Ba me sala nsilulu na Yehova

Pene-pene na bangonda zole na manima ya kubika Ezipte, bana ya Izraele kumaka na Mongo ya Sinayi mpe ba salaka camp. Yehova bokilaka Moyize. Na yawu, Moyize kwendaka na zulu ya mongo. Kuna Yehova zonzaka na yandi: ‘Mu me vuukisa bana ya Izraele. Kana ba tumama na munu mpe ba zitisa misiku ya munu ba ke kuma dikanda ya munu.’ Moyize kwendaka na bana ya Izraele mpe zonzaka na bawu mambu yina Yehova zabisaka yandi. Yinki ba zonzaka? Ba vutulaka: ‘Beto ke sala mambu nyonso yina Yehova ke zonza na beto na kusala.’

Moyize vutukaka dyaka na zulu ya mongo. Kuna, Yehova zonzaka na yandi: ‘Na kati ya bilumbu tatu, mu ke solola na nge. Kebisa bantu na kumeka ve kukwiza na zulu ya Mongo ya Sinayi.’ Moyize kwendaka na bana ya Izraele mpe zonzaka na bawu na kuyidama samu na kuwa Yehova.

Bilumbu tatu na manima, bana ya Izraele talaka nsemo ya tonnerre mpe dituti ya ndombe na zulu ya mongo. Ba kuwaka mpe tonnerre ya ngolo mpe makelele ya mpungi. Na manima Yehova kwizaka na zulu ya mongo na kati ya tiya. Bana ya Izraele kumaka na boma mingi. Na yawu, ba vanda tekita. Mongo ninganaka na ngolo mpe mulinga fukaka yawu. Makelele ya mpungi vanda kuma kaka ngolo. Mpe Nzambi zonzaka: ‘Mu ke Yehova. Beno me fwana kusambila ve banzambi ya nkaka.’

Moyize vutukaka na zulu ya mongo, mpe Yehova pesaka yandi misiku samu na bana ya Izraele na yina me tadila faso ba zola sambila yandi mpe faso ba zola dyatila. Moyize sonikaka misiku yango mpe na manima yandi tangilaka bana ya Izraele yawu. Bana ya Izraele salaka nsilulu yayi: ‘Beto ke sala mambu nyonso yina Yehova me zonza na beto na kusala.’ Ee, ba salaka nsilulu na Nzambi. Kasi ba lungisaka kwandi yawu?