Sadila bima yina ke na paje ya ntete ya site JW.ORG ntangu nge ke samunaka

Na kati ya paje ya ntete ke na masolo mpe bavideo yina lenda sadisa bantu yina ke ve Bambangi ya Yehova kasi ke zolá mambu ya Nzambi. (Bis 13:48) Masolo yina ke na kati ke ya malu-malu mpe ke kwelaná na yina bantu ke zonzá to ke kanisaka.

Wa’ faso nge lenda sadila paje ya ntete ya jw.org ntangu nge ke samunaka?

• Tanga bamambu nyonso yina ke basiká na site. Sosa kuzaba masolo yina ke na paje ya ntete kisika yina ba me sonika “Yina beto me sola samu na nge” mpe kanisa na faso yina nge lenda sadila yawu na muntu yina ke zolá mambu ya Nzambi. (Samu na kuzwa masolo ya nkaka na kitini yango, nyema na “Tala ya nkaka.”) Kukwenda ntangu nyonso na site samu na kutala yina me basika, ke sala ti nge kuzwa bima ya malu-malu yina ke sadisa nge ntangu nge ke samunaka.

• Sadila masolo mpe bavideo yina ke na paje ya ntete samu na kubanda disolo. Ya ke sadisa nge na kuzaba yinki bantu yina beto ke kutaná na bawu ke kanisaka.

• Lakisa paje ya ntete na bantu. Zonzila bamambu yina ke na kitini “Sola rubrike yina ke na sepelisá nge,” mpe lakisa yandi faso ya kusadila site jw.org.

• Filisa muntu disolo mosi to mambu yina ke na site. Bantu ya nkaka ke zolá ve kusolola na beto, kasi ba ke zolá kukota na site ya beto jw.org. Na yawu, filisa disolo to video mosi yina ke na paje ya ntete na muntu yina ke zolá kukota na site ya beto.