KILESO 28

Vutula matondo na yina Yehova na Yesu salá samu na nge

Mutindu ya ke na talanaka na mukanda

Yinki ya ke salá nge ntangu mosi ya bandiku ya nge ke pesá nge dikabu ya kitoko? Ntembe ve, ya ke pesá nge kilengi mingi, mpe nge ke vandá na nsatu ya kulakisa yandi ti nge me sepela na yawu. Yehova na Yesu mpe pesá beto dikabu mosi ya nene yina nabunu beto kuzwa: munkayulu ya Yesu. Na yawu, wa’ faso beto lenda vutula bawu matondo samu na dikabu yango?

1. Wapi yina ke mosi ya bafaso ya kuvutula matondo na yina Nzambi na Kristo salá samu na beto?

Biblia ke zonzá ti “konso muntu yina ke kwikila [na Yesu]” ke zinga ntangu nyonso. (Yoane 3:16) Yinki zola zonza kukwikila? Ya zola zonza ve kaka kundima Yesu. Kasi ya zola zonza mpe kulakisa kiminu ya beto na mikanu yina beto ke baká mpe na mambu yina beto ke salaka. (Zaki 2:17) Ntangu beto ke lakisá kiminu ya beto na ndyatulu ya beto mpe na nzonzolo ya beto, bundiku ya beto na Yesu mpe na Tata ya yandi, Yehova, ke kulaka.—Tanga Yoane 14:21.

2. Wapi kilumbu ya mfunu lenda sadisa beto na kuvutula matondo na yina Yehova na Yesu salaka?

Na nkokila yina tekilá lufwa ya yandi, Yesu zonzá na bilandi ya yandi na kubambukila lufwa ya yandi. Biblia ke bokilaka yawu “madya ya Mfumu.” Beto me zabila mpe yawu na nkumbu ya ‘Kubambuka moyo lufwa ya Yesu’ (Mémorial). Ya ke kilumbu mosi ya mfunu mingi. (1 Bakorinto 11:20) Na kusalá faso yina, Yesu zolá ti bantumwa ya yandi mpe bakristo nyonso ya tsyeleka yina zolá kwiza na manima, bambukila moyo ti Yesu pesá luzingu ya yandi samu na bantu. Ni na yawu Yesu pesá musiku: “Beno sala mutindu yayi samu na kubambuka munu moyo.” (Luke 22:19) Ntangu nge ke salá bangolo samu na kuvukana kintwadi na bampangi kilumbu ya Kubambuka moyo lufwa ya Yesu, nge ke lakisá ti nge ke na vutula matondo, samu na luzolo ya nene yina Yehova na Yesu ke na yawu samu na nge.

SOSA KUZABA MBOTE-MBOTE

Tala bafaso ya nkaka ya kuvutula matondo na Yehova mpe na Yesu na luzolo ya bawu samu na beto. Tala mpe samu na yinki Kubambuka moyo lufwa ya Yesu ke mfunu mingi.

3. Yina beto lenda sala samu na kuvutula matondo

Kanisa ti nge vandá dyama na maza, mpe muntu mosi me kwiza vuukisa nge. Nge lenda zimbana kwandi yina yandi me sala samu na nge? To nge ke sala nyonso samu na kuvutula yandi matondo samu yandi me vuukisa luzingu ya nge?

Ni Yehova muntu me vuukisa luzingu ya beto. Tanga 1 Yoane 4:8-10, mpe na manima beto zonzila byuvu yayi:

Samu na yinki munkayulu ya Yesu kele dikabu mosi ya nene?
Ntangu nge ke na kanisá na yina Yehova na Yesu salá samu na nge, ya ke na salá nge yinki?

Wa’ faso beto lenda lakisa ti beto ke na vutulá matondo na yina Yehova na Yesu me sala samu na beto? Tanga 2 Bakorinto 5:15 na 1 Yoane 4:11; 5:3. Na manima ya kutanga mosi na mosi ya baverse yayi, beto zonzila kyuvu yayi:

Mutindu baverse yina beto me tanga me lakisa yawu, wa’ faso beto lenda vutula matondo na Yehova mpe na Yesu?

4. Landa kifwani ya Yesu

Faso ya nkaka ya kuvutula matondo, ni ya kulanda kifwani ya Yesu. Tanga 1 Piere 2:21, mpe na manima beto zonzila kyuvu yayi:

Na wapi mutindu beto lenda landa mbote-mbote kifwani ya Yesu?

