Beto bongisa mutindu ya beto ya kusambila

1. Yinki Yehova ke lombá na bisadi ya yandi na kusala? (Tala mpe kizizi.)

NA NANI beto lenda kwenda samu yandi kindisa mpe twadisa beto ntangu beto ke kutaná na bampasi? Beto zaba mvutu na kyuvu yayi. Beto lenda sambila Yehova. Yandi ke lombá na beto na kusambila yandi. Yandi zola ti beto sambila bambala mingi, mpe beto “kubika ve na kusambila.” (1 Tes. 5:17) Beto lenda sambila yandi mpe kusosa ti yandi twadisa beto na bamambu nyonso ya luzingu ya beto. (Bin. 3:5, 6) Yehova ke Nzambi ya luzolo. Ni na yawu, yandi me zonza ti beto lenda sambila yandi ntangu nyonso.

2. Yinki beto ke zonzila na disolo yayi?

² Beto ke vutulá Yehova matondo samu yandi me pesa beto bweso ya kusambila yandi. Kasi, beto ke na bamambu mingi ya kusala. Na yawu, ya lenda vanda mpasi na beto na kuzwa ntangu ya kusambila. Beto lenda tala mpe ti beto ke na nsatu ya kubongisa faso ya beto ya kusambila. Mambu ya mbote ke ti Biblia lenda sadisa beto mpe kulongisa beto yinki ya kusala. Na disolo yayi, beto ke tala wa’ faso kifwani ya Yesu lendá sadisa beto na kubongisa ntangu ya kusambila. Beto ke tala mpe bamambu 5 yina beto lenda tula na balusambu ya beto samu na kubongisa yawu.

YESU VANDÁ BONGISÁ NTANGU SAMU NA KUSAMBILA

3. Yinki Yesu zabá na yina me tadila balusambu?

³ Yesu zabá ti balusambu ya beto ke mfunu mingi na meso ya Yehova. Bamvula mingi tekila yandi kwiza awa na ntoto, yandi talá faso Tata ya yandi vandá pesa bamvutu na balusambu ya bisadi ya yandi ya kento na ya bakala. Na kifwani, Yesu vandá kisika mosi na Tata ya yandi ntangu yandi pesá mvutu na balusambu ya Ana, ya Davidi, ya Eli mpe ya bisadi ya yandi ya nkaka. (1 Sa. 1:10, 11, 20; 1 Mf. 19:4-6; Nku. 32:5) Ni na yawu Yesu longá bilandi ya yandi na kusambila mingi, mpe kusala yawu ntangu nyonso yina ba zola.​—Mat. 7:7-11.

4. Yinki kifwani ya Yesu ke na longá beto na yina me tadila kusambila?

⁴ Yesu vandá na kifu ya kusambilá Yehova. Na yawu, yandi bikilá bilandi ya yandi kifwani ya mbote na yina me tadila kusambila. Na kisalu ya yandi ya kusamuna, ntangu nyonso Yesu vandá sambilaka. Samu ti yandi vandá na mingi ya kusala mpe bantu mingi vandá landak’ yandi, yandi vandá na nsatu ya kubongisa ntangu samu na kusambila. (Mrk. 6:31, 45, 46) Na yawu, yandi vandá vumbuká na suka-suka samu na kusala yawu. (Mrk. 1:35) Kilumbu mosi, yandi sambilá mpimpa nyonso tekila yandi baka mukanu ya mfunu. (Luke 6:12, 13) Mpe na mpimpa tekila yandi kufwa, Yesu sambilá mingi samu na bamambu ya mpasi yina yandi zolá kutana na yawu.​—Mat. 26:39, 42, 44.

5. Wa’ faso beto lenda landa kifwani ya Yesu ntangu beto ke sambilaka?

⁵ Kifwani ya Yesu ke na longá beto ti, ata ti beto ke na bamambu mingi ya kusala, beto me fwana kubongisa ntangu samu na kusambila. Mutindu Yesu, beto lenda tala ti beto me bonga kutula ntangu samu na kusala yawu. Ntangu ya nkaka, beto lenda vumbuka na suka-suka samu na kusambila, to kusala yawu na kati-kati ya mpimpa. Ntangu beto ke salak’ yawu, beto ke lakisá ti beto ke sepelá na dikabu ya kitoko yina ke lusambu. Mpangi mosi ya kento na nkumbu ya Lynne ke na zabá dyaka kilengi yina yandi vandá na yawu ntangu yandi longoká ti yandi lenda sambila Yehova. Yandi me zonza: “Ntangu mu longoká ti mu lenda sambila Yehova ntangu ni ntangu yina mu zola, ya sadisá munu na kutala Yehova mutindu ndiku ya munu ya ntima, mpe na kusosa kubongisa balusambu ya munu.” Ntembe ve, mingi na kati ya beto ke kabulá dikanisi ya Lynne. Awa, beto zonzila bamambu 5 ya mfunu yina beto lenda tula na balusambu ya beto.

