KILESO 38
Lakisa ti na meso ya nge luzingu ke dikabu mosi ya mfunu
Luzingu ke ya kufuluka na mambu mingi ya kitoko. Ata ntangu beto ke kutaná na bampasi, beto lenda sepela na bamambu mingi ya nkaka ya luzingu. Na yawu, wa’ faso beto lenda lakisa ti luzingu ke dikabu mosi ya mfunu na meso ya beto? Samu na yinki ya ke mfunu na kuzitisa yawu?
1. Samu na yinki beto fwana bakila luzingu mutindu dikabu ya mfunu?
Samu luzingu ke dikabu yina me katuka na Tata ya beto ya luzolo Yehova, beto fwana kulakisa ti ya ke mfunu na meso ya beto. Ni na yandi “katukaka luzingu,” ni yandi yidiká luzingu. (Nkunga 36:9) “Ni yandi ke pesaka luzingu, mpe bima nyonso.” (Bisalu 17:25, 28) Yehova pesá beto bima yina beto ke na yawu nsatu samu beto vanda kaka moyo. Kasi ya kulutila, yandi yidiká luzingu ya beto na faso yina ke natá beto na kusepela na yawu.—Tanga Bisalu 14:17.
2. Wa’ faso beto lenda lakisa na Yehova ti luzingu ke dikabu mosi ya mfunu na meso ya beto?
Na ntangu yina nge vandá na kati ya kivumu ya mama ya nge, Yehova vandá kipe nge. Na mosi ya balusambu yina Yehova tulá na Biblia, mosi ya bisadi ya yandi, Davidi, zonzá na yandi: “Meso ya nge talaka munu ntangu mu vandaka na kati ya kivumu.” (Nkunga 139:16) Luzingu ya nge ke mfunu na meso ya Yehova. (Tanga Matayi 10:29-31.) Ya ke salá Yehova mpasi mingi na ntima kana muntu na nko nyonso me tula nsuka na luzingu ya bantu ya nkaka, to ya yandi mosi.a (Kubasika 20:13) Ya ke salá mpe Yehova mpasi kana beto sala ve keba samu na kukengidila luzingu ya beto to ya bampangi. Ntangu beto ke kengidilá luzingu ya beto mpe ya bampangi, beto ke lakisá ti na meso ya beto luzingu ke dikabu mosi ya mfunu mingi.
SOSA KUZABA MBOTE-MBOTE
Tala bafaso yina nge lenda lakisa ti na meso ya nge luzingu ke dikabu mosi ya mfunu.
3. Kipe na faso ya mbote mavimpi ya nge
Bakristo yina pesá luzingu ya bawu na Yehova, ke sadilaka yandi luzingu ya bawu nyonso. Ba me fwana kukipe banzutu ya bawu, samu ba me pesa yawu mutindu munkayulu na Nzambi. Tanga Baroma 12:1, 2, mpe na manima beto zonzila byuvu yayi:
Yinki me bonga kunata nge na kukipe mavimpi (santé) ya nge?
Wapi mutindu nge lenda sala yawu?
4. Sala nyonso samu na kukengidila luzingu ya nge mpe ya bantu ya nkaka
Biblia ke lombá na beto na kulosa bansalulu yina lenda tula luzingu ya beto na mpasi to kunatina beto lufwa. Landa VIDEO samu na kutala mambu yina nge lenda sala samu na kukengidila luzingu ya nge.
Tanga Bingana 22:3, mpe na manima beto tala wa’ faso nge lenda kengidila luzingu ya nge na ya bampangi . . .
ntangu nge kele na yinzo ya nge.
na kisalu ya nge.
na ntangu nge ke na sakanaka.
ntangu nge ke na natá, to ba ke na natá nge.
5. Zitisa luzingu ya mwana yina ke na kati ya kivumu
Davidi zonzá ti Yehova ke talá mpe ke tulá dikebi na luzingu ya mwana yina ke na kati ya kivumu. Tanga Nkunga 139:13-17, mpe na manima beto zonzila kyuvu yayi:
Na meso ya Yehova, luzingu ya muntu ke bandá ntangu mama me kuzwa kivumu to ntangu mwana me butuka?
