Sadisa mulongoki ya nge na kusadila Yehova

1-2. a) Samu na yinki balongoki ya Biblia ya nkaka ke vandaka na boma ya kusadila Yehova? b) Yinki beto ke zonzila na disolo yayi?

NGE vandaka kwandi na boma na kukuma mbangi ya Yehova? Ya lenda vanda ti nge vandaka na boma ti bantu ya dikanda ya nge, bampangi ya nge ya kisalu, mpe bandiku ya nge manga nge. To nge vanda tala ti nge ke lenda ve na kulanda misiku ya Nzambi. Kana ni yawu, nge lenda zaba samu na yinki ya ke mpasi na balongoki ya nkaka ya Biblia na kubaka mukanu ya kusadila Yehova.

² Yesu zabaka ti bamambu ya mutindu yayi, lenda kanga muntu nzila na kusadila Yehova. (Mat. 13:20-22) Ata mpila yina, yandi bikaka ve kusadisa bantu yina vandaka na mwa boma na kulanda yandi. Kasi, yandi longaka na bilandi ya yandi faso ya kusadisa bantu ya mutindu yina, na 1) kuzaba yinki ke na kangaka bawu nzila na kusadila Yehova, 2) kukulisa luzolo ya bawu samu na Yehova, 3) kutula kisalu ya Yehova na kisika ya ntete, mpe 4) kununga bankwamusu. Ntangu beto ke longokaka buku Sepela na luzingu ya ntangu nyonso! na bantu, wa’ faso beto lenda sadila mambu yina Yesu longaka samu na kusadisa bantu na kubaka mukanu ya kusadila Yehova?

SADISA MULONGOKI NA KUZABA MAMBU YINA KE NA KANGAKA YANDI NZILA NA KUSADILA YEHOVA

3. Ntangu ya nkaka, yinki vanda sosa kukanga Nikodeme nzila na kukuma kilandi ya Yesu?

³ Nikodeme, mfumu mosi ya Bazwife kutanaka na mambu yina vanda sosa kukanga yandi nzila na kukuma kilandi ya Yesu. Ya salaka kaka bangonda 6 yina Yesu bandaka kisalu ya kusamuna, kasi Nikodeme zabaka ti yandi vandaka muntu yina Nzambi filisaka. (Yoa. 3:1, 2) Kasi, samu yandi vandaka na “boma ya Bazwife” yandi kwendaka tala Yesu na mpimpa. (Yoa. 7:13; 12:42) Ntangu ya nkaka, yandi vandaka na boma ti kana yandi kuma kilandi ya Yesu,a yandi ke vanda dyaka ve na lutumu mpe bimvwama.

4. Yinki Yesu salaka samu na kusadisa Nikodeme na kubakula yinki Nzambi vanda vingila yandi sala?

⁴ Nikodeme zabaka Musiku, kasi yandi vandaka na nsatu muntu sadisa yandi na kubakula yinki Yehova vanda vingila yandi sala. Yinki Yesu salaka samu na kusadisa yandi? Yandi pesaka yandi ntangu ya yandi, mpe yandi ndimaka kusolola na Nikodeme na mpimpa. Dyaka, Yesu zonzilaka yandi pwelele yinki yandi me fwana kusala samu na kukuma kilandi: kubalula ntima na masumu ya yandi, kuzwa mbotokolo na maza, mpe kulakisa kiminu na Mwana ya Nzambi.—Yoa. 3:5, 14-21.

5. Yinki nge lenda sala samu na kusadisa mulongoki ya nge na kuzaba mambu yina ke na kangaka yandi nzila na kusadila Yehova?

⁵ Ata ti mulongoki ya nge zaba mbote-mbote Biblia, yandi lenda vanda na nsatu nge sadisa yandi na kuzaba yinki ke na kangaka yandi nzila na kusadila Yehova. Ya lenda vanda ti kisalu ya yandi ke na bakaka yandi ntangu mingi to bantu ya dikanda ya yandi ke na zolaka ve ti yandi kuma mbangi ya Yehova. Mutindu Yesu, baka ntangu samu na kusadisa mulongoki ya nge. Nge lenda bokila yandi na kudya. Kana nge sala bamambu ya faso yayi, ya lenda vanda pete na yandi na kuzonzila nge bamambu yina yandi ke kutanaka na yawu. Sadisa yandi na kusala bansobolo samu na kusepelisa Yehova, kasi nge ve.

