Beto kindisa bampangi na balukutakanu ya kimvuka

1. Samu na yinki beto ke pesá bamvutu na balukutakanu?

SAMU na yinki beto ke kwendá na balukutakanu ya kimvuka? Ya ntete, ya ke samu na kukembila Yehova. (Nku. 26:12; 111:1) Beto ke kwendá mpe na balukutakanu samu na kukindisa bampangi na bantangu ya mpasi yayi. (1 Tes. 5:11) Ntangu beto ke nanguná diboko ya beto mpe ke pesá bamvutu, beto ke lungisá bamambu zole yayi.

2. Na wapi ntangu beto lenda pesa bamvutu na balukutakanu?

² Konso lumingu, beto ke na bweso ya kupesa bamvutu na balukutakanu. Na kifwani, na nsuka ya lumingu, beto lenda pesa bamvutu na disolo ya Yinzo ya Kengidi. Na lukutakanu ya kati-kati ya lumingu, beto lenda pesa bamvutu ntangu ba ke salá Matadi ya ntalu ya kimpeve, Kulongoka ya Biblia ya kimvuka, mpe masolo ya nkaka.

3. Yinki lenda sala ti ya vanda mpasi na beto na kupesa bamvutu na balukutakanu, mpe wa’ faso Baebre 10:24, 25 lenda sadisa beto?

³ Beto nyonso ke zolá kukembila Yehova mpe kukindisa bampangi ya beto ya kimvuka. Kasi ya ke na bamambu yina lenda sala ti beto pesa ve bamvutu na balukutakanu. Beto lenda vanda na boma ya kupesa bamvutu, to beto lenda vanda na nsatu ya kupesa bamvutu, kasi bambala mingi yina beto ke nanguná diboko na kusala yawu, ba ke baká ve beto. Yinki beto lenda sala kana mambu yayi ke kuminá beto? Beto ke zwa mvutu na mukanda yina ntumwa Polo filisá na Baebre. Ntangu yandi zonzilá mfunu ya kuvanda na balukutakanu, yandi zonzá ti beto me bonga kusala nyonso samu “konso muntu na kati ya beto fwana kukindisa bampangi.” (Tanga Baebre 10:24, 25.) Ata mvutu ya nkufi lenda kindisa bampangi. Kuzaba mambu yayi lenda sala ti beto vanda ve na boma mingi ya kuzonzila kiminu ya beto na balukutakanu. Mpe kana ba me baka ve beto bambala mingi, beto lenda vanda na kilengi ya kuzaba ti bampangi ya nkaka me kuzwa bweso ya kupesa bamvutu.​—1 Pi. 3:8.

4. Wapi bamambu tatu beto ke zonzila na disolo yayi?

⁴ Na disolo yayi, beto ke tala wa’ faso beto lenda kindisa bampangi kana beto ke na kimvuka ya fioti, yina ke kaka na bantu ndambu samu na kupesa bamvutu. Na manima, beto ke tala wa’ faso beto lenda kindisa bampangi kana beto ke na kimvuka ya nene yina ke na bantu mingi yina ke nanguná maboko. Na kumanisa, beto ke tala wa’ faso beto lenda bongisa bamvutu ya beto samu ya kindisa bampangi.

KINDISA BAMPANGI KANA NGE KE NA KATI YA KIMVUKA YA FIOTI

5. Wa’ faso beto lenda kindisa bampangi kana beto ke na kimvuka ya fioti?

⁵ Na kimvuka ya fioti, ya ke ve na bantu mingi samu na kupesa bamvutu. Ntangu ya nkaka, mpangi yina ke twadisá disolo me bonga kuvingila mwa fioti tekila muntu nanguna diboko samu na kupesa mvutu. Ya lenda sala ti lukutakanu vanda mwa madidi mpe ya kindisa ve bampangi. Yinki nge lenda sala? Nanguna diboko bambala mingi. Kana nge sala yawu, nge lenda pesa bampangi nsatu ya kupesa bamvutu.

6-7. Yinki beto lenda sala samu na kuvanda ve na boma mingi ya kupesa bamvutu?

