KILESO 42
Yinki Biblia ke zonzá na yina me tadila kukwela to kukwela ve?
Bantu ya nkaka ke kanisá ti samu muntu vanda na kilengi na luzingu, yandi me bonga kukwela. Ya kele na ba yina ke ya kukwela kasi ke na mawa, mpe ba ya nkaka yina ke ve ya kukwela ke na kilengi. Biblia ke zonzá ti kukwela to kukwela ve, kele nyonso zole makabu ya Yehova.
1. Wapi yina ke bambote ya kuvanda ve ya kukwela?
Biblia ke zonzá ti: “muntu yina me kwela [. . .] me sala mbote, kasi muntu yina me manga kukwela me lutila kusala mambu ya mbote.” (Tanga 1 Bakorinto 7:32, 33, 38.) Samu na yinki Biblia ke zonzá ti muntu yina me kwela ve “me lutila na kusala mambu ya mbote”? Mukristo yina ke ve ya kukwela, kele ve na kento to bakala ya kukipe mpe yandi ke na ntangu mingi. Na kifwani, yandi lenda sala bamambu mingi mutindu kukwenda na bwala ya nkaka samu na kusamuna. Ya kulutila, yandi ke na ntangu mingi samu na kukulisa kindiku ya yandi na Yehova.
2. Wapi yina ke bambote ya kuvanda ya kukwela?
Kuvanda ve ya kukwela ke na bambote ya yawu, kasi kuvanda ya kukwela mpe ke na bambote ya yawu. Biblia ke zonzá ti “bantu zole me lutila muntu mosi.” (Longi 4:9) Matsyeleka yayi ke talaná pwelele na bakristo yina ke salá nyonso samu na kusadila malongi ya Biblia na kati ya makwela ya bawu. Kento na bakala yina kwelaná, baká mukanu ya kuzola mpe ya kuzitisa mosi na mosi na kati ya bawu luzingu ya bawu nyonso. Ya ke sala ti ba tula ntima na dikwela ya bawu mpe ba bakila yawu mutindu kima yina ke kengidila bawu, kulutila ba yina ke vandá yinzo mosi kasi ba me kwelana ve. Bana yina ba ke buta mpe, ke kula na kisika yina ke kengidila bawu.
3. Wapi yina ke dikanisi ya Yehova na yina me tadila makwela?
Ntangu Yehova kwelisá kento na bakala ya ntete, yandi zonzá: “Bakala ke bika tata ya yandi na mama ya yandi mpe yandi ke kangama na kento ya yandi.” (Kubanda 2:24) Yehova zola ti kento na bakala zolasana mpe ba zinga kintwadi luzingu ya bawu nyonso. Yehova ke ndimá ti kento na bakala lenda kufwa makwela, kaka kana mosi na kati ya bawu me sala kinsuza. Ni na yawu, Yehova ke pesá na bakala to kento yina me sala ve disumu bweso ya kusoola, kana yandi ke kufwa makwela to ve.a (Matayi 19:9) Yehova ke zolá ve ata fioti ti mukristo kwela bakento to babakala mingi, kasi mosi kaka.—1 Timote 3:2.
SOSA KUZABA MBOTE-MBOTE
Tala wapi mutindu nge lenda vanda na kilengi, mpe kupesa Yehova kilengi ata ti nge ke ya kukwela to ya kukwela ve.
4. Kana nge ke ve ya kukwela sadila mbote dikabu yina
Samu na Yesu, kuvanda ve ya kukwela vandá dikabu. (Matayi 19:11, 12) Tanga Matayi 4:23, mpe na manima beto zonzila kyuvu yayi:
Wa’ faso Yesu sadilá dikabu ya kuvanda ve ya kukwela samu na kusala luzolo ya Tata ya yandi mpe kusadisa bantu ya nkaka?
Bakristo yina ke ve ya kukwela lenda sadila na kilengi nyonso dikabu yina mutindu Yesu. Tala VIDEO, mpe na manima beto zonzila kyuvu yina ke landa.
Wa’ faso bakristo yina ke ve ya kukwela lenda sadila mbote dikabu yayi?
Nge me zaba yawu?
Biblia ke pesá ve bamvula yina muntu me fwana kukwela. Kasi, ya ke lombá na muntu yina ke na nsatu ya kukwela na kulutisa ntete “kubanda ya buntwenya,” samu ti na ntangu yina nsatu ya kuvukisa nzutu ke vandá ngolo mpe ya lenda sala ti yandi soola ve mbote muntu ya kukwela.—1 Bakorinto 7:36, nwt-MK.
5. Soola na mayela nyonso muntu yina nge ke kwela
Kusoola muntu yina nge ke kwela ke mosi ya mikanu ya kulutila mfunu na luzingu. Tanga Matayi 19:4-6, 9, mpe na manima beto zonzila kyuvu yayi:
Samu na yinki mukristo fwana kukanisa mbote-mbote tekila yandi baka mukanu ya kukwela?
