Yehova ke sadila kimfumu ya yandi, samu na kuyidika bamambu nyonso na zulu ya ntoto. Samu ya ke nsangu ya kulutila mbote, muntu nyonso fwana kuwa yawu. Ni na yawu, Yesu lombá na bilandi ya yandi na kuzonzila nsangu yango na bantu nyonso! (Matayi 28:19, 20) Kasi wa’ faso Bambangi ya Yehova ke landá musiku yayi?

1. Wa’ faso Matayi 24:14 ke na lunganá bubu yayi?

Yesu zonzaka: “Ba ke zabisa Nsangu ya Mbote yayi ya Kimfumu na yinza nyonso.” (Matayi 24:14) Bambangi ya Yehova ke na kilengi mingi na kusala kisalu ya mfunu yayi. Beto ke na zonzilá nsangu ya mbote na bandinga kuluta 1 000 na yinza nyonso! Kisalu ya nene yayi ke lombá ntangu mpe bangolo mingi. Beto ke lendá kusala yawu kaka na ngolo ya Yehova.

2. Wapi bangolo beto ke salá samu na kusamuna?

Beto ke samuná na bisika nyonso yina beto ke kutaná bantu. Faso bakristo ya siècle ya ntete, beto ke samuná “yinzo na yinzo.” (Bisalu 5:42, nwt) Mpe ni na nzila ya yawu, konso mvula beto ke zonzilá mambu ya Yehova na ba millions ya bantu. Samu bantu ke vandá ve ntangu nyonso na bayinzo ya bawu, beto ke samuná mpe na bisika ya nkaka yina beto ke kutaná bawu. Ntangu nyonso beto ke kuzwá bweso ya kuzonzila mambu ya Yehova mpe bansilulu ya yandi na bantu. Beto ke salaka yawu na mbangu nyonso.

3. Banani me bonga kusamuna nsangu ya mbote?

Bakristo nyonso ya tsyeleka me bonga kusamuna nsangu ya mbote. Samu bantu vuuka, na ntima mosi, beto ke salá nyonso samu na kusamuna nsangu ya mbote. (Tanga 1 Timote 4:16.) Ba ke futá ve beto samu na kusala yawu, samu Biblia ke zonzá: “Ata kupesa mbongo, beno me kuzwa […], beno mpe, beno pesa ata kulomba mbongo.” (Matayi 10:7, 8) Ni bantu nyonso ve ke kuwá beto. Kasi beto ke biká ve kusamuna, samu ya ke faso ya beto ya kupesa nkembo na Yehova mpe ya ke sepelisaka yandi.

SOSA KUZABA MBOTE-MBOTE

4. Beto ke salá bangolo samu na kusamuna na bisika nyonso

VIDEO: Kisalu ya kusamuna “tii na kisika ya kuluta ntama na ntoto” (7:33)

• Yinki me simba ntima ya nge na kutala bangolo yina Bambangi ya Yehova ke salá samu na kusamuna?

Tanga Matayi 22:39 mpe Baroma 10:13-15, mpe na manima beto zonzila byuvu yayi:

• Wa’ faso kisalu ya beto ya kusamuna ke lakisá ti beto ke zolá bantu ya nkaka?

• Wa’ faso Yehova ke talá ba yina ke samuná nsangu ya mbote?—Tala verse 15.

5. Beto ke salá kintwadi na Nzambi

Mambu mingi yina beto me kutana na yawu, ke na lakisá ti ni Yehova ke twadisá kisalu ya beto. Na kifwani, na yinsi ya Nouvelle-Zélande mpangi mosi na nkumbu ya Paul, samuná nsangu ya mbote na kento mosi na manima ya midi. Kasi kaka na kubanda ya kilumbu yina, kento yango sambilá Yehova, yandi lombá na Yehova na kufilisa muntu kwiza tala yandi. Mpe Paul me zonza: “bangunga tatu na manima mu kwizá na yinzo ya kento yango.”

Tanga 1 Bakorinto 3:9, mpe na manima beto zonzila kyuvu yayi:

• Wa’ faso bamambu ya mutindu yina lutá na Nouvelle-Zélande, ke na lakisá ti ni Yehova ke na twadisá kisalu ya kusamuna?

Tanga Bisalu 1:8, mpe na manima beto zonzila kyuvu yayi:

• Samu na yinki beto ke na nsatu ya lubakusu ya Yehova samu na kulungisa kisalu yango?

Nge me zaba yawu?

Na balukutakanu ya beto yina ke salamá na kati ya lumingu, beto ke longoká faso ya kusamuna. Kana nge me kwendá na mosi ya yawu, yinki nge me kanisa na mambu yina beto ke longoká kuna?

