Wa’ faso Yehova ke sadisá beto na kulungisa kisalu ya kusamuna?

1. Yinki beto lenda kutana na yawu na kisalu ya kusamuna, kasi na yinki beto lenda vanda ya kundima?

NA KISALU ya kusamuna, beto ke kutaná na bankwamusu. Mpe ntangu ya nkaka na bilumbu yina ke kwiza, ba ke kwamisa dyaka beto ya kulutila. (Dan. 11:44; 2 Tim. 3:12; Luz. 16:21) Ata mpili yina, beto zaba ti Yehova ke sadisa beto. Samu na yinki? Banda ntama, Yehova ke sadisá bisadi ya yandi na kulungisa bisalu yina yandi ke pesá bawu, ata bisalu ya mpasi. Na kifwani, beto tala mwa bamambu yina kuminá mbikudi Ezekiele. Yandi samuná na bazwife yina ba natá na Babilone.

2. Na wapi mutindu ya bantu Ezekiele vandá samuna, mpe yinki beto ke zonzila na disolo yayi? (Ezekiele 2:3-6)

² Na wapi mutindu ya bantu Ezekiele vandá samuna? Yehova zonzá ti ba vandá na ‘yintu-ngolo,’ mpe na “ntima-ngolo.” Ba vandá mutindu bansende mpe ba scorpions. Ni na yawu Yehova zonzá na Ezekiele bambala mingi: “Kuwa ve boma.” (Tanga Ezekiele 2:3-6.) Ezekiele lendá kulungisa kisalu ya yandi ya kusamuna samu ti 1) Yehova muntu filisak’ yandi, 2) yandi kuzwá ngolo na nzila ya mpeve ya santu, mpe 3) yandi dikisá kiminu ya yandi na mambu ya Nzambi. Wa’ faso bamambu tatu yayi sadisá Ezekiele? Mpe wapi mutindu ya ke sadisá beto bubu yayi?

YEHOVA MUNTU FILISÁ EZEKIELE

3. Wapi mambu Yehova zonzá na Ezekiele yina pesak’ yandi ngolo, mpe wa’ faso Yehova lakisak’ yandi ti yandi ke sadisa yandi?

³ Yehova zonzá na Ezekiele: ‘Munu ke tinda nge.’ (Ezk. 2:3, 4) Ntembe ve, mambu yayi pesá Ezekiele ngolo. Samu na yinki? Ntangu ya nkaka, yandi kwizá tala ti bamambu yina Yehova zonzá na yandi, yandi zonzá mpe yawu na Izaya mpe Moyize ntangu yandi filisá bawu. (Bas. 3:10; Iza. 6:8) Ezekiele zabá mpe ti Yehova sadisá bambikudi zole yayi na kulungisa kisalu ya nene yina yandi pesá bawu. Na yawu, ntangu Yehova zonzá na Ezekiele bambala zole ‘munu ke tinda nge,’ Ezekiele zabá ti Yehova zolá sadisa yandi. Bambala mingi yandi sonikaka: ‘Ndinga ya Yehova kwizilaka munu.’ (Ezk. 3:16) Yandi soniká dyaka bambala mingi: ‘Ndinga ya Yehova kwizilaka munu dyaka.’ (Ezk. 6:1) Ntembe ve, Ezekiele vandá ya kundima ti ni Yehova filisak’ yandi. Dyaka, tata ya Ezekiele vandá nganga-nzambi. Ntangu ya nkaka, yandi longá Ezekiele ti Yehova zonzá na bambikudi ya yandi nyonso ti yandi ke sadisa bawu. Na kifwani, Yehova zonzá mambu yayi na Izaki, Yakobi, na Yeremia: ‘Munu kele na nge.’—Kub. 26:24; 28:15; Yer. 1:8.

