“Pesa munu ntima mosi, samu mu vanda na boma ya nkumbu ya nge”

1. Yinki zola zonza kuvanda na boma ya Nzambi, samu na yinki ya ke mbote na ba yina ke zolá Yehova?

BAKRISTO ke zolá Nzambi, mpe ba ke vandá na boma ya yandi. Samu na ba ya nkaka, ya lenda salama ve ti nge zola muntu mpe nge vanda na boma ya yandi. Kasi awa, beto ke na zonzilá ve boma yina ke salá ti muntu tekita. Beto ke na zonzilá boma ya nkaka. Bantu yina ke vandá na boma ya faso yayi, ke vandá na buzitu mingi samu na Nzambi. Ba ke zolá ve kusala mambu yina lenda nyongisa Tata ya bawu ya mazulu, samu ba zola ve kubebisa kindiku ya bawu na yandi.—Nku. 111:10; Bin. 8:13.

2. Faso ya me basika na lusambu ya David yina ke na Nkunga 86:11, wapi bamambu zole yina beto ke zonzila?

² Tanga Nkunga 86:11. Ntangu nge ke na kanisá na bamambu yayi, nge lenda tala pwelele ti, David zabá yinki zola zonza kuvanda na buzitu ya mingi na Yehova. Beto zonzila faso beto lenda sadila mambu yina David zonzá na lusambu ya yandi. Ntete-ntete, beto ke tala barezon yina beto ke na yawu ya kuvanda na buzitu ya mingi samu na nkumbu ya Nzambi. Ya zole, beto ke tala wa’ faso na luzingu ya beto nyonso beto lenda lakisa ti beto ke na buzitu ya mingi samu na nkumbu ya Nzambi.

SAMU NA YINKI BETO ZOLA VANDA NA BUZITU YA MINGI SAMU NA NKUMBU YA YEHOVA

3. Wapi mambu sadisá Moyize na kuvanda na buzitu ya kulutila samu na nkumbu ya Nzambi?

³ Kanisa ntete, yinki ya salá Moyize ntangu yandi bumbaná na ditadi ya nene, ntangu yandi talá na vizion nkembo ya Yehova kuluta na mantwala ya yandi. Ya lenda vanda ti vizion yayi, lutilá kitoko na bavizion nyonso yina Nzambi pesá bantu avant Yesu kwiza na ntoto. Ange mosi zonzá na Moyize mambu yayi: “Yehova, Yehova, Nzambi yina ke talá bantu kyadi mpe yina zaba kuvanda na kisika ya bantu, yandi ke dasuká ve na mbangu, mpe ke ya kufuluka na luzolo ya kukangama mpe na matsyeleka, yina ke lakisá luzolo ya yandi ya kukangama na bantu mingi, yandi ke lemvokilá bifu ya yimbi mpe masumu.” (Bas. 33:17-23; 34:5-7) Ntangu ya nkaka, mambu yayi vandá vutikila Moyize na ntima, ntangu yandi sadilá nkumbu ya Yehova. Ya lenda vanda ti, ni yina natá Moyize na kukebisa bana ya Izraele na “kuvanda na boma ya bunene ya nkumbu yayi.”—Kul. 28:58.

4. Yinki lenda sadisa beto na kupesa Yehova buzitu ya kulutila?

⁴ Ntangu beto ke kanisá na nkumbu, Yehova, beto zolá kanisa mpe wa’ faso ya muntu Yehova kele. Beto zolà kanisa na bifu ya yandi ya mbote faso ngolo ya yandi, mayela ya yandi, kifu ya yandi ya kuyiina mambu ya yimbi, mpe luzolo ya yandi. Kukanisa na bifu ya mbote yayi mpe ya nkaka, lenda nata beto na kupesa dyaka yandi buzitu ya kulutila.—Nku. 77:11-15.

5-6. a) Nkumbu ya Nzambi zola zonza yinki? b) Na Kubasika 3:13, 14 mpe na Izaya 64:8, wa’ faso Yehova ke salá ti bima kuma, samu na kulungisa makanisi ya yandi?

