Misiku samu na lukutakanu Luzingu mpe kisalu ya beto ya bukristo

Mambu yina ke na kati

• Mambu yina beto ke longoka 2

• Bimvwama ya Biblia 3-5

  • Discours 3

  • Matadi ya ntalu ya kimpeve 4

  • Kutanga Biblia 5

• Tula ntima na kisalu ya kusamuna 6-14

  • Kubanda masolo 7

  • Kuvutukila kutala muntu 8

  • Kukumisa bantu bilandi 9

  • Kuzonzila malongi yina beto ke kwikilaka 10

  • Discours 11

  • Yina ke na kati 12

  • Bifwani ya bafaso ya kusamuna 13

  • Mutindu ya kusadila bavideo mpe mikanda 14

• Zinga mutindu bakristo me fwana kuzinga 15-16

  • Kulongoka ya Biblia ya kimvuka 16

• Mambu ya nsuka 17

• Masiika mpe malongi 18

• Ntangu 19

• Ntangu ntwadisi ya circonscription ke kwiza tala kimvuka 20

• Lumingu ya lukutakanu ya nene to ya circonscription 21

• Lumingu ya kubambuka moyo lufwa ya Yesu 22

• Mpangi yina ke tadilaka mambu ya lukutakanu Luzingu mpe kisalu 23

• Ntwadisi ya Lukutakanu luzingu mpe kisalu 24

• Mulongi ya zole 25

• Bayinzo ya nkaka 26

• Bavideo 27

1. Misiku yina ke na kati ya mukanda yayi ke sadisa bantu nyonso yina ke tulaka diboko na lukutakanu Luzingu mpe kisalu ya beto. Tekila ba sala kitini yina ba me lomba bawu na kusala, mosi na mosi me fwana kutadila mbote-mbote malongi yina ke na kati ya Mukanda ya lukutakanu luzingu mpe kisalu mpe yina ke na kati ya mukanda yayi. Ya ke mbote basamuni nyonso ndima na kusala bitini yina ba ke pesaka ba élèves na lukutakanu yayi. Bantu ya nkaka yina ke vukanaka na beto lenda soola kutula diboko na lukutakanu yayi, kana ba ke ndimaka malongi ya Biblia mpe ke dyatilaka na mutindu yina ke ya kukwelana na malongi ya Bakristo. Mpangi yina ke tadilaka mambu ya lukutakanu Luzingu mpe kisalu me fwana kusolola na muntu nyonso yina ke ve musamuni mpe yina ke na nsatu ya kubanda kutula diboko na lukutakanu yayi na bamambu ya kulungisa. Na manima, yandi ke zonzila yandi kana yandi ke na lungisaka bamambu samu na kutula diboko to ve. Nyonso yayi zola salama na mantwala ya mpangi yina ke longokaka Biblia na yandi (to na mantwala ya mosi ya bibuti ya yandi yina ke mbangi ya Yehova). Ya ke mutindu mosi mpe samu na muntu yina ke na sosaka kubanda kisalu ya kusamuna.—od-F kik. 8 par. 8.

MAMBU YINA BETO KE LONGOKA

2. Miniti 1. Balumingu nyonso na manima ya nzimbu ya kubanda mpe lusambu, ntwadisi ya Lukutakanu luzingu mpe kisalu ke zonzila na bunkufi mambu yina lukutakanu ke zonzila. Yandi fwana kuzonzila kaka bamambu yina ke vanda mbote samu na kimvuka.

BIMVWAMA YA BIBLIA

3. Discours: Baminiti 10. Yintu dyambu mpe bamambu zole to tatu ya mfunu yina kitini yayi ke zonzila ke na kati ya Mukanda ya lukutakanu Luzingu mpe kisalu. Kitini yayi ni kuluntu me fwana kusala yawu to kisadisi yina ke na makoki. Balumingu yina kitini ya Biblia ya lumingu ke bandaka na buku ya malu-malu, mpangi yina ke sala discours me fwana kubanda ntete na kulakisa video. Yandi lenda kwelisa mambu yina video me zonza na yina yintu dyambu ya yandi ke na zonzilaka. Kasi yandi zola yidika bamambu samu na kuzonzila bamambu nyonso yina kitini ya yandi ke na zonzilaka. Dyaka, kana yandi ke ntete na ntangu, yandi lenda sadila na mutindu ya mbote bizizi yina ke na kitini yina. Yandi lenda zonzila malongi yina yandi me kuzwa na mikanda ya nkaka, kasi ya vanda ya kukwelana na mambu yina yintu dyambu ya yandi ke na zonzilaka.