Bansiku yina Yehova pesá na bana ya Izraele vanda bumbá bakento ya bivumu mpe bana ya bawu yina vandá na kati. Tanga Kubasika 21:22, 23, mpe na manima beto zonzila byuvu yayi:
Wa’ faso Yehova ke talá muntu yina me sala ti kivumu ya muntu basika, kasi yandi me sala yawu ve na nko?
Wa’ faso Yehova ke talá muntu yina me sala yawu na nko?b
Wa’ faso nge ke na talá dikanisi ya Yehova na mambu yayi?
Na ntangu ya nkaka ata kento yina ke talá ti luzingu ke mfunu, lenda kanisa ti kaka kukatula kivumu ke kima ya kusala. Tanga Izaya 41:10, mpe na manima beto zonzila byuvu yayi:
Ntangu ba ke na zonzá na kento ti kaka kukatula kivumu ke mambu ya kusala, na nani yandi lenda sosa lubakusu? Samu na yinki nge me zonza faso yina?
BANTU YA NKAKA KE ZONZAKA: “Kento lenda katula kivumu, ya ke nzutu ya yandi mosi.”
Yinki ke na ndimisá nge ti luzingu ya kento yina ke na kivumu, mpe ya mwana yina ke na kati ke mfunu na meso ya Yehova?
NA BUNKUFI
Biblia ke longá beto na kuzola, na kupesa buzitu, mpe na kukengidila luzingu yina ke dikabu ya Yehova samu na beto. Beto fwana kusala yawu samu na luzingu ya beto mpe ya bampangi.
Mambu ya kusimba
Samu na yinki luzingu ke mfunu na meso ya Yehova?
Yinki ya ke salá Yehova ntangu muntu na nko nyonso me tula nsuka na luzingu ya muntu ya nkaka?
Samu na yinki nge ke na sepelá na dikabu yina Yehova me pesa beto, luzingu?
SOSA KUZABA DYAKA
Wa’ faso beto lenda tonda Yehova na dikabu yina yandi me pesa beto, luzingu?
Nzimbu 141—Dikabu ya luzingu (2:41)
Sosa kuzwa mvutu na kyuvu: Nzambi lenda lemvokila kento yina katulá kivumu?
“Yinki Biblia ke zonzá na yina me tadila kukatula kivumu?” (Tanga yawu na jw.org)
Tala wa’ faso kuvanda na dikanisi ya Yehova na yina me tadila luzingu lenda sadisa beto na kusoola bansaka ya mbote.
Yinki muntu lenda sala kana yandi ke na makanisi ya kufwa nzutu? Tala lubakusu yina yandi lenda kuzwa na kati ya Biblia.
“Mu ke na makanisi ya kufwa nzutu, Biblia lenda sadisa kwandi munu?” (Tanga yawu na jw.org)
a Yehova ke na kyadi mingi samu na ba yina nyonso ke na mawa. (Nkunga 34:18) Yandi zaba mpasi yina ke talá bantu yina ke na makanisi ya kusosa kufwa nzutu, mpe yandi zola kusadisa bawu. Samu na kutala wa’ faso lubakusu ya Yehova lenda soba makanisi ya muntu ya mutindu yina, tanga disolo “Mu ke na makanisi ya kufwa nzutu, Biblia lenda sadisa kwandi munu?” yina ke na kitini “Sosa kuzaba dyaka” na kileso yayi.
b Ba yina katulá bivumu na ntangu ya ntama, ba kunyokwama ve ya kulutila, samu Yehova lenda lemvokila bawu. Na kuzaba mingi na mambu yayi, tala disolo “Yinki Biblia ke zonzá na yina me tadila kukatula kivumu?” yina ke na kitini “Sosa kuzaba dyaka” na kileso yayi.