Faso ya kutanga Biblia yina ke sadisa nge na ntangu ya mpasi

1. Wapi bamambu ya mpasi bisadi ya Yehova ke kutaná na yawu?

NGE me kutaná deja na bamambu ya mpasi? Ntangu ya nkaka, mpangi mosi ya kimvuka nyongisá nge. (Zaki 3:2) Ntangu ya nkaka mpe, bampangi ya nge ya kisalu to ya lekole ke seká nge samu nge ke sadilá Yehova. (1 Pi. 4:3, 4) To bantu ya famiye ya nge ke sosá kunimina nge na kukwenda na balukutakanu to na kupreche. (Mat. 10:35, 36) Si nge ke na lendá ve kukanga ntima na mantwala ya bamambu ya mpasi, ya lenda nata nge na kubika kusadila Yehova. Mambu ni mambu ya mpasi yina lenda kumina nge, Yehova ke pesa nge mayela ya kubaka badesizion ya mbote mpe ngolo ya kukanga ntima na mantwala ya bampasi.

2. Faso me zonza Baroma 15:4, wa’ faso kutanga ya beto ya Biblia lenda sadisa beto?

² Na kati ya Biblia, Yehova tulá ba-ekzample ya bantu ya masumu yina lendá kukanga ntima na mantwala ya bampasi. Samu na yinki? Samu beto lenda longoka mambu mingi na bawu. Ni na yawu Yehova sadilá apotre Paul, na kusonika Baroma 15:4. (Tanga.) Ntangu beto ke tangá masolo ya Biblia yayi, ya lendá pesa beto kuraje mpe kivuvu. Kasi beto zolá suka ve kaka na kutanga yawu na Biblia. Beto zolá bika mambu ya Biblia, chanje makanisi ya beto mpe simba bantima ya beto. Na kifwani, yinki beto lenda sala si beto ke na nsatu ya konseye na mambu yina beto ke na yawu? Beto lenda sadila bima yiya yayi: 1) Sambila, 2) Tala nete nge vandá kuna, 3) Kanisa mbote-mbote, mpe 4) Sadila yawu. Beto ke zonzila faso beto lenda sadila mosi na mosi ya bima yiya yayi.b Beto ke sadila mpe faso ya kulongoka yayi, na kuzaba mambu yina kuminá David mpe apotre Paul.

3. Avant nge banda kutanga Biblia, yinki nge zolá sala, mpe samu na yinki?

³ 1) Sambila. Avant nge banda kutanga Biblia, lomba na Yehova sadisa nge na kutala bima ya mbote yina nge lenda benda na mambu yina nge ke na tangá. Na kifwani, lomba na Yehova sadisa nge na kuzwa bakonseye na Biblia yina lenda sadisa nge na kubaka badesizion ya mbote.—Flp. 4:6, 7; Zaki 1:5.

4. Yinki lenda sadisa nge na kukumisa disolo ya Biblia faso film na yintu ya nge?

⁴ 2) Tala nete nge vandá kuna. Yehova pesá beto mayela ya kukanisa na bima yina beto me talá ve. Samu disolo ya Biblia yina nge ke na tangá kuma faso film na yintu ya nge, kanisa na mambu yina ke na salamá mpe tala nete nge ke muntu yina disolo ke na zonzilá. Sosa kutala bima yina yandi talá mpe kutala kilengi to kyadi yina vandá na yandi.

