Mbuluku ya Balaami me zonza

Bana ya Izraele vanda me lutisa bamvula pene-pene na 40 na ntoto ya kuyuma. Ba vanda me nunga bambanza mingi ya ngolo. Awa, ntangu ba tulaka camp ya bawu na Moabi, na esti ya maza ya Yordani, ya kumaka ntangu samu na bawu na kukota na ntoto ya nsilulu. Balaki, mfumu ya Moabi, vandaka na boma mingi ti bana ya Izraele baka bwala ya yandi. Na yawu, yandi bokilaka bakala mosi na nkumbu ya Balaami, na kukwiza na Moabi mpe na kuloka bana ya Izraele.

Kasi Yehova zonzaka na Balaami: ‘Nge fwana kuloka ve bana ya Izraele.’ Na yawu, Balaami mangaka kukwenda. Mfumu Balaki bokilaka dyaka yandi mpe pesaka yandi nsilulu ya kupesa yandi nyonso yina yandi ke na yawu nsatu. Kasi, Balaami mangaka. Na manima Nzambi zonzaka na yandi: ‘Nge lenda kwenda, kasi nge lenda zonza kaka mambu yina mu ke zonza na nge na kuzonza.’

Balaami bakaka mbuluku ya yandi mpe kwendaka na Moabi na sude. Yandi vanda kanisa kuloka bana ya Izraele, ata ti Yehova zonzaka na yandi na kusala ve yawu. Mbazi ya Yehova basikilaka yandi bambala tatu na nzila. Balaami vanda lenda ve kutala mbazi, kasi mbuluku ya yandi vanda tala mbazi. Mbala ya ntete mbuluku bikaka nzila mpe kwendaka na matiti. Mbala ya zole yandi kwendaka kangama na kibaka ya matadi, mpe nyemaka dikulu ya Balaami na kibaka yango. Mbala ya nsuka mbuluku lalaka na kati-kati ya nzila. Bambala nyonso tatu yayi, Balaami vanda bula mbuluku yinti.

Na manima ya mbala ya tatu, Yehova salaka ti mbuluku zonza. Mbuluku yufulaka Balaami: ‘Samu na yinki nge ke na bikaka ve kubula munu?’ Balaami zonzaka: ‘Nge ke na basisaka munu zoba. Kana mu vandaka na mbele ya yinda mu zolaka kufwa nge.’ Mbuluku zonzaka: ‘Banda ntama mu ke mbuluku ya nge. Nge me talaka munu na kusala mambu ya faso yayi?’

Na manima Yehova bikaka Balaami tala mbazi. Mbazi zonzaka na Balaami: ‘Yehova kebisaka nge na kuloka ve Izraele.’ Balaami vutulaka: ‘Mu me sala mambu ya yimbi. Mu ke vutuka na yinzo.’ Kasi, mbazi zonzaka na yandi: ‘Nge lenda kwenda na Moabi, kasi nge lenda zonza kaka mambu yina Yehova ke zonza na nge na kuzonza.’

Balaami bendaka kwandi kileso na mambu yayi? Ve. Na manima ya mambu yayi, Balaami mekaka kuloka Izraele bambala tatu, kasi bambala nyonso yina yandi vanda sala yawu, Yehova vanda nata yandi na kusakumuna bana ya Izraele. Na manima, bana ya Izraele kwendaka nwanisa Moabi mpe ba kufwaka Balaami. Ya zolaka vanda kwandi ve mambu ya mbote kana Balaami kuwaka Yehova mbala ya ntete?