Kubika ata kima kabula nge na Yehova

1. Wa’ faso beto zaba ti Yehova zola beto vanda pene-pene na yandi?

YEHOVA ke bokilá beto na kuvanda pene-pene na yandi. (Zaki 4:8) Yandi ke zolá kuvanda Nzambi ya beto, Tata ya beto, mpe ndiku ya beto. Ni na yawu, yandi ke pesá bamvutu na balusambu ya beto, mpe yandi ke sadisá beto ntangu beto ke kutaná na bamambu ya mpasi. Mpe na nzila ya kimvuka ya yandi, yandi ke longá beto mpe ke bumbá beto. Kasi yinki beto me fwana kusala samu na kuvanda pene-pene na yandi?

2. Wa’ faso beto lenda vanda pene-pene na Yehova?

² Beto lenda vanda pene-pene na Yehova na kusambilak’ yandi, na kutangá, mpe na kuyindulá na mambu ya yandi. Ntangu beto ke sala yawu, ntima ya beto ke vanda ya kufuluka na luzolo samu na Yehova, mpe beto ke vanda na nsatu ya mingi ya kuvutula yandi matondo. Ya ke nata beto na kutumama na yandi mpe na kupesa yandi nkembo yina yandi me lunga kuzwa. (Luz. 4:11) Ntangu beto ke zabá mingi Yehova, ya ke salá ti beto tula dyaka ntima na yandi mpe na kimvuka yina yandi ke sadilá samu na kusadisa beto.

3. Wa’ faso Satana ke sosá kukabula beto na Yehova, mpe yinki ke sadisa beto na kubika ve Nzambi ya beto mpe kimvuka ya yandi? (Nkunga 31:13, 14)

³ Kasi, Satana zola kukabula beto na Yehova, mingi-mingi ntangu beto ke kutaná na bamambu ya mpasi. Wa’ faso yandi ke salak’ yawu? Yandi ke sosá ti malembe-malembe beto tula dyaka ve ntima na Yehova mpe na kimvuka ya yandi. Kasi beto lenda nunga yandi. Kana kiminu ya beto ke ngolo, beto ke bika ve Nzambi ya beto mpe kimvuka ya yandi.—Tanga Nkunga 31:13, 14.

4. Yinki beto ke zonzila na disolo yayi?

⁴ Na disolo yayi, beto ke zonzila bamambu tatu yina ke katuká na bantu yina ke sadilá ve Yehova. Mosi na mosi ya bamambu yayi lenda sosa kunata beto na kutula dyaka ve ntima na Yehova mpe na kimvuka ya yandi. Wa’ faso bamambu ya mpasi yayi lenda sosa kukabula beto na Yehova? Yinki beto lenda sala samu Satana bwisa ve beto?

NTANGU BETO KE KUTANÁ NA BAMPASI

5. Wa’ faso bampasi lenda nata beto na kutula dyaka ve ntima na Yehova mpe na kimvuka ya yandi?

⁵ Ya lenda vanda ti bantu ya dikanda ya beto ke na kwamisá beto, beto ke dyaka ve na kisalu, to beto ke na kutaná na bamambu ya nkaka ya mpasi. Wa’ faso bamambu ya mutindu yayi lenda sala ti beto tula dyaka ve ntima na Yehova mpe kunata beto na kukabuka na yandi? Ntangu beto ke talá ti bampasi ya beto ke na manisá ve, beto lenda lemba mpe kuvanda dyaka ve na kivuvu. Satana ke sadilá bamambu ya mutindu yayi samu na kunata beto na kuvanda na ntembe ti Yehova ke zolá beto. Yandi zola beto kanisa ti ni Yehova na kimvuka ya yandi ke na manima ya bampasi ya beto. Mambu ya mutindu yayi kuminá na bantu ya nkaka ya Izraele na Ezipte. Na kubanda, ba vandá ndima ti ni Yehova filisá Moyize na Aroni na kubasisa bawu na muumbu. (Bas. 4:29-31) Kasi ntangu Farao kumisá dyaka luzingu ya bawu mpasi, ba zonzá ti ya vandá foti ya Moyize na Aroni. Ba zonzaka: ‘Beno me sala ti Farao na bisadi ya yandi kuyina beto mpe beno me tula mbele ya bamvita na maboko ya bawu samu ba fwa beto.’ (Bas. 5:19-21) Moyize na Aroni vandá babakala ya kukangama na Yehova. Ya ke kyadi na kutala ti bantu ya Izraele vandá zonza ti bampasi ya bawu vandá katuka na babakala ya kukangama yayi. Kana bampasi ya nge ke na manisá ve, wa’ faso nge lenda bika ve kutula ntima na Yehova mpe na kimvuka ya yandi?