BAMAMBU 5 YA MFUNU YINA BETO LENDA TULA NA LUSAMBU

6. Faso Luzabusu 4:10, 11 ke na lakisak’ yawu, yinki Yehova me lunga kuzwa?

⁶ Kembila Yehova. Na kimona-meso, ntumwa Yoane talá bakuluntu 24 yina vandá na mazulu mpe ba vandá kembila Yehova. Ba vandá zonza ti Nzambi me lunga kuzwa “nkembo, masiika, mpe lulendo.” (Tanga Luzabusu 4:10, 11.) Ya ke mpe na bamambu mingi yina ke natá bambazi na kupesa nkembo mpe masiika na Yehova. Ba ke vandá na yandi na mazulu mpe ba zaba yandi mbote-mbote. Ba ke talá bifu ya Yehova na bamambu nyonso yina yandi ke salaka. Ntangu ba ke talá yina yandi ke salá, ya ke natá bawu na kukembila yandi.​—Yobi 38:4-7.

7. Wapi bamambu lenda nata beto na kukembila Yehova?

⁷ Beto mpe me bonga kukembila Yehova na balusambu ya beto. Beto lenda zonzila yandi samu na yinki beto ke zolak’ yandi. Ntangu nge ke tangá Biblia mpe ke longokak’ yawu, sosa kutala bifu ya Yehova yina nge ke sepelá na yawu. (Yobi 37:23; Rom. 11:33) Zonzila mpe Yehova yinki bifu ya yandi ke salá nge na ntima. Beto lenda kembila mpe Yehova samu na bamambu yina yandi ke salá samu na beto mpe samu na bampangi ya beto ya yinza nyonso. Ntangu nyonso, yandi ke kipe beto mpe yandi ke bumbá beto.​—1 Sa. 1:27; 2:1, 2.

8. Wapi bamambu ke natá beto na kuvutula Yehova matondo? (1 Batesalonika 5:18)

⁸ Vutula Yehova matondo. Beto ke na bamambu mingi yina lenda nata beto na kuvutula Yehova matondo na lusambu. (Tanga 1 Batesalonika 5:18.) Beto lenda vutula Yehova matondo na bima nyonso ya mbote yina beto ke na yawu, samu ti ya ke katuká na yandi. (Zaki 1:17) Na kifwani, beto lenda vutula yandi matondo samu na ntoto mpe bima nyonso ya kitoko yina yandi salaka. Beto lenda vutula Yehova matondo samu na luzingu, dikanda, bandiku mpe kivuvu yina beto ke na yawu. Dyaka, beto ke vutulá Yehova matondo na yina yandi me pesa beto bweso ya kuvanda bandiku ya yandi.

9. Samu na yinki beto ke na nsatu ya kukulisa kifu ya kuvutulá Yehova matondo?

⁹ Ya lenda lomba beto bangolo na kukanisa na bamambu yina ke natá beto na kuvutula Yehova matondo. Beto ke zingá na yinza yina bantu zaba ve kuvutula matondo. Ba ke kanisá kaka na yina ba lenda sala samu na kuzwa yina ba ke na sosaka, kasi ve na kuvutula matondo na yina ba ke na yawu. Kana beto bika kifu yayi lwata beto, balusambu ya beto ke vanda kaka kulomba na kulomba. Samu na kuvanda ve na kifu yayi, beto me bonga kukulisa na kati ya beto kifu ya kuvutulá Yehova matondo na nyonso yina yandi ke salá samu na beto.​—Luke 6:45.

10. Wa’ faso kuvutula matondo sadisá mpangi mosi ya kento na kukanga ntima? (Tala mpe kizizi.)

¹⁰ Kifu ya kuvutulá matondo lenda sadisa beto na kukanga ntima na mantwala ya bampasi. Beto zonzila kifwani ya Kyung-sook, mpangi mosi ya kento yina ba zonzilá na Yinzo ya Kengidi ya 15 janvier 2015 (na lumputu). Ba talak’ yandi na cancer ya ngolo. Yandi zonzaka: “Kimbevo yayi lembisá munu mingi. Mu talá ti mu vandá dyaka ve na ata kima, mpe ya vandá pesa munu boma mingi.” Yinki sadisak’ yandi na kukanga ntima? Yandi me zonza ti bampimpa nyonso tekila yandi kwenda lala, yandi vandá kwendá na kisika yina vandá na zulu ya yinzo ya yandi samu na kusambila mpe kuvutula Yehova matondo na bamambu 5 yina yandi me sala samu na yandi kilumbu yina. Ya sadisak’ yandi na kuvanda dyaka ve na mawa mingi mpe ya natak’ yandi na kuzonza na Yehova ti yandi ke zolak’ yandi. Yandi talá mutindu Yehova ke sadisá bisadi ya yandi ntangu ba ke kutaná na bamambu ya mpasi. Yandi kwizá tala ti balusakumunu yina beto ke kuzwá na luzingu me lutila mingi na bampasi yina beto ke kutaná na yawu. Mutindu kifwani ya Kyung-sook ke na lakisak’ yawu, ya ke na bamambu mingi ke natá beto na kuvutula Yehova matondo ata ti beto ke na kutaná na bampasi. Kuvutula Yehova matondo na lusambu lenda sadisa beto na kukanga ntima mpe na kubumba kilengi ya beto.