6. Yinki nge lenda sala samu na kusadisa mulongoki ya nge na kuvanda na bukindi na kusadila mambu yina yandi ke na longokaka? (1 Bakorinto 16:13)

⁶ Kana mulongoki ya Biblia ke na kundima ti Yehova ke sadisa yandi na kulanda malongi ya yandi, yandi ke vanda na bukindi na kusadila mambu yina yandi ke na longokaka. (Tanga 1 Bakorinto 16:13.) Muntu yina ke longaka Biblia ke mutindu mulongi ya lekole. Mulongi ya mbote ke sukaka ve kaka na kulakisa na mulongoki faso ya kusala bamambu, kasi yandi ke sadisaka mpe yandi na kuvanda na kundima ti yandi lenda sala yawu. Mutindu mosi mpe mulongi ya mbote ya Biblia ke sukaka ve kaka na kulakisa na mulongoki ya yandi mambu yina Yehova zola ti beto sala. Kasi, yandi ke sadisaka mpe yandi na kuvanda na kundima ti Yehova ke sadisa yandi na kulenda kusala bansobolo. Yinki nge lenda sala samu na kuvanda mulongi ya mutindu yayi?

SADISA MULONGOKI NA KUKULISA LUZOLO YA YANDI NA YEHOVA

7. Wa’ faso Yesu sadisaka bantu yina vanda kuwa yandi na kukulisa luzolo ya bawu samu na Yehova?

⁷ Yesu zabaka ti kana muntu ke zolaka Yehova, yandi ke sadila bamambu yina yandi ke na longokaka. Bambala mingi, yandi vanda longaka bilandi ya yandi bamambu yina zola nata bawu na kukulisa luzolo samu na Tata ya bawu ya mazulu. Na kifwani, yandi longaka ti Yehova ke mutindu tata yina ke pesaka bana ya yandi bima ya mbote. (Mat. 7:9-11) Ya lenda vanda ti bantu ya nkaka yina vanda kuwa Yesu batata ya bawu lakisaka ve bawu luzolo. Kanisa na yina ya salaka bawu, ntangu ba kuwaka kifwani yina Yesu pesaka ya tata ya luzolo yina yambaka mwana ya yandi yina salaka bamambu mingi ya yimbi. Yesu sadisaka bawu na kutala ti Yehova vandaka na ntima ya kyadi samu na bawu.—Luke 15:20-24.

8. Wa’ faso nge lenda sadisa mulongoki ya nge na kukulisa dyaka luzolo ya yandi samu na Yehova?

⁸ Ntangu nge ke longaka, nge lenda sadisa mulongoki ya nge na kukulisa luzolo ya yandi samu na Yehova, kana nge zonzila mingi bifu ya mbote ya Yehova. Ntangu nyonso beno ke longokaka Biblia, sadisa yandi na kutala ti bamambu yina yandi ke na longokaka ke lakisaka ti Yehova ke zolaka beto. Ntangu beno ke longoka mutindu Yehova pesaka Mwana ya yandi samu na beto, lakisa yandi ti yandi salaka yawu samu na yandi. (Rom. 5:8; 1 Yoa. 4:10) Kana yandi tala ti Yehova ke zolaka yandi, yandi ke zola dyaka Yehova mingi.—Gal. 2:20.

9. Yinki nataka Michael na kusoba?

⁹ Beto tala kifwani ya Michael, yina ke vandaka na bwala ya Indonésie. Ba kulisaka yandi na matsyelaka, kasi yandi kuzwaka ve mbotokolo. Ntangu yandi kumaka na bamvula 18, yandi kwendaka vanda na bwala ya bunzenza samu na kusala kisalu ya kunataka ba camions ya nene. Na manima yandi kwelanaka, kasi yandi bikaka dyaka dikanda yandi samu na kwenda sala na bwala ya bunzenza. Kento ya yandi na mwana ya yandi bandaka kulongoka Biblia mpe kusadila bamambu yina ba vanda longoka. Ntangu mama ya yandi kufwaka, yandi vutukaka na bwala ya yandi samu na kukipe tata ya yandi mpe yandi ndimaka kulongoka Biblia. Mambu yina yandi longokaka na kitini “Sosa kuzaba mbote-mbote” ya kileso 27 ya buku Sepela na luzingu ya ntangu nyonso! simbaka ntima ya yandi. Ntangu yandi kanisaka na mambu yina ya salaka Yehova na kutala Mwana ya yandi kutala mpasi, Michael dilaka. Nsatu ya kuvutula matondo na Yehova na Yesu na yina ba salaka samu na yandi nataka yandi na kusoba mpe na kuzwa mbotokolo.