6. Yinki kifwani ya Abakuki ke na longá beto na yina me tadila kukanga ntima na mantwala ya bamambu ya mpasi? (Abakuki 3:17-19)

⁶ Fungula ntima ya nge na Yehova na lusambu, mpe vanda na kiminu ti yandi ke sadisa nge. Mbikudi Abakuki kutaná na bamambu mingi ya mpasi. Na ntangu mosi, yandi vandá kanisa ti Yehova vandá kipe ve yandi. Yandi fungulá ntima ya yandi na Yehova. Yandi zonzaka: ‘O Yehova tii wapi ntangu munu fwana dila samu na kulomba lusadusu, kasi nge ke wa ve? Samu na yinki nge ke pesaka nzila ti ba nyokola bantu?’ (Aba. 1:2, 3) Yehova pesá mvutu na kisadi ya yandi. (Aba. 2:2, 3) Na manima, Abakuki kanisá mutindu Yehova vuukisá bisadi ya yandi ya ntama. Ya salá ti yandi kuma dyaka na kilengi. Yandi kumá ya kundima ti Yehova ke kipek’ yandi, mpe yandi ke sadisa yandi na kukanga ntima na mantwala ya mambu ni mambu. (Tanga Abakuki 3:17-19.) Yinki ya ke na longá beto? Ntangu nge ke kutaná na bamambu ya mpasi, sambila Yehova mpe zonza na yandi mambu yina ke na nge na ntima. Tudila yandi ntima samu na kuzwa lubakusu. Kana nge sala yawu, nge lenda vanda ya kundima ti Yehova ke pesa nge ngolo ya kukanga ntima. Mpe ntangu nge ke tala mutindu yandi ke sadisa nge, kiminu ya nge na yandi ke kuma dyaka ngolo.

7. Bantu ya dikanda ya Shirley vandá sosa kunata yandi na kukanisa yinki, mpe yinki sadisak’ yandi na kubumba kiminu ya yandi na Yehova?

⁷ Kubika ve kusala bamambu yina ke sala ti nge bikana pene-pene na Yehova. Beto tala mutindu mambu yayi sadisá Shirley, mpangi mosi ya kento na Papouasie-Nouvelle-Guinée, ntangu yandi kutaná na bamambu ya mpasi.b Bibuti ya Shirley vandá ve na mbongo, mpe bantangu ya nkaka, ya vandá mpasi na kuzwa kima ya kudya. Muntu mosi ya dikanda ya yandi vandá sosa kunata yandi na kutula dyaka ve ntima na Yehova. Yandi zonzá na Shirley: “Nge ke zonzá ti mpeve ya santu ke sadisá nge. Wapi yawu? Dikanda ya beto ke pauvre. Nge ke na lutisá kaka ntangu ya nge ya mpamba na kusamunaka.” Shirley me zonza: “Mu bandá kukanisa: ‘Nzambi ke kipe kwandi beto?’ Na mbangu nyonso, mu sambilá Yehova mpe mu zonzá na yandi nyonso yina vandá na munu na ntima. Mu biká ve kutanga Biblia mpe mikanda ya beto, kusamuna mpe kuvanda na balukutakanu.” Shirley kwizá tala ti Yehova vandá kipe dikanda ya yandi. Ba vandá kufwa ve nsatu, mpe ba vandá na kilengi. Shirley me zonza: “Mu kwizá tala ti Yehova vandá pesa mvutu na balusambu ya munu.” (1 Tim. 6:6-8) Kana nge bika ve kusala bima yina ke salá ti beto vanda pene-pene na Yehova, bampasi na bantembe ke kabula ve nge na yandi.