6. Beto ke tumamá na musiku ya Nzambi ya kusamuna

Na siècle ya ntete bantu ya nkaka sosá kukanga nzila na kisalu ya kusamuna yina bilandi ya Yesu vandá sala. Bakristo ya ntete kwendá tii na mantwala ya luyalu samu na “[. . .] kunwanina Nsangu ya Mbote.” (Bafilipi 1:7) Ni mutindu yina mpe Bambangi ya Yehova ya bubu yayi ke na salaka.a

VIDEO: Ba me kuzwa nzila na mantwala ya luyalu samu na kusamuna (2:28)

Tanga Bisalu 5:27-42, mpe na manima beto zonzila kyuvu yayi:

• Samu na yinki beto lenda bika ata fioti ve kisalu ya kusamuna?—Tala baverse 29, 38, na 39.

NA BUNKUFI

Yesu lombá na bilandi ya yandi na kusamuna nsangu ya mbote na bantu ya makanda, bandinga mpe bayinsi nyonso. Yehova ke na sadisá bisadi ya yandi na kusala kisalu yango.

Mambu ya kusimba

• Wa’ faso ba ke na samuná nsangu ya mbote na yinza nyonso?

• Wa’ faso kisalu ya beto ya kusamuna ke lakisá ti beto ke zolá bantu?

• Nge me kanisa ti kusamuna ke kisalu yina lenda pesa beto kilengi? Samu na yinki?

SOSA KUZABA DYAKA

Tala faso Bambangi ya Yehova ke samuná na bisika yina bantu ke vandá mingi.

Na Paris, ba me yidama na kukwenda samuna na bisika yina bantu ke mingi (5:11)

Yinki Bambangi ya Yehova ke salá samu na kusadisa bantu yina ke kimá bwala ya bawu samu na muvusu to samu na bampasi?

Madya ya kimpeve samu na ba yina me kima babwala ya bawu (5:59)

Tala bambote yina mpangi mosi me kuzwa, samu yandi me lutisa luzingu ya yandi nyonso na kisalu ya kusamuna.

Mu ke na kilengi mingi na kulanda nzila yayi (6:29)

Longoka mingi samu na kuzaba faso beto me nunga na mantwala ya luyalu.

“ Les prédicateurs se défendent devant les tribunaux ” (Le Royaume de Dieu en action !, chapitre 13)

Yesu longá ti bilandi ya yandi fwana kuzwa mbotokolo. (Tanga Matayi 28:19, 20.) Kasi mbotokolo zola zonza yinki? Mpe yinki muntu me bonga kusala samu na kuzwa yawu?

1. Mbotokolo zola zonza yinki?

“Mbotokolo” me katuka na ndinga ya Grec, ya zola zonza “kudyamisa” na kati ya maza. Ntangu Yesu kuzwá mbotokolo, ba kotisaka yandi nyonso na maza ya Yordani, mpe na manima yandi “basikaka na maza.” (Marke 1:9, 10) Faso mosi mpe, ntangu bakristo ya tsyeleka ke kuzwá mbotokolo ba ke dyamisá mpe bawu na kati ya maza.

2. Ntangu muntu ke kuzwá mbotokolo yinki ya ke lakisaka?

Ya ke lakisá ti yandi me kukipesa na Yehova. Kasi wa’ faso muntu ke kukipesá na Nzambi? Tekila yandi kuzwa mbotokolo, yandi ke baka ntangu ya kusambila, ke zonza na Yehova ti yandi ke sadila kaka yandi luzingu ya yandi nyonso. Mpe kusala luzolo ya Yehova ke vanda mambu ya ntete na luzingu ya yandi. Yandi ke soola “kubika kubanza na mambu yina me tadila yandi mosi mpe [. . .] ke landa” malongi ya Yesu na kifwani ya yandi. (Matayi 16:24) Samu yandi me kukipesa na Yehova mpe me kuzwa mbotokolo, bundiku ya yandi na Yehova, mpe na bisadi ya yandi ke kuma dyaka ngolo.

