Beto tatamana na ‘kukindisa bampangi’

1. Faso me zonza yawu 1 Batesalonika 5:11, na wapi kisalu beto nyonso ke tulá diboko?

NGE me salá na kimvuka ya nge samu na kutunga to kubongisa yinzo ya Kimfumu? Kana ni yawu, nge lenda zimbana ve lukutakanu ya ntete yina beno salá kuna ntangu kisalu manisaka. Beno vutulá matondo mingi na Yehova. Ntangu ya nkaka nge dilá na kilengi, mpe nge vandá lembana kuyimba nzimbu ya ntete ya lukutakanu. Faso ya mbote yina beto ke tungá bayinzo ya Kimfumu ke pesá nkembo na Yehova. Kasi beto ke pesá yandi nkembo ya kulutila ntangu beto ke salá kisalu ya nkaka ya kutunga. Kisalu yina me lutila mfunu na kutunga bayinzo. Ya ke kisalu ya kukindisa to kutunga kiminu ya bantu yina ke kwizá na bayinzo ya Kimfumu. Ni na kisalu yina Polo vandá kanisa ntangu yandi soniká bamambu yina ke na 1 Batesalonika 5:11, verse yina ke twadisá disolo yayi.—Tanga.

2. Yinki beto ke zonzila na disolo yayi?

² Ntumwa Polo ke kifwani ya mbote ya muntu yina zabá kukindisa bampangi. Yandi vandá na kyadi mingi samu na bampangi. Na disolo yayi, beto ke tala wa’ faso yandi sadisá bampangi ya yandi ya kento na ya bakala 1) na kukanga ntima na kati ya bampasi, 2) na kuzinga na kati ya kizunu na bampangi, mpe 3) na kukumisa ngolo kiminu ya bawu na Yehova. Beto tala mutindu beto lenda landa kifwani ya yandi mpe kukindisa bampangi ya beto.—1 Ko. 11:1.

POLO SADISÁ BAMPANGI YA YANDI NA KUKANGA NTIMA

3. Na wapi mutindu Polo vandá natá luzingu ya yandi?

³ Polo vandá zola mingi bampangi ya yandi. Bamambu ya mpasi yina bampangi vandá kutana na yawu, yandi mpe kutaná na yawu. Na yawu, yandi zabá kulakisa bawu ntima ya kyadi mpe kuvanda na kisika ya bawu. Ntangu mosi, Polo vandá dyaka ve na mbongo, mpe yandi zolá sosa kisalu samu na kukipe bansatu ya yandi mpe ya ba yina vandá tambulá na yandi. (Bis. 20:34) Polo zabá kuyidika batenta. Na yawu, ntangu yandi kumá na bwala ya Korinto, yandi salá na Akila na Prisila yina mpe vandá yidiká batenta. Kasi “konso kilumbu ya saba” yandi vandá samuná na bazwife mpe na bagreke. Na manima, ntangu Silasi na Timote kumá na Korinto, “Polo bandaka na kulutisa ntangu nyonso ya yandi na kulongisa Mambu ya Nzambi.” (Bis. 18:2-5) Polo zimbaná ata fioti ve ti mambu ya ntete na luzingu ya yandi vandá ni kusadila Yehova. Samu yandi mosi vandá samuná mingi mpe vandá kipeke bansatu ya yandi, Polo lendá kukindisa bampangi ya yandi. Yandi sadisá bawu na kuzimbana ve ti, bamambu ya luzingu mpe nsatu ya kudikisa dikanda ya bawu zolá sala ve ti ba bika ‘mambu ya kulutila mfunu,’ bisalu ya kimpeve.—Flp. 1:10.