5. Yinki zola zonza kukanisa mbote-mbote, mpe wa’ faso nge lenda sala yawu?

⁵ 3) Kanisa mbote-mbote. Kukanisa mbote-mbote zola zonza kutula ntima ya nge nyonso na mambu yina nge ke na tangá, mpe kutala faso nge lenda sadila yawu. Ya ke sadisa nge na kutala badetaye mingi ya disolo yina nge ke na tangá mpe ya kuzaba bien mambu yango. Kutanga Biblia mpe kubaka ve ntangu ya kukanisa mbote-mbote na mambu yina beto me tanga, ke faso nge ke na velo ya malu-malu na kati karton, kasi nge me bika yawu faso ya me kwiza ya kumwangana. Kukanisa mbote-mbote ke faso kubaka ntangu ya kuvukisa ba-piece nyonso yina ke na karton samu ya pesa velo. Samu nge lenda kusala yawu, nge lenda pesa bareponse na mosi na mosi ya bakestion yayi: ‘Yinki muntu yina ke na zonzilá disolo yayi salá samu na kuyidika mambu ya yandi? Wa’ faso Yehova sadisak’ yandi? Wa’ faso mu lenda sadila baleson yina mu me longoka samu na kukanga ntima na mantwala ya bampasi?’

6. Samu na yinki beto me lunga kusadila mambu yina beto ke longoká?

⁶ 4) Sadila yawu. Yesu zonzá ti, si beto sadila ve mambu yina beto ke na longoká, beto ke faso muntu yina me tunga yinzo ya yandi na zulu ya sable. Yandi me sala bangolo, kasi ya me natina yandi ata kima. Samu na yinki? Ntangu mupepe mpe mvula ya nene ke kwiza, yinzo yango ke kubwa. (Mat. 7:24-27) Faso mosi mpe, si beto sambila, beto tala nete beto vandá kote disolo ya Biblia salamá, mpe beto kanisa mbote-mbote, kasi beto sadila ve mambu yina beto me longoka, bangolo ya beto ke vanda ya pamba. Na yawu, kiminu ya beto ke vanda ve ngolo ntangu beto ke kutana na bamambu ya mpasi to ntangu ba ke kwamisa beto samu beto ke sambilá Yehova. Kasi, si beto sadila mambu yina beto ke longoká, beto ke baka badesizion ya mbote, beto ke vanda na kizunu ya mingi, mpe kiminu ya beto ke kuma ngolo. (Iza. 48:17, 18) Beto sadila bametode yayi beto me zonzila, samu na kutala yinki beto lenda longoka na mambu yina kuminá mfumu David.

YINKI NGE LENDA LONGOKA NA EKZAMPLE YA MFUMU DAVID?

7. Wapi disolo ya Biblia beto mase zonzila?

⁷ Kamarade to muntu ya famiye me sala kwandi nge mambu yina me nyongisa nge? Si ya ke faso yina, kima yina lenda sadisa nge ni kulongoka yinki mfumu David salá ntangu mwana ya yandi Absalon lwalisá ntima ya yandi, mpe sosá kukuma mfumu na plase ya yandi.—2 Sa. 15:5-14, 31; 18:6-14.

8. Yinki nge lenda sala samu Yehova sadisa nge?

⁸ 1) Sambila. Na disolo ya Biblia na makanisi, zonzila na Yehova faso mambu yina ba me sala nge ke na salá nge na ntima. (Nku. 6:6-9) Pesa yandi badetaye. Lomba na Yehova sadisa nge na kuzwa bakonseye na Biblia yina ke lakisa nge yinki ya kusala.

9. Yinki salamá na kati ya David na Absalon?

⁹ 2) Tala nete nge vandá kuna. Kanisa na bamambu yina kuminá mfumu David mpe faso ya nyongisak’ yandi. Na kati ya bamvula mingi, Absalon mwana ya David, salá bangolo samu na kunata ba-izraelite na kuzola yandi. (2 Sa. 15:7) Lere Absalon talá ti ntangu me lunga, yandi filisá bantu na kati ya Izrael nyonso samu na kuprepare ba-izraelite na kundima yandi faso mfumu. Yandi lendá mpe kunata Ahithophel, mosi ya bakamarade ya ntima ya David mpe muntu yina vandá pesak’ yandi bakonseye. Absalon yandi mosi zonzá ti yandi vandá mfumu. Yandi sosá kubwila mpe kufwa David yina ntangu ya nkaka vandá na maladi. (Nku. 41:1-9) David kuwá mambu yina Absalon vandá sosa kusala mpe kimá Jeruzalem. Na manima, bamilitere ya Absalon nwaná na bamilitere ya David. Ba kufwá Absalon mpe bamilitere ya yandi kimá.