SADISA MULONGOKI NA KUTULA YEHOVA NA KISIKA YA NTETE

10. Yinki Yesu salaka samu na kusadisa bilandi ya yandi ya ntete na kutula kisalu ya Yehova na kisika ya ntete? (Luke 5:5-11) (Tala mpe kizizi.)

¹⁰ Ya bakaka ve ntangu mingi samu na bilandi ya Yesu ya ntete na kuzaba ti ni yandi Masiya yina ba vanda vingila. Kasi, ba vanda na nsatu ya lubakusu samu na kutula kisalu ya kusamuna na kisika ya ntete na luzingu ya bawu. Tekila Yesu bokila Piere na Andre na kusala na yandi samu na ntangu nyonso, ba landaka ntete yandi na kati ya mwa bantangu. (Mat. 4:18, 19) Kisalu ya bawu ya bilobi-mbisi vanda futaka, mpe ya lenda vanda ti ba vandaka salaka yawu na Zaki mpe Yoane. (Mrk. 1:16-20) Ntangu Piere na Andre “bikaka bampwasa ya bawu,” samu na kulanda Yesu samu na ntangu nyonso, ntembe ve ba yidikaka bamambu samu na kukipe bansatu ya makanda ya bawu. Yinki nataka bawu na kubika kisalu ya bawu? Buku ya Luke ke zonzaka ti Yesu salaka kimangu yina kulisaka kiminu ya bawu ti Yehova ke na makoki ya kukipe bansatu ya bawu.—Tanga Luke 5:5-11.

11. Wa’ faso nge lenda sadila bamambu yina kuminaka nge samu na kukindisa kiminu ya mulongoki ya nge?

¹¹ Beto lenda sala ve bimangu mutindu Yesu, kasi beto lenda kabula masolo yina ke lakisaka ti Yehova ke kipeke ba yina ke tulaka yandi na kisika ya ntete. Na kifwani, nge na zabaka dyaka mutindu Yehova sadisaka nge ntangu nge bandaka kukwiza na balukutakanu? Ya lenda vanda ti nge lombaka na mfumu ya nge ya kisalu, yandi bika nge katuka na mwa ntangu tekila kisalu manisa samu na kuvanda na balukutakanu. Ntangu nge ke zonzila na mulongoki ya nge bamambu yina kuminaka nge, zonzila yandi faso kiminu ya nge kulaka ntangu nge talaka mutindu Yehova sadisaka nge na yina nge tulaka kisalu ya yandi na kisika ya ntete.

12. a) Samu na yinki beto me bonga kubokila bampangi ya mutindu na mutindu samu na kulongoka Biblia na mulongoki ya beto? b) Wa’ faso nge lenda sadila bavideo samu na kusimba ntima ya mulongoki ya nge? Pesa kifwani.

¹² Ya ke mpe mbote mulongoki ya nge kuwa bampangi ya nkaka ya kimvuka kuzonzila mutindu ba tulaka kisalu ya Yehova na kisika ya ntete. Na yawu, bokila bampangi ya mutindu na mutindu samu na kulongoka Biblia na yandi. Yufula bawu faso ba zabaka matsyeleka mpe bamambu yina ba salaka samu na kutula kisalu ya Yehova na kisika ya ntete. Dyaka, baka ntangu ya kutala na yandi bavideo ya kitini “Sosa kuzaba mbote-mbote” to “Sosa kuzaba dyaka” ya buku Sepela na luzingu ya ntangu nyonso! Na kifwani, ntangu beno ke longoka kileso 37, beno lenda zonzila malongi yina beno lenda benda na video Yehova ke lungisa bansatu ya beto.

SADISA MULONGOKI NA KUNUNGA BANKWAMUSU

13. Wa’ faso Yesu sadisaka bilandi ya yandi na kubongama samu na bankwamusu?

¹³ Yesu kebisaka bambala mingi bilandi ya yandi ti ba ke kutana na bankwamusu, ata mpe na kati ya dikanda ya bawu. (Mat. 5:11; 10:22, 36) Mwa ntangu tekila yandi kufwa, yandi zonzaka na bawu ti, ba ke kufwa ba ya nkaka na kati ya bawu. (Mat. 24:9; Yoa. 15:20; 16:2) Yandi zonzaka na bawu na kuvanda ekenge na kisalu ya kusamuna, na kuswana ve na ba yina ke swanisa bawu mpe na kulakisa ndwenga samu ba tatamana na kusamuna.

