Meso ya Yehova ke na zulu ya bisadi ya yandi

1. Samu na yinki Yesu lombá Yehova keba bilandi ya yandi?

MPIMPA yina tekilá lufwa ya yandi, Yesu lombá mambu mosi ya mfunu na Tata ya yandi ya mazulu. Yandi lombá Yehova keba bilandi ya yandi. (Yoa. 17:15, 20) Banda ntama, Yehova ke kipeke mpe ke bumbá bisadi ya yandi. Kasi, Yesu zabá ti Satan ke lutila kukwamisa bilandi ya yandi. Yesu zabá mpe ti ba ke vanda na nsatu ya lubakusu ya Yehova samu na kulenda na mantwala ya bankwamusu ya Satan Dyabulu.

2. Mutindu Nkunga 33:18-20 ke na lakisak’ yawu, samu na yinki beto ke ve na nsatu ya kuvanda na boma ntangu beto ke kutaná na bampasi?

² Yinza ya Satan ke natiná bakristo ya tsyeleka bampasi mingi bubu yayi. Beto ke kutaná na bampasi yina lenda lembisa beto mpe kusala ti ya vanda mpasi na beto na kubikana ya kukangama na Yehova. Kasi mutindu beto ke tala yawu na disolo yayi, beto ke ve na nsatu ya kuvanda na boma. Meso ya Yehova ke na zulu ya beto. Yandi ke talá bampasi ya beto mpe yandi zola kusadisa beto. Beto tala bifwani zole ya Biblia yina ke lakisá wa’ faso Yehova ke sadisá “bantu yina ke waka yandi boma.”—Tanga Nkunga 33:18-20.

NTANGU BETO KE TALÁ TI BETO KE KAKA BETO MOSI

3. Yinki lendá nata beto na kutala ti beto ke kaka beto mosi?

³ Ata beto ke vandá na bampangi mingi ya kento na ya bakala, bantangu ya nkaka, beto lendá tala ti beto ke kaka beto mosi. Na kifwani, bantwenya lendá tala ti ba ke kaka bawu mosi ntangu ba ke nwaniná kiminu ya bawu na lukolo, to ntangu ba ke kumá na kimvuka ya malu-malu. Bampangi ya nkaka ke vandá ya kulemba ntangu ba ke kanisá ti ba me bonga kunwana bawu mosi na makanisi ya mutindu yayi. Ba lenda vanda na maketi-keti na kuzonzila yawu na bampangi samu ba ke na boma ti ba ke zaba ve mbote-mbote bamambu yina ba ke na kutaná na yawu. Mpe bantangu ya nkaka, beto lenda kwenda tii na kukanisa ti ya ke ve na muntu yina ke kipeke beto. Ntangu beto ke kanisá ti beto ke kaka beto mosi, beto lenda vanda na manyongi mpe kubanda kutala ti ya ke ve na muntu yina lenda sadisa beto. Yehova zola ata fioti ve ti beto kanisa mutindu yina. Samu na yinki beto ke na zonzak’ yawu?

4. Samu na yinki mbikudi Eli zonzá ti yandi bikaná kaka yandi mosi?

⁴ Beto tala kifwani ya Eli, bakala mosi ya kiminu. Yezabele zonzá ti yandi ke kufwa yandi. Mpe na kati ya bilumbu 40, Eli vandá kima. (1 Mf. 19:1-9) Na manima, yandi kotá na kati ya dibulu. Kuna yandi zonzá na Yehova ti yandi me bikana kaka yandi mosi mutindu mbikudi. (1 Mf. 19:10) Bambikudi ya nkaka vandá na bwala ya Izraele. Na kifwani, Obadia bumbá bambikudi 100 samu Yezabele kufwa ve bawu. (1 Mf. 18:7, 13) Samu na yinki Eli vandá tala ti yandi vandá kaka yandi mosi? Yandi vandá kanisa kwandi ti bambikudi yina Obadia bumbá manisá na kufwa? To yandi vandá na makanisi yina samu ata muntu bandá kusadila Yehova na manima ya mambu yina Yehova salá na mongo Karmele samu na kulakisa ti ni yandi ke Nzambi ya tsyeleka? To yandi vandá kanisa ti ata muntu zabá ti ba ke na sosá kufwa yandi, mpe ata muntu vandá kipeke yandi? Biblia ke zonzilá ve beto pwelele nyonso yina vandá sala ti Eli vanda na makanisi yayi. Kasi, beto zaba ti Yehova zabá mbote-mbote samu na yinki Eli vandá kanisa ti yandi vandá kaka yandi mosi. Yehova zabá mpe yinki ya kusala samu na kusadisa yandi.

