5. Yina Yehova me lomba na bandiku ya yandi na kusala

Beto ke na bima yina beto ke zolá ti bandiku ya beto sala.

• Yinki nge ke zolá ti bandiku ya nge sala samu na nge?

Tanga 1 Yoane 5:3, mpe na manima beto zonzila kyuvu yayi:

• Yinki Yehova ke zolá ti bandiku ya yandi sala?

Samu na kutumama na Yehova, beto me bonga kusoba ndyatulu ya beto. Tanga Izaya 48:17, 18, mpe na manima beto zonzila kyuvu yayi:

• Samu na yinki Yehova ke na lombá na bandiku ya yandi na kutumama na misiku ya yandi?

Kubanda ntangu yina nge bandá kulongoka kuzaba Nzambi, luzolo ya nge samu na yandi me kula kwandi? Nge ke na nsatu ya kukulisa dyaka kindiku ya nge na yandi? Kana nge sala yawu, Yehova ke zola nge mpe ke kipe nge dyaka ya kulutila. Wa’ faso nge lenda lakisa na Yehova ti nge ke zolaka yandi?

1. Wapi mutindu beto lenda lakisa na Yehova ti beto ke zolaka yandi?

Beto ke lakisa na Yehova ti beto ke zolaka yandi na kutumamá na misiku ya yandi. (Tanga 1 Yoane 5:3.) Yandi ke natá ata muntu na kutumama na yandi na ngolo. Kasi, yandi ke biká mosi na mosi na beto na kusoola na kutumama na yandi to ve. Samu na yinki? Samu Yehova me zola ti beto “kutumama na ntima mosi.” (Baroma 6:17) Ya zola zonza, yandi zola ve ti beto tumama na yandi na bantima zole, to samu ba me lomba beto yawu, kasi samu beto ke zolaka yandi. Bitini 3 na 4 ya buku yayi, ke sadisa nge na kuzaba wapi mutindu nge lenda pesa Yehova kilengi, mpe kumanga kusala mambu yina lenda nyongisa yandi.

2. Samu na yinki ya lenda vanda mpasi na kulakisa luzolo ya beto na Yehova?

“Muntu ya lunungu ke kutanaka na bampasi mingi.” (Nkunga 34:19) Beto nyonso ke nwaná na banzutu ya beto ya masumu. Bantangu ya nkaka ya ke vandá mpasi na kuzwa mbongo, bantu ke salá beto yimbi, mpe beto ke kutaná na bamambu mingi ya nkaka. Ntangu beto ke bwabaná na bankwamusu, ya ke vandá mpasi na beto na kutumama na Yehova. Ni na ntangu yina kusala mambu yina Yehova ke zolá ve, ke kumá pete. Kasi ntangu nge ke sala bangolo na kutumama na Yehova, nge ke lakisa ti nge ke zolaka yandi kulutila bima nyonso. Nge ke lakisa mpe ti nge ke ya kukangama na yandi. Na manima, Yehova mpe ke vanda ya kukangama na nge, mpe yandi ke bika ve nge ata fioti.—Tanga Nkunga 4:3.

4. Sepelisa ntima ya Yehova

Tanga Bingana 27:11, mpe na manima beto zonzila byuvu yayi:

• Yinki ya ke salá Yehova ntangu nge ke salá mambu na mayela nyonso mpe ke tumamá na yandi? Samu na yinki nge me zonza faso yina?

5. Nge lenda vanda ya kukangama na Yehova

VIDEO: Nwanina kiminu ya nge ata na mantwala ya bankwamusu (5:09)

• Ntangu ya nkaka, ya ke vandá kwandi mpasi samu na nge na kuzonzila bantu mambu ya Yehova?

• Na video, yinki sadisá Grayson na kununga boma ya yandi?

Ya ke ve mpasi mingi na kuvanda ya kukangama na Yehova ntangu beto ke zolá mambu yina yandi ke zolá, mpe ke yiná mambu yina yandi ke yinaka. Tanga Nkunga 97:10, mpe na manima beto zonzila byuvu yayi:

• Na nyonso yina nge me longoka na yina me tadila Yehova, wapi yina ke bamambu yina Yehova ke zolaka? Wapi yina ke bamambu yina yandi ke yinaka?

• Wapi mutindu nge lenda longoka kuzola mambu yina ke mbote, mpe kuyina mambu yina ke yimbi?

6. Kutumama na Yehova ke natina beto bambote mingi

Kutumama na Yehova ke vandá kaka mbote ntangu nyonso. Tanga Izaya 48:17, 18, mpe na manima beto zonzila byuvu yayi:

• Nge me kanisa ti Yehova ke zabá ntangu nyonso mambu yina ke mbote samu na beto? Samu na yinki nge me zonza faso yina?