⁶ Yinki nge lenda sala kana nge ke vandá na boma ya kupesa bamvutu na balukutakanu? Zaba ti nge ke ve nge mosi. Kasi, samu na kukindisa bampangi ya kimvuka, ya ke na bamambu yina nge lenda sala na kukatula boma ya kupesa bamvutu. Yinki nge lenda sala?

⁷ Nge lenda kuzwa malongi ya kitoko na banimero ya Yinzo ya Kengidi yina zonzilá mambu yayi.b Na kifwani, bongama mbote. (Bin. 21:5) Kana beto zaba mbote-mbote mambu yina ba ke zonzila, ya ke sala ti beto vanda ve na boma mingi ya kupesa bamvutu. Dyaka, pesa bamvutu ya nkufi. (Bin. 15:23; 17:27) Kana mvutu ya nge ke nkufi, nge ke vanda ve na boma mingi ya kupesa yawu. Bantangu ya nkaka, bampangi lenda simba mbote-mbote mvutu ya nge kana ya ke nkufi. Kasi mvutu ya yinda, yina ke na bamambu mingi na kati, lenda vanda mpasi na kusimba. Ntangu nge ke pesá bamvutu ya nkufi mpe nge ke tangá ve mambu yina nge ke zonzá, ya ke lakisá ti nge me bongama mbote-mbote mpe nge me simba disolo.

8. Ntangu beto ke salá bangolo ya beto nyonso, yinki ya ke salá Yehova?

⁸ Ntangu ya nkaka, nge me sadilá malongi yayi. Kasi nge ke suká kaka na kupesa mvutu mosi to zole samu nge ke na mwa boma. Zaba ti Yehova ke sepelá na bangolo yina nge ke salaka. (Luke 21:1-4) Yandi ke lombá ve beto na kusala mambu yina beto lenda sala ve. (Flp. 4:5) Kanisa na yina nge lenda sala, sosa kulungisa dikanisi ya nge, mpe sambila Yehova samu na kuvanda ve na boma. Na kubanda, nge lenda kanisa na kupesa mwa mvutu ya nkufi

KINDISA BAMPANGI KANA NGE KE NA KIMVUKA YA NENE

9. Na kimvuka yina ke nene, yinki lenda vanda mpasi?

⁹ Kana kimvuka ya nge ke na bantu mingi, ya ke mambu ya nkaka. Ntangu ya nkaka, samu bampangi mingi ke nanguná maboko samu na kupesa bamvutu, ya ke salá ti ba ke baka ve nge. Beto zonzila kifwani ya Danielle. Yandi ke zolá kupesa bamvutu na balukutakanu.c Samu na yandi, kupesa bamvutu na balukutakanu ke faso ya kukembila Yehova, ya kukumisa dyaka ngolo kiminu ya yandi na Biblia mpe ya kukindisa bampangi. Kasi ntangu yandi kwendá na kimvuka ya nene, yandi vandá nanguna diboko bambala mingi, mpe ba vandá baka ve diboko ya yandi ntangu nyonso. Bantangu ya nkaka, yandi vandá pesá ata mvutu mosi ve na lukutakanu. Yandi me zonza: “Ya vandá nyongisá munu mingi. Mu vandá tala ti mu kuzwá ve bweso ya kitoko. Mpe ntangu mu talá ti bambala mingi yina mu vandá nanguná diboko ba vandá baká ve munu, mu bandá kukanisa ti ba vandá sala yawu na nko.”