10. Bamambu yina kuminá mfumu David zolá nata yandi na kusala yinki?

¹⁰ Kanisa na mpasi yina ya salá David na ntima na mambu yina kuminak’ yandi. Yandi vandá zolá Absalon mpe vandá na konfianse na Ahithophel. Ya me talana ti, bawu zole lwalisá ntima ya David. Ba sosá mpe kufwa yandi. Ntangu ya nkaka, David zolá kanisa ti bampangi ya yandi ya nkaka mpe vukaná na Absalon, mpe ya zolá nata yandi na kusala dyaka ve bawu konfianse. Mambu yayi zolá nata yandi na kukanisa kaka na yandi mosi, mpe na kukima Jeruzalem kaka yandi mosi. To ya zolá manisa yandi ngolo. Kasi David salá ata fioti ve bamambu nyonso yayi. Yandi biká ve bamambu ya mpasi yayi lembisa ntima ya yandi. Samu na yinki yandi lendá kusala yawu?

11. Yinki David salá na kati ya bamambu ya mpasi yina yandi kutaná na yawu?

¹¹ 3) Kanisa mbote-mbote. Wapi bakonseye ya mbote ke na basiká na disolo yayi? Na kuzaba yawu, pesa reponse na kestion yayi: “Yinki David salá samu na kuyidika mambu ya yandi?” David panikeke ve mpe yandi baká ve desizion ya yimbi to na mbangu. Dyaka, yandi kumá ve na boma ya kulutila yina zolá nata yandi na kuzaba ve yinki ya kusala. Kasi, yandi sambilá Yehova samu yandi sadisa yandi. Yandi lombá mpe na bakamarade ya yandi na kusadisa yandi. Mpe yandi vingilá ve na kusadila desizion yina yandi baká. Ata ntima ya yandi lwalá mingi, David biká ve kutula konfianse na bampangi mpe yandi fuluka ve na kolere. Yandi kontinyeke kutula ntima ya yandi na Yehova mpe na bakamarade ya yandi.

12. Yinki Yehova salá samu na kusadisa David?

¹² Wa’ faso Yehova sadisá David? Si nge sala barecherche, nge ke longoka ti, Yehova pesá David ngolo yina yandi vandá na yawu nsatu samu na kukanga ntima na mantwala ya mpasi yina. (Nku. 3:1-8; mambu yina ke na zulu ya chapitre.) Yehova salá ti badesizion ya David simba. Yandi sadisá mpe bakamarade ya David, ntangu ba vandá nwana samu na kubumba yandi.

13. Wa’ faso nge lenda landa ekzample ya mfumu David si muntu me lwalisa ntima ya nge? (Matayi 18:15-17)

¹³ 4) Sadila yawu. Nge lendá yufula: ‘Wa’ faso mu lenda landa ekzample ya David?’ Kuvingila ve na kuyidika mambu yina ke na nge. Na bamambu ya nkaka, nge lenda sadila konseye yina Yesu zonzá na Matayi chapitre 18. (Tanga Matayi 18:15-17.) Kasi kubaka ve badesizion na mbangu, ntangu nge ke ntete na kolere. Sambila Yehova pesa nge kizunu ya ntima mpe sadisa nge na kuzaba yinki ya kusala. Kontinye na kusala bakamarade ya nge konfianse. Mpe, ndima ba sadisa nge. (Bin. 17:17) Na nyonso, landa konseye yina Yehova ke na pesá nge na Biblia.—Bin. 3:5, 6.

YINKI NGE LENDA LONGOKA NA EKZAMPLE YA PAUL?