5. Wa’ faso Yehova lakisá na Eli ti yandi vandá ve yandi mosi?

⁵ Yehova salá bamambu mingi samu na kusadisa Eli. Yandi natá Eli na kuzonza mambu yina vandá na yandi. Bambala zole yandi yufulá na Eli: ‘Nge ke na salaka yinki awa?’ (1 Mf. 19:9, 13) Mpe na manima, yandi kuwá ntangu Eli vandá fungula yandi ntima. Na manima ya kuwa yandi, Yehova lakisá Eli ti yandi vandá na yandi, mpe ti yandi ke na ngolo mingi. Mpe yandi zonzá na Eli ti ya vandá na bantu mingi ya nkaka yina vandá sadila yandi. (1 Mf. 19:11, 12, 18) Ntembe ve, na manima ya kufungula ntima ya yandi na Yehova, mpe ya kuwa mambu yina Yehova zonzá na yandi, Eli kumá na kizunu na ntima. Yehova pesá Eli bamambu ya kusala. Yandi zonzá na yandi na kutula mafuta na Azaele samu yandi kuma mfumu ya Siria, na Yehu samu yandi kuma mfumu ya Izraele, mpe na Elize samu yandi kuma mbikudi. (1 Mf. 19:15, 16) Yehova pesá Eli bisalu yayi samu na kusadisa yandi na kutula makanisi ya yandi na bamambu ya mbote. Yehova pesá mpe yandi Elize samu yandi vanda na yandi. Wa’ faso nge lenda kuzwa lubakusu ya Yehova ntangu nge ke talá ti nge ke kaka nge mosi?

6. Yinki nge lenda zonza na Yehova na lusambu ntangu nge ke talá ti nge ke kaka nge mosi? (Nkunga 62:8)

⁶ Yehova zola nge sambila yandi. Yandi ke talá bampasi ya nge, mpe yandi me zonza ti yandi ke kuwa nge bambala nyonso nge ke sambila yandi. (1 Tes. 5:17) Yehova ke zolá kuwa bisadi ya yandi ntangu ba ke sambilak’ yandi. (Bin. 15:8) Yinki nge lenda zonza na Yehova na lusambu ntangu nge ke talá ti nge ke kaka nge mosi? Mutindu Eli, fungula ntima ya nge na Yehova. (Tanga Nkunga 62:8.) Zonza na yandi bamambu yina ke na nge mpe yinki ya ke na salá nge na ntima. Lomba yandi sadisa nge na kuzaba yinki ya kusala. Na kifwani, na lukolo, ntangu nge ke talá ti nge ke kaka nge mosi to nge ke na mwa boma ya kuzonzila kiminu ya nge, lomba Yehova pesa nge bukindi ya kuzonza. Nge lenda lomba mpe yandi ndwenga samu na kuzonza na buzitu. (Luke 21:14, 15) Kana nge ke na makanisi yina ke na lembisá nge, lomba Yehova sadisa nge na kuzonzila yawu na mpangi ya kukula na kimpeve. Nge lenda lomba Yehova sadisa muntu yina ke kuwa nge na kuzaba yinki makanisi yango ke na salá nge na ntima. Fungula ntima ya nge na Yehova. Tala mutindu yandi ke pesá bamvutu na balusambu ya nge, mpe ndima lubakusu ya bampangi. Kana nge sala nyonso yayi, nge ke tala dyaka ve ti nge ke kaka nge mosi.