3. Wapi bangolo muntu me lunga kusala samu na kuzwa mbotokolo?

Tekila nge kuzwa mbotokolo, nge me lunga kulongoka mingi na yina me tadila Yehova mpe kukulisa kiminu na yandi. (Tanga Baebre 11:6.) Na yawu, ntangu kuzaba ya nge na kiminu ya nge ke na kulá, luzolo ya nge na Yehova mpe ke kula. Ya tsyeleka nge ke tala na nge mosi ti nge ke banda kuzola kuzonzila mambu ya Yehova na bantu ya nkaka, mpe kulanda misiku ya yandi. (2 Timote 4:2; 1 Yoane 5:3) Ntangu muntu ke kuma ‘na luzingu ya kudedama na ntwala ya Yehova na kusalaka mambu yina ke sepelisaka yandi,’ yandi ke kuma na nsatu ya kupesa luzingu ya yandi na Yehova, mpe kuzwa mbotokolo.—Bakolose 1:9, 10.a

SOSA KUZABA MBOTE-MBOTE

4. Mambu yina mbotokolo ya Yesu lenda longa beto

Tanga Matayi 3:13-17 samu na kuzaba mingi na yina me tadila mbotokolo ya Yesu. Mpe na manima beto zonzila byuvu yayi:

• Yesu vandá kwandi mwana ya fioti ntangu yandi kuzwá mbotokolo?

• Wa’ faso mbotokolo ya yandi salamaka? Ba tulaka yandi kaka maza na zulu ya yintu?

Na manima ya kuzwa mbotokolo, Yesu bandá kisalu ya mfunu yina Nzambi pesaka yandi na zulu ya ntoto. Tanga Luke 3:21-23 na Yoane 6:38, mpe na manima beto zonzila kyuvu yayi:

• Na manima ya kuzwa mbotokolo, wapi kisalu Yesu tulá na kisika ya ntete na luzingu ya yandi?

5. Kukuma tii na mbotokolo ke ve mambu ya mpasi

Dikanisi ya kukipesa na Yehova mpe kuzwa mbotokolo lenda pesa beto boma. Kasi, ntangu kiminu ya nge ke kuma ngolo nge ke lenda na kubaka mukanu ya mfunu yayi. Samu na kutala bifwani ya ba yina salaka yawu, landa VIDEO.

VIDEO: Sala kindiku na Yehova (1:11)

Tanga Yoane 17:3 na Zaki 1:5, mpe na manima beto zonzila kyuvu yayi:

• Yinki lenda sadisa muntu samu yandi bongama na kuzwa mbotokolo?

1. Beto ke kukipesá na Yehova, ntangu beto ke zonzá na yandi ti beto ke sadila kaka yandi luzingu ya beto nyonso

2. Ntangu beto ke kuzwa mbotokolo, beto ke lakisa na meso ya bantu nyonso ti beto kukipesá na Nzambi

6. Mbotokolo ke salá ti beto kota na dikanda ya Yehova

Ntangu beto ke kuzwa mbotokolo, beto ke kota na dikanda ya Yehova ya yinza nyonso. Ata bisika yina beto kele, mpe bandinga yina beto ke zonzá, beto nyonso ke kwikilá na mambu mosi mpe ke landá misiku mosi. Tanga Nkunga 25:14 na 1 Piere 2:17, mpe na manima beto zonzila kyuvu yayi:

• Wapi mutindu mbotokolo ke bongisá bundiku ya beto na Yehova mpe na bisadi ya yandi ya nkaka?

NA BUNKUFI

Yesu longá ti bilandi ya yandi fwana kuzwa mbotokolo. Tekila muntu kuzwa mbotokolo, yandi me bonga kukulisa kiminu ya yandi na Yehova, kutumama na misiku ya yandi, mpe kukipesa na Yehova.

Mambu ya kusimba

• Mbotokolo kele yinki, mpe samu na yinki ya ke mfunu?

• Ntangu muntu ke kuzwá mbotokolo yinki ya ke lakisaka?

• Yinki muntu me bonga kusala tekila yandi kukipesa na Yehova mpe kuzwa mbotokolo?

SOSA KUZABA DYAKA

Tala yinki zola zonza mbotokolo mpe yinki ya kele ve.

“Mbotokolo zola zonza Yinki?” (Tanga yawu na jw.org)

Tala dyaka mambu yina muntu me lunga kusala tekila yandi kuzwa mbotokolo.

“Luzolo na kifu ya kutondá Yehova ke nata nge na bateme” (Yinzo ya Kengidi, Mars 2020)

Tala faso bakala mosi baká na ntima nyonso mukanu ya kuzwa mbotokolo.

“ Ils voulaient que je découvre la vérité par moi-même ” (La Tour de Garde, 1^er Février 2013)

Tala samu na yinki mbotokolo ke mukanu mosi yina ke natina nge bambote, mpe faso nge lenda bongama samu na kubaka yawu.

“ Devrais-je me faire baptiser ? ” (Les jeunes s’interrogent. Réponses pratiques [Volume 2], chapitre 37)