya kitoko. Na yawu, yinki beto lenda pesa yandi? Tala VIDEO.

VIDEO: Beno pesa makabu ya beno na Nzambi (3:04)

Na wapi bafaso Yehova ke na lakisá ti yandi ke zolá nge? Tanga Nkunga 104:14, 15 na 1 Yoane 4:9, 10, mpe na manima beto zonzila byuvu yayi:

• Na wapi makabu ya Yehova nge ke sepelá ya kulutila?

• Yinki ya ke salá nge na ntima ntangu nge ke kanisá na makabu yango? Wapi makanisi ya ke natá nge na kuvanda na yawu samu na Yehova?

Ntangu muntu ke pesá beto dikabu yina beto me zola mingi, beto ke lakisaka yandi ti beto me zola yawu, mpe ke vutulaka yandi matondo. Tanga Kulonga Misiku 16:17, mpe na manima beto zonzila kyuvu yayi:

• Ntangu nge ke na kanisá na nyonso yina Yehova me sala samu na nge, yinki nge ke zola kupesa yandi na manima?

5. Kupesa luzingu ya nge na Yehova ke natina nge bambote mingi

VIDEO: Kubula ballon vandá luzingu ya munu nyonso (5:45)

• Ata ti bakala yina beto me tala na video vanda zolá kubula ballon, samu na yinki yandi baká mukanu ya kubika yawu?

• Yandi baká mukanu ya kukipesa na Yehova, kasi na ballon ve. Nge me kanisa ti yandi baká mukanu ya mbote? Samu na yinki?

Tekila yandi kuma mukristo, ntumwa Polo, longoká mingi na sika ya mulongi mosi ya nene ya bansiku ya ba Juifs. Yandi vanda sala bangolo samu na kuvanda muntu ya nene mpe ya kuzabana. Kasi yandi biká nyonso yina samu na kukuma mukristo. Polo nyongaka kwandi mukanu yina yandi bakaka? Tanga Bafilipi 3:8, mpe na manima beto zonzila byuvu yayi:

• Samu na yinki ntumwa Polo zonzá ti bima yina yandi vanda salá tekila yandi kuma mukristo, vandá bima ya “mpamba,” to bima ya mvindu?

• Wapi bambote yandi kuzwá na manima?

• Samu na nge, yinki ke pesa nge kilengi ya kulutila, kusadila Yehova na luzingu ya nge, to kusadila luzingu ya nge na mutindu ya nkaka?

NA BUNKUFI

Luzolo ke natá beto na kukipesa na Yehova mpe na kuzwa mbotokolo.

Mambu ya kusimba

• Samu na yinki beto me fwana kuzola mpe kusadila Yehova na ntima ya beto nyonso?

• Wapi bambote Yehova ke pesá na Bambangi ya yandi yina kuzwá mbotokolo?

• Nge me zola kupesa luzingu ya nge nyonso na Yehova?

SOSA KUZABA DYAKA

Tala samu na yinki kento mosi yina vanda zolá kuyimba, mpe bakala mosi yina vanda zolá kubula ballon, soolá kupesa luzingu ya bawu na Yehova.

Byuvu yina bantwenya ke yufulaka—Yinki mu ke sala na luzingu ya munu?—Ba ke na bambukaka (6:54)

Tala mambu ya nkaka yina lenda nata muntu na kukipesa na Nzambi.

“ Pourquoi se vouer à Jéhovah ? ” (La Tour de Garde, 15 Janvier 2010)

Na nzimbu yayi, tala kilengi yina kele na bantu yina kukipesá na Yehova.

Mu me pesa nge luzingu ya munu (4:30)

Na disolo “ Pendant des années, je me suis demandé pourquoi on existe,” tala yinki natá kento mosi na kukanisa mbote-mbote na mambu yina vandá mfunu na luzingu ya yandi.

“ La Bible transforme des vies ” (La Tour de Garde, 1^er Novembre 2012)