Wa’ faso beto lenda sadila bavideo yina ke zonzilaka kulongoka ya Biblia

Beto ke na bavideo 4 yina beto lenda sadila na kisalu ya kusamuna samu na kuzonzila kulongoka ya Biblia. Samu na yinki ba salá mosi na mosi ya bavideo yayi?

• 

  Samu na yinki kulongoka Biblia? (Ya yinda) Ba salá video yayi samu na kupesa bantu ya mabuundu nyonso nsatu ya kulongoka Biblia. Ya ke natá bantu yina ke talak’ yawu na kusosa na kati ya Biblia bamvutu na byuvu ya nene yina me tadila luzingu, mpe ya ke pesá kifwani ya mvutu ya kulunga yina Biblia ke pesá na kyuvu mosi. Ya ke lakisá yinki bantu lenda sala samu na kuzwa muntu yina ke longoka Biblia na bawu.

• 

  Samu na yinki kulongoka Biblia? (Ya nkufi) Ya ke mutindu mosi na ya yinda, kasi ya me lutila nkufi. Ya lenda vanda mfunu mingi na bisika yina bantu ke ve na ntangu mingi samu na kusolola.

• 

  Wapi mutindu kulongoka ya Biblia ke lutilaka? Ba salá video yayi samu na kupesa bantu nsatu ya kulongoka Biblia na beto ya mpamba, mpe kusadisa bawu na kuzwa bamvutu na byuvu yina ba lenda vanda na yawu na yina me tadila kulongoka ya Biblia. Ya ke lakisá mpe yinki bantu lenda sala samu na kuzwa muntu yina ke longoka Biblia na bawu.

• 

  Faso ya kulongoka Biblia na buku yayi Ba salá video yayi samu na kulakisa yawu na bantu yina ke longoká Biblia. Ata ti ba ke zonzilá video yayi na paje ya zole ya buku Sepela na luzingu ya ntangu nyonso!, beto lenda lakisa mpe yawu ntangu beto ke na longoká na muntu mukanda Sepela na luzingu ya ntangu nyonso! Video yayi ke lakisá yinki ke na kati ya buku yayi, mpe wa’ faso kulongoka Biblia na yawu ke lutilaka.

Ata ti mosi na mosi ya bavideo yayi ke na kisalu ya yawu, kasi beto lenda lakisa to kufilisa yawu na bantu kana beto me tala ti ya lenda sadisa bawu. Ya me bonga bampangi ya kimvuka mesana na bavideo yayi mpe sadila yawu na faso ya mbote na kisalu ya kusamuna.