Kubasika

35 Na manima Moyize vukisaka kimvuka nyonso ya bantu ya Izraele mpe yandi zonzaka na bawu: “Yayi ni bamambu yina Yehova me tumisa ti beto sala: 2 Bantu lenda sala kisalu na kati ya bilumbu 6, kasi kilumbu ya 7 ke vanda kima ya santu samu na beno. Ya ke vanda saba, kilumbu ya mfunu ya kupema samu na Yehova. Muntu yina ke sala kisalu kilumbu yina, ba ke kufwa yandi. 3 Kisika ni kisika yina beno ke zinga, beno me fwana ve kunamisa tiya na kilumbu ya saba.”

4 Moyize zonzaka dyaka na kimvuka nyonso ya bantu ya Izraele: “Yayi ni mambu yina Yehova me tumisa, 5 ‘Beno katudila Yehova dikabu na kati ya bima ya beno. Bika ti muntu nyonso yina ntima ya yandi me zola, natina Yehova wolo, arza, kwivre, 6 singa ya bleu, singa ya lene ya mbwaki-viole, singa ya mbwaki ya ngolo, singa ya lino ya kitoko, mika* ya nkombo, 7 bampusu ya mbwaki ya dimeme ya bakala, bampusu ya kibulu yina ba ke bokilaka foke, mabaya ya akasia, 8 mafuta samu na bamwinda, kima ya nsunga ya kitoko yina ba ke bokilaka balzame samu na kuyidika mafuta ya santu, mpe samu na ansan ya nsunga ya kitoko, 9 matadi ya oniksi, mpe matadi ya nkaka yina ba ke tula na efode mpe na kitende ya ntulu.

10 “Bika ti ba yina nyonso na kati ya beno yina zaba kusala kisalu mbote-mbote* kwiza, mpe ba sala mambu nyonso yina Yehova me tumisa, 11 ya zola zonza tabernakle na tenta ya yawu mpe lele samu na kufuka yawu, bakroshe ya yawu mpe bakadre ya yawu, bayinti ya yawu, makunzi ya yawu, mpe bivwandulu ya yawu yina ke na mabulu, 12 Sanduku mpe bayinti ya yawu, kitapu mpe rido yina ke kabulaka, 13 mesa na bayinti ya yawu, bisalulu ya yawu nyonso mpe mampa ya kulakisa; 14 kima ya kutudila bamwinda samu na nsemo, mpe bisalulu ya yawu, bamwinda ya yawu mpe mafuta samu na nsemo; 15 mesa ya ansan mpe bayinti ya yawu; mafuta ya santu mpe ansan ya nsunga ya kitoko; lele* samu na kisika ya kukotila ya tabernakle; 16 dikuku ya dikabu ya kuyoka mpe kitalaka ya yawu ya kwivre, bayinti ya yawu mpe bisalulu ya yawu nyonso; ndonga ya nene mpe kivwandulu ya yawu; 17 barido ya lupangu, makunzi ya yawu mpe bivwandulu ya yawu yina ke na mabulu, lele* samu na kisika ya kukotila ya lupangu; 18 bayinti ya nsongi ya tabernakle mpe bayinti ya nsongi ya lupangu na basinga ya yawu; 19 bilele ya kitoko yina ba ke tunga samu na kisalu ya kisika ya santu, bilele ya santu samu na nganga-nzambi Aroni, mpe bilele ya bana ya yandi samu na kusala mutindu banganga-nzambi.’”

20 Na yawu, kimvuka nyonso ya bantu ya Izraele katukaka na mantwala ya Moyize. 21 Na yina, ba yina nyonso ntima ya bawu vanda pesa, mpe ba yina nyonso mpeve ya bawu vanda tinda bawu, kwizaka, mpe ba nataka makabu ya bawu samu na Yehova, makabu yina ba zola sadila samu na tenta ya lukutakanu, samu na kisalu ya yawu nyonso mpe samu na bilele ya santu. 22 Ba vanda bika ve kukwiza, bakento na babakala, konso muntu yina ntima ya yandi zolaka. Ba nataka babarete ya kitoko yina ba ke tulaka na bilele, binzembele, milunga, babiju ya nkaka mpe bima ya wolo ya mutindu nyonso. Bawu nyonso nataka makabu ya bawu* ya wolo na Yehova. 23 Ba yina nyonso vandaka na singa ya bleu, singa ya lene ya mbwaki-viole, singa ya mbwaki ya ngolo, singa ya lino ya kitoko, mika* ya nkombo, bampusu ya mbwaki ya dimeme ya bakala, mpe bampusu ya kibulu yina ba ke bokilaka foke, nataka yawu. 24 Ba yina nyonso zolaka kupesa arza mpe kwivre nataka dikabu samu na Yehova. Ba yina nyonso vandaka na mabaya ya akasia nataka yawu samu na bisalu nyonso.

25 Bakento nyonso yina zabaka kisalu ya kuyidika basinga na maboko, nataka bima yina ba yidikaka: singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko. 26 Mpe bakento nyonso yina zabaka kisalu mbote-mbote, mpe yina ntima ya bawu vanda pesa, yidikaka singa na mika ya nkombo.

27 Mpe bamfumu nataka matadi ya oniksi mpe matadi ya nkaka yina ba zola tula na efode mpe na kitende ya ntulu, 28 kima ya nsunga ya kitoko yina ba ke bokilaka balzame mpe mafuta samu na nsemo mpe samu na kuyidika mafuta ya santu, mpe samu na ansan ya nsunga ya kitoko. 29 Bakento mpe babakala nyonso yina ntima ya bawu vanda nata bawu, pesaka kima samu na kisalu yina Yehova, na nzila ya Moyize, tumisaka ti ba sala. Bantu ya Izraele nataka makabu na luzolo ya bawu mosi na sika ya Yehova.

30 Na manima Moyize zonzaka na bantu ya Izraele: “Beno kuwa. Yehova me soola Bezalele mwana ya Uri, mwana ya Hure ya dibuta ya Yuda. 31 Yandi me fulusa yandi na mpeve ya Nzambi, yandi me pesa yandi ndwenga, mayela, mpe luzabu ya bisalu ya maboko ya mutindu nyonso, 32 samu na kuzaba kusala bizizi ya bima, samu na kusadila wolo, arza mpe kwivre, 33 samu na kuzenga matadi ya ntalu mpe kukangimisa yawu na bima, mpe samu na kusala bima ya kitoko ya mutindu nyonso na mabaya. 34 Mpe yandi me tula na kati ya ntima ya yandi mpe ya Oholiabe, mwana ya Ayisamake ya dibuta ya Dane, mayela ya kulonga bantu ya nkaka. 35 Yandi me fulusa bawu na mayela ya kusala mbote-mbote* bisalu nyonso ya muntu yina ke salaka kisalu ya maboko, ya muntu yina ke tungaka bizizi na balele, ya muntu yina ke yidikaka balele na singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko, mpe kisalu ya mutindu nyonso ya muntu yina ke yidikaka balele. Babakala yayi ke sala bisalu ya mutindu nyonso mpe ba ke bongisa bisalu nyonso ya kuyidika bima.