7. Yinki nge ke na longoká na kifwani ya Mauricio?

⁷ Yehova pesá beto nyonso kisalu ya mbote ya kusala. Nge lenda vanda ya kundima ti Yehova ke talá mpe ke sepelá na bangolo nyonso nge ke salá na kati ya kimvuka mpe na kisalu ya kusamuna. (Nku. 110:3) Wa’ faso nge lendá vanda kaka na mingi ya kusala ata na ntangu yina nge ke talá ti nge ke kaka nge mosi? Beto tala kifwani ya Mauricio, mpangi mosi ya ntwenya.b Mwa ntangu fioti na manima ya mbotokolo ya Mauricio, mosi ya bandiku ya yandi ya ntima bandá kukwenda ntama na matsyeleka. Mauricio me zonza: “Ntangu mu talá mutindu yandi vandá kwenda ntama na Yehova, mu kumá na boma ti mu ke lenda ve kulungisa nsilulu yina mu pesá na Yehova, mpe kubikana na kati ya dikanda ya yandi. Mu vandá tala ti mu vandá kaka munu mosi mpe ti ata muntu vandá zaba yinki ya vandá sala munu na ntima.” Yinki sadisá Mauricio? Yandi me zonza: “Mu bandá kusamuna mingi. Ya sadisá munu na kukanisa ve kaka na munu mosi mpe na bamambu yina vandá na munu na ntima. Ntangu mu vandá samuná na bampangi, mu vandá na kilengi mpe mu vandá tala dyaka ve ti mu vandá munu mosi.” Ata na ntangu yina beto lenda basika ve samu na kusamuna na bampangi, beto lenda zwa ngolo na kusamuná kintwadi na bawu, na kusoniká mikanda to na kubokilá bantu na téléphone. Yinki sadisá dyaka Mauricio? Yandi me bwela: “Mu vandá sala mpe mingi na kati ya kimvuka ya munu. Mu vandá sala bangolo ya munu nyonso na kubongisá mpe na kusalá na mutindu ya mbote ba devoirs yina ba vandá pesa munu. Bisalu yina ba vandá pesa munu sadisá munu na kutala ti mu ke ntalu na meso ya Yehova mpe ya bampangi.”

NTANGU BAMAMBU YA MPASI KE LEMBISÁ BETO

8. Yinki bampasi lenda sala beto?

⁸ Beto nyonso zaba ti bamambu ya mpasi ke kumina beto na bilumbu ya nsuka yayi. (2 Tim. 3:1) Kasi, ya ke na bamambu ya nkaka yina beto lenda kanisa ti ya lenda kumina ve beto. To ya lenda kumina beto na ntangu yina beto vandá vingila ve yawu. Na mbala mosi, beto lenda vanda dyaka ve na mbongo, ba lenda zonza na beto ti beto ke na kimbevo ya ngolo, to muntu yina beto ke zolá lenda kufwa. Bamambu ya faso yayi lenda lembisa beto, mingi-mingi kana ya ke na landasaná, to nyonso me kumina beto na mbala mosi. Kasi, kuzimbana ve ti meso ya Yehova ke na zulu ya beto. Na lubakusu ya yandi, beto ke lenda na mantwala ya mpasi ni mpasi yina lenda kumina beto.

9. Zonzila mwa bampasi yina Yobi kutaná na yawu.

⁹ Beto kanisa na faso yina Yehova sadisá Yobi, bakala mosi ya kiminu. Bamambu mingi ya mpasi kuminá Yobi kaka na mwa ntangu fioti. Kaka na kilumbu mosi, ba zonzá na Yobi ti bibulu ya yandi, ya nkaka ba yibá, ya nkaka ba fwaka, mpe bisadi ya yandi ata mpe bana ya yandi kufwaka. (Yobi 1:13-19) Na manima, Yobi vandá ntete na mawa ntangu yandi kuzwá kimbevo ya mpasi mingi mpe yina vandá bebisa nzutu ya yandi. (Yobi 2:7) Samu bamambu yina yandi vandá kutana na yawu vandá mpasi mingi, Yobi zonzaka: ‘Munu me yina luzingu ya munu; munu ke na zolaka dyaka ve kuzinga.’—Yobi 7:16.

