“Bika ti Kimfumu ya nge kwiza”

Yehova pesaka nsilulu yayi: ‘Bidilu, bampasi, bimbevo mpe lufwa ke vanda dyaka ve. Mu ke kusuna mansangasa nyonso na meso ya bawu. Mambu ya yimbi nyonso ya ntama ke zimbana.’

Yehova tulaka Adami na Eva na bilanga ya Edeni. Ba vanda zinga na kizunu mpe na kilengi. Ba zolaka sambila Tata ya bawu ya mazulu mpe kufulusa ntoto na bana ya bawu. Adami na Eva tumamaka ve na Yehova, kasi dikanisi ya Yehova sobaka ve. Na buku yayi beto me longoka ti mambu nyonso yina Nzambi ke pesaka nsilulu ke lunganaka. Kimfumu ya yandi ke nata balusakumunu ya kitoko mpe ya mbote na zulu ya ntoto nyonso, mutindu yandi pesaka nsilulu na Abrahami.

Ntama mingi ve, ba ke kufwa Satana, bambazi ya yimbi mpe bantu nyonso yina ke salaka bamambu ya yimbi. Bantu nyonso ke sambila kaka Yehova. Beto ke bela dyaka ve mpe ke kufwa dyaka ve. Konso kilumbu, beto ke banda kuvumbuka na ngolo nyonso mpe na kilengi ya kuzinga. Ntoto ke kuma paradiso. Muntu nyonso ke kudya madya ya kitoko mpe ke zinga na yinzo ya yandi kukondwa boma. Bantu nyonso ke vanda bantu ya mbote, mpe bantu ya yimbi mpe ya mambu ya ngolo ke vanda dyaka ve. Bibulu ya brusu ke vanda dyaka ve na boma ya beto, beto mpe ke vanda dyaka ve na boma ya bawu.

Ya ke vanda kilengi mingi ntangu Yehova ke banda kuvumbula bantu ya kufwa. Beto ke yamba bantu ya ntama mutindu Abele, Nowe, Abrahami, Sara, Moyize, Rute, Estere mpe Davidi. Kintwadi na bawu, beto ke kumisa ntoto paradiso. Ntangu nyonso beto ke banda kuvandaka na mambu ya kitoko mingi ya kusala.

Yehova zola ti nge vanda kuna. Nge ke longoka na kuzaba yandi na mutindu yina nge vanda kanisa ve. Sala bangolo na kukuma pene-pene na Yehova, banda bubu yayi mpe samu na ntangu nyonso!