NTANGU BA KE NYOKOLÁ BAMPANGI YINA KE TWADISÁ BETO

8. Yinki lenda kumina bampangi yina ke twadisá beto?

⁸ Na nzila ya télé, internet to bima ya nkaka, bambeni ya beto ke mwangisá bamambu ya luvunu na nkumbu ya bampangi yina ke twadisá beto, to ba ke sosá beto tula ntembe na bawu. (Nku. 31:13) Ya ke na bampangi yina ba me kanga to ba me zonza ti ba me sala bamambu ya yimbi. Bakristo ya ntete kutaná mpe na bamambu ya mutindu yayi ntangu bantu vuniná Polo bamambu mpe ba kangak’ yandi. Yinki ba salaka?

9. Yinki bakristo ya nkaka salá ntangu ba tulá ntumwa Polo na boloko?

⁹ Bakristo ya nkaka biká Polo ntangu ba kangak’ yandi na boloko na Roma. (2 Tim. 1:8, 15) Samu na yinki? Biblia ke zonzá ve yawu. Ya lenda vanda ti ba vandá na nsoni ya Polo, samu bantu vandá tala yandi mutindu muntu yina salá bamambu ya yimbi. (2 Tim. 2:8, 9) To ba vandá na boma ti ba kwamisa mpe bawu. Ya vanda mutindu yina to ve, mambu yayi salá Polo mpasi mingi. Polo kutaná na bamambu mingi, mpe yandi tulá luzingu ya yandi na mpasi samu na bawu. (Bis. 20:18-21; 2 Ko. 1:8) Beto vanda ata fioti ve mutindu ba yina biká Polo na ntangu yina yandi vandá na nsatu ya bawu. Yinki beto me bonga kuzimbana ve ntangu ba ke nyokolá bampangi yina ke twadisá beto?

10. Yinki beto me bonga kuzimbana ve ntangu ba ke nyokolá bampangi yina ke twadisá beto?

¹⁰ Kuzimbana ve samu na yinki ba ke nyokolá beto mpe nani ke na manima ya mambu yayi. 2 Timote 3:12 ke zonzaka: ‘Bantu nyonso yina ke zola kuzinga kintwadi na Yesu Kristo na kuvanda ya kukwikama na Nzambi, ke tala mpasi mingi.’ Ya zolá pamusa ve beto na kutala ti Satana ke sosá mingi kunwanisa bampangi yina ke twadisá beto. Dikanisi ya yandi ke ti ba vanda dyaka ve ya kukangama na Yehova, mpe beto kuma na boma.—1 Pi. 5:8.

11. Yinki kifwani ya Onezifore ke na longá beto? (2 Timote 1:16-18)

¹¹ Kubika ve kusadisa bampangi ya nge mpe vanda ya kukangama ngolo na bawu. (Tanga 2 Timote 1:16-18.) Onezifore salá ve mutindu bakristo ya nkaka yina biká Polo ntangu yandi vandá na boloko. Biblia ke zonzá ti ‘yandi vandaka ve na nsoni ya Polo yina vandaka na boloko.’ Yandi sosá Polo mpe ntangu yandi kuzwak’ yandi, yandi pesak’ yandi bima yina yandi vandá na yawu nsatu. Samu na kusala yawu, Onezifore tulá luzingu ya yandi na mpasi. Yinki ya ke na longá beto? Beto fwana bika ve boma ya bantu kusala ti beto tekita, to kukanga beto nzila na kusadisa bampangi ya beto yina ba ke nyokolaka. Beto sala nyonso samu na kubakisa bawu. (Bin. 17:17) Ba ke na nsatu ya luzolo mpe lubakusu ya beto.