⁵ Yinki beto zaba, na yina zola zonza nkumbu ya Nzambi? Bantu ya mayela mingi ke ndimá ti, nkumbu Yehova zola zonza “Yandi ke kumisaka.” Ya zola zonza ti ata kima mosi lenda kanga Yehova nzila na kusala yina yandi zola kusala, mpe yandi lenda sala ti bima kuma faso yandi me zola. Wa’ faso ya lenda salama?

⁶ Yehova ke salá ti bima kuma faso yandi zola ya vanda samu na kulungisa dikanisi ya yandi. (Tanga Kubasika 3:13, 14.) Na mikanda ya beto, beto ke zonzilá mingi samu na yinki beto zolá baka ntangu ya kukanisá na kitini yayi ya kimuntu ya Nzambi. Yehova lenda nata mpe bisadi ya yandi yina ke bantu ya masumu, na kukuma nyonso yina yandi zola samu na kusadila yandi mpe kulungisa dikanisi ya yandi. (Tanga Izaya 64:8.) Ni na bafaso yayi, Yehova ke salá ti dikanisi ya yandi lungana. Ata kima lenda kanga yandi nzila na kulungisa makanisi ya yandi.—Iza. 46:10, 11.

7. Wa’ faso beto lenda kulisa kifu ya beto ya kuvutulá matondo na Tata ya beto ya mazulu?

⁷ Beto lenda kulisa kifu ya beto ya kuvutulá matondo na Tata ya beto ya mazulu, na kubaká ntangu ya kukanisá mbote-mbote na bima yina yandi yidiká, mpe na nyonso yina yandi me pesa beto ngolo ya kusala. Na kifwani, ntangu beto ke kanisá na nyonso yina Yehova yidiká, ntima ya beto ke fuluká na kilengi. (Nku. 8:3, 4) Ntangu beto ke kanisá mbote-mbote na yina Yehova sadisá beto na kusala samu na kulungisa luzolo ya yandi, buzitu ya beto samu na yandi ke kula. Ya tsyeleka, beto zolá vanda na boma mingi ya nkumbu ya Nzambi, ya kimuntu ya yandi, ya nyonso yina yandi salá, mpe ya nyonso yina yandi ke sala.—Nku. 89:7, 8.

“MU KE ZONZILA NKUMBU YA YEHOVA”

8. Faso ke na zonzá Kulonga Misiku 32:2, 3, wa’ faso Yehova zola ti bisadi ya yandi bakila nkumbu ya yandi?

⁸ Kaka avant bana ya Izraele kota na ntoto ya promese, Yehova zonzá na Moyize na kusonika nzimbu mosi. (Kul. 31:19) Na manima, yandi longá nzimbu yango na bana ya Izraele. (Tanga Kulonga Misiku 32:2, 3.) Ntangu beto ke kanisá na baverse 2 na 3, ya ke talaná pwelele ti, Yehova zola ve ti ba bumba nkumbu ya yandi, to bantu manga kutanguna nkumbu yango samu ti ya me lutila santu. Yandi zola ti, bantu nyonso yina yandi yidiká, zaba nkumbu ya yandi! Ya vandá bweso ya nene samu na bana ya Izraele, na kuwa Moyize kulonga bawu mambu ya Yehova mpe bunene ya nkumbu ya yandi! Kaka faso mvula ya malembe ke sadisá bayinti na kukula, mambu yina Moyize longá bawu, kumisá kiminu ya bawu ngolo mpe pesá bawu kuraje. Wa’ faso beto lenda zaba si faso ya beto ya kulonga ke mpe faso yayi?

