Wapi mutindu kuvanda na bunkete mpe ya kuvedila na meso ya Nzambi?

Kanisa na mama mosi ya luzolo yina ke na bongisá mwana ya yandi ya fioti samu na kukwenda na lukolo (école). Yandi ke sosa kutala kana mwana ya yandi me yobila mpe kana bilele ya yandi ke ve na mvindu. Ni yawu ke sadisa yandi na kuvanda na mavimpi ya mbote, mpe ya ke lakisa na bantu ya nkaka ti bibuti ya yandi ke zolaka yandi mpe ke kipeke yandi. Kaka faso bibuti yina, Tata ya beto ya luzolo, Yehova, zola ti beto vanda ve na mvindu—ya vanda na nzutu ya beto, na makanisi ya beto, nzonzolo ya beto mpe bansalulu ya beto. Kuvanda na bunkete (propre) mpe ya kuvedila (pur), ke natiná beto bambote mpe ya ke pesá nkembo na Yehova.

1. Yinki beto lenda sala samu na kuvanda na bunkete?

Yehova me zonza na beto: “Beno vanda bantu ya santu.” (1 Piere 1:16) Samu na kuvanda santu beto me lunga kuvanda na makanisi, nzonzolo mpe ndyatulu ya mbote mpe kuvanda na bunkete. Beto ke lakisa ti beto ke na bunkete, na kuyobilá ntangu nyonso, na kusukulá mpe kuyidiká bilele, yinzo mpe tomabilu ya beto. Beto lenda tula mpe diboko na kukombolá mpe kusukulá Yinzo ya Kimfumu. Na kuvandá na bunkete, beto ke pesa nkembo na Yehova.—2 Bakorinto 6:3, 4.

2. Samu na kuvanda ya kuvedila, wapi bifu beto me fwana kulosa?

Biblia ke lombá beto na “kukatula mvindu nyonso yina ke bebisaka nzutu mpe mpeve.” (2 Bakorinto 7:1) Ya zola zonza ti beto fwana kusala bangolo samu na kulosa bima nyonso yina lenda bebisa nzutu ya beto mpe makanisi ya beto. Makanisi ya beto me lunga kupesa kilengi na Yehova. Na yawu, beto sala nyonso samu na kulosa makanisi ya yimbi. (Nkunga 104:34) Beto fwana kusala mpe bangolo samu na kuvanda na nzonzolo ya mbote.—Tanga Bakolose 3:8.

Yinki dyaka lenda nata mvindu na nzutu, nzonzolo, makanisi mpe ndyatulu ya beto? Bima ya nkaka lenda bebisa nzutu ya beto. Na yawu, beto fwana kulosa bima mutindu tabaka, cigarette, dyamba, chicha mpe ba drogues ya nkaka. Kulosa bima nyonso yayi, ke sadisa beto na kuvanda na mavimpi ya mbote mpe beto ke lakisa ti luzingu ke dikabu mosi ya mfunu samu na beto. Beto ke vanda mpe na makanisi, na ndyatulu ya kuvedila, na kusalá bangolo samu na kumanga bansalulu ya mvindu mutindu, kusakana na binama ya kuvukisa nzutu (masturbation), kutala bafoto na bavideo yina ke lakisá bantu yina ke bipene to ke na vukisá nzutu, to kutanga mikanda mpe kuwa banzimbu yina ke vumbulá nsatu ya kuvukisa nzutu (pornographie). (Nkunga 119:37; Baefeze 5:5) Ya lenda vanda mpasi na kubika bansalulu yayi, kasi Yehova ke sadisa beto na kulosa yawu.—Tanga Izaya 41:13.

SOSA KUZABA MBOTE-MBOTE

3. Bunkete ke pesá nkembo na Yehova

Beto lenda zaba dikanisi ya Yehova na yina me tadila bunkete kana beto tanga misiku yina yandi pesá na bana ya Izraele. Tanga Kubasika 19:10 na 30:17-19, mpe na manima beto zonzila byuvu yayi:

• Yinki baverse yayi me lakisa na yina me tadila dikanisi ya Yehova samu na bunkete?

• Yinki nge lenda sala ntangu nyonso samu na kubumba bunkete?

Ya ke lombá ntangu mpe bangolo mingi samu na kuvanda na bunkete. Kasi beto lenda sala yawu ata kisika yina beto kele mpe kana beto ke na mbongo to ve. Tala VIDEO, mpe na manima beto zonzila kyuvu yina ke landa.

VIDEO: Nzambi ke zolá bantu yina ke na bunkete (4:10)

• Wapi mutindu kuvanda na bunkete ke pesá nkembo na Yehova ntangu beto ke samunaka?

4. Losa bansalulu ya mvindu

Kana nge ke kunwá cigarette to ba drogues ya nkaka, nge me zaba ti ya ke mpasi mingi na kubika yawu. Yinki nge lenda sala? Kanisa na mambu ya yimbi yina ya ke na natiná nge. Tanga Matayi 22:37-39, mpe beto tala yinki kunwa tabaka mpe kusadila ba drogues ke salá na . . .