4. Wapi mutindu Polo na Timote sadisá bampangi ya bawu na kukanga ntima na mantwala ya bankwamusu?

⁴ Na manima ya kubutama ya kimvuka ya Tesalonika, bampangi ya kimvuka ya malu-malu yayi kutaná na bankwamusu ya ngolo. Kilumbu mosi, bantu mingi vukaná na dikanisi ya kusala Polo na Silasi yimbi. Ntangu ba kuzwá ve bawu, ba natá “bampangi ya nkaka ya dibuundu na ntwala ya bamfumu ya mbanza,” mpe ba vandá zonza na ngolo: “Bantu yina [. . .] ke na kuzitisa ve misiku ya ntinu Sezale.” (Bis. 17:6, 7) Beno lenda kanisa yinki ya salá bakristo ya malu-malu yayi na kutala ti bantu ya bwala ya bawu me balukila bawu? Mambu yayi zolá lembisa bawu na kimpeve. Kasi Polo vandá ve na nsatu tiya ya bawu manisa. Ata ti yandi na Silasi vandá kwenda, ba salá nyonso samu ya vanda na bantu yina ke kipe kimvuka ya malu-malu yayi. Na manima, ntangu Polo sonikilá kimvuka ya Batesalonika, yandi bambukilá bawu moyo mambu yayi: “Beto fidisaka beno Timote, mpangi ya beto [. . .]. Yandi fwanaka pesa beno ngolo mpe kukindisa beno na kiminu ya beno, samu ata muntu kukondwa kizunu na ntima samu na bampasi yina beto ke na kutala.” (1 Tes. 3:2, 3) Ntangu ya nkaka Timote mpe kutaná na bankwamusu ntangu yandi vandá na bwala ya yandi, Listre. Yandi talá mutindu Polo kindisá bampangi ya kuna. Samu yandi talá mutindu Yehova sadisá bampangi ya Listre, yandi lendá kusadisa bampangi ya kimvuka ya malu-malu ya Tesalonika na kuvanda ve na boma samu Yehova ke sadisa mpe bawu.—Bis. 14:8, 19-22; Ebr. 12:2.

5. Wa’ faso mpangi mosi na nkumbu ya Bryant kuzwá lubakusu ya kuluntu mosi?

⁵ Wapi mutindu ya nkaka Polo kindisá bampangi ya yandi? Ntangu ba vutuká samu na kutala bampangi ya Listre, ya Ikoniumi, mpe ya Antioshe, “na konso dibuundu, Polo na Banabase soolaka bakuluntu ya dibuundu.” (Bis. 14:21-23) Ntembe ve, bakuluntu yina kindisá mingi bampangi, mutindu bakuluntu ya bubu yayi ke salak’ yawu. Bryant, mpangi mosi ya bakala me zonza mambu yayi: “Ntangu mu kumá na bamvula 15, tata ya munu biká beto, mpe ba basisá mama ya munu na kimvuka. Mu vandá tala ti mu bikaná kaka munu mosi mpe ya vandá lembisa munu.” Yinki sadisá Bryant na kukanga ntima na kati ya ntangu ya mpasi yina? Yandi me zonza: “Kuluntu mosi na nkumbu ya Tony vandá sololá na munu na balukutakanu ya kimvuka mpe na bantangu ya nkaka. Yandi vandá zonzila munu masolo ya bantu ya nkaka yina kutaná na bankwamusu mpe bumbá kilengi ya bawu. Yandi tangisá munu Nkunga 27:10. Yandi vandá zonzilá munu mingi kifwani ya Ezekiasi, yina bikaná ya kukangama na Yehova ata ti tata ya yandi bikilá ve yandi kifwani ya mbote.” Wa’ faso bamambu yina Tony salá sadisá Bryant? Yandi me zonza: “Bamambu ya mbote yina Tony salá samu na munu, sadisá munu na kusala kisalu ya ntangu nyonso.” Bakuluntu, beno vanda ekenge samu na kukindisa bampangi yina mutindu Bryant, lenda vanda na nsatu ya “ndinga ya mbote.”—Bin. 12:25.

6. Wa’ faso Polo sadilá masolo ya bantu ya ntama samu na kukindisa bampangi ya yandi?

⁶ Polo bambukilá bampangi ya yandi moyo na “nkonga [. . .] ya nene ya bambangi” yina lendá kukanga ntima na mantwala ya bampasi, na lubakusu ya Yehova. (Ebr. 12:1) Polo zabá ti masolo ya ba yina kangá ntima na mantwala ya bampasi ni bampasi lendá pesa bampangi ya yandi ngolo, mpe kusadisa bawu na kutala kaka “mbanza ya Nzambi ya moyo.” (Ebr. 12:22) Ya lenda sadisa mpe beto bubu yayi. Na kifwani, beto ke kuzwá ngolo ntangu beto ke tangá mutindu Yehova sadisá Gedeoni, Baraki, Davidi, Samuele, mpe bantu mingi ya nkaka. (Ebr. 11:32-35) Beto ke mpe na bifwani ya bubu yayi. Na siège mondial, beto ke kuzwaka mikanda ya bampangi ya kento na ya bakala yina ke zonzá ti kiminu ya bawu kulá na kutangá masolo ya luzingu ya bisadi ya Yehova ya ntangu ya beto.

