Bamfumu zole yina ke na wisaná ve na ntangu ya nsuka

Baprofesi mingi yina ke na tablo yayi, ke na zonzilá mambu yina ke na lunganá na ntangu mosi. Ya ke na lakisá na bafaso mingi ti beto ke na zingá “na ntangu ya nsuka.”—Dan. 12:4.

Tablo ya baprofesi yina ke na lakisa nani ke mfumu ya Nord mpe mfumu ya Sud banda 1870 tii bubu yayi.

Baverse: Luz. 11:7; 12:13, 17; 13:1-8, 12

Profesi: “Kibulu ya bruse” ke na yalá ntoto bamvula kuluta 3000. Na ntangu ya nsuka, ba me lwalisa yintu ya sambwadi ya kibulu yango. Na manima, yintu yango me beluka, “ntoto nyonso” mase landa kibulu ya bruse. Satan ke na sadilá kibulu ya bruse na “kunwanisa [bana yina kento butá], yina bikaná” na ntoto.

Kulungana ya profesi: Na manima ya mvula ya nene ya ntangu ya Nowe, baguvernema ya bantu yina ke ba-enemi ya Yehova bandá kuyala na zulu ya bantu. Bamvula kuluta 3000 na manima, Angleterre, mosi ya baguvernema yango manisá ngolo na ntangu ya Guerre Mondiale ya Ntete. Bwala yango kumá dyaka ngolo, ntangu ba vukaná na États-Unis. Na ntangu ya nsuka, Satan ke na sadilá baguvernema nyonso ya ntoto na kukwamisa bisadi ya Yehova.
Baverse: Dan. 11:25-45

Profesi: Na ntangu ya nsuka, mfumu ya Nord na mfumu ya Sud ke na nwaná samu na kuyala yinza.

Kulungana ya profesi: Allemagne me nwana na Angleterre na États-Unis. Na 1945, URSS na babwala yina ke wisaná na yandi, kumá mfumu ya Nord. Na 1991, URSS me kubwa, mpe na manima, Russie na babwala yina ke wisaná na yandi me kuma mfumu ya Nord.
Baverse: Iza. 61:1; Mal. 3:1; Luke 4:18

Profesi: Yehova me filisa “kinati-nsangu (messager)” samu na “kuyidika nzila” avant Kimfumu ya Nzambi butuka. Grupe yayi me banda “ kunata nsangu ya mbote na bapovre.”

Kulungana ya profesi: Kubanda 1870, mpangi Charles Taze Russell na bampangi ya yandi, bandá kulongoka Biblia samu na kuzaba matsyeleka yina ya ke longá. Na 1881, ba kwizá zaba ti ya ke mfunu mingi na bisadi ya Yehova na kusala kisalu ya predikasion. Ba basisá na mikanda ba-artikle faso “ Recherchons 1000 prédicateurs ” mpe “ Oints pour prêcher ”
Baverse: Mat. 13:24-30, 36-43

Profesi: Na kati ya bilanga ya blé(mbuma yina ke pesá farine), enemi mosi me kunda matiti ya yimbi. Ba me bika ya kula mpe ya yela tii na ntangu ya kubuka bambuma. Kuna, ba ke sola mpe ba ke katula matiti ya yimbi na kati ya blé.

Kulungana ya profesi: Katuka 1870, ya kumá dyaka ve mpasi na kuzaba ba nani ke bakristo ya tsyeleka mpe ba nani ke bakristo ya luvunu. Na bantangu ya nsuka, kimvuka ya bakristo ya tsyeleka me talana; mpe ba me katuka na mabuundu ya luvunu.
Baverse: Dan. 2:31-33, 41-43

Profesi: Makulu ya fer na argile ya kiteki yina ba me yidika na bisengo ya bafaso mingi.

Kulungana ya profesi: Ntoto ke ni bantu yina Angleterre na États-Unis ke yalá, mpe yina ke lakisá yintu ngolo na baguvernema yayi. Mpe ba ke salá ti, baguvernema yango sadila ve ngolo nyonso.
Baverse: Mat. 13:30; 24:14, 45; 28:19, 20

Profesi: Ba me bumba “blé” na “magazin ya bambuma” mpe ba me tula “muumbu ya mayele mpe ya kukwikama” na zulu ya “bisadi ya yinzo.” “Nsangu ya mbote ya Kimfumu ya Nzambi” me banda kumwangana “na yinza nyonso.”