• kindiku ya muntu na Yehova.

• dikanda ya yandi mpe na bantu ya nkaka.

Kanisa na yina nge ke sala samu na kulosa bansalulu ya yimbi mpe sonika yawu.a Tala VIDEO.

VIDEO: Sala bangolo na kukanga nzutu (2:47)

Tanga Bafilipi 4:13, mpe na manima beto zonzila kyuvu yayi:

• Wapi mutindu kuvanda na kifu ya kusambila, kulongoka Biblia mpe kukwenda na balukutakanu lenda sadisa muntu na kununga bansalulu ya yimbi?

5. Sala bangolo na kulosa makanisi mpe bansalulu ya mvindu

Tanga Bakolose 3:5, mpe na manima beto zonzila byuvu yayi:

• Wa’ faso beto me zaba ti kutala bizizi ya bantu yina ke vukisá nzutu, kufidisa ba messages, bafoto to bavideo yina ke vumbulá nsatu ya kuvukisa nzutu mpe kusakana na binama ya kuvukisa nzutu ke mvindu na meso ya Yehova?

• Nge me kanisa ti ya ke mbote Yehova lomba na beto na kuvanda na makanisi, nzonzolo mpe ndyatulu ya kuvedila? Samu na yinki nge me zonza faso yina?

Beto tala wa’ faso beto lenda sala samu na kulosa makanisi ya mvindu. Tala VIDEO.

VIDEO: Sala bangolo samu na kuvanda na makanisi ya kuvedila (1:51)

Yesu sadilá kifwani mosi samu na kulakisa mfunu ya kubumba makanisi, nzonzolo mpe ndyatulu ya kuvedila. Tanga Matayi 5:29, 30, mpe na manima beto zonzila kyuvu yayi:

• Yesu vanda sosa ve kuzonza ti beto talisa banzutu ya beto mpasi, kasi yandi vanda sosa kuzonza ti beto me lunga kusala bangolo. Wapi bima ya mfunu muntu lenda sala samu na kulosa makanisi ya mvindu?b

Zaba ti kana nge ke na nwaná na kubika makanisi ya mvindu, Yehova ke na sepelá na bangolo ya nge. Tanga Nkunga 103:13, 14, mpe na manima beto zonzila kyuvu yayi:

• Kana nge ke na nwaná na nsalulu mosi ya yimbi, wapi mutindu verse yayi lenda sadisa nge na kulemba ve?

Kulemba ata fioti ve!

Ntangu beto ke vutukilá kifu ya yimbi yina beto ke na sosá kubika, ya lenda vanda ve mpasi na kuzonza na mbangu, ‘Mu ke lenda dyaka ve, ya ke mbote mu bika kaka.’ Kasi kanisa na mambu yayi: Ntangu muntu yina ke kimá mbangu ke bulá dibaku mpe ke kubwaka, ya zola zonza ve ti yandi me lembana kukima to yandi ke lenda dyaka ve kukima to ti yandi ke vutuka dyaka na manima mpe kukima dyaka. Mutindu mosi mpe, kubwa dyaka na kifu yina beto ke na sosá kubika zola zonza ve ti beto ke lenda dyaka ve kubika yawu. Ya zola zonza mpe ve ti bangolo nyonso yina beto me sala ke ya mpamba. Zaba ti, kubwa dyaka na kifu yina nge ke na sosá kubika ke kuminá bantu nyonso yina ke na salá bangolo samu na kubika bifu ya yimbi. Na yawu, kubika ata fioti ve kusala bangolo! Yehova ke sadisa nge na kulenda kubika kifu ya yimbi yina.

NA BUNKUFI

Ntangu beto ke salá bangolo na kubumba bunkete, kuvanda na makanisi, nzonzolo mpe ndyatulu ya mbote, beto ke pesá Yehova kilengi.

Mambu ya kusimba

• Samu na yinki ya ke mfunu na kuvanda na bunkete?

• Wapi mutindu beto lenda vanda na bunkete?

• Wapi mutindu nge lenda bumba makanisi mpe ndyatulu ya kuvedila?

SOSA KUZABA DYAKA

Ata ti beto ke ve na mbongo mingi, wapi mambu ya fioti-fioti beto lenda sala samu na kuvanda na bunkete?

Mavimpi na bunkete—kusukulá maboko (3:01)

Tala mambu yina lenda sadisa nge na kulenda kubika kifu ya kunwa cigarette.

“ Comment arrêter de fumer ” (Réveillez-vous !, Mai 2010)

Tala mambu ya yimbi yina nge ke kuzwa na kutalá bizizi ya bantu yina ke na vukisá nzutu (pornographie).

“ La pornographie : inoffensive ou dangereuse ? ” (La Tour de Garde, 1^er Août 2013)

Tala yinki bakala mosi salá samu na kubika kifu ya kutalá bizizi yina bantu ke na vukisá nzutu.

“ J’ai échoué bien des fois avant de réussir ” (La Tour de Garde n^o 42016)