Banzimbu yina ke salá ti beto kuma pene-pene na Nzambi

Musique ke dikabu ya kitoko yina me katuka na Yehova. Musique ke simbá ntima, mpe ya lenda sala ti beto vanda na kilengi to na kyadi. Ya lenda nata beto na kusala bamambu. Ni yawu mpe banzimbu ya beto ke salaka. Ya ke suká ve kuna. Ya ke salá ti beto kuma dyaka pene-pene na Yehova.

Kubanda 2014 tii bubu yayi, beto me basisa banzimbu kuluta 70. Na kati ya banzimbu yayi, ya ke na ba yina me basika na bandinga kuluta 500. Ntangu ya nkaka nge ke yufulaka: ‘Nani ke yidiká banzimbu yango mpe wa’ faso ba ke basisá yawu?’

Mutindu ba ke yidiká banzimbu

Na siège mondial ya Bambangi ya Yehova, ya ke na bampangi 13 yina ke salá samu na kubasisa banzimbu. Ba ke salá na service audio-vidéo. Ni Comité pour l’enseignement ya Kimvuka ya Bantwadisi ke twadisá kisalu ya service audio-vidéo. Bampangi yina ke basisá banzimbu ke yidikak’ yawu mpe ke tulak’ yawu na ba-appareil yina ke vukisá musique, na ndinga ya muntu yina me yimba mpe. Ba ke kanisá mpe na ntangu mpe mutindu kisalu ke salama tii nzimbu ke basika. Comité pour l’enseignement pesá nzila samu bampangi ya nkaka ya yinza nyonso sadisa bampangi yayi. Na kati ya bawu, ya ke na ba yina ke soniká banzimbu, ba yina ke yidiká musique, mpe ba yina ke yimbaka. Bampangi ya kento na ya bakala yayi ke ya kukuluka. Mpe ba ke sosá ve kuzwa nkembo samu na kisalu yina ba ke salaka.

Wa’ faso ba ke yidiká banzimbu? Comité pour l’enseignement ke zonzá na bawu wapi dikanisi ya Biblia ba ke sadila samu na nzimbu. Ba ke zonzá mpe mutindu nzimbu ke vanda: si ya ke vanda ya kyadi, ya kilengi, to yina ke pesa ngolo. Na manima, bampangi yina ke yidiká banzimbu ke tala nani ke yidika musique mpe nani ye sonika nzimbu. Na manima ya kuyidika nzimbu, ba ke filisa yawu na Comité pour l’enseignement samu ba kuwa yawu, mpe ba zonza kisika yina ba ke bongisa. Ba ke landa bamambu yina Comité pour l’enseignement ke zonza na bawu, mpe ba ke yidika nzimbu yina ke basika. Ba yina ke yimbá banzimbu ke salá yawu na bisika mingi. Ya lenda vanda na Béthel to na bayinzo.

Samu na kuyidika nzimbu mpe kusala ba-enregistrement, bampangi ke sadilá ba-appareil ya musique, ba-programme yina ke tambulá na ba-ordinateur, bamicro, mpe ba-appareil mingi ya nkaka. Kaka micro mosi lenda sala lutangu ya 100 dollar. Ba ya nkaka ke lutá 1 000 dollar. Na 2020, beto me basisa 116 000 dollar samu na ba-appareil ya kusala ba-enregistrement.

Yinki beto ke salá samu na kusadila na mayela nyonso makabu yina beto ke kuzwaka? Beto ke sadilá bampangi mingi na yinza nyonso. Ya ke salá ti na Béthel beto vanda ve na nsatu ya bantu mingi na kusala musique. Mpe bambala mingi, beto ke sadilá ba-ordinateur samu na kuyidika musique. Ya ke salá ti beto vanda ve na nsatu ya kuvukisa bantu mingi yina ke sika musique.

“Ya ke sadisá munu na kudyama ve na bamambu”

Bampangi ya kento na ya bakala ke zolá mingi kuwa banzimbu yayi. Tara yina ke vandá na Allemagne me zonza: “Banzimbu ke sadisá munu na kuvutula kizunu na ntima ntangu bamambu mingi ke kwamisá makanisi ya munu. Kuwa yawu na ndinga ya bwala ya munu, ya ke mutindu Yehova ke na simbá munu na maboko ya yandi.” Dimitry mpangi mosi ya Kazakhstan me zonza: “Mu ke zolá kuwa banzimbu yayi samu ti bamambu nyonso yina ba ke zonzá na kati ke ya kukwelana na misiku ya Yehova. Mpe ya ke sadisá munu na kubumba kindiku ya munu na Yehova.”

Delia yina ke vandá na Afrique du Sud me zonza yinki banzimbu ke salak’ yandi na ntima. Yandi me zonza: “Ya ke sadisá munu na kudyama ve na bamambu. Ntangu mu ke vandá na basusi to mu ke kutaná na bamambu ya mpasi, ya ke vandá ntangu nyonso na nzimbu yina ke kwelaná na bamambu ya munu. Ntangu ya nkaka mu ke zwá ngolo kaka na kuwa kubanda ya nzimbu.”

Bampangi mingi ke na nzimbu yina ba ke lutilá kuzola. Lerato yina ke vandá na Afrique du sud me zonza: “ Banzimbu “Juste à notre porte” mpe “Le monde nouveau” ke natá munu na kukanisa na kilumbu yina mu ke yamba mama ya munu yina kufwaka. Bambala nyonso yina mu ke kuwá banzimbu yayi, na yintu ya munu mu ke talá mama ya munu ke na kimá mbangu na maboko ya kufunguka, samu na kwiza bwabana munu.”

Nzimbu mosi sadisá ntwenya mosi ya kento na bwala ya Sri Lanka. Yandi me zonza: “Professeur ya munu ya science zonzilá munu bamambu ya ngolo na mantwala ya bampangi ya lekole, samu mu ke mbangi ya Yehova. Mu kumá na boma, mpe mu zabá ve yinki ya kuzonza. Ntangu mu vutuká na yinzo, mama ya munu zonzá na munu na kuwa nzimbu “Étudier rend fort.” Nzimbu yango sadisá munu na kuzaba ti mu me bonga kusala ba-recherche mpe kuyidama samu na kuzaba yinki ya kuzonza. Kilumbu yina landá, mu kwendá solola na professeur ya munu. Yandi kuwá munu mpe yandi zonzá na munu ti mu me sadisa yandi na kuzaba malongi ya Bambangi ya Yehova. Mu ke na vutulá matondo mingi na kimvuka ya Yehova samu ba ke pesá beto banzimbu yina ke kindisá beto.”

Wapi mutindu beto ke kuzwá mbongo samu na kubasisa banzimbu yayi? Ni na makabu yina beno ke pesá samu kisalu ya Kimfumu kwenda na mantwala. Mingi ya makabu yina beto ke kuzwak’ yawu na nzila ya donate.jw.org. Matondo mingi na makabu yina beno ke pesá na ntima mosi.