Bantu ya Izraele yina kwizaka tala bwala ya Yeriko na mansweki, kwizaka na yinzo ya kento mosi na nkumbu ya Rahabi. Ntangu mfumu ya bwala ya Yeriko kuwaka yawu, yandi filisaka basoda na yinzo ya kento yina. Rahabi bumbaka babakala zole yayi na zulu ya yinzo ya yandi, mpe yandi lakisaka basoda ya mfumu nzila ya nkaka. Yandi zonzaka na bantu yina kwizaka tala bwala na mansweki: ‘Mu ke sadisa beno samu mu zaba ti Yehova ke na beno mpe ti beno ke baka mbanza yayi. Mulemvo beno sala munu nsilulu ti ntangu beno ke kwiza beno ke kufwa ve dikanda ya munu.’

Ba vutulaka: ‘Beto ke sala yawu, ata muntu mosi ve yina ke vanda na yinzo ya nge ke kufwa’. Ba bwelaka: ‘Kanga singa ya mbwaki na nela (fenêtre) ya nge mpe dikanda ya nge ke vuuka.’

Rahabi sadilaka singa samu na kubasisa na nela, bantu yina kwizaka tala bwala na mansweki. Ba kwendaka bumbana na bamongo bilumbu tatu tekila ba vutuka na sika ya Yozue. Na manima, bantu ya Izraele sabukaka maza ya Yordani mpe ba bandaka kuyidama samu na kubaka yinsi yina. Yeriko vandaka bwala ya ntete yina ba bakaka. Yehova zonzaka na bawu na kutambula na kuzungaka mbanza ya Yeriko mbala mosi na kilumbu na kati ya bilumbu 6. Na kilumbu ya 7, ba tambulaka na kuzungaka mbanza bambala 7. Mpe banganga-nzambi bulaka bampungi mpe basoda gangaka na ndinga ya ngolo. Na yawu, bibaka ya bwala kubwaka. Kasi yinzo ya Rahabi yina vandaka ya kukangama na kibaka ya mbanza, kubwaka ve. Rahabi na dikanda ya yandi vuukaka samu ba vandaka na kiminu na Yehova.

Bantu ya babwala ya nkaka na Kanana kuwaka mambu yina salamaka na Yeriko. Bamfumu ya babwala yina bakaka mukanu ya kuvukana samu na kunwanisa bana ya Izraele. Kasi, bantu ya Gibeoni bakaka mukanu ya nkaka. Ba lwataka bilele ya kubeba, ba kwizaka na sika ya Yozue mpe ba zonzaka: ‘Beto me katuka na bwala mosi ya ntama. Beto me kuwa nsangu ya Yehova mpe nyonso yina yandi me sala samu na beno na Ezipte mpe na bwala ya Moabi. Sala beto nsilulu ti beno ke nwanisa ve beto, mpe beto ke kuma bangaamba ya beno.’

Yozue ndimaka mpe yandi zonzaka ti ba ke nwanisa ve bawu. Na manima ya bilumbu tatu, yandi kwizaka zaba ti bwala ya bawu vandaka pene-pene. Ba vandaka kaka bantu ya Kanana. Yozue yufulaka bantu ya Gibeoni: ‘Samu na yinki beno me vuna beto?’ Ba zonzaka na yandi: ‘Beto vandaka na boma! Beto zabaka ti Yehova Nzambi ya beno ke na nwanaka samu na beno. Mulemvo kufwa ve beto.’ Yozue zitisaka nsilulu ya yandi mpe yandi kufwaka ve bawu.

Ntangu fioti na manima, bamfumu 5 ya Kanana na basoda ya bawu kwendaka nwanisa bantu ya Gibeoni. Yozue na basoda ya yandi tambulaka mpimpa ya muvimba samu na kusadisa bantu ya Gibeoni. Ba bandaka kunwana na suka. Bantu ya Kanana bandaka kukima na bisika nyonso. Kasi Yehova salaka ti matadi ya nene kubwa na zulu ya bawu. Yozue lombaka na Yehova na kutelemisa ntangu kaka kisika mosi. Samu na yinki Yozue lombaka na Yehova na kutelemisa ntangu, ata ti yandi zabaka ti mambu ya mutindu yayi vandaka nabunu ya salama? Ya ke samu yandi vandaka na kiminu na Yehova. Ntangu vanda ngenga kaka tii ntangu bana ya Izraele nungaka bamfumu ya Kanana na basoda ya bawu.