2. Yinki Biblia ke zonzá na yina me tadila Yehova?

Bantu ke sambilá banzambi mingi. Kasi, Biblia ke zonzá ti kaka ni Yehova ke Nzambi ya tsyeleka. Samu na yinki? Samu ti, kaka ni Yehova ke mfumu ya kulutila bamfumu, mpe kaka ni yandi kele “Muntu ya Kulutila Zulu na ntoto ya mvimba.” (Tanga Nkunga 83:18.) Dyaka, ni yandi ke ‘Muntu ya Ngolo-Nyonso’ samu ti, kaka ni yandi ke na ngolo ya kusala bima nyonso yina yandi zola. Ni yandi “yidikaka bima nyonso,” ya vanda na zulu mpe na ntoto. (Luzabusu 4:8, 11) Biblia ke zonzá mpe ti, katuka bamvula na bamvula tii bamvula na bamvula, kaka Yehova kele mpe yandi ke vanda kaka.—Nkunga 90:2.

Beto me bonga kuzola mpe kusambila kaka Yehova samu ti ni yandi yidikaka beto. (Luzabusu 4:11) Na yawu, beto zolá sadila ve biteki to bima ya nkaka samu na kusambila yandi.—Tanga Izaya 42:8.

Faso ya beto ya kusambila me bonga kuvanda “ya santu mpe yina Yehova ke ndimaka.” (Baroma 12:1, nwt-MK) Ya zola zonza ti beto zolá tumama na misiku ya yandi. Na kifwani, ba yina ke zolá Yehova ke tumamá na misiku yina me tadila makwela, mpe ke losá bima ya yimbi faso tabaka, cigarette, dyamba mpe kunwa malafu mingi.a