11. Samu na yinki bilandi ya Yesu vandá na nsatu ya bukindi ntangu Yesu vutuká na zulu?

¹¹ Lomba Yehova pesa nge bukindi na kisalu ya kusamuna. Tekila yandi vutuka na zulu, Yesu bambulá bilandi ya yandi kisalu yina yandi pesá bawu ya kuzonzila nkumbu ya yandi ‘na Yeruzalemi, na kizunga nyonso ya Zude, ya Samaria, mpe tii na bansuka ya ntoto.’ (Bis. 1:8; Luke 24:46-48) Mwa ntangu fioti na manima, bamfumu ya Bazwife simbá bantumwa Piere na Yoane, ba natá bawu na sanedreni, mpe ba zonzá na bawu na kubika kusamuna. Ba zonzá ti ba ke talisa bawu mpasi kana ba tatamana. (Bis. 4:18, 21) Yinki Piere na Yoane salaka?

12. Mutindu Bisalu 4:29, 31 ke lakisak’ yawu, yinki bilandi salaka?

¹² Piere na Yoane pesá mvutu yayi na bamfumu ya dibuundu ya Bazwife: “Wapi mambu kele ya kudedama na meso ya Nzambi: kutumama na Nzambi to na beno? Beno kuzwa mvutu beno mosi. Kasi beto, beto lenda kumanga ve na kuzonzila mambu yina beto talaka mpe kuwaka.” (Bis. 4:19, 20) Ntangu ba biká Piere na Yoane, bawu na bilandi ya nkaka sambilá Yehova samu yandi pesa bawu ngolo ya kusala luzolo ya yandi. Ba zonzaka: “Pesa ngolo na bisadi ya nge, samu ti bawu mwangisa nsangu ya nge na kivuvu nyonso.” Yehova pesá mvutu na lusambu ya bawu.​—Tanga Bisalu 4:29, 31.

13. Yinki kifwani ya Jin-hyuk ke na longá beto?

¹³ Beto lenda landa kifwani ya bilandi ya Yesu na kubika ve kusamuna ata na ntangu bamfumu ya bwala ke niminá beto na kusala yawu. Beto tala kifwani ya mpangi Jin-hyuk, yina ba tulá na boloko samu yandi mangá kukuma soda. Na boloko, ba pesak’ yandi kisalu ya kukipe bantu yina ba tulá kisika ya bawu mosi. Kasi ba niminak’ yandi na kuzonzila bawu mambu ya Nzambi. Yandi sambilá Yehova samu yandi pesa yandi bukindi mpe mayela ya kusamuna bambala nyonso yina yandi lenda sala yawu. (Bis. 5:29) Yandi me zonza: “Yehova pesá mvutu na balusambu ya munu. Mu kuzwá bukindi mpe mayela ya kubanda kulongoka na bantu yina mu vandá kipeke. Mu vandá sala kaka baminiti 5 na mantwala ya porte ya mosi na mosi ya bawu. Na mpimpa, mu vandá soniká mikanda yina mu ke pesa bantu kilumbu yina ke landa.” Beto mpe lenda vanda na kundima ti Yehova ke sadisa beto na kulungisa kisalu ya beto ya kusamuna. Kaka mutindu Jin-hyuk, beto lenda sambila samu na kuzwa bukindi mpe mayela.

14. Yinki lenda sadisa beto ntangu beto ke kutaná na bamambu ya mpasi? (Nkunga 37:3, 5)

¹⁴ Lomba Yehova sadisa nge na kukanga ntima na mantwala ya bampasi. Mingi na kati ya beto ke nwaná na bimbevo, me fwidila muntu yina ba vandá zolá, ke na bamambu na makanda, bankwamusu mpe bamambu ya nkaka. Bamambu mutindu bimbevo yina ke mwanganá na yinza mpe bamvita lenda sala ti bampasi ya beto kuma dyaka mingi. Zonzila Yehova nyonso yina ke na ntima ya nge. Zonzila yawu mutindu nge ke salak’ yawu na ndiku ya nge ya ntima. Vanda na kundima ti ‘yandi ke sadila nge mambu ya mbote.’​—Tanga Nkunga 37:3, 5.

