KILESO 51
Wapi mutindu nge lenda pesa Yehova kilengi na faso ya nge ya kuzonza?
Ntangu Yehova yidiká beto, yandi pesá beto dikabu mosi ya kitoko: dikabu ya kulenda kuzonza. Faso ya beto ya kusadila dikabu yango ke kwandi mfunu na meso ya yandi? Ntembe ve, ya ke mfunu na meso ya yandi! (Tanga Zaki 1:26.) Na yawu, wapi mutindu beto lenda sala ti nzonzolo ya beto pesa Yehova kilengi?
1. Wapi mutindu beto lenda sadila mbote dikabu yina Yehova me pesa beto?
Biblia me zonza na beto “beno kindisa bampangi mpe beno salasana na kukula na kiminu.” (1 Batesalonika 5:11) Nge me zaba bantu yina ke na nsatu ba kindisa bawu? Yinki nge lenda sala samu na kusadisa bawu? Sala mambu yina ke lakisa bawu ti ba ke mfunu mingi na meso ya nge. Na kifwani, nge lenda zonzila bawu mosi ya bamambu yina nge ke zolá na bawu. Nge lenda kanisa na verse mosi yina lenda pesa ngolo na mosi na kati ya bawu? Ya kele na baverse mingi yina nge lenda sadila. Kasi, kuzimbana ve ti faso ya nge ya kuzonza bamambu lenda pesa mpe bampangi ngolo mingi. Na yawu, ntangu nge ke sololá na bampangi, sala bangolo na kuzonza na bawu na mutindu ya mbote mpe na malembe nyonso.—Bingana 15:1.
2. Wapi mutindu ya nzonzolo beto me fwana kulosa?
Biblia ke zonzá: “Beno zonza ve mambu yina ke lwalisaka bantu.” (Tanga Baefeze 4:29.) Ya zola zonza ti bamambu ya yimbi yina lenda lwalisa to kunyongisa bampangi zolá basika ve na yinwa ya beto. Beto me fwana mpe kulosa kifu ya kutonga, kusala kisongi-songi na mambu yina me tadila ve beto, kuzonza mambu ya luvunu na yina me tadila bantu mpe kuzonza yimbi ya bawu na bantu ya nkaka.—Tanga Bingana 16:28.
3. Yinki lenda sadisa beto na kuvanda na nzonzolo yina ke kindisa bampangi?
Mambu yina beto ke zonzá ke lakisá wapi mutindu ya muntu beto kele, wapi mambu ke na ntima ya beto to wapi makanisi ke na beto. (Luke 6:45) Na yawu, beto fwana kusala bangolo na kukanisá na mambu ya mbote, ya kulunga, ya tsyeleka, ya kitoko, mpe ya nsoni ve. (Bafilipi 4:8) Samu na kuvanda na makanisi ya faso yayi, beto me fwana kusoola na faso ya mbote bandiku ya beto. Beto me fwana mpe kusoola mbote bima yina beto ke salá samu na kulutisa ntangu, mutindu kutala bavideo to kuwa banzimbu mpe mambu mingi ya nkaka. (Bingana 13:20) Dyaka, beto me fwana kubaka ntangu ya kukanisa mbote-mbote na mambu yina beto ke zonza tekila beto zonza yawu. Beto fwana mpe kukanisa na yina ya ke sala na bampangi. Biblia ke zonzá: “Kuzonza kukondwa kukanisa kele mutindu kulwalisa muntu na mbele ya bamvita, kasi ludimi ya bantu ya mayela ke belusaka.”—Bingana 12:18.
SOSA KUZABA MBOTE-MBOTE
Tala wapi mutindu nge lenda vanda na nzonzolo yina ke pesa Yehova kilengi mpe yina ke pesa bampangi ngolo.
4. Sala keba na faso ya nge ya kuzonza
Ntangu ya nkaka beto nyonso ke zonzá bamambu yina beto ke nyongá na manima. (Zaki 3:2) Tanga Bagalate 5:22, 23, mpe na manima beto zonzila byuvu yayi:
Wapi bifu ba me zonzila na baverse yayi, yina nge lenda lomba na Yehova samu nge lenda kusala keba na mambu yina nge ke zonza? Wa’ faso bifu yango lenda sadisa nge?