9. Wa’ faso beto lenda tula diboko samu na kusukula nkumbu ya Yehova?

⁹ Ntangu beto ke salá predikasion ya yinzo na yinzo to na banzila, beto lenda sadila Biblia ya beto na kulakisa bantu nkumbu ya Nzambi, Yehova. Beto lenda pesa bawu mikanda, kulakisa bawu bavideo ya kitoko, mpe bima ya nkaka yina ke pesá nkembo na Yehova na site ya beto. Na kisalu, na lekole, to ntangu beto ke na salá voyage, beto lenda sosa bantangu ya mbote samu na kuzonzila nkumbu ya Nzambi ya beto ya luzolo, mpe nani yandi kele. Beto lenda zonzila bawu bima ya kitoko yina Yehova ke sala samu na beto mpe samu na ntoto. Mpe ntangu ba ke kuwa bamambu yayi, ya lenda vanda mbala ya ntete na luzingu ya bawu na kuzaba ti Yehova ke zolá beto. Ntangu beto ke zonzila bantu ya nkaka matsyeleka yina me tadila Tata ya beto ya mazulu, beto ke tula diboko samu na kusukula nkumbu ya yandi. Beto ke sadisa bantu na kuzaba ti, ba longá bawu mambu mingi ya luvunu na nkumbu ya Nzambi. Mambu ya Biblia yina beto ke longá bantu, ke kima ya kulutila mbote na bima nyonso yina ba lenda longoka.—Iza. 65:13, 14.

10. Ntangu beto ke longoká na bantu, samu na yinki beto zolá suka ve kaka na kulonga bawu mambu yina Nzambi ke zolá mpe misiku ya yandi?

¹⁰ Ntangu beto ke longoká Biblia na bantu, beto zolá sadisa bawu na kuzaba mpe kusadila nkumbu ya Yehova. Dyaka, beto zolá sadisa bawu na kuzaba mbote-mbote yinki nkumbu ya Yehova zola zonza. Beto ke lenda kwandi kusala yawu si beto ke longá bantu misiku ya Nzambi kaka na zulu-zulu? Muntu yina ke zolá kulongoka Biblia lenda longoka misiku ya Nzambi, mpe kutula ntima ya yandi na yawu. Kasi, ba yina ke longoká Biblia ke landá kwandi misiku ya Nzambi samu ba ke zolak’ yandi? Kuzimbana ve ti, Eve zabá misiku ya Nzambi, kasi yandi na Adam lakisá ve luzolo samu na Nzambi. (Kub. 3:1-6) Beto zolá suka ve kaka na kulonga bantu mambu yina Nzambi ke zolá mpe misiku ya yandi.

11. Ntangu beto ke na longá misiku ya Nzambi, wa’ faso beto lenda sadisa bantu na kuzola ve kaka misiku mpe muntu yina pesak’ yawu?

¹¹ Misiku ya Yehova ke vandá ntangu nyonso mbote samu na beto. (Nku. 119:97, 111, 112) Kasi, ba yina ke longoká na beto lenda kanisa ve faso yina, si ba zaba ve ti Yehova ke pesá misiku samu yandi zola beto. Na yina, beto lenda yufula bawu: “Samu na yinki nge me kanisa ti, Nzambi ke lombá na bisadi ya yandi na kusala yayi to na kusala ve? Yinki ya ke na longá beto na kimuntu ya Nzambi?” Si beto sadisa ba yina ke longoká na beto na kukanisa na Yehova, mpe na kukulisa luzolo ya tsyeleka samu na bunene ya nkumbu ya yandi, malembe-malembe, beto lenda simba bantima ya bawu. Ba ke zola ve kaka misiku, kasi na muntu yina pesak’ yawu. (Nku. 119:68) Kiminu ya bawu ke kula, mpe ya ke sadisa bawu na kulemba ve na mantwala ya bankwamusu.—1 Ko. 3:12-15.