• Kubanda ntangu yina nge bandá kulongoka Biblia, mpe kuzaba Nzambi ya matsyeleka Yehova, wapi bambote nge me kuzwa?

NA BUNKUFI

Nge lenda lakisa ti nge ke zolá Yehova na kutumamá na yandi, mpe na kuvandá ya kukangama na yandi ata na ntangu ya mpasi.

Mambu ya kusimba

• Yinki nge me longoka na kifwani ya Yobi?

• Wa’ faso nge lenda lakisa luzolo ya nge na Yehova?

• Yinki ke sadisa nge na kuvanda ya kukangama na Yehova?

SOSA KUZABA DYAKA

Tala wapi mutindu nge lenda vanda ya kukangama na Yehova mpe na kimvuka.

“Na muntu ya kukwikama, nge ke salá mambu ya kukwikama” (16:49)

Longoka mingi na mambu yina Satana vuniná bantu.

“ L’intégrité de Job ” (La Bible : quel est son message ?, partie 6)

Tala wapi mutindu bana lenda lakisa luzolo ya bawu na Yehova.

Pesa Yehova kilengi (8:16)

Wa’ faso ntwenya lenda lakisa ti yandi ke ya kukangama na Yehova, ata ntangu bantwenya ya nkaka ke sosá kunata yandi na kusala mambu ya yimbi?

Kusala ve bamambu na luyenge samu bampangi ndima nge! (3:59)

Na luzingu ya beto, beto nyonso ke baká mikanu. Mingi ya yawu lenda natina beto bambote to ve, mpe lenda kulisa to kufwa kindiku ya beto na Yehova. Na kifwani, beto ke baká mikanu na yina me tadila kisika yina beto ke vanda, faso beto ke sala samu na kuzwa mbongo mpe kana beto ke kwela to ve. Ntangu beto ke baká mikanu ya mbote, beto lenda vanda na luzingu ya kilengi mpe kusepelisa Yehova.

1. Wapi mutindu nge lenda sadila Biblia samu na kubaka mikanu ya mbote?

Tekila nge baka mukanu, sambila Yehova samu yandi sadisa nge, mpe sosa na Biblia dikanisi ya Yehova samu na mambu yina. (Tanga Bingana 2:3-6.) Na bamambu ya nkaka, bansiku ya Yehova ke pwelele. Kutumama na yawu, ke vanda mbote mingi.

Kasi yinki nge ke sala kana ya kele ve na nsiku ya Biblia yina ke na zonzilá pwelele mambu yina nge fwana kusala? Yehova ke bika ata fioti ve kutwadisa nge “na nzila yina nge fwana tambula.” (Izaya 48:17) Wapi mutindu yandi ke sala yawu? Yandi tulá mambu yina lenda twadisa beto na Biblia. Bamambu yango ke sadisá beto na kuzaba yina Nzambi ke zolá mpe yina yandi ke zolá ve. Bantangu ya nkaka beto lenda zaba yina Yehova ke kanisá to ke zolá, ntangu beto ke tangá masolo ya Biblia. Ni yawu ke sadisa beto na kubaka mukanu yina ke pesa yandi kilengi.

2. Tekila nge baka mukanu, na yinki nge me lunga kukanisa?

Biblia ke zonzá: “Muntu ya mayela ke tadilaka konso kisika yandi ke tulaka dikulu ya yandi.” (Bingana 14:15) Ya zola zonza ti tekila beto baka konso mukanu, beto me bonga kubaka ntangu ya kukanisa mbote-mbote na yawu. Na yawu, beto lenda yufula: ‘Wapi malongi ya Biblia mu lenda sadila na mambu yayi? Ntangu mu ke baka mukanu yayi, mu ke vanda kwandi na kizunu na ntima? Yinki mukanu yina mu ke baka ke sala na bampangi? Ya kulutila mfunu, mukanu yango ke pesa kwandi Yehova kilengi?’—Kulonga Misiku 32:29.

Yehova me lunga kuzonza na beto wapi yina ke mambu ya mbote mpe wapi yina ke mambu ya yimbi. Ntangu beto ke zaba mbote-mbote mambu ya yandi, mpe ke baka mukanu ya kusadila yawu, beto ke bongisa makanisi ya ntima ya beto. Ntima awa, kele ndinga yina ke zonzá na kati ya beto mambu yina ke mbote to ke yimbi. (Baroma 2:14, 15) Kana beto me sadila mambu ya Biblia samu na kubongisa ntima ya beto, ya ke sadisa beto na kubaka mikanu ya mbote.

SOSA KUZABA MBOTE-MBOTE

3. Bika Biblia twadisa nge

VIDEO: Bika Biblia twadisa nge (5:54)

• Wapi dikabu ya kitoko Yehova pesá beto?

