Campagne ya nene samu na kubanda kulongoka Biblia na bantu na ngonda ya septembre

Na ngonda ya septembre beto ke sala bangolo samu na kubanda kulongoka Biblia na bantu na nzila ya mukanda Sepela na luzingu ya ntangu nyonso! Beto lenda sola kuvanda pionnier auxiliaire yina ke pesá ba-heure 30 na nsuka ya ngonda. Wapi mutindu beto lenda tula diboko na campagne ya nene yayi?

• Na kukutana ya mbala ya ntete: Sadila mambu yina ke na manima ya mukanda samu na kusadisa muntu na kusepela na yawu. Lakisa faso ke lutilá kulongoka ya Biblia. Kuzimbana ve ba yina ndimá nsangu yina nge natiná bawu, mpe vutuka kutala bawu. Ata ba mangá kulongoka Biblia na ntama, ba lenda sepela na faso ya beto ya malu-malu ya kulongoka na bantu mpe na mukanda ya beto ya malu-malu. Beto bika ve mikanda na bayinzo yina beto ke kutana ve bantu, beto ke tula ve yawu na ba lettre yina beto ke sonika na ba yina sepelá ve na disolo ya beto. Comité de service lenda sola bilumbu ya nkaka na ngonda ya septembre samu na balukutakanu ya kusamuna.

• Bafaso ya nkaka ya kusala: Kana kimvuka ya beno ke sadilá présentoir, beno tula mukanda Sepela na luzingu ya ntangu nyonso! kisika bantu ke tala yawu. Zonza na ba yina me ndima mukanda yayi ti beto lenda longoka mpe Biblia na bawu ya mpamba. Na bunkufi, lakisa mpe faso kulongoka ya Biblia ke lutilá ntangu nge ke na sololá na muntu, to yidika bamambu samu na kusala yawu kilumbu ya nkaka. Mpangi yina ke twadisá kisalu ya kusamuna ke yidika bamambu samu na kufidisa bampangi yina me lunga na bisika ya bisalu, mpe kulomba bantu kana ba me zola kulongoka Biblia. Nge lenda lomba mpe na bampangi ya nge ya kisalu, to na bantu yina nge ke zonzilá mambu ya Nzambi na nzila, kana ba zola kulongoka Biblia.

Yesu tumisá beto na “kukumisa bantu balongoki,” na “kulonga bawu.” (Mt 28:19, 20) Bika campagne ya nene yayi ya mukanda Sepela na luzingu ya ntangu nyonso! sadisa beto na kulungisa kisalu yango.