Kubasika

39 Na singa ya bleu, singa ya lene ya mbwaki-viole mpe singa ya mbwaki ya ngolo, ba yidikaka bilele ya kitoko samu na kisalu ya kisika ya santu. Ba yidikaka bilele ya santu samu na Aroni kaka mutindu Yehova tumisaka Moyize.

2 Yandi yidikaka efode na wolo, singa ya bleu, singa ya lene ya mbwaki-viole, singa ya mbwaki ya ngolo mpe singa ya lino ya kitoko yina me futamaka-futamaka. 3 Ba bulaka manzanza* ya wolo na marto samu na kukumisa yawu makasa ya kupetama, mpe yandi zengaka yawu mutindu basinga yina ba zola vukisa na singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko. Ba tungaka efode na basinga yina. 4 Ba yidikilaka efode bitini ya balele yina ba kangaka na mapeka samu na kuvukisa lele ya mantwala na lele ya manima. 5 Mpe kitende ya luketo yina ba tungaka mpe yina vandaka ya kukangama na efode samu na kusimba yawu, ba salaka yawu na bima ya faso mosi: wolo, singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko yina me futamaka-futamaka, kaka mutindu Yehova tumisaka Moyize.

6 Ba kotisaka matadi ya oniksi na kati ya bisimbilu ya wolo, mpe ba sonikaka bankumbu ya bana ya Izraele na zulu ya yawu, mutindu ba ke kotisaka bisoni na kinyemo.* 7 Yandi tulaka yawu na zulu ya bitini ya lele ya efode yina ke lutaka na mapeka, samu ya vanda matadi ya kubambuka moyo samu na bana ya Izraele, kaka mutindu Yehova tumisaka Moyize. 8 Na manima, yandi salaka kitende ya ntulu. Mutindu efode, ya vandaka kisalu ya muntu yina ke tungaka bizizi na balele. Yandi salaka yawu na wolo, singa ya bleu, singa ya lene ya mbwaki-viole, singa ya mbwaki ya ngolo, mpe singa ya lino ya kitoko yina me futamaka-futamaka. 9 Ntangu ba vanda futika yawu, balweka nyonso vandaka faso mosi. Ba salaka kitende ya ntulu, mpe ntangu ba vanda futika yawu, yinda ya yawu mpe nene ya yawu vandaka diboko mosi ya kufunguka nene.* 10 Na zulu ya yawu, ba salaka milonga yiya ya matadi ya ntalu. Na mulonga ya ntete, ya vandaka na matadi ya rubi, topaze na emerode. 11 Na mulonga ya zole, ya vandaka na matadi ya turkwaze, safire na yasipe. 12 Na mulonga ya tatu, ya vandaka na matadi ya leshʹem,* agate, na ametiste. 13 Mpe na mulonga ya yiya, ya vandaka na matadi ya krizolite, oniksi na jade. Ba kotisaka yawu na bisimbilu ya wolo. 14 Matadi yango vandaka na bankumbu ya bana 12 ya Izraele. Ba salaka bankumbu yango mutindu kinyemo,* mpe konso ditadi vandaka na nkumbu ya dibuta mosi ya mabuta 12 ya Izraele.

15 Na manima, ba yidikaka basinga na wolo yina ba me vukisa na ata kima. Basinga yango vandaka basinga yina ba kangaka zole-zole. 16 Ba salaka bisimbilu zole ya wolo mpe milunga zole ya wolo, mpe ba tulaka milunga zole yina na bansongi zole ya kitende ya ntulu. 17 Na manima, ba lutisaka basinga zole ya wolo na kati ya milunga zole yina vandaka na bansongi ya kitende ya ntulu. 18 Ba kotisaka bansongi zole ya basinga zole na kati ya bisimbilu zole, mpe ba kangaka yawu na mapeka ya lele ya efode, na mantwala. 19 Na manima, ba yidikaka milunga zole ya wolo mpe ba tulaka yawu na bansongi zole ya kitini ya kati ya kitende ya ntulu yina vanda talasana na efode. 20 Ba salaka milunga zole ya nkaka ya wolo, mpe ba tulaka yawu na mantwala ya efode, na yisi ya bitini zole ya lele yina vanda luta na mapeka, pene-pene na kisika yina ya vanda vukana, na zulu ya kitende ya luketo ya efode. 21 Na kumanisa, ba kangaka kitende ya ntulu na singa ya bleu yina vanda luta na milunga ya kitende ya ntulu mpe na milunga ya efode. Ya vanda sala ti kitende ya ntulu bikana kaka na efode, na zulu ya kitende ya luketo yina ba tungaka, kaka mutindu Yehova tumisaka Moyize.