10. Yinki beto lenda sala samu na kuzwa bweso ya kupesa mvutu?

¹⁰ Ya me kuminá nge na kuvanda na makanisi mosi na Danielle? Kana ni yawu, ya lenda sala ti nge sosa dyaka ve kupesa bamvutu, mpe nge vanda kaka kuna samu na kuwa. Kasi, kulemba ve na kunanguna diboko. Yinki nge lenda sala? Nge lenda bongisa bamvutu mingi samu na konso lukutakanu. Ya ke sala ti kana ba me baka ve nge na kubanda ya lukutakanu, ba lenda baka nge na mantwala. Ntangu nge ke bongama samu na disolo ya Yinzo ya Kengidi, kanisa na wapi mutindu konso paragrafe ke ya kukangama na yintu dyambu ya disolo. Kana nge sala yawu, ntangu ya nkaka nge ke kuzwa bamvutu ya kitoko ya kupesa. Nge lenda bongama mpe na kupesa bamvutu na bisika yina ke na malongi ya ngolo. (1 Ko. 2:10) Samu na yinki? Samu ti ya lenda vanda ve na bantu mingi yina ke nanguna diboko na bisika yina. Kasi yinki nge lenda sala kana nge me sadila malongi yayi kasi nge ke na talá ti ba ke ve kaka na baká nge? Nge lenda kwenda tala mpangi yina ke twadisa disolo samu na kuzonza na yandi wapi kisika nge ke zola kupesa mvutu.

11. Yinki Bafilipi 2:4 ke zonzá na beto na kusala?

¹¹ Tanga Bafilipi 2:4. Yehova natá ntumwa Polo na kuzonza na Bakristo na kutala ve kaka bansatu ya bawu. Wa’ faso beto lenda sadila dilongi yayi na balukutakanu? Beto me bonga kuzimbana ve ti bampangi mpe ke na nsatu ya kupesa bamvutu.

12. Wapi yina ke faso ya mbote ya kukindisa bampangi na balukutakanu? (Tala mpe kizizi.)

¹² Kanisa na kifwani yayi. Kana nge ke na salá masolo na bandiku ya nge, nge ke sosa kaka ba kuwa nge, mpe nge ke pesa ve bawu bweso ya kuzonza? Ni yawu ve nge ke sala. Mutindu mosi mpe, ntangu beto ke vandá na balukutakanu, beto ke vandá na nsatu bampangi mingi pesa bamvutu. Na yawu kubika bampangi kupesa bamvutu ke mosi ya bafaso ya kukindisa bawu. (1 Ko. 10:24) Beto tala wa’ faso beto lenda sala yawu.

13. Yinki nge lenda sala samu bampangi ya nkaka kuzwa bweso ya kupesa bamvutu?

¹³ Mosi ya bafaso ya kusala yawu ke ni na kupesá bamvutu ya nkufi samu bampangi mpe kuzwa bweso ya kupesa bamvutu. Bakuluntu mpe bampangi ya nkaka yina ke ya kukula na kimpeve lenda pesa kifwani ya mbote na mambu yayi. Ata ntangu nge ke pesá mvutu ya nkufi, kutulá ve bamambu mingi na kati. Kana nge zonzila bamambu nyonso yina ke na paragrafe, yinki dyaka bampangi ke bwela? Na kifwani, na paragrafe yayi, ba me pesa malongi zole. Ya ntete, kupesa bamvutu ya nkufi. Ya zole, kutula ve bamambu mingi na kati. Kana nge ke muntu ya ntete ya kupesa mvutu na paragrafe yayi, zonza kaka mambu mosi.

14. Yinki lenda sadisa beto na kusoola na wapi ntangu beto ke nanguna diboko? (Tala mpe kizizi.)

¹⁴ Sadila mayela samu na kusoola na wapi ntangu nge ke nanguna diboko. Kana nge nanguna ntangu nyonso diboko, ya ke vanda mutindu nge ke na salá tiya na mpangi yina ke na twadisá disolo samu yandi baka nge. Ntangu ya nkaka, ya ke na bampangi yina nabunu ba baka bawu. Mpe kusala mutindu yayi lenda lembisa bampangi na kunanguna diboko.​—Lon. 3:7.

15. a) Ntangu ba ke baká ve beto, yinki beto zolá kanisa ve? b) Yinki mpangi yina ke na twadisá disolo lenda sala samu na kutula dikebi na bantu nyonso? (Tala encadré “Kana ni nge ke na twadisá disolo.”)

