Kulongoka Biblia ke mbote. Ba ya nkaka bandá kusala yawu, kasi na manima, ba bikaka. Ya me kuminá nge mpe na kukanisa ti, ya ke na kima yina lenda sala ti nge bika kulongoka Biblia? Samu na yinki nge me bonga kusala bangolo na kubika ve? Yinki lenda sadisa nge na kubika ve ata bankwamusu?

1. Wa’ faso kulongoka Biblia lenda sadisa nge?

“Mambu ya Nzambi kele moyo mpe ngolo.” (Baebre 4:12) Biblia ke mfunu samu ti ya ke zonzá makanisi ya Nzambi samu na nge. Ya ke sadisa nge na kuzaba mambu mingi, mpe na kuzwa mayela na kivuvu. Ya kulutila mfunu, Biblia ke sadisa nge na kukuma ndiku ya Yehova. Kulongoka Biblia ke bongisa luzingu ya nge.

2. Samu na yinki ya ke mbote na kundima ti matsyeleka ya Biblia ke mfunu mingi?

Matsyeleka yina ke na kati ya Biblia ke muntidu bima ya ntalu. Biblia ke zonzá na beto na “kusumba matsyeleka mpe kutekisa ve yawu ata fioti.” (Bingana 23:23) Kana beto zimbana ve ntalu ya matsyeleka ya Biblia, ya ke sadisa beto na kubika ve ata kima kanga beto nzila na kulongoka Biblia.—Tanga Bingana 2:4, 5.

3. Wapi mutindu Yehova lenda sadisa nge na kubika ve kulongoka Biblia?

Ni Yehova yidiká nge. Yandi ke na ngolo nyonso mpe yandi ke ndiku ya nge. Na yawu, yandi me zola kusadisa nge na kuzaba yandi. Yandi lenda pesa nge “ngolo ya kuzola mpe ya kusala mambu yina yandi ke zolaka.” (Tanga Bafilipi 2:13.) Kana nge ke na lendá dyaka ve kulongoka, to kusadila mambu yina nge ke na longokaka, yandi lenda sadisa nge. Ntangu bankwamusu ke manisa nge ngolo ya kulongoka Biblia, Yehova lenda pesa nge ngolo. Sambila Yehova ntangu nyonso samu yandi sadisa nge na kubika ve kulongoka Biblia.—1 Batesalonika 5:17.

SOSA KUZABA MBOTE-MBOTE

4. Sala ti kulongoka Biblia vanda mosi ya bamambu ya ntete na luzingu ya nge

Ya lenda salama ti nge vanda ve na ntangu mingi na kulongoka Biblia, samu nge ke na bamambu mingi ya kusala. Yinki lenda sadisa nge? Tanga Bafilipi 1:10, mpe na manima beto zonzila byuvu yayi:

• Wapi yina kele “mambu ya mfunu” na luzingu ya nge?

• Wa’ faso nge lenda sala ti kulongoka Biblia kuma mosi ya bamambu ya ntete na luzingu ya nge?

1. Kana nge tula bantoto na kati ya kantine mpe nge sosa kubwela matadi na zulu, matadi ke lunga ve

2. Kana nge banda kutula ntete matadi, na manima nge ke kuzwa kisika ya kutula bantoto mingi. Ntangu nge ke bwela bantoto, ya ke lunga. Mutindu mosi mpe, kana nge tula “mambu ya kulutila mfunu” na kisika ya ntete na luzingu ya nge, nge ke lenda kusala yawu, mpe nge ke kuzwa dyaka ntangu ya kusala bima ya nkaka

Kulongoka Biblia ke lungisaka bansatu ya beto ya kimpeve. Bansatu ya kimpeve awa ke ni kuzaba mpe kusala luzolo ya Nzambi. Tanga Matayi 4:4, mpe na manima beto zonzila kyuvu yayi:

• Wapi yina kele mambu ya kulutila mfunu na luzingu ya muntu? Wa’ faso kulongoka ya nge ya Biblia lenda sadisa nge na kusala yawu?

5. Kubika ve kulongoka Biblia ata na mantwala ya bankwamusu

VIDEO: Yandi kuzwá bambote samu yandi biká ve (5:22)

• Na video, yinki bandiku ya Francesco na mama ya yandi salá, ntangu yandi vandá zonzila bawu mambu yina yandi vandá longoka?

• Wapi bambote yandi kuzwá samu yandi biká ve kulongoka Biblia?

Tanga 2 Timote 2:24, 25, mpe na manima beto zonzila byuvu yayi:

• Yinki dikanda na bandiku ya nge ke na zonzá samu nge ke na longoká Biblia?

• Faso baverse yayi me lakisa yawu, yinki nge lenda sala ntangu bantu ke kwamisa nge samu nge ke na longoká Biblia? Samu na yinki?

6. Vanda na kiminu ti Yehova ke sadisa nge

VIDEO: Yehova ke sadisá beto na kusoba ndyatulu ya beto (3:56)

• Na video yayi, yinki Jim sobaka na luzingu ya yandi samu na kusepelisa Yehova?