10. Wapi mutindu Yehova sadisá Yobi na kukanga ntima na kati ya bampasi? (Tala kizizi ya paje ya kubanda.)

¹⁰ Meso ya Yehova vandá na zulu ya Yobi. Samu Yehova vandá zola yandi, yandi pesak’ yandi nyonso yina yandi vandá na yawu nsatu samu na kukanga ntima mpe na kuvanda kaka ya kukangama na yandi. Yehova zonzá na Yobi, mpe yandi lakisak’ yandi ndwenga ya yandi ya kulutila mpe luzolo ya yandi samu na bantu mpe bibulu yina yandi yidikaka. Yandi zonzilá na bibulu mingi ya ngitukulu. (Yobi 38:1, 2; 39:9, 13, 19, 27; 40:15; 41:1, 2) Yehova sadilá mpe Elihu, ntwenya mosi ya kukangama na yandi samu na kukindisa Yobi. Elihu lakisá na Yobi ti ntangu nyonso Yehova ke sakumuná bisadi ya yandi yina ke kangá ntima na kati ya bampasi. Kasi, Yehova natá mpe Elihu na kupesa Yobi malongi ya mbote. Elihu sadisá Yobi na kubika kukanisa kaka na yandi mosi, mpe na kuzimbana ve ti beto ke kaka fioti na mantwala ya Yehova, muntu yina yidiká bima nyonso. (Yobi 37:14) Yehova pesá mpe Yobi kima ya kusala. Yandi zonzá na Yobi na kusambila samu na bandiku ya yandi yina salá disumu. (Yobi 42:8-10) Bubu yayi, wapi mutindu Yehova ke sadisá beto ntangu beto ke kutaná na bamambu ya mpasi?

11. Wa’ faso Biblia lenda sadisa beto ntangu beto ke kutaná na bampasi?

¹¹ Bubu yayi, beto ke wá dyaka ve ndinga ya Yehova mutindu Yobi kuwak’ yawu. Kasi yandi ke zonzá na beto na nzila ya Biblia, mambu ya yandi. (Rom. 15:4) Yehova ke kindisá beto na kupesá beto kivuvu samu na bilumbu ya mbote na mantwala. Beto tala mwa bamambu yina Biblia ke zonzá yina lenda pesa beto ngolo ntangu bampasi ke kuminá beto. Na Biblia, Yehova ke zonzá na beto ti ya ke ve na kima, ata bampasi ya ngolo, yina lenda ‘kabula beto na luzolo ya yandi.’ (Rom. 8:38, 39) Yandi ke lakisá mpe beto ti yandi ‘kele pene-pene na bantu nyonso yina ke bokilaka yandi’ na lusambu. (Nku. 145:18) Yehova ke zonzá na beto ti kana beto tula yandi ntima, beto ke lenda kukanga ntima na mantwala ya mpasi ni mpasi yina beto lenda kutana na yawu, mpe beto lenda vanda na kilengi ata na kati ya bampasi. (1 Ko. 10:13; Zaki 1:2, 12) Biblia ke lakisá beto ti bampasi ya beto ke kaka samu na ntangu fioti na mantwala ya luzingu ya ntangu nyonso yina Yehova ke pesa beto. (2 Ko. 4:16-18) Yehova ke pesá beto kivuvu ya ngolo ti yandi ke kufwa Satan, mpe bantu ya nkaka ya yimbi yina ke natiná beto bampasi. (Nku. 37:10) Ya ke kwandi na baverse yina nge me bumba na yintu yina lenda sadisa nge na kati ya bampasi?

12. Yinki Yehova ke na vingilá beto sala samu na kuzwa ngolo yina ke katuká na Biblia?

¹² Yehova ke na vingilá ti beto pesa ntangu na kulongoka Biblia balumingu nyonso mpe kukanisa mbote-mbote na bamambu yina beto ke tangaka. Ntangu beto ke sadilá bamambu yina beto ke longoká, kiminu ya beto ke kumá ngolo, mpe beto ke kumá dyaka pene-pene na Tata ya beto ya mazulu. Ya ke salá ti beto vanda na ngolo na mantwala ya bampasi. Yehova ke pesá mpe mpeve ya yandi ya santu na ba yina ke kwikilá na mambu ya yandi Biblia. Mpe mpeve yango lenda pesa beto “ngolo yina me [lutila] ngolo ya bantu” samu na kukanga ntima na kati ya mpasi ni mpasi yina lenda kumina beto.—2 Ko. 4:7-10, nwt-MK.