¹⁵ Ntangu bantu mingi ke nanguná diboko, ya lenda sala ti ba baka ve beto mingi. Bantangu ya nkaka, lukutakanu lenda manisa, kasi ba me baka ve beto. Mambu yayi lenda nyongisa beto. Kasi, beto zolá kanisa ve ti kana mpangi yina ke na twadisá disolo me baka ve beto, ya zola zonza ti yandi ke na mambu na beto.​—Lon. 7:9.

16. Wapi mutindu beto lenda kindisa bampangi yina me pesa bamvutu?

¹⁶ Ntangu ba ke baká ve nge bambala mingi, nge lenda baka mukanu ya kuwa mbote-mbote bamvutu ya bampangi. Na manima ya lukutakanu, nge lenda siika bampangi na bamvutu yina ba me pesa. (Bin. 10:21) Kuzonza na bampangi ti beto me sepela na bamvutu yina ba me pesa ke mutindu ya nkaka ya kukindisa bawu.

BAFASO YA NKAKA YA KUKINDISA BAMPANGI

17. a) Wa’ faso bibuti lenda sadisa bana ya bawu na kubongisa bamvutu samu na balukutakanu? b) Mutindu video me lakisa yawu, wapi bamambu 4 beto lenda sala samu na kubongisa bamvutu ya beto? (Tala mpe noti ya yinsi ya paje.)

¹⁷ Yinki beto lenda sala dyaka samu na kukindisa bampangi na balukutakanu? Kana nge ke na bana, sadisa bawu na kubongisa bamvutu na kutalá bamvula ya bawu. (Mat. 21:16) Bantangu ya nkaka, na masolo yina ke salamá na balukutakanu, ba ke zonzilá bamambu na yina me tadila makwela mpe ndyatulu. Ata na masolo yayi, ya lenda vanda na mwa bisika yina mwana lenda pesa mvutu. Dyaka, sadisa bana ya nge na kuzaba samu na yinki ba lenda baka ve bawu bambala nyonso yina ba ke nanguna diboko. Kana nge zonzila bawu yawu, ya ke sala ti ba nyonga ve ntangu ba ke baka ve bawu.​—1 Tim. 6:18.d

18. Yinki beto lenda sala samu beto kumisa ve beto mosi ntangu beto ke pesá bamvutu? (Bingana 27:2)

¹⁸ Beto nyonso lenda bongama samu na kupesa bamvutu yina ke kembila Yehova mpe ke kindisa bampangi ya beto. (Bin. 25:11) Bantangu ya nkaka, beto lenda zonzila mambu na yina me tadila beto. Kasi beto me bonga ve kusala yawu bambala mingi. (Tanga Bingana 27:2; 2 Ko. 10:18) Beto zolá sala bangolo na kuzonzila mingi Yehova, mambu ya yandi Biblia, mpe kimvuka ya yandi. (Luz. 4:11) Kasi, kana ba me yufula byuvu na yina me tadila beto, ya ke mbote beto zonzila mambu yina me tadila beto. Kifwani ya mutindu yayi ke na paragrafe yina ke na landaka.

19. a) Yinki ke salamá ntangu beto ke tulá dikebi na bampangi nyonso na balukutakanu? (Baroma 1:11, 12) b) Yinki nge ke zolá mingi na yina me tadila kupesa bamvutu na balukutakanu?

¹⁹ Ya ke ve na misiku yina ke zonzilá nyonso yina beto lenda sala to beto lenda sala ve ntangu beto ke pesá bamvutu. Ata mpila yina, beto nyonso lenda sala bangolo samu na kukindisa bampangi. Samu na ba ya nkaka, ya zola zonza kusala dyaka bangolo samu na kupesa bamvutu mingi. Na ba ya nkaka, ya zola zonza kusepela ata ba me baka beto kaka bambala fioti. Mpe na ba ya nkaka kuzaba ti bampangi ya nkaka me kuzwa bweso ya kupesa bamvutu. Na balukutakanu, ntangu beto ke tulá bansatu ya bampangi na mantwala ya ke salá ti beto nyonso kuzwa “ngolo.”​—Tanga Baroma 1:11, 12, nwt-MK.