4. Matadi ya ntalu ya kimpeve: Baminiti 10. Ya ke disolo yina ke salama na byuvu mpe bamvutu. Mpangi yina ke sala yawu ke zonzila ve na bunkufi mambu yina kitini ya yandi ke zonzila. Kitini yayi ni kuluntu to kisadisi yina ke na makoki fwana kusala yawu. Mpangi yina ke sala yawu ke yufula byuvu zole ya kitini yayi. Ni na yandi mpe na kutala kana ya ke vanda mfunu na kutanga to ve baverse ya Biblia yina ke na kitini yayi. Bampangi yina ke pesa bamvutu zola pesa bamvutu ya nkufi yina ke sala ba secondes 30 to na yisi.

5. Kutanga Biblia: Baminiti 4. Mpangi yina ke sala kitini yayi me fwana kuvanda bakala. Yandi ke tanga kitini ya Biblia yina ba me lomba yandi na kutanga, kasi yandi ke ve na nsatu ya kuzonzila yawu na bunkufi tekila yandi banda kutanga. Ntwadisi ya lukutakanu ke sosa mutindu ya kusadisa élève na kutanga na faso ya kulunga mambu yina ba me sonika, kuzonza mutindu yandi ke zonzaka bilumbu nyonso, kuzaba mambu yina yandi ke na tangaka, kunyema banzonzolo ya mfunu, kusoba bandinga, mpe kupema na ntangu ya kulunga. Mpangi yina ke tadilaka mambu ya lukutakanu Luzingu mpe kisalu zola bumba mpe na yintu makoki ya élève ntangu yandi ke na pesaka yandi kitini ya kutanga, samu bitini ya nkaka ya kutanga ke vandaka nkufi mpe ya nkaka yinda.

TULA NTIMA NA KISALU YA KUSAMUNA

6. Baminiti 15. Kitini yayi ke sadisa beto nyonso na kuyidama samu na kisalu ya kusamuna mpe na kubongisa mayela ya beto ya kusamuna mpe ya kulonga. Kana ya ke mfunu, bakuluntu lenda sala mwa bitini ya kitini yayi. Konso élève ke sala kileso mosi ya mukanda Enseignement to ya mukanda Zola bantu yina ba me tula na Mukanda ya lukutakanu Luzingu mpe kisalu kisika ba me sonika disolo yina yandi ke sala. Bantangu ya nkaka, ya ke vanda na masolo yina ba ke yufula bampangi byuvu. Masolo ya mutindu yayi, ni kuluntu to kisadisi yina ke na makoki me bonga kusala yawu.—Tala paragrafe 15 samu na kuzaba faso ya kusala masolo yina ba ke yufulaka bampangi byuvu.

7. Kubanda masolo: Mpangi ya bakala to mpangi ya kento lenda sala yawu. Mpangi ya bakala ke sala yawu kaka na mpangi ya bakala mpe mpangi ya kento na mpangi ya kento. Kana mpangi ya kento sala yawu na mpangi ya bakala, ba zola vanda bantu ya dikanda mosi. Ba lenda sala yawu ya kuvanda to ya kutelama.—Samu na kuzaba dyaka mingi na yina me tadila yina ke na kati mpe bifwani ya bafaso ya kusamuna samu na kusala kitini yayi, tala paragrafe 12 na 13.

8. Kuvutukila kutala muntu: Mpangi ya bakala to mpangi ya kento lenda sala yawu. Kasi mpangi ya bakala ke sala yawu na mpangi ya nkaka ya bakala mpe mpangi ya kento na mpangi ya nkaka ya kento. (km-F 5/97 p. 2) Ba lenda sala yawu ya kuvanda to ya kutelama. Mpangi yina ke sala yawu fwana kusala disolo yayi na mutindu yina ke lakisa mambu yina beto lenda zonza ntangu beto ke vutukilaka kutala muntu.— Samu na kuzaba dyaka mingi na yina me tadila yina ke na kati mpe bifwani ya bafaso ya kusamuna samu na kusala kitini yayi, tala paragrafe 12 na 13.

