Kengidi ya boloko me longoka matsyeleka

Na Filipi, ya vandaka na ntwenya mosi ya kento yina vandaka ngaamba. Yandi vandaka na mpeve mosi ya yimbi. Mpeve yango vanda sadila yandi samu na kubikula, mpe bantu ya kuzwa yandi vanda kuzwa mbongo mingi na nzila ya yandi. Ntangu Polo na Silase kwizaka na Filipi, mwana ya kento yayi vanda landa bawu na kati ya bilumbu mingi. Mpeve ya yimbi vanda nataka yandi na kuzonza na ndinga ya ngolo: “Bantu yayi ke bisadi ya Nzambi ya Kulutila Kuzangama.” Kilumbu mosi Polo zonzaka na mpeve yango: ‘Na nkumbu ya Yesu, basika na kati ya yandi!’ Mpeve ya yimbi basikaka.

Ntangu bantu ya kuzwa mwana ya kento yayi kwizaka zaba ti ba zolaka kuzwa dyaka ve mbongo na nzila ya yandi, ba dasukaka mingi. Ba nataka Polo na Silase na mantwala ya bazuzi ya mbanza mpe ba zonzaka: ‘Bantu yayi ke ve na zitisaka musiku mpe ba ke na salaka muvusu na mbanza nyonso!’ Bazuzi zonzaka ti ba bula Polo na Silase mpe ba tula bawu na boloko. Kengidi ya boloko tulaka bawu na kisika ya nsuka yina vandaka mpimpa mingi mpe yandi kangaka bawu mabaya na makulu.

Bantu ya nkaka yina vandaka na boloko kuwaka ntangu Polo na Silase vanda kembila Yehova na banzimbu. Na mbala mosi na kati-kati ya mpimpa, ntoto ninganaka na ngolo mpe ya ningisaka boloko nyonso. Bamwelo ya boloko fungukaka yawu mosi mpe basinga ya bisengo yina vandaka na makulu ya bawu fungukaka. Kengidi ya boloko kimaka tii kisika yina Polo na Silase vandaka mpe yandi talaka ti bamwelo vandaka ya kufunguka. Samu yandi vanda kanisa ti bantu yina vandaka na boloko kimaka, yandi bakaka mbele samu na kufwa nzutu.

Kaka na ntangu yina, Polo zonzaka na ndinga ya ngolo: ‘Kutalisa ve nzutu ya nge mpasi! Beto kele awa!’ Kengidi ya boloko kotaka mbangu na kati mpe yandi fukamaka na mantwala ya Polo na Silase. Yandi yufulaka bawu: “Yinki mu me fwana kusala samu na kuvuuka?” Ba zonzaka na yandi: ‘Nge na bantu ya yinzo ya nge, beno me bonga kukwikila na Yesu.’ Na manima, Polo na Silase longaka bawu mambu ya Yehova, mpe kengidi na dikanda ya yandi nyonso kuzwaka mbotokolo.