14. Na wapi bamambu 2 Timote 1:12-16; 4:6-11, 17-22, lenda pesa nge kuraje?

¹⁴ Famiye ya nge ke na kwamisá kwandi nge samu nge ke na sambilá Yehova? Nge ke vandá kwandi na bwala yina ba ke kwamisá batemwe ya Yehova to ba me niminá kusambila Yehova? Si ya ke faso yina, mambu yina ke na 2 Timote 1:12-16; 4:6-11, 17-22, ke pesa nge kuraje.c Paul soniká bamambu yina ke na baverse yayi ntangu yandi vandá na boloko.

15. Yinki nge lenda lomba na Yehova?

¹⁵ 1) Sambila. Avant na kutanga baverse yayi, zonzila na Yehova mambu yina ke na nge mpe yinki ya ke na salá nge. Pesa yandi badetaye. Mpe lomba na Yehova sadisa nge na kuzwa baleson yina ke vanda mbote samu na nge na disolo ya Paul.

16. Yinki kuminá Paul?

¹⁶ 2) Tala nete nge vandá kuna. Kanisa ti nge ni Paul. Yandi vandá na boloko na bachene na Rome. Yandi vandá ntete na boloko avant, kasi na mbala yayi, yandi zabá ti ba ke kufwa yandi. Bakamarade ya yandi ya nkaka kimak’ yandi, mpe nzutu ya yandi vandá ya kulemba.—2 Tim. 1:15.

17. Yinki Paul zola sala na bamambu yina kuminak’ yandi?

¹⁷ Ntangu ya nkaka, Paul zolá banda kukanisa kaka na faso luzingu ya yandi vandá na ntama. Yandi zolá kanisa mpe ti, si yandi vandá ve mukristo yina vandá na tiya na Predikasion, ba zolá kanga ve yandi na boloko. Yandi zolá dasukila bakamarade ya yandi ya Asie yina kimak’ yandi mpe yandi zolá bika kutula konfianse na bakamarade ya yandi ya nkaka. Kasi nyonso yayi, Paul salá ve yawu. Samu na yinki yandi zabá ti bakamarade ya yandi ya nkaka vandá kaka ya kukangama na yandi, mpe ti Yehova ke pesa yandi bima ya mbote na mantwala?

18. Yinki Paul salá na kati ya mambu ya mpasi?

¹⁸ 3) Kanisa mbote-mbote. Pesa reponse na kestion yayi: “Yinki Paul salá samu na kuyidika mambu ya yandi?” Ata Paul zabá ti ntangu bikaná kaka fioti samu yandi kufwa, yandi zimbaná ve ti ya vandá important na kupesa nkembo na Yehova. Mpe yandi kontinyeke kukanisa na faso yandi zola pesa bampangi kuraje. Yandi vandá tulá konfianse na Yehova mpe yandi vandá sambilak’ yandi ntangu nyonso. (2 Tim. 1:3) Paul kontinyeke ve na kukanisa na bampangi yina kimak’ yandi. Yandi zonzá ti, yandi vandá na vrai kilengi faso bakamarade ya yandi ya luzolo vandá na kote ya yandi mpe vandá sadisa yandi. Dyaka, yandi kontinyeke kulongoka mambu ya Nzambi. (2 Tim. 3:16, 17; 4:13) Ya kulutila important, yandi zabá na ntima ya yandi nyonso ti, Yehova na Yesu ke zolak’ yandi. Na yawu, ba lendá bika ve yandi mpe ba ke pesa yandi bima ya mbote na kisalu yina yandi salá.

19. Wa’ faso Yehova sadisá Paul?

¹⁹ Yehova zonzá deja na Paul ti, ba ke kwamisa yandi samu yandi ke mukristo. (Bis. 21:11-13) Wa’ faso Yehova sadisá Paul? Yandi pesá reponse na bapriere ya Paul, mpe pesak’ yandi ngolo. (2 Tim. 4:17) Paul zonzá ti, yandi ke kuzwa bambote na kisalu ya ngolo yina yandi salá. Yehova sadilá mpe bakamarade ya Paul ya ntima samu na kupesa yandi bima yina yandi vandá na yawu nsatu.