Yesu ke na tangá mambu ya Nzambi na kati ya mukanda. — Yesu vanda zolá mambu ya Nzambi, yandi vanda samuná nsangu ya mbote, mpe vandá sadisá bantu

Yesu ke na sololá na kento mosi ya Samaria, pene-pene na dibulu ya maza. — Yesu vanda zolá mambu ya Nzambi, yandi vanda samuná nsangu ya mbote, mpe vandá sadisá bantu

5. Vanda na kilumbu ya Kubambuka moyo lufwa ya Yesu

Na kuzaba faso Madya ya Mfumu salamá mbala ya ntete, tanga Luke 22:14, 19, 20. Mpe na manima beto zonzila byuvu yayi:

Wapi mutindu Madya ya Mfumu salamaka?
Dimpa na vinu ke na fwanisá yinki?—Tala baverse 19 na 20.

Yesu zolá ti mbala mosi na mvula, na kilumbu ya lufwa ya yandi, bilandi ya yandi bambukila yandi moyo. Ni na yawu mpe, Bambangi ya Yehova ke vukaná mbala mosi na mvula samu na Kubambuka moyo lufwa ya Yesu. Samu na kuzaba dyaka mingi na yina me tadila lukutakanu ya mfunu yayi, tala VIDEO. Mpe na manima beto zonzila kyuvu yina ke landa.

VIDEO: Beno bambuka lufwa ya Yesu (1:41)

Foto ya video ‘Beno bambuka lufwa ya Yesu.’ Bambangi ya Yehova me vukana na nkokila ya kilumbu ya lukutakanu ya Madya ya Mfumu.

Wa’ faso lukutakanu ya Kubambuka moyo lufwa ya Yesu ke salamaka?

Ndonga ya dimpa yina ke ve na levure mpe kopo ya vinu.

Dimpa na vinu kele bifwani. Dimpa ke fwanisá nzutu ya Yesu yina vandá ve na disumu mpe yina yandi pesá na munkayulu samu na beto. Vinu ke fwanisá menga ya yandi

Ba ke na lutisá vinu na nkokila ya kilumbu ya lukutakanu ya Madya ya Mfumu.

BANTU YA NKAKA KE ZONZAKA: “Kana nge me ndima Yesu na luzingu ya nge, nge me vuuka ya mbala mosi.”

Wapi mutindu nge lenda sadila Yoane 3:16 mpe Zaki 2:17 samu na kulakisa ti kundima Yesu me lunga ve?

NA BUNKUFI

Beto lenda lakisa ti beto ke na vutulá matondo na yina Yesu salá samu na beto, na kukwikilá na yandi mpe na kuvandá na lukutakanu ya kilumbu ya Kubambuka moyo lufwa ya yandi.

Mambu ya kusimba

Yinki zola zonza kukwikila na Yesu?
Wa’ faso nge lenda lakisa ti nge ke na vutulá matondo na yina Yehova na Yesu salá samu na nge?
Samu na yinki ya ke mfunu mingi na kuvandaka na lukutakanu ya Kubambuka moyo lufwa ya Yesu?

Sonika kilumbu yina kileso me manisa:

Yina nge lenda sala

Vanda na lukutakanu ya Kubambuka moyo lufwa ya Yesu yina ke na kwizaka. Yufula na muntu yina ke longá nge Biblia kilumbu yina ya ke vanda mpe sonika yawu na kisika yina ke sadisa nge na kuzimbana ve kilumbu yango.

Mambu ya nkaka ya kusala:

Your other goal

SOSA KUZABA DYAKA

Yinki lufwa ya Yesu ke na natá beto na kusala?

Yandi pesá nzutu ya yandi samu na kupesa Yehova lukumu (9:28)

Longoka dyaka yinki ke kiminu, mpe faso beto lenda kumisa yawu ngolo.

“ Exerce ta foi dans les promesses de Jéhovah ” (La Tour de Garde, Octobre 2016)

Tanga faso luzingu ya kento mosi sobá ntangu yandi kwizá zaba yinki munkayulu ya Yesu zola zonza samu na yandi.

“ La Bible transforme des vies ” (La Tour de Garde, 1^er Août 2011)

Tala samu na yinki kaka bantu fioti ke kudyaka dimpa mpe ke kunwaka vinu na lukutakanu ya Kubambuka moyo lufwa ya Yesu.

“Samu na yinki Bambangi ya Yehova ke salá ve lukutakanu ya Madya ya Mfumu mutindu mabuundu ya nkaka” (Tanga yawu na jw.org)