Mulemvo ya masumu tekila munkayulu ya Yesu

Beto lenda kuzwa mulemvo ya masumu ya beto kaka na nzila ya munkayulu ya Yesu. (Ef. 1:7) Kasi, Biblia ke zonzaka: “[Nzambi] vanda kangaka ntima mpe vanda lemvokilaka masumu yina salamaka na ntangu ya ntama,” yandi vanda salaka yawu tekila Yesu pesa munkayulu ya yandi. (Rom. 3:25) Wa’ faso Yehova lenda sala mambu yango mpe kubumba misiku ya yandi ya lunungu?

Yehova pesaka nsilulu ti ni na nzila ya “mwana” ba yina ke kwikilaka na yandi mpe na bansilulu ya yandi ke vuuka. Na ntangu yandi salaka nsilulu yango, ya vandaka mutindu yandi futaka munkayulu ya Yesu. (Kub. 3:15; 22:18) Nzambi vandaka na kundima ti na ntangu ya kulunga Mwana ya yandi ke kukipesa na ntima nyonso mutindu munkayulu. (Gal. 4:4; Ebr. 10:7-10) Ntangu Yesu vandaka awa na ntoto, Yehova pesaka yandi ngolo ya kulemvokila masumu ya bantu tekila yandi pesa munkayulu ya yandi. Yesu vandaka na makoki ya kulemvokila masumu ya ba yina vandaka na kiminu na yandi, samu ti yandi zabaka ti munkayulu yina yandi zola pesa ke kanga masumu ya bawu.​—Mat. 9:2-6.