Kanisa na yina nge lenda sala na ntangu ya kubambukila moyo lufwa ya Yesu

Bamvula nyonso, bisadi ya Yehova ke vingilá na mbangu kilumbu yina ba ke bambukila moyo lufwa ya Yesu. Na kati ya balumingu tekila kilumbu ya kubambukila moyo, mpe na manima ya kilumbu yango, beto ke kuzwá bweso ya nene ya kukembila Yehova mpe kuvutula yandi matondo samu na munkayulu ya Yesu. (Ef 1:3, 7) Na kifwani, na tiya nyonso beto ke bokilá bantu na kwiza vukana na beto kilumbu yango. Ba ya nkaka ke bongisá ntangu ya bawu samu na kuvanda ba pionniers mpe kusala bangunga 30 to 50 na kisalu ya kusamuna samu na bangonda ya mars na avril. Nge mpe lenda sala mingi na kisalu ya kusamuna na bangonda yina. Yinki lenda sadisa nge?

Mingi-mingi, beto ke lendá kulungisa bamambu ntangu beto ke bongisá mbote-mbote ntangu ya beto. (Bin 21:5) Samu ti kilumbu ya kubambukila moyo me kuma pene-pene, yayi ni ntangu ya kubongisa bamambu. Kanisa na mutindu nge lenda sala ya kulutila na kisalu ya kusamuna na kati ya ntangu ya kubambukila moyo lufwa ya Yesu. Mpe tala yinki lenda sadisa nge na kulungisa dikanisi ya nge. Na manima, sambila Yehova yandi sakumuna bangolo ya nge.—1Yn 5:14, 15.

Nge lenda kanisa kwandi na mwa bafaso ya kusala ya kulutila na kisalu ya kusamuna na kati ya ntangu ya kubambukila moyo?