14. Wa’ faso beto lenda sadisa balongoki na kubongama na bankwamusu? (2 Timote 3:12)

¹⁴ Beto lenda sadisa mulongoki na kubongama na bankwamusu na kuzonzaka na yandi bamambu yina bampangi ya yandi ya kisalu, bandiku ya yandi to bantu ya dikanda ya yandi lenda zonza to kusala samu yandi ke na longokaka Biblia. (Tanga 2 Timote 3:12.) Bampangi ya kisalu lenda seka yandi na yina yandi ke na sosaka kusoba luzingu ya yandi. Bantu ya nkaka mutindu bantu ya dikanda ya yandi, lenda tula ntembe na bamambu yina yandi ke na longokaka. Kana beto sadisa balongoki ya beto na mbangu na kubongama na bankwamusu, ba ke lenda kununga yawu ntangu ya ke kuma.

15. Yinki lenda sadisa mulongoki ya Biblia na kununga bankwamusu na kati ya dikanda?

¹⁵ Kana bantu ya dikanda ya mulongoki ya nge ke na kwamisaka yandi, sadisa yandi na kutala samu na yinki ba ke na salaka mutindu yina. Ba ke na talaka kwandi ti ba ke na vunaka yandi, to ba me kuwa bamambu ya luvunu na yina me tadila Bambangi ya Yehova? Yesu mpe kutanaka na bankwamusu na kati ya dikanda ya yandi. (Mrk. 3:21; Yoa. 7:5) Sadisa mulongoki ya nge na kulakisa ntima ya yinda mpe kuzonza na buzitu na bantu ya dikanda ya yandi mpe bantu ya nkaka.

16. Wa’ faso beto lenda sadisa mulongoki na kuzonzila mambu ya Nzambi na mutindu ya mbote?

¹⁶ Ata ti bantu ya dikanda ya yandi ke na sosaka kuwa mambu ya Nzambi, yandi me bonga kuzonzila ve bawu bamambu nyonso na mbala mosi. Kana yandi sala yawu, ya lenda lembisa bawu mpe ba lenda vanda dyaka ve na nsatu ya kuwa yandi. Sadisa yandi na kuzonzila mambu ya Nzambi na mutindu yina ke pesa bawu nsatu ya kuwa dyaka yandi. (Kol. 4:6) Yandi lenda lakisa bawu site jw.org. Ya ke sala ti kana bawu mosi ba zola, ba ke longoka dyaka mingi na yina me tadila Bambangi ya Yehova.

17. Wa’ faso nge lenda sadisa mulongoki na kupesa bamvutu na bamambu ya luvunu yina ba ke zonzaka na yina me tadila Bambangi ya Yehova? (Tala mpe kizizi.)

¹⁷ Nge lenda sadila kitini “Byuvu yina bantu ke yufulaka mingi” na jw.org samu na kusadisa mulongoki na kubongisa bamvutu ya nkufi na byuvu yina bampangi ya yandi ya kisalu to ya dikanda lenda yufula yandi. (2 Tim. 2:24, 25) Ntangu beno ke manisaka konso kileso ya buku Sepela na luzingu ya ntangu nyonso! beno solola na kitini “Bantu ya nkaka ke zonzaka.” Zonza na yandi na kubonga na kupesa bamvutu yina ke katuka na ntima ya yandi. Zonzila yandi bamambu yina yandi lenda bongisa na bamvutu ya yandi. Kana nge baka ntangu na kusadisa yandi na kubongama, yandi ke lenda kunwanina kiminu ya yandi.

