Nzambi ke kwandi na nkumbu?

Mvutu ya Biblia

Muntu nyonso ke na nkumbu. Ya ke mbote na kukanisa mpe ti Nzambi ke na nkumbu. Bandiku ke zabá bankumbu ya bampangi mpe ke sadilaka yawu. Mutindu mosi mpe, samu na kuvanda na kindiku na Nzambi, beto me bonga kuzaba mpe kusadila nkumbu ya yandi.

Na Biblia, Nzambi zonzaka: ‘Munu kele Yehova. Ni yina nkumbu ya munu.’ (Izaya 42:8) Ya tsyeleka, yandi ke na ba titres mingi, mutindu ‘Nzambi ya Ngolo-Nyonso’, ‘Mfumu ya Kulutila Nene’ mpe “Kiyidiki.” Kasi, yandi ke pesá bisadi ya yandi bweso na kubokila yandi na nkumbu ya yandi.—Kubanda 17:1; Bisalu 4:24; 1 Piere 4:19.

Na babiblia mingi, nkumbu ya Nzambi ke na buku ya Kubasika 6:3. Kuna yandi ke zonzaka: ‘Munu vandaka talanaka na Abrahami, na Izaki, mpe na Yakobi mutindu Nzambi ya Ngolo-Nyonso, kasi na yina me tadila nkumbu ya munu Yehova munu zabisaka ve bawu yawu.’

Na kituba, Yehova ke nkumbu ya Nzambi yina ba ke sadilá banda ntama. Bantu ya mayela ya nkaka ke soolá kusadila “Yawe.” Kasi, Yehova kele nkumbu yina me zabana mingi. Ba soniká kitini ya ntete ya Biblia na ndinga ya Kiebreo, yina ke ve faso mosi na ndinga ya Kituba, samu ti ya ke tangamá kubanda na diboko ya kento samu na kumanisa na diboko ya bakala. Na ndinga ya Kiebreo, ba ke sonikaka nkumbu ya Nzambi na ba lettres 4 יהוה yina ba ke bokila tétragramme. Na ndinga na Kituba, bisoni yango kele YHWH.