Tatamana na “kutambula na matsyeleka”

1. Wapi bambote beto ke zwá na kuzonzilá wapi mutindu beto zabá “matsyeleka”?

“WA’ FASO nge zabá matsyeleka?” Ntembe ve, ba me yufulá nge kyuvu yayi bambala mingi. Ya ke na kati ya byuvu ya ntete ba ke yufulá mpangi ntangu ba ke sosá kuzaba yandi mbote-mbote. Beto ke sepelá kuwa ntangu bampangi ya beto ke zonzá wa’ faso ba kwizá zaba mpe kuzola Yehova. Mpe beto ke zolá mpe kuzonzila bawu samu na yinki beto ke zolá matsyeleka. (Rom. 1:11) Masolo ya mutindu yayi ke sadisá beto na kuzimbana ve ti matsyeleka ke ntalu mingi. Mpe ya ke pesá beto nsatu mingi ya kutatamana na “kutambula na matsyeleka,” ya zola zonza kunata luzingu ya beto na mutindu yina ke sala ti Yehova ndima mpe sakumuna beto.—3 Yoa. 4.

2. Yinki beto ke zonzila na disolo yayi?

² Na disolo yayi, beto ke tala mwa bamambu yina ke salá ti beto zola matsyeleka. Beto ke tala mpe wapi mutindu beto lenda bika ve kulakisa ti beto ke zolá dikabu ya nene yayi. Ya ke sadisa beto na kusepela dyaka ya kulutila na yina Yehova salá samu na kubenda beto na matsyeleka. (Yoa. 6:44) Mpe ya ke kulisa nsatu ya beto ya kuzabisa matsyeleka na bantu ya nkaka.

SAMU NA YINKI BETO KE ZOLÁ “MATSYELEKA”

3. Wapi yina ke mambu ya kulutila mfunu yina ke salá ti beto zola matsyeleka?

³ Ya ke na bamambu mingi yina ke salá ti beto zola matsyeleka. Yina me lutila mfunu, beto ke zolá Yehova muntu yina pesá beto matsyeleka. Na nzila ya mambu ya yandi Biblia, beto me kwiza zaba yandi kaka ve mutindu Muntu ya Ngolo-Nyonso yina yidiká zulu na ntoto, kasi mpe mutindu Tata ya beto ya mazulu yina ke kipeke beto na luzolo nyonso. (1 Pi. 5:7) Beto zaba ti Nzambi ya beto ‘ke wilaka bantu mawa mpe ke fwilaka bawu kyadi, yandi ke waka nkele nswalu ve mpe kele ya kufuluka na luzolo ya kukwikama mpe tsyeleka.’ (Bas. 34:6) Yehova zola lunungu. (Iza. 61:8) Ya ke salak’ yandi mpasi na kutala bampasi yina beto ke kutaná na yawu. Mpe yandi ke na nsatu ya mingi ya kukatula bampasi nyonso na ntangu yina yandi me soola. (Yer. 29:11) Beto mpe ke na vingilá ti ntangu yina kuma. Yayi ke mosi ya bamambu yina ke salá ti beto zola mingi Yehova.

4-5. Samu na yinki ntumwa Polo fwanisá kivuvu ya beto na kisengo yina ke simbá bwatu?

⁴ Mambu ya nkaka yina ke salá ti beto zola matsyeleka ke ni bambote ya ke natiná beto. Na kifwani, kivuvu samu na bilumbu ya mbote yina ke kwiza ke na kati ya matsyeleka yina Biblia ke longaka. Samu na kulakisa ntalu ya kivuvu yina, ntumwa Polo sonikaka: ‘Beto kele na kivuvu yayi mutindu kizundu samu na moyo, ya kele ya tsyeleka mpe ngolo.’ (Ebr. 6:19) Kaka mutindu kisengo yina ke simbá bwatu samu ya ningana ve, kivuvu yina Biblia ke pesá beto ke sadisá beto na kubumba kizunu ya beto ntangu beto ke kutaná na bamambu ya mpasi.