POLO LAKISÁ MUTINDU YA KUVANDA NA KIZUNU NA BAMPANGI

7. Yinki nge ke na longoká na malongi yina Polo pesá na Baroma 14:19-21?

⁷ Beto ke kindisá bampangi ya beto ntangu beto ke salá mpe beto ke zonzá bamambu yina ke tulá kizunu na kati ya kimvuka. Ata na ntangu yina beto ke tadilá ve bamambu faso mosi na bampangi, beto ke bumbá bumosi mpe beto ke ndimá kulanda makanisi ya bawu ntangu ya ke ve na musiku ya Biblia yina ke niminak’ yawu. Beto tala kifwani. Na kimvuka ya Roma, ya vandá na bazwife mpe ba yina vandá ve bazwife. Ntangu ba katulá Musiku ya Moyize, bisadi ya Nzambi vandá dyaka ve na nsatu ya kulanda misiku yina vandá nimina kudya madya ya nkaka. (Mrk. 7:19) Banda ntangu yina, bazwife ya nkaka yina kumá bakristo vandá tala ti mambu ke dyaka ve ya kudya bima ya nkaka. Kasi bazwife ya nkaka yina kumá bakristo vandá tala ti ya vandá yimbi na kudya bima nyonso. Mambu yina kabulá kimvuka. Polo lakisá bampangi ti ya vandá mfunu na kubumba kizunu. Yandi zonzaka: “Mambu ya mbote, ni kudya ve mbisi, kunwa ve vinu, to kumanga bima nyonso yina lenda kubwisa mpangi ya nge na masumu.” (Tanga Baroma 14:19-21.) Polo sadisá bawu na kutala ti kuswana na bamambu ya mutindu yina ke ve mbote samu na bampangi mpe samu na kimvuka. Polo vandá ndima mpe kusoba ndyatulu ya yandi samu yandi kuma ve dibaku samu na bampangi. (1 Ko. 9:19-22) Beto mpe lenda kindisa bampangi mpe kubumba kizunu kana beto manga kuswana na bamambu yina Yehova ke biká muntu na muntu vanda na dikanisi ya yandi.

8. Yinki Polo salá ntangu mambu ya nene sosá kubebisa kizunu ya kimvuka?

⁸ Polo bumbá kizunu na bampangi yina vandá ve na dikanisi mosi na yandi na bamambu ya nene. Na kifwani, bampangi ya nkaka vandá zonzá na bantu ya makanda ya nkaka yina kumá bakristo na kuzenga kibakala ya bawu. Ntangu ya nkaka, ba vandá zonza yawu samu ba vandá na boma ti bazwife yina vandá ve bakristo zonzila yimbi ya bawu. (Gal. 6:12) Polo vandá ndima ata fioti ve mambu yayi. Kasi yandi natá ve bampangi na ngolo samu ba landa dikanisi ya yandi. Na kukuluka nyonso, yandi sosá malongi ya bantumwa mpe bakuluntu yina vandá na Yeruzalemi. (Bis. 15:1, 2) Samu Polo salá mutindu yina, yandi sadisá bampangi na kubumba kilengi mpe kizunu na kati ya kimvuka.—Bis. 15:30, 31.

9. Wa’ faso beto lenda landa kifwani ya Polo?

⁹ Ntangu beto ke wisaná ve na bampangi na bamambu ya nene, beto ke sosá malongi na ba yina Yehova soolá samu na kukipe kimvuka. Beto ke salak’ yawu samu na kubumba kizunu. Bambala mingi, beto ke kuzwá malongi ya Biblia na mikanda ya beto to na bima ya nkaka yina kimvuka ya Yehova ke pesá beto. Ntangu beto ke landá malongi yina kimvuka ya Yehova ke pesá beto, mpe beto ke sosá ve kutula makanisi ya beto na mantwala, beto ke salá ti kizunu vanda na kati ya kimvuka.

10. Yinki Polo salá dyaka samu kizunu vanda na kati ya kimvuka?

¹⁰ Samu kizunu vanda, Polo vandá zonzilá mingi bifu ya mbote ya bampangi ya kento na ya bakala, kasi ve bifu ya bawu ya yimbi. Na kifwani, na nsuka ya mukanda yina yandi filisá na Baroma, yandi zonzilá bankumbu ya bampangi mingi. Mpe bambala mingi yandi zonzilá bamambu ya mbote yina ba vandá sala, to bima ya nkaka yina yandi zabá samu na bawu. Beto ke landá kifwani ya Polo na kuzonzilá mingi bifu ya mbote ya bampangi ya beto. Ntangu beto ke salak’ yawu, beto ke tungá kindiku ya mbote na bampangi, mpe beto ke salá ti luzolo kula na kati ya kimvuka.

