Fungula radio to tele mpe landa lukutakanu ya nene

Lukutakanu ya nene ya 2020 vandá mambu mosi nabunu ya salama. Kimvuka ya Yehova yidiká bamambu samu ba bongisa ba-discours na bavideo yina ke luta na lukutakanu, mpe ba tula yawu na internet samu bampangi baka yawu kuna. Bampangi ya beto ya Malawi na ya Mozambique landá mpe lukutakanu ya nene. Kasi kaka fioti landak’ yawu na nzila ya internet. Wa’ faso bampangi mingi ya nkaka lendá kulanda lukutakanu yango?

Comité des coordinateurs na Comité pour l’enseignement ya Kimvuka ya Bantwadisi pesá nzila samu na Malawi mpe na Mozambique lukutakanu ya nene luta na radio mpe na tele. Samu na yinki? Na Malawi, internet ke ntalu mingi. Ya ke salá ti kaka bampangi ndambu lenda kuzwa mbongo ya kusumba yawu. Mpangi William Chumbi, mosi ya bampangi ya comité ya filiale ya Malawi me zonza: “Kaka na nzila ya radio mpe ya tele bampangi ya kento na ya bakala lendá kuzwa madya ya kimpeve yina.” Luka Sibeko, mpangi ya nkaka ya comité ya filiale ya Malawi me bwela: “Si ya lutá ve na radio to na tele, kaka bampangi ndambu zolá landa lukutakanu yayi.” Na Mozambique mpe, kaka bampangi ndambu lenda kuzwa appareil yina ke sadisa bawu na kulanda lukutakanu. Kuna mpe kusumba internet ke mpasi.

Bamambu yina ba me sala

Ntangu kimbevo ya COVID-19 mwanganá na yinza nyonso, na Malawi mpe na Mozambique ba bandá kulutisa balukutakanu ya kimvuka na tele mpe na radio.a Bampangi lombá na baradio mpe batele yina vandá lutisá balukutakanu ya kimvuka na kubwela bawu ntangu samu na kulutisa balukutakanu ya nene.

Na Malawi, bampangi ya beto kutaná na mambu mosi ya mpasi. Baradio mpe batele mingi ke pesá kaka heure mosi na bantu yina zola kulutisa kima. Samu na bawu, kana kima baka ntangu mingi, bantu ke tula dyaka ve dikebi na bamambu yina ke na lutaka. Bampangi ya beto zonzá na bawu ti kisalu ya beto ke sadisá bantu mingi. Ata na kati ya confinement, beto ke sadisá bantu na kuzaba nsangu ya mbote ya Biblia. Nsangu yina ke sadisá ba yina ke kuwá yawu na kuvanda bantu ya mbote na kati ya bwala mpe na makanda ya bawu. Ntangu bantu ya tele mpe ya radio kuwá mambu yina bampangi ya beto zonzá, ba ndimá kubwela bawu ntangu.

Na Malawi, lukutakanu lutá na chaîne mosi ya tele mpe na chaîne mosi ya radio. Tele na radio yina, ke kumá na bisika nyonso na Malawi mpe ba-million ya bantu lenda landa yawu. Na Mozambique, lukutakanu ya nene luta na chaîne mosi ya tele mpe na ba-chaîne 85 ya radio.

Na babwala zole yayi, beto me futa 28 227 dollarb samu lukutakanu ya nene luta na tele. Mpe samu na radio, beto futá mbongo pene-pene ya 20 000 dollar. Chaîne ya radio yina baká ve mbongo mingi lombá 15 dollar, mpe yina baká mbongo mingi lombá 2 777 dollar, samu ba ke wá yawu na bwala nyonso.

Bampangi salá bangolo samu na kusadila makabu na mutindu ya mbote. Na kifwani, na Malawi ba lendá kusala ti ba katula bawu mwa mbongo na yina ba zolá futa, tii na 30 pour 100. Ya salá ti ba bumba 1 711 dollar. Na Mozambique, baradio ya nkaka ndimá kukatula bawu mwa mbongo samu ba zaba ti Bambangi ya Yehova ke vuná ve, mpe ba ke futá ntangu ba ke zonzaka.

Bampangi me vutula matondo

Bampangi ya beto me sepela mingi na kulanda lukutakanu na radio mpe na tele. Patrick, kuluntu mosi na Malawi me zonza: “Matondo mingi na bampangi ya Kimvuka ya Bantwadisi na nyonso yina ba me sala samu na beto na kati ya maladie ya COVID-19 yayi.” Isaac mpangi ya nkaka ya Malawi me zonza: “Beto ke kaka na radio. Na yawu, beto me sepela mingi na nyonso yina kimvuka ya Yehova me sala samu beto landa lukutakanu ya nene na nzila ya radio. Ya me sala ti munu na dikanda ya munu nyonso beto landa lukutakanu ya nene. Beto me tala ti ya tsyeleka, Yehova ke zolá bisadi ya yandi.”

Samu na mpangi mosi na Mozambique, ya vandá mbala ya ntete ya yandi ya kuvanda na lukutakanu ya nene. Yandi me zonza: “Kulanda lukutakanu ya nene na tele me sadisa munu na kuzaba ti Yehova ke Nzambi ya kulutila ngolo. Maladie ya COVID-19 yayi me kanga ve Yehova nzila na kupesa beto madya ya kimpeve, mpe na kunatina munu yawu tii na table ya munu. Mu me tala ti luzolo ke na kati ya dikanda ya Yehova. Ntembe ve, yayi ke dibuundu ya tsyeleka.”

Wilson, kuluntu mosi me zonza: “Mu zola kuvutula matondo mingi na muumbu ya mayela mpe ya kukwikama na mutindu ba me sadisa beto na kati ya maladie yayi. Bwala ya beto ke bwala mosi yina, na kuzwa mbongo, ya ke mpasi mingi. Nyonso yina ba me sala samu lukutakanu luta na tele me sadisa mingi na kati ya beto yina ke ve na mbongo.”

Samu na lukutakanu ya nene ya 2021, Comité des coordinateurs na Comité pour l’enseignement ya Kimvuka ya Bantwadisi me ndima ti, na bisika ya nkaka lukutakanu ya nene luta na tele mpe na radio. Wapi kisika beto ke kuzwá mbongo ya kufuta samu ba lutisa balukutakanu ya nene na radio mpe na tele? Mbongo yango ke katuká na makabu yina beno ke pesá na banzila mingi yina ke na donate.jw.org. Matondo mingi na makabu ya beno yina beno ke pesá na ntima mosi.