Biblia ke zonzilá bifu ya mbote yina nge me bonga kusosa na kento to bakala yina nge me zola kukwela. Kasi mambu ya kulutila mfunu, ni kusosa kento to bakala yina ke zolá Yehova.b Tanga 1 Bakorinto 7:39 mpe 2 Bakorinto 6:14. Mpe na manima beto zonzila byuvu yayi:
Samu na yinki beto me fwana kukwelana kaka na mpangi mukristo?
Samu na nge, yinki ya ke sala Yehova kana muntu me soola kukwela muntu yina ke ve kisadi ya yandi?
Kana ba me vukisa bibulu zole yina ke ve nene to yinda mosi samu na kusala kintwadi, bawu zole ke tala mpasi. Mutindu mosi mpe, mukristo yina me kwelana na muntu yina ke ve mukristo mutindu yandi ke kutana na bampasi mingi
6. Tala mambu ya makwela mutindu Yehova ke tadilaka yawu
Na ntangu ya Izraele ya ntama, babakala ya nkaka vandá kufwa makwela na bakento ya bawu, samu na mambu yina Biblia me pesa ve nzila na kufwa makwela. Tanga Malaki 2:13, 14, 16, mpe na manima beto zonzila kyuvu yayi:
Samu na yinki Yehova ke zolá ve ntangu bantu ke kufwá makwela samu na mambu yina biblia ke zonzilá ve?
Kinsuza mpe kufwa makwela ke salá mpasi na mpangi yina me sala ve disumu mpe na bana
Tala VIDEO, mpe na manima beto zonzila kyuvu yina ke landa.
Kana nge ke ya kukwela kento to bakala yina ke ve Mbangi ya Yehova, yinki nge fwana kusala samu dikwela ya beno vanda na kilengi?
7. Sadila malongi ya Yehova na yina me tadila makwela
Kuzitisa malongi ya Yehova na yina me tadila makwela lenda lomba bangolo mingi.c Kasi Yehova ke sakumuná ba yina nyonso ke salaka yawu. Tala VIDEO.
Tanga Baebre 13:4, mpe na manima beto zonzila byuvu yayi:
Nge me kanisa ti beto lenda zitisa malongi yina Yehova me pesa samu na makwela to ya ke mpasi na kuzitisa yawu? Samu na yinki nge me zonza faso yina?
Yehova ke lombá na bakristo na kusonika makwela ya bawu to na kufwa yawu na mantwala ya luyalu, mutindu luyalu ke lombaka yawu na babwala mingi. Tanga Tite 3:1, mpe na manima beto zonzila byuvu yayi:
Wapi mutindu luyalu ke zolá ti makwela salama? Kana nge ke zonzá ti nge ke ya kukwela, “dikwela” ya nge ke kwandi faso luyalu ke lombaka yawu?
MUNTU LENDA YUFULA: “Kana bantu me zolasana, samu na yinki ba me fwana kukwelana samu na kuvanda yinzo mosi?”
Wapi mvutu nge ke pesa?
NA BUNKUFI
Kuvanda ya kukwela to ya kukwela ve, kele nyonso zole makabu ya Yehova. Kana beto sadila misiku ya Yehova na mosi na mosi ya makabu yayi, ya ke natina beto kilengi ya tsyeleka.
Mambu ya kusimba
Wapi mutindu bantu yina ke ve ya kukwela lenda sadila mbote dikabu ya bawu?
Samu na yinki Biblia ke zonzá ti beto me bonga kukwelana kaka na mpangi mukristo?
Na wapi mambu Biblia ke pesá nzila na kufwa makwela?
SOSA KUZABA DYAKA
Yinki zola zonza kukwelana “kaka na Mfumu”?
“ Questions des lecteurs ” (La Tour de Garde, 1er Juillet 2004)
Tala bavideo zole ya nkufi yina lenda sadisa nge, na kusoola mbote-mbote muntu yina nge ke banda kutalana na yandi samu na kuzabana mpe na manima kukwelana.
Tala samu na yinki mpangi mosi ya bakala zonzá ti yina Yehova pesaka yandi lutilaka nyonso yina yandi bikaka.
Na wapi bamambu bantu me fwana kukanisa tekila ba baka mukanu ya kufwa makwela to ya kukabuka?
“ Honore ‘ce que Dieu a uni’ ” (La Tour de Garde, Décembre 2018)
a Tala Note 4 ya nsuka yina me zonzila mambu ya kubika yinzo ya makwela ata ti kinsuza me salama ve.
b Na babwala ya nkaka, ni bibuti ke sosilá bana ya bawu bantu yina ba ke kwela. Ni na yawu, ntangu bibuti ke sala yawu, kima ya ntete ba ke sosa na muntu yina ke kwela mwana ya bawu, ke vanda ve ni bimvwama ya yandi, kasi luzolo ya yandi na Yehova.
c Kana nge ke vandá na muntu yina beno ke ve ya kukwelana, ya ke kaka ni na nge na kubaka mukanu ya kukwelana na yandi to ya kukabuka.