KILESO 41

Yinki Biblia ke zonzá na yina me tadila kuvukisa nzutu

Mutindu ya ke na talanaka na mukanda

Samu na bantu mingi, kuzonzila mambu ya kuvukisa nzutu ke mambu ya nsoni. Kasi Biblia ke zonzilaka yawu pwelele na buzitu nyonso. Mambu yina ya ke zonzá ke samu na bambote ya beto. Ni Yehova yidiká beto. Na yawu, yandi me zaba mambu yina ke ya kulutila mbote samu na beto. Yandi ke zonzá na beto yinki beto me bonga kusala samu na kusepelisa yandi mpe yinki beto lenda sala samu na kusepela na luzingu ya ntangu nyonso na bilumbu yina ke kwiza.

1. Wapi mutindu Yehova ke talá mambu ya kuvukisa nzutu?

Kuvukisa nzutu ke dikabu yina me katuka na Yehova. Yandi zola ti bantu sepela na yawu. Kasi yandi pesaka yawu kaka na kento na bakala yina me kwelanaa. Dikabu yayi ke sadisá ve kaka bantu ya kukwela na kubuta bana, kasi mpe samu ba lakisa luzolo na mutindu ya mbote yina ke pesa bawu kilengi. Ni na yawu Biblia ke zonzá: “Tala kilengi na kento ya nge ya buntwenya.” (Bingana 5:18, 19) Yehova ke zolá ti mukristo ya kukwela vukisa nzutu kaka na kento to bakala ya yandi mpe kubwa ata fioti ve na kinsuza.—Tanga Baebre 13:4.

2. Samu na Nzambi wapi yina ke bafaso ya yimbi ya kuvukisa nzutu?

Biblia ke zonzá ti “Bantu yina ke vukisaka nzutu na faso ya yimbi . . . ke kota ve na Kimfumu ya Nzambi.” (1 Bakorinto 6:9, 10, nwt-MK) Bantu yina soniká Biblia na ndinga ya grec, sadilá mot pornéïa samu na kuzonzila bafaso ya yimbi ya kuvukisa nzutu. Ya zola zonza (1) kuvukisa nzutu bakala na kento yina me kwelana veb, (2) kuvukisa nzutu babakala na babakala to bakento na bakento, mpe (3) kuvukisa nzutu bantu na bibulu. Kana beto “losa bafaso ya yimbi nyonso yayi ya kuvukisa nzutu,” beto ke sepelisa Yehova mpe beto ke kuzwa bambote mingi.—1 Batesalonika 4:3, nwt-MK.

SOSA KUZABA MBOTE-MBOTE

Tala mambu yina nge me bonga kusala samu na kukima bafaso ya yimbi ya kuvukisa nzutu mpe tala bambote yina nge ke kuzwa kana nge losa bansalulu nyonso ya mvindu.

Yozefi ke na kimá kento ya Potifare. Kento ya Potifare ke na bendá kinkuti ya Yozefi.

3. Kima bafaso ya kuvukisa nzutu yina ke yimbi na meso ya Nzambi

Yozefi salá nyonso samu na kukima kento yina vandá sosa kuvukisa nzutu na yandi. Tanga Kubanda 39:1-12, mpe na manima beto zonzila byuvu yayi:

Samu na yinki Yozefi kimaka?—Tala verse 9.
Nge me kanisa ti Yozefi baká mukanu ya mbote? Samu na yinki?

Wapi mutindu bantwenya lenda landa kifwani ya Yozefi bubu yayi, mpe kukima bafaso ya kuvukisa nzutu yina ke yimbi na meso ya Nzambi? Tala VIDEO.

VIDEO: Kima bafaso ya yimbi ya kuvukisa nzutu (5:06)

Yehova zola ti beto kima to beto bika bafaso nyonso ya yimbi ya kuvukisa nzutu. Tanga 1 Bakorinto 6:18, mpe na manima beto zonzila byuvu yayi:

Wapi bamambu lenda sala ti beto kubwa na bafaso ya yimbi ya kuvukisa nzutu?
Wa’ faso nge lenda kima bafaso ya yimbi ya kuvukisa nzutu?

4. Manga mambu yina lendá nata nge na kusadila bafaso ya yimbi ya kuvukisa nzutu

Yinki lenda sala ti ya kuma pete na muntu na kuvukisa nzutu na faso ya yimbi? Tala VIDEO, mpe na manima beto zonzila kyuvu yina ke landa.

VIDEO: Tanga Biblia ntangu nyonso samu na kubwa ve na mutambu (3:02)

Ntangu mpangi ya bakala yina beto me tala na video kwizá zaba ti, makanisi mpe ndyatulu ya yandi zola nata yandi na kusala kinsuza to na kuvanda dyaka ve ya kukangama na kento ya yandi, yinki yandi salaka?

Bakristo ya kukwikama ke vandá mpe na nsatu ya kusala bangolo samu na kuvanda na makanisi ya mbote. Yinki nge lenda sala samu na kukatula makanisi ya yimbi na yintu ya nge? Tanga Bafilipi 4:8, mpe na manima beto zonzila byuvu yayi:

Na wapi mambu ya mbote beto me bonga kukanisa?
Wa’ faso kutanga Biblia mpe kukipesa na kisalu ya Yehova, ke sadisa beto na kukatula makanisi yina lenda nata beto na kusala disumu?