9. Kukumisa bantu bilandi: Mpangi ya bakala to mpangi ya kento lenda sala yawu. Mpangi ya bakala ke sala yawu na mpangi ya nkaka ya bakala mpe mpangi ya kento na mpangi ya nkaka ya kento. (km-F 5/97 p. 2) Ba lenda sala yawu ya kuvanda to ya kutelama. Mpangi yina ke sala disolo yayi fwana kulakisa mutindu beto lenda twadisa kulongoka ya Biblia, yandi ke sala yawu mutindu disolo ya bawu bandaka mwa ntama. Yandi fwana kuzonza ve bamambu ya kubanda to ya kumanisa disolo. Yandi lenda sala yawu kaka kana ni yawu ba me lomba yandi na kusala. Bampangi ke soola kana ba ke tanga to ve na ndinga ya ngolo paragrafe ya kitini yina ba ke na longokaka.

10. Kuzonzila malongi yina beto ke kwikilaka: Kana ya kele discours, ni mpangi ya bakala me bonga kusala yawu. Kana ya ke masolo, mpangi ya bakala to mpangi ya kento lenda sala yawu. Mpangi ya bakala ke sala yawu kaka na mpangi ya nkaka ya bakala mpe mpangi ya kento na mpangi ya nkaka ya kento. Kana mpangi ya kento sala yawu na mpangi ya bakala, ba zola vanda bantu ya dikanda mosi. Mpangi yina ke sala yawu me bonga kulakisa pwelele mpe na buzitu nyonso mvutu ya kyuvu yina kele na yintu dyambu. Na kusala yawu, yandi ke sadila bamambu yina ke na mikanda yina ba me pesa samu na kusosa mvutu. Yandi mosi ke soola kana yandi ke zonzila kisika yina yandi me kuzwa mvutu.

11. Discours: Disolo yayi ke salama na mpangi mosi ya bakala. Ya ke salama mutindu discours ya kimvuka. Kana ba me benda disolo na mambu yina ke na Yina ba me bwela 1 ya mukanda Zola bantu, mpangi yina ke sala yawu me bonga kulakisa faso beto lenda sadila verse (to baverse) na kisalu ya kusamuna. Na kifwani, yandi lenda zonzila wapi ntangu beto lenda sadila verse, yinki verse yango zola zonza, mpe mutindu beto lenda nata muntu na kukanisa samu na kubenda malongi yina ke na verse yango. Kana ba me benda disolo na dikanisi ya kileso mosi ya mukanda Zola bantu, mpangi yina ke sala yawu ke zonzila mingi wapi mutindu beto lenda sadila dikanisi yango na kisalu ya kusamuna. Yandi lenda zonzila kifwani yina ke na dikanisi ya ntete ya kileso, to kana ya ke mfunu, yandi lenda zonzila baverse ya nkaka yina ke na kileso.

12. Yina ke na kati: Bamambu yina ba me zonzila na paragrafe yayi na paragrafe yina ke landa ke samu na bitini “Kubanda masolo” mpe “Kuvutukila kutala muntu.” Kana ba me zonzila ve mambu ya nkaka, dikanisi ya mpangi yina ke sala yawu zola vanda na kukabula dilongi ya pete ya Biblia yina lenda sadisa muntu yina yandi ke na sololaka na yandi, mpe kuzonza mambu yina ke fungula nzila ya kuvutukila masolo kilumbu ya nkaka. Mpangi yina ke sala yawu ke soola disolo yina ke na kwelanaka na bamambu yina ke na salamaka ntangu yayi kisika beno kele mpe yina ke simba bantima ya bantu ya kisika beno kele. Yandi mosi ke soola kana yandi ke sadila to ve video to mukanda ya Bima ya kusadila samu na kulonga. Bampangi ke sosa ve kusimba na yintu bamambu yina ba ke zonza, kasi ba ke sosa kukulisa mayela ya bawu ya kusala masolo na bantu, mutindu kulakisa bantu luzolo, mpe kubika ti masolo kwenda ya yawu mosi.

13. Bifwani ya bafaso ya kusamuna: Bampangi me bonga kusoola bafaso ya kusamuna yina ke na salamaka kisika yina beno kele. Na kifwani:

1. (1) Yinzo na yinzo: Na kati ya yawu ke na kisalu ya kusamuna yinzo na yinzo, kusonikaka mikanda to kubokilaka bantu na telefone, mpe kuvutukila masolo na muntu yina beto kutanaka ntangu beto samunaka yinzo na yinzo.

