BENO LALA VE!
Mvita na Ukraine me sala ti bansatu kuma dyaka ngolo na yinza
Na kilumbu ya 19 mai 2022, bantu 75 yina ke na lutumu na yinza zonzá mambu yayi na lukutakanu ya Conseil de sécurité des Nations Unies: “COVID-19 na kusoba ya kilima me sala ti bansatu kuma ngolo na yinza. Mvita na Ukraine me bebisa dyaka bamambu. Bansatu ke na kumá dyaka ngolo ya kulutila na bisika mingi ya yinza.” Mwa ntangu na manima, journal mosi (The Economist), zonzá ti “yinza vandá déjà na bampasi. Kasi, mvita na Ukraine ke sala ti bantu mingi na yinza kufwa na nsatu.” Biblia zonzá ti bansatu ya ngolo ke vanda na ntangu ya beto. Kasi, ya ke sadisá mpe beto na kuzaba yinki beto lenda sala na mantwala ya mambu yayi.
Biblia zonzá ti bansatu ya ngolo ke vanda
Yesu bikulaka: ‘Yinsi mosi ke nwanisa yinsi ya nkaka mpe kimfumu mosi ke nwanisa kimfumu ya nkaka, mpe nsatu ke vanda.’—Matayi 24:7.
Buku ya Luzabusu ke zonzilá binati-mpunda 4. Mosi ke kifwani ya mvita. Kinati-mpunda yina ke kwizá na manima ya yandi ke kifwani ya bansatu ya ngolo, ntangu yina ya ke vanda mpasi na kuzwa bima ya kudya, mpe madya ke kuma ntalu ya kulutila. ‘Mu talaka mpunda ya ndombi. Muntu yina vandaka na zulu ya yawu simbaka kitezolo (to balance) na diboko. Mu kuwaka ndinga yina tubaka: “Kilo mosi ya faline samu na mbongo mosi ya kisengo, mpe bakilo tatu ya oloze samu na mbongo mosi ya kisengo.”’—Luzabusu 6:5, 6.
Bambikudulu yayi ke na lunganá na ntangu ya beto yina Biblia ke bokilá “bilumbu ya nsuka.” (2 Timote 3:1) Na kuzaba dyaka mingi yinki Biblia ke zonzá samu na “bilumbu ya nsuka” mpe binati-mupnda 4 ya buku ya Luzabusu, tala video Na 1914 yinza sobaka, mpe tanga “Les cavaliers de l’Apocalyse : qui sont-ils ?”
Wa’ faso Biblia lenda sadisa nge
Biblia ke na malongi ya mbote yina lenda sadisa beto na mantwala ya bamambu ya mpasi. Na kifwani, beto lenda sadila malongi ya Biblia samu na kuzaba yinki ya kusala ntangu madya ke kumá ntalu, ata mpe ntangu bansatu ya ngolo ke vandaka. Tala mwa malongi yango na “Wa’ faso kuzinga na mbongo ndambu.”
Dyaka, Biblia ke pesá beto kivuvu ti bamambu ke bonga. Ya ke zonzilá ntangu yina ‘mbuma ke vanda mingi tsyeleka na ntoto’ mpe bantu nyonso ke vanda na bima mingi ya kudya. (Nkunga 72:16) Na kuzaba dyaka mingi na kivuvu yina Biblia ke pesá mpe samu na yinki beto lenda tula ntima na yawu, tanga “Kivuvu ya tsyeleka samu na bilumbu ya mbote na mantwala.”