⁵ Na verse ya Baebre yina beto me tanga, Polo vandá zonzila kivuvu ya bakristo yina ke kwenda vanda na zulu. Kasi mambu yina yandi zonzá ke na tadilá mpe bakristo yina ke na kivuvu ya kuzinga ntangu nyonso na paradiso awa na ntoto. (Yoa. 3:16) Ntembe ve, kuzaba kivuvu ya luzingu ya ntangu nyonso me bongisa faso ya beto ya kutala luzingu.

6-7. Wapi bambote Yvonne kuzwá na kulongoka matsyeleka na yina me tadila bilumbu yina ke kwiza na mantwala?

⁶ Beto tala kifwani ya Yvonne, mpangi mosi ya kento. Yandi butuká ve na matsyeleka. Mpe ntangu yandi vandá mwana ya fioti, yandi vandá na boma ya lufwa. Yandi lenda zimbana ve mambu yayi yandi tangá kilumbu mosi: “Kilumbu kele luzingu ke vanda dyaka ve.” Yvonne me zonza: “Mambu yayi salá ti mu lala ve. Mu vandá kanisa na bilumbu yina ke kwiza. Mu kanisá, ‘Nsuka ya luzingu lenda vanda ve kaka ni yayi. Samu na yinki beto ke awa na ntoto?’ Mu vandá ve na nsatu ya kufwa!”

⁷ Na manima, ntangu yandi vandá ntwenya, Yvonne kutaná na Bambangi ya Yehova. Yandi me zonza: “Mu kumá na kivuvu ti mu lenda zinga ntangu nyonso na paradiso awa na ntoto.” Wapi bambote mpangi ya beto kuzwá na kulongoka matsyeleka? Yandi me bwela: “Mu me kuma na pongi ya mbote, samu mu ke dyaka ve na boma ya mbasi to ya lufwa.” Ya ke na talaná ti matsyeleka ke ntalu mingi samu na Yvonne, mpe yandi ke na kilengi mingi na kukabula na bantu ya nkaka kivuvu yina ke na yandi samu na bilumbu yina ke kwiza na mantwala.—1 Tim. 4:16.

8-9. a) Na mosi ya bifwani yina Yesu sadilá, wa’ faso bakala mosi lakisá ti kimvwama yina yandi talá vandá ntalu mingi? b) Matsyeleka ke kwandi ntalu samu na nge?

⁸ Na kati ya matsyeleka yina ke na Biblia, ya ke mpe na nsangu ya mbote ya Kimfumu ya Nzambi. Yesu zonzá ti matsyeleka na yina me tadila Kimfumu ke mutindu kimvwama ya kubumbana. Na Matayi 13:44, yandi zonzaka: “Kimfumu ya Mazulu kele mutindu kimvwama yina ba bumbaka na bilanga. Muntu yina me tala yawu, ke bumba dyaka yawu. Na kilengi nyonso, yandi ke kwenda kutekisa bima nyonso ya yandi, mpe ke vutuka samu na kusumba bilanga yina.” Bakala yina kuzwá kimvwama vandá sosa ve yawu. Kasi ntangu yandi kwizá tala kimvwama yango, yandi biká bima mingi samu na kuzwa yawu. Yesu zonzá ti yandi tekisá bima nyonso yina vandá na yandi. Samu na yinki? Samu yandi zabá ti kimvwama yina vandá ntalu mingi. Ya lutilá ntalu na bima nyonso yina yandi zolá bika.

⁹ Ntembe ve, ni mutindu yina nge mpe ke talá matsyeleka. Beto zaba ti ya ke ve na kima yina yinza yayi lenda pesa beto yina me lutila kilengi yina beto ke na yawu na kusadila Yehova, mpe kuvanda na kivuvu ya luzingu ya ntangu nyonso ntangu Kimfumu ya Nzambi ke yala. Bweso ya kuvanda na kindiku ya mbote na Yehova me lutila bima nyonso yina beto lenda bika na yinza yayi. Kilengi ya beto ya kulutila ke ni ‘kupesa yandi kyese mingi.’—Kol. 1:10.

10-11. Yinki natá Michael na kusoba luzingu ya yandi?