11. Wa’ faso beto lenda vutula kizunu ntangu bamambu ke kumaka?

¹¹ Bantangu ya nkaka, ata bakristo ya kukula na kimpeve ke vandá na mindondo na kati ya bawu. Ni yina kuminá Polo na ndiku ya yandi ya ntima Barnabasi. Ba wisaná ve na kunata Marke na kwenda samuna na bawu mbala ya nkaka na bisika ya ntama. Biblia ke zonzá ti “bawu swanaka mingi” mpe ba kabukaka. (Bis. 15:37-39) Kasi Polo, Barnabasi na Marke vutulá kizunu na kati ya bawu. Samu na bawu, kizunu mpe bumosi ya kimvuka vandá ntalu mingi. Na manima, Polo zonzilá mbote ya Barnabasi mpe ya Marke. (1 Ko. 9:6; Kol. 4:10) Beto mpe me bonga kuyidika mambu ni mambu beto lenda vanda na yawu na bampangi, mpe kusala nyonso samu na kutala kaka bifu ya bawu ya mbote. Na kusalak’ yawu, beto ke tula kizunu mpe bumosi.—Ef. 4:3.

POLO KINDISÁ KIMINU YA BAMPANGI YA YANDI

12. Zonzila mwa bampasi yina bampangi ya beto ke na kutaná na yawu.

¹² Beto ke kindisá bampangi ya beto ntangu beto ke sadisá bawu na kuvanda na kiminu ya ngolo na Yehova. Ba ke seká ba ya nkaka na bantu ya dikanda ya bawu, na bampangi ya bawu ya kisalu, to na ba yina ke kotá na bawu. Ba ya nkaka ke na nwaná na bimbevo ya ngolo to ke na mpasi na ntima samu na bamambu yina ba zonzá to ba salá bawu na ntama. Ya ke mpe na ba yina kuzwá mbotokolo bamvula mingi na manima, mpe me lutisa bamvula mingi na kuvingila nsuka ya yinza yayi. Bamambu nyonso yayi lendá meka kiminu ya bakristo bubu yayi. Bakristo ya siècle ya ntete kutaná mpe na bamambu yayi. Yinki Polo salá samu na kukindisa bawu?

13. Wa’ faso Polo sadisá bampangi yina ba vandá seka samu na kiminu ya bawu?

¹³ Polo sadilá mambu ya Nzambi samu na kukindisa kiminu ya bampangi ya yandi. Na kifwani, ntangu ya nkaka, ya vandá mpasi na bazwife yina kumá bakristo na kuzaba yinki ya kuzonza na bantu ya dikanda ya bawu yina vandá zonza ti dibuundu ya bazwife lutilá dibuundu ya bakristo. Ntembe ve, mukanda yina Polo soniká na Baebre kindisá mingi bakristo yina. (Ebr. 1:5, 6; 2:2, 3; 9:24, 25) Bamambu ya kitoko yina yandi soniká zolá sadisa bawu na kukanga yinwa ya ba yina vandá sombola bawu. Bubu yayi mpe, ya ke na bampangi ya beto yina ba ke sekaka. Beto lenda lakisa bawu wa’ faso ba lenda sadila mikanda ya beto samu na kunwanina kiminu ya bawu. Kana nge zaba ntwenya yina ba ke seká samu yandi ke salá ve ba anniversaires to mikembo ya nkaka ya yinza, nge lenda sadisa yandi na kuzwa bamambu ya mbote na mikanda Sepela na luzingu ya ntangu nyonso! kileso 44, samu na kunwanina kiminu ya yandi.