2. (2) Kusamuna ntangu beto ke na salaka bamambu ya beto ya bilumbu nyonso: Ya ke na tadilaka mutindu beto lenda sala ti masolo ya mpamba fungula beto nzila ya kuzonzila mambu ya Yehova. Kana bweso me talana, beto lenda kabula dikanisi mosi ya Biblia na bantu yina beto ke kutanaka na kisalu, na lukolo, kisika yina beto ke vandaka, ntangu beto ke na kati ya bus to taxi, to kisika ni kisika yina beto lenda vanda ntangu beto ke na salaka bamambu ya beto ya bilumbu nyonso.

3. (3) Kusamuna bisika yina bantu ke mingi: Na kati ya yawu ke na kusamuna na présentoir, kukwenda tala bantu na bisika yina ba ke salaka, kusamuna na banzila, na bisika yina bantu ke kwendaka lutisaka ntangu, na bisika yina bantu ke bikaka ba camions ya bawu, to na konso kisika yina bantu kele.

14. Mutindu ya kusadila bavideo mpe mikanda: Bampangi ke soola kana ba ke sadila video to mukanda mosi. Kana kitini yina mpangi ke sala ke na video to kana yandi mosi me soola kusadila video mosi, yandi ke zonzila video yango, kasi yandi ke lakisa ve yawu.

ZINGA MUTINDU BAKRISTO ME FWANA KUZINGA

15. Na manima ya nzimbu, baminiti 15 yina ke landa ke vanda na disolo mosi to masolo zole yina ba me yidika samu na kusadisa beto na kusadila dyambu ya Nzambi na luzingu ya beto. Kana malongi ya nkaka me pesama ve, ni bakuluntu to basadisi yina ke na makoki zola sala yawu. Kasi na yina me tadila bansatu ya kimvuka, kaka ni mpangi yina ke kuluntu lenda sala yawu. Kana kitini yina mpangi me kuzwa ke disolo, ya ke vanda na byuvu samu na yawu, kasi mpangi yina ke na twadisaka lenda bwela byuvu ya nkaka. Bamambu yina yandi ke zonza na kubanda me bonga kuvanda nkufi samu na kulutisa ntangu ya kulunga na bamambu ya mfunu ya disolo mpe samu bampangi kuzwa bweso ya kuzonza. Kana ya ke disolo ya kusala na mpangi mpe kana ya lenda salama, ya ke vanda mbote ti mpangi yina ba me bokila samu na disolo kwiza zonza na estrade, kasi ve ti yandi bikana kaka ya kuvanda na kisika ya yandi mpe kuzonza.

16. Kulongoka ya Biblia ya kimvuka: Baminiti 30. Ni kuluntu yina ke na makoki muntu me lunga kusala kitini yayi. (Kisika yina bakuluntu ke fioti, basadisi yina ke na makoki lenda sala yawu.) Kimvuka ya bakuluntu fwana kutala nani ke na makoki ya kutwadisa Kulongoka ya Biblia ya kimvuka. Bampangi yina ba me soola fwana kutwadisa kitini yayi ya lukutakanu na mutindu ya mbote mpe kuzitisa ntangu. Bawu fwana kubenda dikebi na baverse ya mfunu, mpe kusadisa bantu nyonso na kubakula mfunu ya kusadila mambu yina ba me zonzila. Bampangi yina ba me soola lenda tala dyaka malongi yina dibuundu ya Yehova basisaka na yina me tadila faso ya kutwadisa masolo yina ke na byuvu ya kuyufula. (w23.04 p. 24, encadré) Ya ke vanda ve mfunu na kusosa kunata lukutakanu yinda, kana beno me manisa kutadila mbote-mbote makanisi nyonso yina ba tulaka samu na kulongoka. Konso lumingu, beno lenda soba mpangi yina ke twadisa kitini yayi mpe mpangi yina ke tanga paragrafe, kana ya lenda salama. Kana ntwadisi ya lukutakanu Luzingu mpe kisalu me lomba ti ba kumisa nkufi baminiti yina ba tulaka samu na Kulongoka ya Biblia ya kimvuka, mpangi yina ke twadisa kitini yayi ke tala mutindu yandi lenda sala yawu. Yandi lenda lomba ba tanga ve paragrafe ya nkaka.