Kulungana ya profesi: Na 1919 muumbu ya mayela me banda kudikisa bisadi ya Nzambi. Banda ntangu yina, bampangi yina vanda longoka Biblia me banda kupreche na tiya nyonso nsangu ya mbote. Bubu yayi, batemwe ya Yehova ke na mwangisá nsangu ya mbote na bayinsi kuluta 200, mpe me sadila Biblia na kubasisa mikanda na bandinga kuluta 1000.
Baverse: Dan. 12:11; Luz. 13:11, 14, 15

Profesi: Kibulu ya nkaka ya bruse yina ke na bakorne zole, ke na zonzá na bantu ya ntoto na kusadila “kibulu ya bruse” ya ntete mpe yandi ke na pesá “mupepe ya kupema na kizizi ya kibulu” yango.

Kulungana ya profesi: Kimvuka ya ngolo ya Angleterre na États-Unis, me tunga SDN (Société des Nations). Bayinsi ya nkaka mpe me kota na SDN. Na yawu mfumu ya Nord kotá na SDN katuka 1926 tii 1933. Bantu kanisá ti, SDN lenda nata kizunu na zulu ya ntoto, kima yina kaka Kimfumu ya Nzambi lenda nata. Bantu kanisá mpe ti ONU lenda nata kizunu na zulu ya ntoto.
Baverse: Dan. 8:23, 24

Profesi: Mfumu mosi yina ke faso kibulu ya ngolo yina ke pesá boma “ke na kufwa bantu na faso mosi ya ngitukulu.”

Kulungana ya profesi: Kimvuka ya ngolo ya Angleterre na États-Unis me kufwa bantu mingi mpe me mwangisa bisika mingi. Na kifwani, na ntangu ya Guerre Mondiale ya Zole, États-Unis losá bombe atomik na bwala yina vandá enemi ya bawu. Na minduki nyonso yina bantu me sadila deja, ni bombe yayi me lutila kufwa bantu mingi.
Baverse: Dan. 11:31; Luz. 17:3, 7-11

Kibulu ya mbwaki yina ke na bakorne kumi ke na basika na dibulu (dibenga ya yinda) ke mfumu ya nana. Buku ya Danyele ke na zonzila “kibulu ya nganzi yina ke nata lufwa.”

Kulungana ya profesi: Na ntangu ya Guerre Mondiale ya Zole, SDN mwanganá. Na manima, ONU baka kisika ya SDN. Faso SDN, ONU mpe me baka nkembo yina me bonga na Kimfumu ya Nzambi. Ni ONU ke nwanisa mabuundu.
Baverse: 1 Tes. 5:3; Luz. 17:16

Bayinsi ke zonzá “kizunu mpe sécurité,” mpe “[bakorne] kumi” mpe “na kibulu ya bruse ya ngitukulu” ke nwanisa “kento ya kidumba” mpe ke kufwa yandi. Na manima, Kimfumu ya Nzambi ke kufwa yinza yayi.

Kulungana ya profesi: Bayinsi ya yinza lenda zonza ti ba me lenda kunata kizunu na securite na ntoto nyonso. Mpe na manima, bayinsi yina ke na kimvuka ya ONU ke mwangisa mabuundu nyonso ya luvunu. Ni yawu ke nata bampasi ya nene (grande tribulation). Bampasi ya nene ke manisa ntangu Yesu ke mwangisa kimvuka ya politike ya bayinsi nyonso yina Satan ke twadisá, na guerre ya Armagedon.
Baverse: Ezk. 38:11, 14-17; Mat. 24:31

Profesi: Gog me kota na yinsi ya bisadi ya Nzambi. Mpe ba-ange me vukisá “ba yina ba solá” na kukwenda zinga na zulu.

Kulungana ya profesi: Mfumu ya Nord na bayinsi ya nkaka ke nwanisa bisadi ya Nzambi. Ntangu fioti na manima, bakristo yina ba solá, yina ke ntete na ntoto ke kwenda na zulu.
Baverse: Ezk. 38:18-23; Dan. 2:34, 35, 44, 45; Luz. 6:2; 16:14, 16; 17:14; 19:20

Profesi: “Muntu yina ke ya kuvanda” na zulu ya “cheval ya mpembe” ke manisa “na kununga guerre ya yandi”, ntangu yandi ke mwangisa Gog na basoda ya yandi. Ba me losa “kibulu ya bruse” na “dyanga ya sufre yina ke na tiya,” mpe ditadi me mwangisa kiteki ya nene.

Kulungana ya profesi: Yesu, Mfumu ya Kimfumu ya Nzambi, ke kwiza vuukisa bisadi ya Nzambi. Yesu, bakristo 144000, mpe ba-ange, ke kwiza mwangisa bayinsi nyonso yina ke na nwanisa bisadi ya Nzambi. Mpe ba ke manisa mbala mosi na yinza ya Satan.