12. Yinki kifwani ya bampangi ya Russie ke na longá beto?

¹² Beto tala wa’ faso bampangi ya Russie me sadisa bampangi ya beto yina ba tulá na boloko. Ntangu ba ke sambisá bamambu ya bampangi ya nkaka na tribunal, bampangi mingi ya kento na ya bakala ke kwizá kuna samu na kulakisa ti ba ke na manima ya bawu. Yinki ya ke na longá beto? Ntangu ba ke vuniná bampangi yina ke twadisá beto bamambu, to ba ke kangá bawu na boloko, mpe ba ke nyokolá bawu, kuvanda ve na boma. Sambila samu na bawu. Sadisa makanda ya bawu mpe sosa bafaso ya kubakisa bawu.—Bis. 12:5; 2 Ko. 1:10, 11.

NTANGU BA KE SEKÁ BETO

13. Ntangu ba ke seká beto, wa’ faso ya lenda sala ti beto tula dyaka ve ntima na Yehova mpe na kimvuka ya yandi?

¹³ Bantu ya dikanda ya beto, bampangi ya kisalu to ya lukolo lenda seka beto samu na kisalu ya beto ya kusamuna, to samu beto ke landá misiku ya Yehova na luzingu ya beto. (1 Pi. 4:4) Ba lenda zonza na beto: ‘Nge ke muntu ya mbote. Kasi dibuundu ya beno ke na misiku mingi. Mpe misiku yango ke dyaka ve misiku ya bantu ya bubu yayi.’ Bantu ya nkaka lenda zonzila yimbi ya beto na faso yina beto ke bakilá ba yina ba me basisa na dibuundu. Ba lenda zonza na beto ti beto ke ve na luzolo samu na bampangi. Bamambu yayi lenda nata beto na kusala ntembe na misiku ya Yehova. Beto lenda banda kukanisa ti misiku ya Yehova ke ngolo, mpe ti kimvuka ya yandi ke mutindu boloko. Kana nge ke na kutaná na mambu ya mutindu yayi, yinki nge lenda sala samu na kuvanda kaka pene-pene na Yehova mpe na kimvuka ya yandi?

14. Yinki beto me bonga kusala ntangu bantu ke seká beto samu beto ke landá misiku ya Yehova? (Nkunga 119:50-52)

¹⁴ Sala nyonso na kubika ve kulanda misiku ya Yehova. Yobi vandá landa misiku ya Yehova, ata na ntangu yina ba vandá sekak’ yandi. Mosi ya bandiku ya yandi ya luvunu sosá kunata yandi na kukanisa ti Yehova vandá kipeke ve nyonso yina yandi vandá sala. (Yobi 4:17, 18; 22:3) Kasi Yobi mangá mambu ya luvunu yayi. Yandi zabá ti misiku ya Yehova ke kaka mbote. Yandi kanisá ata fioti ve kubika yawu. Yandi biká ve bantu ya nkaka bebisa kukangama ya yandi na Yehova. (Yobi 27:5, 6) Yinki ya ke na longá beto? Ntangu bantu ke seká nge, kubika ve ya nata nge na kutula ntembe na misiku ya Yehova. Kanisa na bambote yina nge me kuzwa samu nge ke landak’ yawu. Sala nyonso na kuvanda kaka ya kukangama na dibuundu yina ke landá misiku ya Yehova. Ya ke sala ti ata ba seka nge, nge ke bika ve ya kabula nge na Yehova.—Tanga Nkunga 119:50-52.

15. Samu na yinki bantu ya dikanda ya Brizit vandá sekak’ yandi?

¹⁵ Beto tala kifwani ya Brizit, mpangi mosi ya kento yina ke vandá na Inde. Bantu ya dikanda ya yandi vandá seka yandi samu na dibuundu ya yandi. Yandi kuzwá mbotokolo na 1997, mpe mwa ntangu fioti na manima, bakala ya yandi yina vandá ve mbangi ya Yehova, vandá dyaka ve na kisalu. Bibuti ya bakala ya yandi vandá vandá na mbanza ya nkaka. Mpe bakala ya Brizit baká mukanu ya kwenda vanda na bibuti ya yandi yinzo mosi, na kento ya yandi mpe bana ya bawu. Brizit kutaná na bamambu ya nkaka ya mpasi. Samu bakala ya yandi vandá sala dyaka ve, Brizit zolá sala mingi samu na kudikisa dikanda ya yandi. Dyaka, kimvuka yina vandá pene-pene na bawu, vandá na bakilometele 350. Bantu ya dikanda ya bakala ya Brizit vandá kwamisa yandi samu na dibuundu ya yandi. Samu bankwamusu vandá ngolo, Brizit na dikanda ya yandi katuká kuna samu na kukwenda na kisika ya nkaka. Na manima, bakala ya yandi kufwaka. Mpe mwana ya yandi ya kento ya bamvula 12 kufwá na cancer. Ya suká ve kuna. Bantu ya dikanda ya Brizit zonzá ti mambu nyonso yayi vandá foti ya yandi. Ba zonzá ti kana yandi kumá ve mbangi ya Yehova, mambu nyonso yayi zolá kumina ve yandi. Kasi, Brizit biká ve kutula ntima ya yandi na Yehova. Mpe yandi vandá kaka pene-pene na kimvuka ya yandi.