MAMBU YA NSUKA

17. Baminiti 3. Ntwadisi ya lukutakanu Luzingu mpe kisalu ke vutukila bamambu ya mfunu. Yandi fwana kuzonzila mpe na bunkufi mambu yina beto ke longoka lumingu yina ke landa. Kana ntangu kele, yandi lenda tanga bankumbu ya bampangi yina ke sala masolo na lumingu yina ke landa. Kana bawu me pesa ve malongi ya nkaka, ntwadisi ya lukutakanu ke pesa konso luzabusu ya mfunu, mpe kutangila kimvuka konso mukanda yina me katuka na filiale, ntangu yandi ke zonza bamambu ya nsuka. Yandi me lunga ve kupesa mazabusu na yina me tadila bamambu yina ke salamaka mbala na mbala, mutindu balukutakanu samu na kisalu ya kusamuna, mpe bamambu yina me tadila programme samu na kusala bunkete. Kasi ba me bonga kutula yawu na kisika ya kutula bansangu samu na kimvuka nyonso. Ntwadisi ya lukutakanu me lunga kulomba na bampangi yina ke sala masolo ya kitini Zinga mutindu bakristo me fwana kuzinga, na kukumisa nkufi bitini ya bawu, kana baminiti samu na mambu ya nsuka ke lunga ve na kupesa mazabusu to kutanga mikanda. (Tala paragrafe 16 na 19.) Lukutakanu ke manisa na nzimbu mpe na lusambu.

MASIIKA MPE MALONGI

18. Na manima ya disolo ya konso mpangi, ntwadisi ya lukutakanu Luzingu mpe kisalu ke na miniti mosi samu na kupesa yandi masiika mpe malongi na yina me tadila kileso yina ba lombaka na yandi na kusala. Na ntangu yandi ke bokila mpangi samu na kubanda disolo, ntwadisi ke zonza ve kileso yina yandi ke sala. Kasi ntangu mpangi ke manisa disolo ya yandi, ntwadisi ke pesa yandi masiika. Na manima ya kusala yawu, yandi lenda zonza kileso yina mpangi vanda me sala mpe kuzonza samu na yinki yandi me sala kileso yango mbote, to kuzonza na luzolo nyonso samu na yinki mpe wapi mutindu mpangi me lunga kulongoka dyaka kileso yina. Ntwadisi lenda zonzila mpe mambu ya nkaka yina me tadila disolo ya mpangi kana yandi me tala ti ya lenda sadisa yandi to ba yina ke na kuwaka. Na kisika ya bawu zole, ntwadisi lenda pesa mpangi malongi ya nkaka yina me katuka na mukanda Zola bantu, na mukanda Enseignement to na buku École du ministère na manima ya lukutakanu to na ntangu ya nkaka.—Samu na kuzaba bamambu ya nkaka na yina me tadila kisalu ya ntwadisi ya lukutakanu Luzingu mpe kisalu mpe ya mulongi ya zole, tala paragrafe 19, 24, mpe 25.

NTANGU

19. Ata disolo mosi ve fwana kulutisa ntangu, ya vanda mpe bamambu yina ntwadisi ya lukutakanu Luzingu mpe kisalu ke zonza. Mukanda ya lukutakanu Luzingu mpe kisalu ke lakisa ntangu yina ba me tula samu na mosi na mosi ya bitini. Kasi kana makanisi ya mambu yina nge ke na salaka me basika mbote-mbote, nge ke ve na nsatu ya kubwela bamambu ya nkaka samu na kusosa kumanisa baminiti yina ba me pesa. Kana bampangi yina ke sala masolo ya nkaka me lutisa ntangu, ntwadisi ya lukutakanu Luzingu mpe kisalu, to mulongi ya zole me lunga kupesa bawu malongi na mansweki. (Tala paragrafe 24 na 25.) Lukutakanu nyonso, ya vanda banzimbu na balusambu na kati, me lunga kusala ngunga 1 na baminiti 45.

