Vanda ya kundima ti Yehova ke vuukisa beto ntangu yandi ke kufwa yinza yayi

Na mwa ntangu fioti, ntima ya yinda yina Yehova ke lakisá na yinza yayi ke suka. Ba ke kufwa mabuundu nyonso ya luvunu. Na manima, makanda ke vukana samu na kunwanisa dikanda ya Yehova. Mpe Yehova ke kufwa bantu ya yimbi na Armagedoni. Bakristo ke na vingilá na ntima nyonso bamambu ya mfunu yayi.

Beto zaba ve mbote-mbote bamambu nyonso na yina me tadila mpasi ya nene. Na kifwani, beto zaba ve wapi kilumbu ya ke banda. Beto zaba ve wapi bamambu ke nata bamfumu ya makanda na kunwanisa mabuundu ya luvunu. Beto zaba ve bantangu yinkwa bamfumu ya makanda ke nwanisa dikanda ya Yehova, to yinki ke salama na kati ya bantangu yina. Mpe beto zaba ve yinki Yehova ke sadila samu na kufwa bantu ya yimbi na Armagedoni.

Kasi, Biblia ke zonzilá beto bamambu nyonso yina beto ke na nsatu ya kuzaba samu na kuvanda na bukindi mpe kuvanda na kiminu ti Yehova ke vuukisa beto. Na kifwani, beto zaba ti beto ke na zingá na nsuka ya “bilumbu ya nsuka.” (2Ti 3:1) Beto zaba ti Yehova ke ‘kumisa nkufi’ bantangu yina bamfumu ya yinza ke nwanisa mabuundu ya luvunu, samu ti ba kufwa ve dibuundu ya tsyeleka. (Mt 24:22) Beto zaba ti Yehova ke vuukisa dikanda ya yandi. (2Pi 2:9) Mpe beto zaba ti muntu yina Yehova me soola samu na kufwa bantu ya yimbi mpe kuvuukisa kimvuka ya nene ya bantu ke na lunungu mpe ngolo.—Luz 19:11, 15, 16.

Bamambu yina ke kwiza na mantwala ke nata bantu na “kufwa na boma.” Kasi ntangu beto ke tangá mpe beto ke yindulá na bamambu yina Yehova salá na ntama samu na kuvuukisa bisadi ya yandi, mpe na bamambu yina yandi me zabisa beto samu na bilumbu yina ke kwiza, beto lenda ‘telama mpe kutala na zulu,’ na kiminu ti ntangu yina Nzambi ke vuukisa beto me kuma pene-pene.—Lk 21:26, 28.