• Yinki me simba ntima ya nge na kifwani ya Jim?

Tanga Baebre 11:6, mpe na manima beto zonzila byuvu yayi:

• Verse yayi me zonza ti Yehova ke pesa difuta “na ba yina ke sosaka yandi.” Nge me kanisa ti, kuzwa difuta yina ke lomba bangolo? Samu na yinki?

• Ntangu nge ke salá bangolo samu na kubika ve kulongoka Biblia, yinki ya ke salá na Yehova?

NA BUNKUFI

Ntangu ya nkaka ya lenda vanda mpasi, kasi kulongoka Biblia lenda sadisa nge na kusepela na luzingu ya ntangu nyonso. Kubika ve kutula ntima na Yehova mpe yandi ke sakumuna bangolo ya nge.

Mambu ya kusimba

• Samu na yinki matsyeleka ya Biblia ke kima ya ntalu samu na nge?

• Wapi mutindu nge lenda “zaba mambu ya kulutila mfunu”?

• Samu na yinki nge me bonga kusambila Yehova samu yandi sadisa nge na kubika ve kulongoka Biblia?

SOSA KUZABA DYAKA

Tala bima 4 yina me sadisa bantu mingi, na kuzaba kusadila ntangu ya bawu mbote-mbote.

“ Comment bien gérer son temps ” (Réveillez-vous !, Février 2014)

Kento mosi vandá sala bangolo samu na kusepelisa Nzambi, kasi bakala ya yandi vandá kwamisaka yandi. Tala faso Yehova sadisaka yandi.

Yehova ke pesá beto ngolo ya kunata kilo ya beto ya luzingu (5:05)

Tala bambote yina bakala mosi kuzwaka, samu kento ya yandi biká ve na kulongoka Biblia.

Mu salá nyonso samu na kulakisa ti ya vandá luvunu (6:30)

Bantu ya nkaka ke zonzá ti Bambangi ya Yehova ke mwangisá makanda. Kasi ya ke kwandi ya tsyeleka?

“Bambangi ya Yehova ke mwangisa kwandi makanda to ke tungaka yawu?” (Tanga yawu na jw.org)

Na luzingu ya beto, beto nyonso ke baká mikanu. Mingi ya yawu lenda natina beto bambote to ve, mpe lenda kulisa to kufwa kindiku ya beto na Yehova. Na kifwani, beto ke baká mikanu na yina me tadila kisika yina beto ke vanda, faso beto ke sala samu na kuzwa mbongo mpe kana beto ke kwela to ve. Ntangu beto ke baká mikanu ya mbote, beto lenda vanda na luzingu ya kilengi mpe kusepelisa Yehova.

1. Wapi mutindu nge lenda sadila Biblia samu na kubaka mikanu ya mbote?

Tekila nge baka mukanu, sambila Yehova samu yandi sadisa nge, mpe sosa na Biblia dikanisi ya Yehova samu na mambu yina. (Tanga Bingana 2:3-6.) Na bamambu ya nkaka, bansiku ya Yehova ke pwelele. Kutumama na yawu, ke vanda mbote mingi.

Kasi yinki nge ke sala kana ya kele ve na nsiku ya Biblia yina ke na zonzilá pwelele mambu yina nge fwana kusala? Yehova ke bika ata fioti ve kutwadisa nge “na nzila yina nge fwana tambula.” (Izaya 48:17) Wapi mutindu yandi ke sala yawu? Yandi tulá mambu yina lenda twadisa beto na Biblia. Bamambu yango ke sadisá beto na kuzaba yina Nzambi ke zolá mpe yina yandi ke zolá ve. Bantangu ya nkaka beto lenda zaba yina Yehova ke kanisá to ke zolá, ntangu beto ke tangá masolo ya Biblia. Ni yawu ke sadisa beto na kubaka mukanu yina ke pesa yandi kilengi.

2. Tekila nge baka mukanu, na yinki nge me lunga kukanisa?

Biblia ke zonzá: “Muntu ya mayela ke tadilaka konso kisika yandi ke tulaka dikulu ya yandi.” (Bingana 14:15) Ya zola zonza ti tekila beto baka konso mukanu, beto me bonga kubaka ntangu ya kukanisa mbote-mbote na yawu. Na yawu, beto lenda yufula: ‘Wapi malongi ya Biblia mu lenda sadila na mambu yayi? Ntangu mu ke baka mukanu yayi, mu ke vanda kwandi na kizunu na ntima? Yinki mukanu yina mu ke baka ke sala na bampangi? Ya kulutila mfunu, mukanu yango ke pesa kwandi Yehova kilengi?’—Kulonga Misiku 32:29.

Yehova me lunga kuzonza na beto wapi yina ke mambu ya mbote mpe wapi yina ke mambu ya yimbi. Ntangu beto ke zaba mbote-mbote mambu ya yandi, mpe ke baka mukanu ya kusadila yawu, beto ke bongisa makanisi ya ntima ya beto. Ntima awa, kele ndinga yina ke zonzá na kati ya beto mambu yina ke mbote to ke yimbi. (Baroma 2:14, 15) Kana beto me sadila mambu ya Biblia samu na kubongisa ntima ya beto, ya ke sadisa beto na kubaka mikanu ya mbote.