NTANGU NTWADISI YA CIRCONSCRIPTION KE KWIZA TALA KIMVUKA

20. Ntangu ntwadisi ya circonscription ke kwiza na kimvuka, lukutakanu ke salama mutindu ba me sonika na Mukanda ya lukutakanu Luzingu mpe kisalu. Kaka mambu yayi ke soba: Discours ya kisalu ya baminiti 30 yina ntwadisi ya circonscription ke sala, ke salama na kisika ya Kulongoka ya Biblia ya kimvuka. Tekila discours ya kisalu, ntwadisi ya lukutakanu Luzingu mpe kisalu ke zonzila na bunkufi mambu yina kimvuka me longoka, ke pesa programme ya lumingu yina ke landa, mpe yandi ke pesa mazabusu to ke tanga mukanda kana ya kele. Na manima, yandi ke bokila ntwadisi ya circonscription samu na discours ya kisalu. Na manima ya discours yango, ntwadisi ya circonscription ke sukisa lukutakanu na nzimbu yina yandi me soola. Yandi lenda bokila mpangi ya nkaka ya bakala na kusukisa na lusambu. Na lumingu yina, ya ke vanda ve na bampangi yina ke sala bitini na yinzo ya zole. Kana kimvuka ke na groupe, groupe yango ke sala balukutakanu ya yawu. Kasi, ba ke vukana kintwadi samu na kulanda discours ya kisalu ya ntwadisi ya circonscription.

LUMINGU YA LUKUTAKANU YA NENE TO YA CIRCONSCRIPTION

21. Lumingu ya lukutakanu ya nene to ya circonscription, balukutakanu ya kimvuka ke vanda ve. Ya me bonga kuzonzila bampangi ti bamambu yina beto zola longoka na lumingu yina, makanda lenda longoka yawu na kulongoka ya dikanda to na kulongoka ya muntu yandi mosi.

LUMINGU YA KUBAMBUKA MOYO LUFWA YA YESU

22. Kana kilumbu ya kubambuka moyo lufwa ya Yesu me kubwa na kati ya lumingu, lukutakanu Luzingu mpe kisalu ke salama ve.

MPANGI YINA KE TADILAKA MAMBU YA LUKUTAKANU LUZINGU MPE KISALU

23. Kimvuka ya bakuluntu ke soola mpangi mosi yina ke banda kutadilaka mambu ya lukutakanu Luzingu mpe kisalu. Kisalu ya yandi ni kuyidika bamambu samu lukutakanu yango salama na faso ya mbote na mutindu yina ke ya kukwelana na misiku yayi. Yandi me lunga kuwisana mbote-mbote na mulongi ya zole. Ntangu Mukanda ya lukutakanu Luzingu mpe kisalu ke basika, yandi ke kabula masolo nyonso yina ke salama na kati ya bangonda zole ya mukanda yango. Yandi ke kabula mpe masolo yina ke ve ya ba élèves mpe bampangi yina ke twadisa lukutakanu na kati ya bampangi yina kimvuka ya bakuluntu me soola. (Tala paragrafe 3-16 na 24.) Na ntangu yandi ke na soolaka ba élèves, yandi me bonga kuvanda na bamambu yayi na yintu: bamvula ya yandi, bamambu yina yandi me zaba, mpe kana yandi lenda zonzila disolo yango na pwelele nyonso. Yandi ke sala mutindu mosi samu na bitini ya nkaka ya lukutakanu. Konso mpangi me bonga kuzwa kitini yina yandi ke sala balumingu tatu tekila kilumbu ya lukutakanu yango. Beto ke sadila Mukanda ya kitini ya kusala na lukutakanu Luzingu mpe kisalu ya beto ya bukristo (S-89), samu na kupesa ba élèves masolo. Mpangi yina ke tadilaka mambu ya lukutakanu Luzingu mpe kisalu me bonga kusala nyonso samu ba tula na tableau ya bansangu programme nyonso ya lukutakanu yayi na bankumbu ya ba yina ke sala bitini ya yawu. Kimvuka ya bakuluntu lenda soola mpangi ya nkaka yina ke kuluntu to kisadisi yina ke sala kintwadi na yandi. Kasi, na yina me tadila bitini yina ke ve ya ba élèves, kaka ni kuluntu lenda soola bampangi yina ke sala yawu.

