Kimona-meso ya Yoane

Ntangu ntumwa Yoane vandaka na boloko na kisanga ya Patmose, Yesu lakisaka yandi bimona-meso 16 ya bamambu yina ke kwiza na mantwala. Bimona-meso yango vanda lakisa faso nkumbu ya Yehova ke vanda ya santu, faso Kimfumu ya yandi ke kwiza mpe faso luzolo ya yandi ke lungana na ntoto mutindu na mazulu.

Na Kimona-meso mosi, Yoane talaka Yehova ya kuvanda na kiti ya yandi ya kimfumu ya nkembo na mazulu. Bakuluntu 24 yina vandaka ya kulwata bilele ya mpembe mpe bayimpu ya wolo vandaka ya kuzunga yandi. Bansemo ya kidumu mpe bidumu wakanaka na kisika yina. Bakuluntu 24 fukamaka na mantwala ya Yehova mpe vanda kembila yandi. Na kimona-meso ya nkaka, Yoane talaka nkonga ya bantu yina vanda sambila Yehova, ba katukaka na makanda nyonso, na mabuta nyonso mpe na bayinsi nyonso. Mwana ya Dimeme yina vandaka Yesu, vandaka muvungi mpe yandi vanda nata mameme na bisika ya maza yina ke pesaka luzingu. Na manima ya mwa bantangu, na kimona-meso ya nkaka, Yoane talaka Yesu, yandi bandaka kuyala na bakuluntu 24. Na kimona-meso yina vanda landa, Yoane talaka Yesu vanda nwana na dragoni, yina ke Satana mpe na bampeve ya yandi ya yimbi, mpe yandi losaka bawu na ntoto.

Na manima, Yoane talaka kimona-meso mosi ya kitoko ya mwana ya Dimeme mpe ba 144000 ya kutelama na Mongo ya Siyoni. Yandi talaka mpe mbazi mosi yina vanda pumbuka pene-pene ya ntoto. Yandi vanda zonza na bantu na kuvanda na boma ya Nzambi mpe na kupesa Nzambi nkembo.

Na kimona-meso ya nkaka, Yoane talaka mvita ya Armagedoni. Na kati ya mvita yina, Yesu na basoda ya yandi nungaka yinza ya Satana. Na kimona-meso ya nsuka, Yoane talaka bumosi ya kulunga na mazulu mpe na ntoto. Ba kufwaka Satana na bantu ya yandi. Bantu nyonso, ya vanda na mazulu mpe na ntoto, vanda bakila nkumbu ya Yehova santu mpe ba vanda sambila kaka yandi.