“BETO KE TAMBULA NA NKUMBU YA YEHOVA”

12. Wa’ faso David lendá ve na kubumba ntima yina ke ve ya kukabuka, mpe yinki ya nataka?

¹² Bamambu yina mfumu David soniká na Nkunga 86:11, ke mfunu mingi, yandi zonzá: “Pesa munu ntima yina ke ve ya kukabuka.” Na kati ya luzingu ya yandi, David talá ti ya ke ve mpasi na kubika ntima ya beto kuma ya kukabuka. Kilumbu mosi, yandi vandá na zulu ya yinzo ya yandi, mpe talá kento mosi ya kukwela vandá yobila. Na ntangu yina, David vandá na ntima ya kukabuka to ve? Yandi zabá musiku ya Yehova yayi: “Nge zolá tula ve meso na kento ya mpangi ya nge.” (Bas. 20:17) Kasi, yandi kontinyeke kutala. Ntima ya yandi kumá ya kukabuka. Ntima ya nkaka vandá puse yandi na kubasika na Bethsabée, kasi ya nkaka vandá nata yandi na kusepelisa Yehova. Ata David vandá na luzolo mpe boma ya Yehova, kasi awa, yandi me baka desizion ya yimbi, mpe samu na yawu, yandi salá mambu ya yimbi. David talisá nkumbu ya Yehova nsoni. Ya natiná mpe bampasi na bantu yina salá ata kima, ba-izraelite mpe dikanda ya yandi mosi.—2 Sa. 11:1-5, 14-17; 12:7-12.

13. Wa’ faso beto me zaba ti ntima ya David kumá dyaka ya kulunga?

¹³ Yehova pesá David disipline, mpe na manima, yandi vutulá dyaka kindiku ya mbote na Yehova. (2 Sa. 12:13; Nku. 51:2-4, 17) David zimbaná ve mambu ya yimbi, mpe bampasi yina disumu ya yandi natá ntangu yandi kumá na ntima ya kukabuka. Beto lenda zonzila mpe bamambu yina ke na Nkunga 86:11 faso yayi: “Pesa munu ntima mosi.” Yehova sadisá kwandi David na kuvanda na ntima mosi? Ee, na manima ya lufwa ya David, Yehova zonzá: “Ntima ya yandi vandá . . . ya kulunga na mantwala ya Yehova, Nzambi ya yandi.”—1 Mf. 11:4; 15:3.

14. Yinki beto nyonso zolá yufula, mpe samu na yinki?

¹⁴ Kifwani ya David ke na natá beto na kulanda misiku ya Yehova, mpe ke na kebisá beto. Yandi kubwá na disumu ya nene, mpe disolo ya yandi ke kebisá bisadi ya Yehova bubu yayi. Ya vanda ba yina me banda kusadila Yehova ntama mingi ve, to ba yina ke sadilak’ yandi bamvula mingi deja, beto nyonso zolá yufula: ‘Mu ke salá kwandi nyonso samu na kubika ve mitambu ya Satan kabula ntima ya munu?’

15. Wa’ faso boma ya Nzambi ke bumbá beto si beto me tala foto to video yina ke na pesá beto nsatu ya kuvukisa nzutu na muntu?

¹⁵ Na kifwani, si nge me tala foto to video na internet yina lenda pesa nge nsatu ya kuvukisa nzutu na muntu, yinki nge ke sala? Ya lenda vanda ve mpasi na kukanisa ti foto to video yina, ke ya yawu ve pornografi. Kasi, ya lenda vanda kwandi bima yina Satan ke na sadilá samu na kukabula ntima ya nge? (2 Ko. 2:11) Foto to video yayi, lenda vanda nete soka ya fioti yina muntu ke na sadilá samu na kuzenga yinti ya nene. Ntete-ntete, yandi ke banda kubula kisika ya soka yina ke na meno na zulu ya yinti. Soka ke banda kupasula malembe-malembe yinti tii yandi ke kabula yawu na bitini zole. Bafoto to bavideo yina ke lakisá bantu bimpene to na bilele ya nkufi, lenda vanda kwandi faso kisika ya soka yina ke na meno? Kutala bima ya faso yayi, lenda talana nete ya ke ve yimbi, mpe malembe-malembe ya lenda nata muntu na kusala disumu ya nene na mantwala ya Yehova. Samu na yawu, kukotisa ve bima nyonso yina ke yimbi na ntima ya nge! Sala ti ntima ya nge kabuka ve samu ya vanda na boma ya nkumbu ya Nzambi!

