Ntwenya mosi ya bakala ke na talaka bantu yina ke na kotaka na Yinzo ya Kimfumu

BYUVU YINA BANTWENYA KE YUFULAKA

Samu na yinki kukwenda na balukutakanu na Yinzo ya Kimfumu?

Bilumbu zole na lumingu, Bambangi ya Yehova ke vukanaka na Bayinzo ya Kimfumu, bisika yina ba ke sambilaka. Yinki ke lutaka kuna, mpe wapi bambote nge lenda kuzwa kuna?

Yinki ke lutaka na Yinzo ya Kimfumu?

Yinzo ya Kimfumu ke kisika samu na kulongoka mambu ya Biblia yina lenda sadisa beto na luzingu. Na kifwani, nge lenda:

longoka matsyeleka na yina me tadila Nzambi.
zaba samu na yinki bamambu ke na salamaka mutindu beto ke na talaka yawu bubu yayi.
longoka faso ya kukuma muntu ya mbote.
kuzwa bandiku ya mbote.

Nge zabaka yawu? Bambangi ya Yehova ke bokilaka kisika yina ba ke vukanaka na kusambila, Yinzo ya Kimfumu, samu ba ke zonzilaka mingi Kimfumu ya Nzambi kuna.—Matayi 6:9, 10; 24:14; Luke 4:43.

Samu na yinki nge me bonga kukwenda kuna?

Mambu yina nge ke kuwa kuna ke sadisa nge. Malongi yina nge ke kuwa na balukutakanu ya Bambangi ya Yehova ke sadisa nge na ‘kuzwa mayela.’ (Bingana 4:5) Ya zola zonza ti Biblia ke sadisa nge na kubaka mikanu ya mbote na luzingu. Ya ke pesa mpe nge bamvutu na byuvu ya nene, mutindu:

Byuvu yina ke landa ke kaka ndambu ya bayintu dyambu ya masolo yina nge lenda kuwa na balukutakanu ya beto ya nsuka ya lumingu:

Samu na yinki beto me bonga kubika Biblia twadisa luzingu ya beto?
Wapi kisika nge lenda kuzwa lubakusu na bantangu ya mpasi?
Yinki Kimfumu ya Nzambi ke na salaka samu na beto bubu yayi.

Brenda me zonza: “Mpangi ya munu mosi ya lekole kwizaka na Yinzo ya Kimfumu. Beto vandaka kisika mosi, mpe yandi vanda landa lukutakanu kintwadi na munu. Ntangu beto manisaka, yandi zonzá na munu ti ya salaka yandi kilengi mingi na kuwa bamvutu ya bampangi. Yandi zonzá mpe ti na dibuundu ya bawu, ba ke longoká ve Biblia mutindu beto.”

Nge zabaka yawu? Kukwiza na Yinzo ya Kimfumu ke ya mpamba, mpe mabonza kele ve.

Bampangi ke kindisa nge. Biblia ke zonzaka ti mosi ya bamambu yina ke salaka ti Bakristo kuvukana, ke ni samu na “kukindisa bampangi.” (Baebre 10:24, 25) Na yinza yayi bantu ke talaka kaka bansatu ya bawu mosi. Na yawu, kuvanda na kati ya bantu yina ke tulaka Nzambi mpe bansatu ya bampangi na kisika ya ntete, ke pesaka ngolo.

Elisa me zonza: “Na nsuka ya kilumbu, bantangu ya nkaka mu ke vandaka na mawa mpe ya kulemba. Kasi na Yinzo ya Kimfumu bampangi ke sadisaka munu na kuvutula kilengi ya munu mpe na kuzwa dyaka ngolo. Ntangu mu ke vutukaka na yinzo, mu ke vandaka na kilengi, mpe mu ke vandaka na nsatu ya kuvutuka dyaka kuna kilumbu ya nkaka.”

Nge zabaka yawu? Na yinza nyonso, ya ke na bimvuka kuluta 120 000 ya Bambangi ya Yehova mpe Bayinzo ya Kimfumu kuluta 60 000. Konso mvula, ba ke tungaka Bayinzo ya Kimfumu pene-pene na 1 500 samu ba ke na kumaka mingi.a

Yina bantwenya ya nkaka ke kanisaka

Jessica me zonza: “Ntangu mu vandaka na lycée, mwana mosi ya classe ya munu kwendaka na munu na Yinzo ya Kimfumu, mpe ya kamwisaka yandi na kutala bantu ya bamvula nyonso kulongoka kintwadi. Ntama mingi ve, mfumu ya munu ya kisalu kwizaka na balukutakanu. Ya kamwisaka yandi na kutala ti beto ke sadilaka mingi Biblia. Mambu yina yandi zonzaka kulisaka luzolo ya munu samu na balukutakanu.”

Timothée me zonza: “Balukutakanu ke sadisaka munu na kuzimbana basusi ya munu. Beto ke longokaka faso ya kuvanda na kilengi na luzingu, faso ya kuvanda muntu ya mbote, mpe bima mingi ya nkaka. Ntangu nyonso mu ke katukaka na Yinzo ya Kimfumu, mu ke vandaka na ngolo mpe kilengi mingi.”

Jacob me zonza: “Bakala mosi yina mu bokilá na balukutakanu zonzá na manima ya yawu: ‘Mu kwizá kaka samu na kulakisa ti malongi ya beno kele ya luvunu. Kasi mu me kwiza tala ti ni malongi ya munu vandá ya luvunu.’ Kima ya kaka yina kamwisaka yandi ni kutala ntima ya mbote ya Bambangi ya Yehova. Ya nataka yandi na kuzonza: ‘Ya me vanda mbala ya ntete mu kutana na beno, kasi beno me yamba munu nete beto zabanaka ntama.’”

Madison me zonza: “Ya ke na bantangu yina mu ke kanisaka, ‘Ntangu lukutakanu ke manisa, mbala mosi mu ke kwenda na yinzo.’ Kasi ntangu lukutakanu ke bandaka, makanisi yina ke zimbanaka. Na manima ya lukutakanu, mu ke sololaka na bantu mpe mu ke zimbanaka ti mu zola kwenda mbala mosi ntangu beto zola manisa lukutakanu. Balukutakanu me sadisa munu na kuzwa bandiku ya mbote yina mu zola kuzwa ve kisika ya nkaka.”

a Samu na kuzwa Yinzo ya Kimfumu mosi, kwenda na jw.org na “Balukutakanu ya bimvuka ya Bambangi ya Yehova” mpe kota na “Sosa Adrese.”