15. Wa’ faso lusambu lenda sadisa beto na ‘kukanga ntima na ntangu ya bampasi’? Pesa kifwani.

¹⁵ Kutatamana na kusambila ke sadisa beto na ‘kukanga ntima na ntangu ya bampasi.’ (Rom. 12:12) Yehova zaba bamambu ya mpasi yina bisadi ya yandi ke na kutaná na yawu, mpe ‘yandi ke waka kudila ya bawu samu na kulomba lusalusu.’ (Nku. 145:18, 19) Kristie ke na bamvula 29 mpe yandi ke mupasuli-nzila. Yandi me kwiza tala ti mambu yayi ke tsyeleka. Yandi kuzwá kimbevo ya ngolo mpe ya natak’ yandi na kukuma na manyongi ya kulutila. Na manima, ba kwizá tala mpe mama ya yandi na kimbevo ya ngolo mingi. Kristie me zonza: “Mu sambilá Yehova bambala mingi samu yandi pesa munu ngolo konso kilumbu. Mu salá nyonso samu na kubika ve bifu ya munu ya kimpeve mutindu kukwenda na balukutakanu mpe kulongoka Biblia.” Yandi me bwela: “Lusambu sadisá munu na kukanga ntima. Mu zabá ti Yehova vandá kaka na munu mpe ti ngolo yina mu vandá na yawu vandá katuka na yandi. Ata ti kimbevo ya munu manisá ve, Yehova kuwá balusambu ya munu mpe yandi pesá munu kizunu na ntima.” Beto me bonga kuzimbana ve ti “Nzambi zaba wapi mutindu yandi lenda kukatula na bantotolo bayina ke ya kukwikama na yandi.”​—2 Pi. 2:9.

16. Samu na yinki beto ke na nsatu Yehova sadisa beto na kubwa ve na bantontolo?

¹⁶ Lomba Yehova sadisa nge na kubwa ve na bantontolo. Samu ti beto nyonso ke bantu ya masumu, beto me bonga kusala bangolo samu na kunwana na nsatu ya kusala mambu ya yimbi. Satana ke na salá nyonso samu na kunata beto na kusala mambu ya yimbi. Na kifwani, yandi ke sosá kubebisa makanisi ya beto na nzila ya bima ya yimbi yina bantu ke sadilá samu na kulutisa ntangu. Bima yayi lendá fulusa beto na makanisi ya mvindu, yina lenda nata beto na kusala disumu.​—Mrk. 7:21-23; Zaki 1:14, 15.

17. Na manima ya kusambila Yehova samu yandi sadisa beto na kubwa ve na bantontolo, yinki beto me fwana kusala? (Tala mpe kizizi.)

¹⁷ Samu beto kubwa ve na bantontolo, beto me bonga kulomba Yehova sadisa beto. Na lusambu yina Yesu longá beto, yandi zonzaka: “Kubika beto ve na kubwa na bantontolo, kasi katula beto na maboko ya Mfumu ya Yimbi.” (Mat. 6:13) Yehova zola kusadisa beto, kasi beto me fwana kulomba yandi. Beto me bonga mpe kusala bamambu yina ke kwelana na balusambu ya beto. Ya zola zonza kusala nyonso samu na kutanga to kuwa ve bamambu ya yimbi yina ke na mwanganá na yinza ya Satana. (Nku. 97:10) Kana beto tanga Biblia mpe beto longoka yawu, beto ke fulusa makanisi ya beto na bamambu ya kitoko. Kukwenda na balukutakanu mpe kusamuna ke sadisa beto na kubumba makanisi ya beto. Yehova me pesa beto nsilulu ti yandi lenda bika ve ti beto kutana na bantontolo yina beto ke lenda ve kununga.​—1 Ko. 10:12, 13.

18. Na yina me tadila lusambu, yinki beto nyonso me bonga kusala?

¹⁸ Mosi na mosi na kati ya beto me bonga kusala bangolo samu na kubikana ya kukangama na Yehova na kati ya bantangu ya nsuka yayi. Na yawu, bongisa ntangu samu na kusambila Yehova bilumbu nyonso. Yehova zola ti na lusambu, beto ‘fungula bantima ya beto na mantwala ya yandi.’ (Nku. 62:8) Kembila yandi na nyonso yina yandi ke salaka. Lomba yandi sadisa nge na kuvanda na bukindi na kisalu ya kusamuna. Bondila yandi sadisa nge na kukanga ntima na mantwala ya bampasi mpe na kubwa ve na bantontolo yina nge ke na kutaná na yawu. Kubika ata kima to ata muntu kanga nge nzila ya kusambila Yehova ntangu nyonso. Kasi, wa’ faso Yehova ke pesá mvutu na balusambu ya beto? Na disolo yina ke landa, beto ke kuzwa mvutu na kyuvu ya mfunu yayi.