16. Wa’ faso Yehova sakumuná Brizit na bangolo yina yandi salá samu na kukangama kaka na yandi mpe na kimvuka ya yandi?

¹⁶ Samu Brizit vandá vanda ntama na kimvuka, ntwadisi ya circonscription zonzá na yandi na kusamuna kisika yandi vandá, mpe na kusala balukutakanu na yinzo ya yandi. Na kubanda, Brizit vandá tala ti ya vandá mpasi mingi na kusala yawu. Kasi yandi landá mambu yina ntwadisi ya circonscription zonzá na yandi. Yandi samuná nsangu ya mbote. Yandi salá balukutakanu na yinzo ya yandi. Mpe yandi vandá salá kulongoka ya dikanda na bana ya yandi. Wapi bambuma ya butaka? Brizit longoká Biblia na bantu mingi mpe mingi na kati ya bawu kuzwá mbotokolo. Na mvula 2005, yandi kumá pionnière permanente. Samu Brizit tulá kaka ntima na Yehova mpe kangamá na kimvuka ya yandi, Yehova sakumuná bangolo ya yandi. Bubu yayi, bana ya yandi ke bisadi ya Yehova mpe ya ke na bimvuka zole na kisika yina yandi kwendaka. Brizit ke ya kundima ti ni Yehova pesak’ yandi ngolo na bamambu yina kuminak’ yandi, mpe na kukanga ntima ntangu bantu ya dikanda ya yandi vandá sekak’ yandi.

VANDA KAKA YA KUKANGAMA NA YEHOVA MPE NA DIBUUNDU YA YANDI

17. Wapi mukanu beto me bonga kubaka?

¹⁷ Satana zola ti beto kanisa ti Yehova ke bika beto ntangu beto ke kutana na bamambu ya mpasi. Mpe ti si beto vanda kaka na kimvuka ya Yehova, luzingu ya beto ke vanda mpasi. Yandi zola ti beto kuma na boma ntangu ba ke vuniná bampangi yina ke twadisá beto bamambu, ba ke nyokolá bawu to ba ke tulá bawu na boloko. Mpe yandi zola ti beto tula dyaka ve ntima na misiku ya Yehova mpe na kimvuka ya yandi ntangu ba ke seká beto. Kasi beto zaba mabanza ya yandi ya yimbi, mpe yandi lenda vuna ve beto. (2 Ko. 2:11) Sala nyonso na kumanga baluvunu yina ke katuká na Satana, mpe na kubikana ya kukangama na Yehova mpe na kimvuka ya yandi. Kuzimbana ve: Yehova lenda bika ata fioti ve nge. (Nku. 28:7) Na yawu, nge mpe kubika ata kima kukabula nge na yandi.—Rom. 8:35-39.

18. Yinki beto ke zonzila na disolo yina ke landa?

¹⁸ Na disolo yayi, beto me tala bamambu ya mpasi yina ke katuká na bantu yina ke sadilá ve Yehova. Kasi ata na kati ya kimvuka, beto lenda kutana na bamambu yina lenda nata beto na kutula dyaka ve ntima na Yehova mpe na kimvuka ya yandi. Wa’ faso beto lenda nunga bamambu yango? Ni yawu beto ke zonzila na disolo yina ke landa.