14. Ata ti Polo vandá na bamambu mingi ya kusala na kisalu ya kusamuna mpe kulonga bantu, yinki yandi vandá salaka?

¹⁴ Polo sadisá bampangi ya yandi na kusala “bisalu ya mbote” samu na kulakisa luzolo na bampangi. (Ebr. 10:24) Polo sadisá bampangi ya yandi kaka ve na bamambu yina yandi vandá zonza, kasi mpe na yina yandi vandá sala. Na kifwani, ntangu nsatu ya nene kuminá bakristo ya Zude, Polo natiná bawu mwa bima yina ba vandá na yawu nsatu. (Bis. 11:27-30) Ata ti Polo vandá na bamambu mingi ya kusala na kisalu ya kusamuna mpe ya kulonga bantu, ntangu nyonso yandi vandá sosá mutindu ya kusadisa bampangi ya yandi na bansatu ya bawu ya kinsuni. (Gal. 2:10) Na yawu, yandi sadisá bampangi ya yandi na kuvanda na kiminu ti Yehova ke kipe bawu. Bubu yayi mpe, ntangu beto ke pesá ntangu, ngolo mpe mayela ya beto samu na kusadisa bampangi yina ke kutaná na bampasi, beto ke kindisá kiminu ya bawu. Beto ke salá mpe yawu ntangu beto ke zimbaná ve kupesa mbongo samu na kisalu yina ke salamá na yinza nyonso. Bamambu nyonso yayi mpe bamambu ya nkaka yina beto ke salá, ke sadisá bampangi ya beto na kuvanda na kiminu ya ngolo ti Yehova ke bika ata fioti ve bawu.

15-16. Wa’ faso beto zolá bakila bampangi yina kiminu me lemba?

¹⁵ Polo biká ve kukindisa bampangi yina kiminu me lemba. Yandi lakisá bawu ntima ya kyadi mpe zonzilá bawu na mutindu ya mbote. (Ebr. 6:9; 10:39) Na kifwani, na mukanda yina yandi filisá na Baebre, yandi zonzilá mingi “beto.” Na kusalá mutindu yina, yandi vandá lakisa ti yandi mpe zolá landa malongi yina yandi vandá pesa bawu. (Ebr. 2:1, 3) Mutindu Polo, beto ke biká ve ba yina kiminu me lemba. Beto ke kindisá bawu ntangu beto ke lakisá bawu ti ba ke mfunu samu na beto. Ya ke mutindu ya kulakisa luzolo ya beto samu na bawu. Kana beto ke zonzá na mutindu ya mbote, ya ke kindisa dyaka bawu mingi.

¹⁶ Polo lakisá bampangi ya yandi ti Yehova zabá bamambu ya mbote yina ba vandá sala. (Ebr. 10:32-34) Beto lenda sala mpe yawu ntangu beto ke sadisá mpangi yina kiminu me lemba. Beto lenda yufula yandi wa’ faso yandi zabá matyeleka, to kunata yandi na kukanisa mutindu yandi talá diboko ya Yehova na luzingu ya yandi. Beto lenda lakisa yandi ti Yehova me zimbana ve nyonso yina yandi salá samu na yandi, mpe ti yandi ke bika ve yandi na bilumbu yina ke kwiza. (Ebr. 6:10; 13:5, 6) Masolo ya mutindu yayi lendá vumbula nsatu ya mpangi ya beto na kutatamana na kusadila Yehova.

BETO TATAMANA NA ‘KUKINDISA BAMPANGI’

17. Yinki beto lenda sosa kubongisa?

¹⁷ Muntu yina ke tungá bayinzo ke bongisá ntangu nyonso mayela ya yandi ya kisalu. Mutindu mosi mpe, beto lenda bongisa faso ya beto ya kukindisa bampangi. Beto lenda zonzila bawu masolo ya bantu yina kangá ntima na kati ya bampasi, samu na kusadisa bawu na kusala faso mosi. Beto lenda sala ti kizunu vanda, ntangu beto ke zonzilá bamambu ya mbote yina bampangi ke salaka. Ntangu bamambu ke sosá kubebisa kizunu, beto ke salá nyonso samu na kubumba yawu. Mpe beto ke vutulá kizunu ntangu beto ke kuzwá mindondo na bampangi. Mpe beto ke kindisá kiminu ya bampangi ntangu beto ke kabulá na bawu matsyeleka ya mfunu ya Biblia, ntangu beto ke sadisá bawu na bamambu ya bawu mpe ntangu beto ke bakisá ba yina kiminu me lemba.

18. Yinki nge ke bika ve kusala?

¹⁸ Ba yina ke tulá diboko samu na kutunga bayinzo samu na kimvuka ya Yehova ke na kilengi mingi. Beto lenda zwa kilengi ntangu beto ke sadisá bampangi na kutunga kiminu ya bawu. Bayinzo yina beto ke tungá lendá beba. Kasi bambote yina ke katuká na kukindisa bampangi ya beto lendá vanda ntangu nyonso. Beto sala nyonso samu na kutatamana na “[kukindisa] bampangi mpe [kusalasana] na kukula na kiminu.”—1 Tes. 5:11.