5. Malongi ya Yehova ke natina beto bambote mingi

Yehova zaba yina ke mbote samu na beto. Na yawu, yandi ke zonzilá beto yinki kusala samu na kuvanda na makanisi mpe na ndyatulu ya kuvedila, mpe bambote yina ya ke natina beto. Tanga Bingana 7:7-27 to tala VIDEO, mpe na manima beto zonzila byuvu yina ke landa.

VIDEO: Beto kukondwa ve mayela (9:31)

Yinki ntwenya ya bakala yayi salá yina bwisaka yandi na mutambu?—Tala Bingana 7:8, 9.
Faso Bingana 7:23, 26 me lakisa yawu, kuvukisa nzutu na faso ya yimbi lenda natina muntu bampasi mingi. Kana nge sala bangolo samu na kuvanda na ndyatulu ya kuvedila, wapi bamambu ke kumina ve nge?
Wa’ faso ndyatulu mpe makanisi ya kuvedila, lenda sadisa beto na kuzwa luzingu ya ntangu nyonso na bilumbu yina ke kwiza?

Samu na bantu ya nkaka, mambu yina Biblia ke zonzá na yina me tadila kuvukisa nzutu babakala na babakala to bakento na bakento, ke lakisá ti Nzambi zola ve bantu. Kasi Yehova Nzambi ya luzolo, me zola ti bantu sepela na luzingu ya ntangu nyonso. Na yawu, samu na kuzwa luzingu yango, beto fwana kutadila bamambu faso Yehova ke tadilaka yawu mpe kusadila misiku ya yandi ntangu nyonso na luzingu ya beto. Tanga 1 Bakorinto 6:9-11, mpe na manima beto zonzila kyuvu yayi:

Katula kuvukisa nzutu babakala na babakala to bakento na bakento, ya ke na mambu ya nkaka yina Yehova ke niminá beto na kusala?

Samu na kusepelisa Nzambi, beto nyonso zola soba ndyatulu ya beto. Kusala yawu ke kwandi na bambote? Tanga Nkunga 19:8, 11, mpe na manima beto zonzila kyuvu yayi:

Nge me kanisa ti beto lenda zitisa malongi ya Yehova to ya ke mpasi na kuzitisa yawu?

Collage: 1. Ntwenya mosi ya kento ke ya kuvanda na dikangu ya yandi kasi yandi ke na mawa mingi. Yandi ke na kunwá malafu na cigarette na bandiku ya yandi na boite de nuit. 2. Na kilengi nyonso, kento yango ke na sololá na bampangi ya nkaka ya kento na Yinzo ya Kimfumu. — Yehova sadisá bantu mingi na kutadila bamambu faso yandi ke tadilaka yawu, mpe na kutumama na malongi ya yandi. Yandi lenda sadisa nge mpe

BANTU YA NKAKA KE ZONZAKA: “Kana bantu zole me zolasana, ya ke ve yimbi ba vukisa nzutu ata ti ba ke ve ya kukwelana.”

Yinki nge lenda zonza?

NA BUNKUFI

Kuvukisa nzutu ke dikabu yina me katuka na Yehova, kasi yandi pesaka yawu kaka na kento na bakala yina ke ya kukwelana.

Mambu ya kusimba

Wapi yina ke bafaso ya yimbi ya kuvukisa nzutu?
Yinki beto me fwana kusala samu na kubwa ve na bafaso ya yimbi ya kuvukisa nzutu?
Wapi bambote beto ke kuzwa kana beto tadila bamambu mutindu Yehova ke tadilaka yawu, mpe kuzitisa malongi ya yandi na yina me tadila kuvukisa nzutu?

Sonika kilumbu yina kileso me manisa:

Yina nge lenda sala

Kanga na yintu verse mosi to zole ya kileso yayi, yina lenda sadisa nge na kubwa ve na mutambu ya bafaso ya yimbi ya kuvukisa nzutu.

Mambu ya nkaka ya kusala:

Your other goal

SOSA KUZABA DYAKA

Tala samu na yinki Nzambi me zola ti bakala na kento yina ke na nsatu ya kuvanda yinzo mosi, zolá vanda ya kukwelana.

“Yinki Biblia ke zonzá na yina me tadila kento na bakala yina ke vandá yinzo mosi, kasi ba me kwelana ve?” (Tanga yawu na jw.org)

Samu na Biblia kuvukisa nzutu babakala na babakala to bakento na bakento kele yimbi. Tala samu na yinki ya zola zonza ve ti beto me bonga kuyina ba yina ke salaka yawu.

“Kuvukisa nzutu babakala na babakala to bakento na bakento kele kwandi yimbi?” (Tanga yawu na jw.org)

Tala faso malongi ya Nzambi na yina me tadila bafaso nyonso ya kuvukisa nzutu ke bumbá beto.

“Kutula kinama ya kuvukisa nzutu na yinwa, kele kwandi mutindu ya kuvukisa nzutu?” (Tanga yawu na jw.org)

Na disolo “ Ils ont respecté ma dignité, ” tala yinki natá bakala mosi yina vanda vukisá nzutu na babakala, na kubika nsalulu yina samu yandi sepelisa Nzambi.

“ La Bible transforme des vies ” (La Tour de Garde, 1^er Avril 2011)

a Na kati ya buku yayi, bisika nyonso yina ba ke na zonzilá makwela to kuvanda ya kukwela, ya zola zonza bakala na kento yina me kwelana mutindu luyalu ke lombaka yawu.

b Kuvukisa nzutu zola zonza mpe kusakana na kinama ya kuvukisa nzutu, to kuvukisa nzutu na muntu yina beno me kwelana ve, kuvukisa nzutu na yinwa, mpe na kinama ya kunenina.