¹⁰ Mingi na kati ya beto me bika bima mingi samu Yehova ndima bawu. Ba ya nkaka me bika bisalu ya nene na yinza yayi. Ba ya nkaka biká kulanda mbongo. Ba ya nkaka sobá luzingu ya bawu ntangu ba kwizá zaba Yehova. Ni yawu Michael salaka. Yandi kulá ve na matsyeleka. Ntangu yandi vandá ntwenya, yandi longoká karate. Yandi me zonza: “Ya vandá mfunu mingi na munu na kuvanda na ngolo. Bantangu ya nkaka mu vandá tala ti ata muntu lenda bula munu.” Kasi ntangu Michael bandá kulongoka Biblia, yandi kwizá zaba dikanisi ya Yehova na yina me tadila bamambu ya ngolo. (Nku. 11:5) Michael zonzá mambu yayi samu na bampangi ya kukwela yina longak’ yandi Biblia: “Ya vandá ve na kilumbu yina ba zonzá na munu na kubika karate. Yina ba salá vandá kaka na kulakisa munu matsyeleka ya Biblia.”

¹¹ Bamambu nyonso yina Michael vandá longoka salá ti fioti-fioti luzolo ya yandi na Yehova kula. Ya simbá mingi ntima ya yandi na kuzaba mutindu Yehova ke talá mawa ya bisadi ya yandi. Na manima, Michael talá ti ya me lunga yandi baka mukanu samu na luzingu ya yandi. Yandi me zonza: “Mu zabá ti kubika karate zolá vanda kima ya kulutila mpasi na luzingu ya munu. Kasi mu zabá mpe ti ya zolá sepelisa Yehova. Mpe kusadila Yehova vandá mfunu kulutila bima nyonso yina mu zolá bika.” Michael zabá ti matsyeleka yina yandi kuzwá vandá ntalu mingi, mpe ni yina natak’ yandi na kusoba luzingu ya yandi.—Zaki 1:25.

12-13. Wa’ faso matsyeleka ya Biblia sadisá Mayli?

¹² Samu na kulakisa ntalu ya matsyeleka, Biblia ke sadilá kifwani ya mwinda na mpimpa. (Nku. 119:105; Ef. 5:8) Mayli, mpangi mosi ya kento yina ke vandá na Azerbaïjan, ke sepelá mingi na mutindu mambu ya Nzambi sadisak’ yandi. Bibuti ya yandi vandá sambila ve dibuundu mosi. Tata ya yandi vandá musulman, mpe mama ya yandi vandá sambila na dibuundu ya bazwife. Mayli me zonza: “Mu vandá salá ve ntembe ti Nzambi kele, kasi mu vandá na byuvu mingi. Mu vandá yufulá, ‘Samu na yinki Nzambi yidiká bantu, mpe samu na yinki bantu ke talá mpasi luzingu ya bawu nyonso, mpe na manima ba ke kwendá tala dyaka mpasi ya kulutila na dibenga ya tiya?’ Bantu ke zonzá ti bamambu nyonso yina ke salamá ke luzolo ya Nzambi. Na yawu, mu vandá yufulá, ‘Nzambi ke talá kwandi bantu mutindu bima ya kusakana na yawu, mpe na manima ke sepelá na bampasi ya bawu?’”

¹³ Mayli biká ve kusosa bamvutu na byuvu ya yandi. Na manima, yandi ndimá kulongoka Biblia mpe kumá mosi ya Bambangi ya Yehova. Yandi me zonza: “Bamvutu ya mbote mu kuzwá na Biblia ndimisá munu mpe sadisá munu na kuvanda na kilengi na luzingu. Ya pesá munu kizunu na ntima.” Mutindu Mayli, beto nyonso ke kembilá Yehova muntu yina “katulaka [beto] na mpimpa samu na kulutisa [beto] na nsemo ya ngitukulu.”—1 Pi. 2:9.

14. Wa’ faso beto lenda kulisa luzolo ya beto samu na matsyeleka? (Tala mpe encadré “Bifwani ya nkaka.”)

¹⁴ Beto me zonzila kaka mwa bima yina Biblia ke sadilá samu na kufwanisa ntalu ya matsyeleka. Ntangu ya nkaka, nge lenda kanisa na bima ya nkaka. Nge lenda baka mukanu ya kulongoka bamambu ya nkaka yina ke salá ti beto zola matsyeleka. Ntangu luzolo ya beto samu na matsyeleka ke kulá, beto ke lakisak’ yawu na bafaso mingi.