NTWADISI YA LUKUTAKANU LUZINGU MPE KISALU

24. Balumingu nyonso, kuluntu mosi ke twadisa lukutakanu Luzingu mpe kisalu. (Na bimvuka yina bakuluntu ke fioti, ba lenda sadila basadisi yina ke na makoki.) Yandi mosi ke bongisa bamambu yina yandi ke zonza na kubanda mpe na nsuka ya lukutakanu. Yandi ke bokila na mantwala konso muntu yina ka na kitini, mpe kana bakuluntu ke ve mingi, yandi lenda sala mpe bitini ya nkaka ya lukutakanu, mingi-mingi bitini yina ba ke lakisaka kaka video mpe yina ke vandaka ve na disolo. Bamambu yina yandi ke zonza na manima ya konso kitini me bonga kuvanda nkufi. Kimvuka ya bakuluntu ke soola bakuluntu yina ke na makoki ya kutwadisa lukutakanu Luzingu mpe kisalu. Konso kuluntu yina ba ke soola ke twadisa lukutakanu yayi na ntangu ya yandi. Na kutadila mambu ya kimvuka ya beno, mpangi yina ke tadilaka mambu ya lukutakanu Luzingu mpe kisalu lenda twadisa lukutakanu yayi bambala mingi kuluta bakuluntu ya nkaka. Ntangu ya nkaka,kuluntu yina ke twadisaka Kulongoka ya Biblia ya kimvuka ke mpe na makoki ya kutwadisa lukutakanu Luzingu mpe kisalu. Kasi, beno zimbana ve ti, kisalu ya ntwadisi ya lukutakanu Luzingu mpe kisalu, ke lombaka mpe ti yandi pesa masiika mpe malongi yina me lunga na bampangi yina me vanda ba élèves. Ni na yandi mpe na kusala nyonso samu lukutakanu manisa na ntangu yina me lunga. (Tala paragrafe 17 na 19.) Kana kisika ya kubwela mikro ya zole kele na zulu ya estrade, mpe kana ntwadisi zola, ba lenda telemisa mikro ya nkaka samu yandi bokila mpangi yina ke sala kitini yina ke landa, na ntangu mpangi yango ke na bakaka kisika na mantwala ya pupitre. Mutindu mosi, ntwadisi lenda vanda na mantwala ya mesa yina ke na zulu ya estrade na ntangu kitini ya kutanga Biblia to bitini ya lukutakanu Tula ntima na kisalu ya kusamuna ke na salamaka. Ya lenda sadisa na kudya ve ntangu.

MULONGI YA ZOLE

25. Ya ke vanda mbote ti kuluntu yina zaba kuzonza lungisa kisalu yayi. Kisalu ya mulongi ya zole ke ni ya kupesa na mansweki, kana ya ke mfunu, malongi na bakuluntu to na basadisi na bitini yina ba ke salaka na lukutakanu Luzingu mpe kisalu, ba discours ya bantu nyonso, mpe na mutindu ya kutwadisa to kutanga paragrafe na kulongoka ya Yinzo ya Kengidi to na Kulongoka ya Biblia ya kimvuka. (Tala paragrafe 19.) Kana bakuluntu yina zaba kuzonza mpe kulonga ke mingi, konso mvula ba lenda soba mpangi ya nkaka yina ke pesaka malongi. Ya ke mfunu ve ti mpangi yayi pesa malongi na bitini nyonso yina bampangi ke salaka.

BAYINZO YA NKAKA

26. Kana bampangi yina ke ba élèves ke mingi, bakuluntu ke yidika bamambu samu na kubwela bayinzo. Samu na konso yinzo yina ba ke bwela, ya me bonga kuvanda na mulongi yina ke na makoki, ya ke vanda mbote yandi vanda kuluntu. Kasi kana ya ke mfunu, kisadisi yina ke na makoki lenda sala kisalu yayi. Kimvuka ya bakuluntu ke tala na kati ya bawu nani ke na makoki na kisalu yayi mpe kana ya ke lomba ba soola bampangi ya nkaka yina ke twadisa yawu, muntu na muntu na ntangu ya yandi. Mpangi yina ke pesa malongi me lunga kulanda malongi yina ba me pesa na paragrafe 18. Ba ke lomba na bampangi yina ke na bayinzo ya nkaka na kukwenda kuna na manima ya disolo Matadi ya ntalu ya kimpeve yina ke na kitini Bimvwama ya Biblia. Ba ke vutuka na yinzo ya ntete kisika bampangi nyonso kele, na manima ya kitini Tula ntima na kisalu ya kusamuna.

BAVIDEO

27. Na lukutakanu yayi, beto ke sadila bavideo yina ba me tula na mukanda ya lukutakanu. Bavideo yango ke na JW Library mpe bampangi lenda kuzwa yawu na batelefone ya bawu to ba appareils ya nkaka.

© 2023 Watch Tower Bible and Tract Society of Pennsylvania

S-38-KIT 11/23