20. Wa’ faso beto lenda landa kiminu yina Paul me lakisa na Baroma 8:38, 39?

²⁰ 4) Sadila yawu. Nge lendá yufula: ‘Wa’ faso mu lenda landa ekzample ya Paul?’ Faso Paul, ba lenda kwamisa mpe beto samu beto ke sambilá Yehova. (Mrk. 10:29, 30) Samu na kuvanda kaka ya kukangama na Yehova na ntangu ya mpasi, beto zolá kontinye kusambila yandi mpe kulongoka Biblia ntangu nyonso. Mpe beto zolá zimbana ata fioti ti, kima ya kulutila important ni kupesa nkembo na Yehova. Beto lenda ndima ti Yehova lendá bika ata fioti ve beto mpe ata kima mosi ve lenda sala ti Yehova bika kuzola beto.—Tanga Baroma 8:38, 39; Ebr. 13:5, 6.

LONGOKA NA BA-EKZAMPLE YA NKAKA YA BIBLIA

21. Yinki sadisá Aya na Hector na kuzwa ngolo na mantwala ya bampasi?

²¹ Ba-ekzample ya Biblia lenda sadisa beto na kuzwa ngolo ya kukanga ntima na mantwala ya bampasi. Na kifwani, Aya, mpangi ya pionier yina ke vandá na Japon zonzá ti, disolo ya Jonas sadisak’ yandi na kukatula boma ya kupreche na mantwala ya prezentware. Hector, jeune mosi yina ke vandá na Indonésie yina ke na baparent yina ke ve batemwe ya Yehova me zonza ti, ekzample ya Ruth pesak’ yandi kuraje ya kulongoka na kuzaba Yehova mpe na kusadila yandi.

22. Wa’ faso nge lenda kuzwa baleson yina nge lenda sadila na Biblia ke na tangama faso na theatre to na rubrik “Imitez leur foi”?

²² Wapi kote nge lenda kuzwa ba-ekzample ya Biblia yina lenda pesa nge ngolo? Bavideo, ba-audio, Biblia ke na tangamá faso na theatre mpe rubrik “Imitez leur foi” na site ya beto, ke sadisa beto na kutala nete beto vandá kuna, ntangu masolo ya Biblia vandá salama.d Avant na kutala, kuwa, mpe kutanga masolo yango, lomba na Yehova sadisa nge na kubenda baleson ya mbote yina nge lenda sadila. Tala nete ni nge ke muntu yina disolo ke na zonzilá. Kanisa mbote-mbote na yina bisadi yango ya Yehova salá mpe faso Yehova sadisá bawu na kati ya bampasi. Na manima, sadila baleson yina nge me kuzwa na kuyidika mambu yina ke na nge. Vutula matondo na Yehova na faso yandi ke na sadisá deja nge. Mpe lakisa ti nge ke na sepelá na faso Yehova ke sadisá nge na kusosá ba-okazion ya kupesa bampangi ngolo mpe ya kusadisa bawu.

23. Wapi promese Yehova me pesa beto na Izaya 41:10, 13?

²³ Luzingu na yinza yayi ya Satan, lenda vanda mpasi, mpe bantangu ya nkaka, beto ke zabá ve yinki ya kusala. (2 Tim. 3:1) Kasi beto zolá vanda ve na boma. Yehova zaba bamambu ya mpasi yina ke na beto. Si beto kubwa, yandi me pesa promese ya kusimba beto na diboko ya yandi ya bakala. (Tanga Izaya 41:10, 13.) Beto ke na konfianse ti Yehova ke sadisa beto, mpe Biblia ke pesá beto ngolo yina beto ke na yawu nsatu, samu na kukanga ntima na mantwala ya bampasi.