13. Wa’ faso madya ya kimpeve yina ke katuká na “kisadi ya kukwikama mpe ya mayela” ke sadisá beto na kukanga ntima?

¹³ Na ngolo ya Yehova, “kisadi ya kukwikama mpe ya mayela” ke bongisá bavideo, banzimbu, mpe bima mingi na kutanga yina lenda sadisa beto na kutunga kiminu ya ngolo mpe kuvanda kaka pene-pene na Yehova. (Mat. 24:45) Beto me bonga kusadila bima nyonso yina Yehova ke pesá beto. Mpangi mosi ya kento yina ke vandá na États-Unis, me zonza ntama mingi ve ti yandi ke sepelá mingi na madya nyonso ya kimpeve yina beto ke zwaka. Yandi me zonza: “Na kati ya bamvula 40 yina mu me lutisa na kisalu ya Yehova, ya ke na bamambu mingi yina meká kukangama ya munu na yandi.” Yandi kutaná na bamambu mingi ya mpasi: bakala mosi yina kolá malafu kufwá nkoko ya yandi ya bakala na camion ya yandi. Bibuti ya yandi kuzwá kimbevo ya ngolo mpe kufwaka. Mpe yandi mosi kuzwá cancer bambala zole. Yinki sadisak’ yandi na kukanga ntima? Yandi me zonza: “Yehova biká ve munu. Madya ya kimpeve yina yandi ke pesá beto na nzila ya kisadi ya kukwikama mpe ya mayela sadisá munu na kukanga ntima. Na yawu, mutindu Yobi, mu lenda zonza: ‘Tii ntangu munu ke kufwa, munu ke yambula ve kukwikama ya munu!’”—Yobi 27:5.

14. Wa’ faso Yehova ke sadilá bampangi ya kimvuka samu na kusadisa beto na ntangu ya mpasi? (1 Batesalonika 4:9)

¹⁴ Yehova ke longá bisadi ya yandi na kuzolasana mpe na kukindisa bampangi na kati ya bantangu ya mpasi. (2 Ko. 1:3, 4; tanga 1 Batesalonika 4:9.) Mutindu Elihu, bampangi ya beto ke na nsatu ya kusadisa beto na kuvanda kaka ya kukangama na Yehova ata na kati ya bampasi. (Bis. 14:22) Beto tala faso bampangi ya kimvuka ya Diane kindisak’ yandi, mpe sadisak’ yandi na kuvanda kaka ngolo na kimpeve ntangu bakala ya yandi kuzwá kimbevo mosi ya ngolo. Yandi me zonza: “Ya vandá mpasi. Kasi beto vandá tala faso Yehova vandá lakisa beto ngolo mpe luzolo ya yandi na kati ya bangonda ya mpasi yina. Bampangi ya kimvuka ya beto salá bamambu mingi samu na kusadisa beto. Ba kwizá tala beto, ba vandá bokilá beto na téléphone, mpe ba vandá simbá beto na banzutu samu na kulakisa beto luzolo ya bawu. Nyonso yayi sadisá beto na kukanga ntima. Samu mu zaba ve kunata, bampangi vandá nata munu na balukutakanu mpe na kisalu ya kusamuna na ntangu yina mu vandá na ngolo ya kusala yawu.” Beto ke na kilengi mingi na kuvanda na bampangi yina ke zolá beto.

BETO KE SEPELÁ NA LUBAKUSU YA YEHOVA

15. Samu na yinki beto ke ya kundima ti beto lenda kanga ntima na mantwala ya bampasi?

¹⁵ Beto nyonso ke kutana na bampasi. Kasi mutindu beto me tala yawu, beto ke vanda ve kaka beto mosi. Mutindu tata ya luzolo, meso ya Yehova ke vandá na zulu ya beto ntangu nyonso. Yandi ke na beto. Yandi zola beto lomba yandi lubakusu, mpe yandi ke na nsatu ya kusadisa beto. (Iza. 43:2) Beto ke ya kundima ti beto lendá kanga ntima na mantwala ya bampasi samu Yehova me pesa beto bima nyonso yina beto ke na yawu nsatu. Yandi me pesa beto lusambu, Biblia, madya mingi ya kimpeve, mpe bampangi yina ke zolá beto.

16. Wa’ faso beto lendá bikana kaka na maboko ya Yehova?

¹⁶ Beto ke sepelá mingi na kuvanda na Tata ya mazulu yina ke sadisá beto. ‘Bantima ya beto ke vandaka na kyese samu na yandi.’ (Nku. 33:21) Samu na kuvutula matondo na lubakusu ya Yehova, beto me bonga kusadila bima nyonso yina yandi ke pesá beto. Beto me bonga kusala bamambu samu na kubikana ntangu nyonso na kati ya maboko ya Yehova. Ya zola zonza ti, kana beto sala bangolo ya beto nyonso samu na kubika ve kutumama na Yehova mpe kusala bamambu yina ke mbote na meso ya yandi, meso ya Yehova ke vanda ntangu nyonso na zulu ya beto!—1 Pi. 3:12.