16. Ntangu beto ke vandá na nsatu ya kusala mambu ya yimbi, wapi byuvu beto zolá yufula?

¹⁶ Katula bafoto na bavideo ya yimbi, Satan ke sadilá mpe bima mingi ya nkaka samu na kusosa kunata beto na disumu. Yinki beto zolá salá? Ya ke ve mpasi na kukanisa ti, kima yina beto ke na salá ke ve yimbi. Na kifwani, beto lendá kanisa: ‘Ba lenda basisa ve munu na kimvuka si mu sala mambu yayi, na yina, ya ke ya yawu ve yimbi.’ Kuvanda na makanisi ya faso yayi ke ve mbote. Beto zolá yufula byuvu yayi: ‘Satan ke na sosá kwandi kusadila mutambu yayi samu na kukabula ntima ya munu? Si mu bika nzila na bansatu ya yimbi, mu lenda bebisa kwandi nkumbu ya Yehova? Mambu yayi mu ke na sosá kusala, ke kulisa kwandi kindiku ya munu na Yehova to lenda nata munu ntama na yandi?’ Kanisa mbote-mbote na byuvu yayi. Sambila na kuzwa mayela samu na kupesa bamvutu yina ke katuka na ntima. (Zaki 1:5) Kuvanda na kifu ya kusalak’ yawu lenda bumba beto. Ya lenda sadisa nge na kumanga na ngolo nyonso mitambu ya Satan, faso Yesu salak’ yawu ntangu yandi zonzá: “Katuka awa, Satan!”—Mat. 4:10, nwt-MK.

17. Samu na yinki ya ke ve mbote si ntima ya beto ke ya kukabuka? Pesa kifwani.

¹⁷ Ya ke ve mbote si beto ke na ntima ya kukabuka. Kanisa ntete na ekipe ya sport yina ke na bantu yina ke na wisana ve bawu na bawu. Ba ya nkaka ke na nsatu ya kuzwa nkembo kaka samu na bawu mosi, ndambu ke na landá ve misiku ntangu ba ke na bulá, ndambu ya nkaka ke na pesá ve entrenere buzitu. Ekipe ya faso yayi, lenda nunga ata match mosi ve. Kasi, ekipe yina ke na bumosi, ke na bweso ya kununga. Ntima ya nge lenda vanda nete ekipe yina ke gagneke, si na makanisi ya nge, na bansatu ya nge, mpe na bamambu ya nge nyonso, nge ke sosá kaka kusepelisa Yehova. Kuzimbana ve ti, Satan zola kukabula ntima ya nge. Yandi zola ti na makanisi ya nge, na bansatu ya nge, mpe na bamambu ya nge ya nkaka, nge zitisa dyaka ve misiku ya Yehova. Kasi nge, nge zolá sadila Yehova na ntima ya nge nyonso. (Mat. 22:36-38) Kubika ata fioti ve Satan kabula ntima ya nge!

18. Faso Mika 4:5 ke na zonzilak’ yawu, wapi yina ke desizion ya nge?

¹⁸ Sambila Yehova faso David salak’ yawu: “Pesa munu ntima yina ke ve ya kukabuka, samu mu vanda na boma ya nkumbu ya nge.” Sala nyonso yina nge lenda sala, samu na kusadila lusambu yayi na luzingu ya nge. Bilumbu nyonso, lakisa na badesizion ya fioti to ya nene yina nge ke baká ti, nge ke na buzitu mingi samu na nkumbu ya Yehova. Si nge sala yawu, samu nge ke mosi ya batemwe ya Yehova, nge ke lakisa ti nge me lunga na kulwata nkumbu yayi. (Bin. 27:11) Mpe mosi na mosi na kati ya beto lenda zonza kintwadi na profete Mika: “Beto ke tambula na nkumbu ya Yehova Nzambi ya beto ntangu nyonso.”—Mika. 4:5.