18. Wa’ faso nge lenda kindisa mulongoki ya nge na kubanda kusamuna na kimvuka? (Matayi 10:27)

¹⁸ Yesu pesaka bilandi ya yandi musiku ya kusamuna nsangu ya mbote ma bantu nyonso. (Tanga Matayi 10:27.) Ntangu mulongoki ya Biblia ke banda kusamuna na bampangi ya kimvuka, yandi ke tala diboko ya Yehova mpe kiminu ya yandi ke kula. Wa’ faso nge lenda sadisa mulongoki ya nge na kukuma musamuni? Ntangu dibuundu ya Yehova me soola ngonda mosi samu na kusamuna dyaka mingi, kindisa yandi na kutala kana yandi lenda kuma musamuni. Zonzila yandi samu na yinki bantu mingi ke soolaka kubanda kusamuna na bangonda ya mutindu yina. Yandi lenda longoka mpe mingi kana yandi kota na lekole yina ke salamaka na lukutakanu ya kati-kati ya lumingu. Kana yandi sala bangolo na kukota na lekole yango, yandi ke bongisa faso ya yandi ya kuzonzila bamambu yina yandi ke kwikilaka.

LAKISA MULONGOKI TI NGE KE TUDILAKA YANDI NTIMA

19. Wapi mutindu Yesu lakisaka ti yandi vanda tudila bilandi ya yandi ntima, mpe wa’ faso beto lenda landa kifwani ya yandi?

¹⁹ Tekila Yesu kwenda na mazulu, yandi zonzaka na bilandi ya yandi ti ya ke vanda na kilumbu yina ba ke vukana dyaka kintwadi. Ba bakulaka ve ti yandi vanda zonza na bawu ti ba ke kwenda na mazulu. Ata faso yina Yesu vanda tala mingi kukwikama ya bawu, kasi ve bamambu yina ba vanda bakula ve. (Yoa. 14:1-5, 8) Yandi zabaka ti ba vandaka na nsatu ya mwa ntangu samu na kubakula bamambu ya nkaka, mutindu kivuvu ya kukwenda na mazulu. (Yoa. 16:12) Mutindu Yesu beto mpe lenda lakisa ti beto ke tudilaka balongoki ya beto ntima ti ba ke na nsatu ya kusepelisa Yehova.

20. Wa’ faso mpangi mosi ya kento ya bwala ya Malawi lakisaka ti yandi vanda tudila mulongoki ya yandi ntima?

²⁰ Vanda na kundima ti mulongoki ya nge ke na nsatu ya kusala mambu ya mbote. Beto tala kifwani ya Chifundo mpangi mosi ya kento ya bwala ya Malawi. Yandi bandaka kulongoka buku Sepela na luzingu ya ntangu nyonso! na Alinafe ntwenya mosi ya kento yina vanda sambilaka na dibuundu ya katolike. Ntangu ba manisaka kileso 14, Chifundo yufulaka mulongoki ya yandi yinki yandi vanda kanisa na lusambu ya biteki. Kyuvu yina pesaka Alinafe nkele, mpe yandi zonzaka: “Ya me tala ve nge!” Chifundo kumaka na boma ti ba ke bika kulongoka. Kasi na ntima ya yinda nyonso, yandi tatamanaka kulongoka na Alinafe. Yandi vandaka na kivuvu ti na mantwala yandi ke bakula mambu yango. Mwa bangonda na mantwala, Chifundo yufulaka yandi kyuvu yayi yina ke na kileso 34: “Kubanda ntangu yina nge bandaka kulongoka Biblia mpe kuzaba Nzambi ya matsyeleka Yehova, wapi bambote nge me kuzwa?” Alinafe zonzilaka bamambu mingi yina yandi kwizaka zaba. Mosi ya yawu ke ti Bambangi ya Yehova ke sadilaka ve bamambu yina Biblia ke niminaka. Ntangu fioti na mantwala, Alinafe bikaka kusambila biteki mpe kuzwaka mbotokolo.

21. Wa’ faso beto lenda sadisa balongoki na kuvanda na kundima ti bawu mpe lenda sadila Yehova?

²¹ Ya tsyeleka ni Nzambi ke ‘kulisaka.’ Kasi beto lenda sadisa balongoki ya beto na kukula. (1 Kor. 3:7) Beto ke sukaka ve kaka na kulonga bawu mambu yina Nzambi zola ba sala. Beto ke sadisaka bawu na kukulisa luzolo ya bawu samu na Yehova. Beto ke kindisaka mpe bawu na kulakisa ti ba ke zolaka Yehova na kutulaka kisalu ya yandi na kisika ya ntete. Dyaka beto ke longaka bawu na kutula ntima na Yehova na mantwala ya bankwamusu. Ntangu beto ke lakisaka ti beto ke tudilaka bawu ntima, ya ke sadisaka bawu na kuvanda na kundima ti bawu mpe lenda landa misiku ya Yehova mpe kusadila yandi.