WA’ FASO BETO KE LAKISÁ TI BETO KE ZOLÁ MATSYELEKA

15. Wapi yina ke mosi ya bafaso yina beto lenda lakisa ti beto ke zolá matsyeleka?

¹⁵ Beto lendá lakisa luzolo ya beto samu na matsyeleka na kulongoká ntangu nyonso Biblia mpe mikanda ya beto. Ata ti beto me sala bamvula mingi na matsyeleka, beto ke kaka na bamambu mingi ya kulongoka. Yinzo ya Kengidi ya ntete yina ba basisá vandá zonza: “Samu luvunu me fuluka mingi na yinza yayi, ya lenda vanda mpasi na kuzwa matsyeleka. Kana nge ke na nsatu ya kuzwa yawu, kubika ve kusosa yawu. [. . .] Kana nge zola ya kuma ya nge, sala bangolo na kuzwa yawu. Kusepela ve kaka na ndambu ya matsyeleka yina nge ke na yawu. [. . .] Ntangu nyonso, kubika ve kusosa yawu.” Kulongoka ke kisalu ya mpasi, kasi ya ke natiná beto bambote mingi.

16. Wapi mutindu ya kulongoka Biblia nge ke talá ke mbote? (Bingana 2:4-6)

¹⁶ Beto nyonso ve ke zolá kutanga mpe kulongoka. Kasi Yehova ke zonzá na beto na kutatamana na “kusosa” samu na kuzaba matsyeleka mbote-mbote. (Tanga Bingana 2:4-6.) Ntangu beto ke salak’ yawu, beto ke kuzwá bambote. Corey me zonza ti ntangu yandi ke tangá Biblia, yandi ke lutisá ntangu mingi na verse mosi. Yandi me zonza: “Mu ke tangá banote nyonso ya yinsi ya paje. Mu ke tangá baverse nyonso yina ba me lakisa ti ya ke ya kuvukana na verse yina mu ke na tangá, mpe mu ke sosá dyaka na mikanda ya beto. [. . .] Mu ke kuzwá bambote mingi na kusalá mutindu yina.” Kana beto ke salá mutindu Corey, to mutindu ya nkaka, ntangu beto ke baká ntangu mpe ke salá bangolo ya kulongoka matsyeleka, beto ke lakisá ti ya ke ntalu samu na beto.—Nku. 1:1-3.

17. Yinki zola zonza kutambula na matsyeleka? (Zaki 1:25)

¹⁷ Ntembe ve, beto zaba ti beto me lunga ve kaka kulongoka matsyeleka. Na kuzwa bambote, beto fwana kutambula na matsyeleka, ya zola zonza kusadila bamambu yina beto ke na longoká na luzingu ya beto. Kaka ni na kusalá mutindu yayi matsyeleka ke pesa beto kilengi ya kulutila. (Tanga Zaki 1:25.) Wa’ faso beto lenda zaba ti beto ke na tambulá na matsyeleka? Mpangi mosi ya bakala me zonza ti ya ke mbote na kusosa kuzaba bamambu yina beto ke na salá mbote, mpe yina beto lenda bongisa. Ntumwa Polo zonzaka: “Beto tatamana na kudyatila kaka na nzila yina beto me dyatila tii ntangu yayi.”—Flp. 3:16.

18. Samu na yinki beto ke salá bangolo na kutatamana na “kutambula na matsyeleka”?

¹⁸ Kanisa na bambote nyonso yina beto ke kuzwá ntangu beto ke salá bangolo na kutatamana na “kutambula na matsyeleka.” Beto ke bongisá ve kaka luzingu ya beto, kasi beto ke sepelisá mpe Yehova, na bampangi ya beto. (Bin. 27:11; 3 Yoa. 4) Ni yina ke bamambu yina ke natá beto na kuzola matsyeleka mpe na kutambula na matsyeleka.