SOSA KUZABA MBOTE-MBOTE

3. Bika Biblia twadisa nge

VIDEO: Bika Biblia twadisa nge (5:54)

• Wapi dikabu ya kitoko Yehova pesá beto?

• Samu na yinki Yehova pesá beto makoki ya kubaka mikanu samu na beto mosi?

• Yinki yandi pesá beto samu beto baka mikanu ya mbote?

Samu na kutala kifwani mosi ya malongi ya Biblia, tanga Baefeze 5:15, 16. Na manima beto zonzila wa’ faso nge lenda “kusadila mbote ntangu yina Nzambi me pesa” beto samu na . . .

• kutanga Biblia bilumbu nyonso.

• kukuma kento to bakala ya mbote, bibuti mpe mwana ya mbote.

• kukwenda na balukutakanu.

4. Longa ntima ya nge samu na kubaka mikanu ya mbote

VIDEO: “Bumba ntima ya nge” (5:13)

• Na video, yinki mpangi ya beto ya kento me sala samu na kunata ntima ya yandi na kubaka mukanu ya mbote, yina ke sepelisa Yehova?

Samu na yinki beto me bonga ve kulomba na bantu ya nkaka na kubaka mikanu samu na beto? Tanga Baebre 5:14, mpe na manima beto zonzila byuvu yayi:

• Ata ti ya lenda talana pete na kulomba na bantu ya nkaka mambu yina ke mbote to yimbi, kasi yinki beto me lunga kusala beto mosi?

• Yinki ke sadisa nge na kulonga ntima ya nge mpe na kubaka mikanu ya mbote?

5. Zitisa mikanu yina bampangi ke bakaka

Bantu nyonso ke baká ve mikanu faso mosi. Na yawu, wa’ faso beto lenda lakisa buzitu na mikanu ya bampangi? Beto tala bamambu zole:

Mambu 1: Mpangi mosi ya kento yina ke zolá kuzenga basuki mutindu bakala, me kwenda na kimvuka kisika bampangi mingi ya bakento ke zolá ve faso ya kusala yina.

Tanga Baroma 15:1 mpe 1 Bakorinto 10:23, 24, mpe na manima beto zonzila byuvu yayi:

• Wa’ faso baverse yayi lenda sadisa mpangi ya kento yina? Yinki nge ke sala kana nge kele na muntu yina ke na talá yimbi na kusala mambu yina nge ke ve na talá yimbi?

Mambu 2: Mpangi mosi ya bakala zaba ti Biblia ke niminá ve na kunwa malafu, kasi yandi baká mukanu ya kunwá ve yawu. Ba me bokila yandi na kukwenda kudya na bampangi, mpe kisika yina, yandi ke na talá bampangi ke na kunwá malafu.

Tanga Longi 7:16 mpe Baroma 14:1, 10, mpe na manima beto zonzila byuvu yayi:

• Wa’ faso baverse yayi lenda sadisa mpangi ya bakala yina? Yinki nge ke sala kana nge me tala muntu ke na salá mambu yina nge ke talá yimbi?

Yinki nge me bonga kusala samu na kubaka mikanu ya mbote?

1. Lomba na Yehova na kusadisa nge na kubaka mikanu ya mbote.—Zaki 1:5.

2. Sosa na kati ya Biblia mpe na kati ya mikanda ya beto bamambu yina lenda sadisa nge. Nge lenda tala mpe bakristo yina ke ya kuyela na kimpeve.

3. Kanisa na mambu yina mukanu nge ke baka ke sala na nge mosi mpe na bampangi.

NA BUNKUFI

Beto ke baká mikanu ya mbote ntangu beto ke zabá faso Yehova ke na tadilá mambu yango, mpe ntangu beto ke kanisá na yina ya lenda sala na bampangi.

Mambu ya kusimba

• Wa’ faso nge lenda baka mikanu yina ke pesa Yehova kilengi?

• Wa’ faso nge lenda longa ntima ya nge?

• Wapi mutindu nge lenda zitisa mikanu yina bampangi ke bakaka?

SOSA KUZABA DYAKA

Wapi mutindu nge lenda baka mikanu yina ke kulisa kindiku ya nge na Yehova?

“ Prenons des décisions qui honorent Dieu ” (La Tour de Garde, 15 Avril 2011)

Kulisa luzabu ya nge na faso Yehova ke pesá beto malongi.

Yehova ke twadisá bisadi ya yandi (9:50)

Tala bamambu yina sadisá bakala mosi na kubaka mukanu yina vandá mpasi na kubaka.

Yehova ke pesá beto bima nyonso ya mbote (5:46)

Longoka dyaka wa’ faso kusepelisa Yehova ata ntangu nge ke ve na musiku ya pwelele samu na kutwadisa nge na kusala mambu.

“ Vous faut-il un commandement pour tout ? ” (La Tour de Garde, 1^er Décembre 2003)