Tanga 1 Bakorinto 15:33, mpe na manima beto zonzila kyuvu yayi:
Yinki bandiku mpe bansaka yina nge ke soolá lenda sala na faso ya nge ya kuzonza?
Yinki lenda sala ti beto vanda na nzonzolo ya mbote to ya yimbi?
Tanga Longi 3:1, 7, mpe na manima beto zonzila kyuvu yayi:
Na wapi ntangu nge me kanisa ti nge me bonga kuvanda swi mpe nge me bonga kuzonza?
5. Zonza mambu ya mbote na yina me tadila bampangi
Wa’ faso beto lenda losa kifu ya kufingá bampangi to ya kuzonzá mambu ya yimbi na yina me tadila bawu? Tala VIDEO, mpe na manima beto zonzila byuvu yina ke landa.
Na video, samu na yinki mpangi yayi vandá na nsatu ya kusoba mutindu ya yandi ya kuzonza na bampangi?
Yinki yandi salá samu na kuyidika mutindu ya yandi ya kuzonza?
Tanga Longi 7:16, mpe na manima beto zonzila kyuvu yayi:
Yinki beto me fwana kuzimbana ve ntangu ntima ya beto ke sosá kunata beto na kuzonza mambu ya yimbi na yina me tadila muntu?
Tanga Longi 7:21, 22, mpe na manima beto zonzila kyuvu yayi:
Wapi mutindu baverse yayi lenda sadisa nge na kudasuka ve kana muntu me zonzila yimbi ya nge?
6. Vanda na ntima ya mbote ntangu nge ke sololá na bantu ya dikanda ya nge
Yehova zola ti ntangu beto ke sololá na bantu ya dikanda ya beto, beto sala yawu na faso ya mbote mpe na luzolo nyonso. Tala VIDEO, mpe na manima beto zonzila kyuvu yina ke landa.
Yinki lenda sadisa nge na kusolola na faso ya mbote na dikanda ya nge?
Tanga Baefeze 4:31, 32, mpe na manima beto zonzila kyuvu yayi:
Wapi mutindu ya nzonzolo ke pesá ngolo na dikanda?
Yehova zonzá na mantwala ya bantu ti yandi ke zolá mwana ya yandi, Yesu. Tanga Matayi 17:5, mpe na manima beto zonzila kyuvu yayi:
Wa’ faso nge lenda landa kifwani ya Yehova na mutindu ya kusolola na dikanda ya nge?
Budila bampangi maboko na mambu ya mbote yina ba ke salaka
BANTU YA NKAKA KE ZONZAKA: “Mu ke zonzá kaka mambu yina mu ke kanisaka. Mu kele ve kuna kana bantu ke zolá ve faso ya munu ya kuzonza.”
Nge mpe ke kanisá ni mutindu yina? Samu na yinki nge me zonza faso yina?
NA BUNKUFI
Bamambu yina beto ke zonzá ke na ngolo mingi, ya lenda kindisa to kusala bampangi mpasi. Tekila beto zonza, beto me fwana kukanisa mbote-mbote na yina beto ke zonza, na ntangu beto ke zonza yawu, mpe mutindu beto ke zonzila yawu.
Mambu ya kusimba
Wapi mutindu nge lenda sadila nzonzolo ya nge samu na kusadisa bampangi?
Wapi mutindu ya nzonzolo nge me fwana kulosa?
Yinki lenda sadisa beto na kuvanda ntangu nyonso na nzonzolo yina ke mbote mpe yina ke pesá ngolo na bampangi?
SOSA KUZABA DYAKA
Yinki lenda sadisa beto na kuvanda na nzonzolo yina ke pesá ngolo na bampangi?
Sala bangolo na kuvanda na nzonzolo ya bantu ya ndwenga (8:04)
Tala yinki lenda sadisa nge na kuvanda ve na nzonzolo ya yimbi.
“Ya ke kwandi yimbi na kuzonza mambu ya nsoni?” (Tanga yawu na jw.org )
Tala yinki lenda sadisa nge na kuvanda ve na kifu ya kuzonzila yimbi ya bampangi to kutonga bawu.
Tala wa’ faso Yehova sadisá bakala mosi na kubika nzonzolo ya yimbi.
“ J’ai sérieusement réfléchi à ce que je faisais de ma vie ” (La Tour de Garde, 1er Août 2013)