• Samu na yinki Yehova pesá beto makoki ya kubaka mikanu samu na beto mosi?

• Yinki yandi pesá beto samu beto baka mikanu ya mbote?

Samu na kutala kifwani mosi ya malongi ya Biblia, tanga Baefeze 5:15, 16. Na manima beto zonzila wa’ faso nge lenda “kusadila mbote ntangu yina Nzambi me pesa” beto samu na . . .

• kutanga Biblia bilumbu nyonso.

• kukuma kento to bakala ya mbote, bibuti mpe mwana ya mbote.

• kukwenda na balukutakanu.

4. Longa ntima ya nge samu na kubaka mikanu ya mbote

VIDEO: “Bumba ntima ya nge” (5:13)

• Na video, yinki mpangi ya beto ya kento me sala samu na kunata ntima ya yandi na kubaka mukanu ya mbote, yina ke sepelisa Yehova?

Samu na yinki beto me bonga ve kulomba na bantu ya nkaka na kubaka mikanu samu na beto? Tanga Baebre 5:14, mpe na manima beto zonzila byuvu yayi:

• Ata ti ya lenda talana pete na kulomba na bantu ya nkaka mambu yina ke mbote to yimbi, kasi yinki beto me lunga kusala beto mosi?

• Yinki ke sadisa nge na kulonga ntima ya nge mpe na kubaka mikanu ya mbote?

5. Zitisa mikanu yina bampangi ke bakaka

Bantu nyonso ke baká ve mikanu faso mosi. Na yawu, wa’ faso beto lenda lakisa buzitu na mikanu ya bampangi? Beto tala bamambu zole:

Mambu 1: Mpangi mosi ya kento yina ke zolá kuzenga basuki mutindu bakala, me kwenda na kimvuka kisika bampangi mingi ya bakento ke zolá ve faso ya kusala yina.

Tanga Baroma 15:1 mpe 1 Bakorinto 10:23, 24, mpe na manima beto zonzila byuvu yayi:

• Wa’ faso baverse yayi lenda sadisa mpangi ya kento yina? Yinki nge ke sala kana nge kele na muntu yina ke na talá yimbi na kusala mambu yina nge ke ve na talá yimbi?

Mambu 2: Mpangi mosi ya bakala zaba ti Biblia ke niminá ve na kunwa malafu, kasi yandi baká mukanu ya kunwá ve yawu. Ba me bokila yandi na kukwenda kudya na bampangi, mpe kisika yina, yandi ke na talá bampangi ke na kunwá malafu.

Tanga Longi 7:16 mpe Baroma 14:1, 10, mpe na manima beto zonzila byuvu yayi:

• Wa’ faso baverse yayi lenda sadisa mpangi ya bakala yina? Yinki nge ke sala kana nge me tala muntu ke na salá mambu yina nge ke talá yimbi?

Yinki nge me bonga kusala samu na kubaka mikanu ya mbote?

1. Lomba na Yehova na kusadisa nge na kubaka mikanu ya mbote.—Zaki 1:5.

2. Sosa na kati ya Biblia mpe na kati ya mikanda ya beto bamambu yina lenda sadisa nge. Nge lenda tala mpe bakristo yina ke ya kuyela na kimpeve.

3. Kanisa na mambu yina mukanu nge ke baka ke sala na nge mosi mpe na bampangi.

NA BUNKUFI

Beto ke baká mikanu ya mbote ntangu beto ke zabá faso Yehova ke na tadilá mambu yango, mpe ntangu beto ke kanisá na yina ya lenda sala na bampangi.

Mambu ya kusimba

• Wa’ faso nge lenda baka mikanu yina ke pesa Yehova kilengi?

• Wa’ faso nge lenda longa ntima ya nge?

• Wapi mutindu nge lenda zitisa mikanu yina bampangi ke bakaka?

SOSA KUZABA DYAKA

Wapi mutindu nge lenda baka mikanu yina ke kulisa kindiku ya nge na Yehova?

“ Prenons des décisions qui honorent Dieu ” (La Tour de Garde, 15 Avril 2011)

Kulisa luzabu ya nge na faso Yehova ke pesá beto malongi.

Yehova ke twadisá bisadi ya yandi (9:50)

Tala bamambu yina sadisá bakala mosi na kubaka mukanu yina vandá mpasi na kubaka.

Yehova ke pesá beto bima nyonso ya mbote (5:46)

Longoka dyaka wa’ faso kusepelisa Yehova ata ntangu nge ke ve na musiku ya pwelele samu na kutwadisa nge na kusala mambu.

“ Vous faut-il un commandement pour tout ? ” (La Tour de Garde, 1^er Décembre 2003)