22 Na manima, yandi yidikaka kinkuti yina ke ve na maboko, ya kulwata na yisi ya efode. Ya vandaka kisalu ya muntu yina ke yidikaka balele. Yandi yidikaka yawu nyonso na singa ya bleu. 23 Na kati-kati ya yawu, ya vandaka na dibulu samu na kukotisa yintu, mutindu dibulu ya kinkuti ya kisengo. Ba tungaka zinga-zinga ya dibulu yango, samu ya pasuka ve. 24 Na manima, na kisika yina kinkuti yina ke ve na maboko vanda suka na yisi, ba salaka bambuma ya grenade na singa ya bleu, singa ya lene ya mbwaki-viole mpe singa ya mbwaki ya ngolo, yina ba kangaka kintwadi. 25 Mpe ba salaka bangunga* ya fioti na wolo yina ba me vukisa na ata kima. Ba tulaka bangunga yango na kati-kati ya bambuma ya grenade, zinga-zinga ya kisika yina kinkuti yina ke ve na maboko vanda suka na yisi, na kati-kati ya bambuma ya grenade. 26 Ba tulaka ngunga mosi na mbuma mosi ya grenade, ngunga mosi na mbuma mosi ya grenade, zinga-zinga ya kisika yina kinkuti yina ke ve na maboko vanda suka na yisi, kinkuti yina ba salaka samu na kisalu, kaka mutindu Yehova tumisaka Moyize.

27 Mpe ba salaka basutane na singa ya lino ya kitoko samu na Aroni mpe bana ya yandi. Ya vandaka kisalu ya muntu yina ke yidikaka balele. 28 Ba salaka mpe kitambala na singa ya lino ya kitoko, bima ya kulwata na yintu yina ke bongisaka nzutu na singa ya lino ya kitoko, bakaleson* ya lino yina ba salaka na singa ya lino ya kitoko yina me futamaka-futamaka, 29 mpe kitende ya luketo yina ba tungaka na kuvukisaka singa ya lino ya kitoko yina me futamaka-futamaka, singa ya bleu, singa ya lene ya mbwaki-viole mpe singa ya mbwaki ya ngolo, kaka mutindu Yehova tumisaka Moyize.

30 Na kumanisa, na wolo yina ba me vukisa na ata kima, ba yidikaka kidimbu ya santu ya kukipesa na Nzambi,* mwa dinzanza yina vanda ngenga, mpe ba kotisaka bisoni yayi na kati ya yawu mutindu muntu ke kotisaka bisoni na kinyemo:* “Busantu kele ya Yehova.” 31 Ba kangaka yawu na singa ya bleu samu na kutula yawu na zulu ya kitambala, kaka mutindu Yehova tumisaka Moyize.

32 Na yawu ba manisaka kisalu nyonso ya tabernakle, tenta ya lukutakanu, mpe bantu ya Izraele salaka mambu nyonso mutindu Yehova tumisaka Moyize. Ni mutindu yina ba salaka.

33 Na manima, ba nataka tabernakle na sika ya Moyize, tenta mpe bima ya yawu nyonso: bakroshe ya yawu, bakadre ya yawu, bayinti ya yawu, makunzi ya yawu, mpe bivwandulu ya yawu yina ke na mabulu; 34 lele ya mpusu ya mbwaki ya dimeme ya bakala samu na kufuka tenta, lele ya mpusu ya kibulu yina ba ke bokilaka foke samu na kufuka yawu, rido yina ke kabulaka; 35 sanduku ya Kimbangi, bayinti ya yawu mpe kitapu; 36 mesa, bisalulu ya yawu nyonso mpe mampa ya kulakisa; 37 kima ya kutudila bamwinda yina ba yidikaka na wolo yina ba me vukisa na ata kima, bamwinda ya yawu yina ba tulaka na mulonga, bisalulu ya yawu nyonso mpe mafuta samu na nsemo; 38 mesa ya wolo ya ansan,* mafuta ya santu, ansan ya nsunga ya kitoko, lele* samu na kisika ya kukotila ya tenta; 39 dikuku ya kwivre ya minkayulu mpe kitalaka ya yawu ya kwivre, bayinti ya yawu, bisalulu ya yawu nyonso, ndonga ya nene mpe kivwandulu ya yawu; 40 barido ya ngaanda ya lupangu, makunzi ya yawu mpe bivwandulu ya yawu yina ke na mabulu, lele* ya kisika ya kukotila ya lupangu, basinga ya tenta na bayinti ya yawu ya nsongi, mpe bisalulu nyonso samu na kisalu ya tabernakle, tenta ya lukutakanu; 41 bilele ya kitoko yina ba tungaka samu na kisalu ya kisika ya santu, bilele ya santu samu na nganga-nzambi Aroni, mpe bilele ya bana ya yandi samu na kusala mutindu banganga-nzambi.

42 Bantu ya Izraele salaka kisalu nyonso na kulandaka mambu nyonso yina Yehova tumisaka Moyize. 43 Ntangu Moyize talaka kisalu nyonso yina ba salaka, yandi talaka ti ba salaka yawu kaka mutindu Yehova tumisaka; mpe Moyize sakumunaka bawu.