4. Yinki kindisá Ezekiele?

⁴ Bantu mingi ya Izraele zolá ndima kwandi mambu yina Ezekiele zolá zonza na bawu? Ve. Yehova zonzaka: ‘Yinzo ya Izraele ke manga kuwa nge, samu ba zola ve kuwa munu.’ (Ezk. 3:7) Samu ba mangá mambu yina Ezekiele vandá zonzá, ba lakisá ti ba mangá Yehova. Mambu yina Yehova zonzá na Ezekiele sadisak’ yandi na kutala ti yandi lungisá kisalu ya yandi na mutindu ya mbote, ata ti bantu ya Izraele mangá kuwa yandi. Yehova zonzá mpe na Ezekiele ti, ntangu bamambu yina yandi zonzá ke lungana, bantu ya Izraele zolá ‘zaba tsyeleka ti mbikudi mosi vandaka na kati na bawu.’ (Ezk. 2:5; 33:33) Ntembe ve, mambu yayi pesá Ezekiele ngolo yina yandi vandá na yawu nsatu samu na kulungisa kisalu ya yandi ya kusamuna.

YEHOVA MUNTU KE FILISÁ BETO

5. Samu na yinki mambu yina ke na Izaya 44:8 ke na pesá beto ngolo?

⁵ Beto mpe ke kuzwá ngolo samu beto zaba ti ni Yehova ke filisá beto. Yandi ke bokilá beto “Bambangi” ya yandi. (Iza. 43:10) Ya ke bweso ya nene. Mutindu Yehova zonzá na Ezekiele “kuwa ve boma,” Yehova me zonza mpe na beto: “Beno wa boma ve.” Samu na yinki beto lenda vanda ve na boma ya ba yina ke kwamisá beto? Samu ti mutindu Ezekiele, Yehova muntu ke filisá beto, mpe yandi ke na beto.—Tanga Izaya 44:8.

6. a) Wapi mambu Yehova me zonza yina ke lakisá ti yandi ke sadisa beto? b) Yinki ke pesá beto ngolo?

⁶ Yehova me pesa beto nsilulu ti yandi ke sadisa beto. Na kifwani, tekila yandi zonza ‘beno kele bambangi ya munu,’ yandi zonzaka: ‘Ntangu nge ke luta na kati ya bamaza, munu ke vanda na nge, mpe ntangu nge ke luta na kati ya banzadi, ya ke dyamisa nge ve. Ntangu nge ke tambula na kati ya tiya, nge ke nyenga ve, ludimi ya tiya ke yoka nge mpe ve.’ (Iza. 43:2) Na kisalu ya beto ya kusamuna, beto ke kutaná na bamambu yina ke sosá kukanga beto nzila mutindu banzadi, mpe bankwamusu mutindu tiya. Ata mpili yina, na lubakusu ya Yehova, beto ke biká ve kusamuna. (Iza. 41:13) Bubu yayi, bantu mingi ke mangá kuwa beto, mutindu bantu ya Izraele na ntangu ya Ezekiele. Kasi, ya ke ve samu ti beto me sala ve kisalu ya beto na faso ya mbote. Beto ke kuzwá ngolo samu beto zaba ti Yehova ke na kilengi na kutala mutindu beto ke biká ve kuzonzila nsangu ya yandi. Ntumwa Polo zonzaka: “Konso muntu ke kuzwa difuta na kisalu ya yandi.” (1 Ko. 3:8; 4:1, 2) Mpangi mosi ya kento yina ke pionnière na kati ya bamvula mingi zonzaka: “Ya ke pesá munu kilengi na kuzaba ti Yehova ke sakumuná beto samu na bangolo yina beto ke salaka.”

EZEKIELE KUZWÁ NGOLO NA NZILA YA MPEVE YA SANTU

7. Bantangu nyonso yina Ezekiele kanisá na kimona-meso yina yandi kuzwaka, yinki ya vandá salak’ yandi? (Tala kizizi ya paje ya kubanda.)

⁷ Ezekiele talá ngolo ya mpeve ya Nzambi. Na kati ya kimona-meso yina yandi kuzwá, ngolo ya mpeve ya santu vandá talana na bambazi, mpe na mutindu makulu ya pusu-pusu ya Yehova vandá tambula. (Ezk. 1:20, 21) Yinki mambu yayi natá Ezekiele na kusala? Yandi sonikaka: ‘Ntangu munu talaka yawu, munu fukamaka luse (to figure) na ntoto.’ Mambu yina Ezekiele talá kamwisak’ yandi mingi mpe ya salá ti yandi fukama na ntoto. (Ezk. 1:28) Na manima, bantangu nyonso yina Ezekiele kanisá na kimona-meso yayi, ya pesak’ yandi kiminu ti, na lubakusu ya mpeve ya Nzambi, yandi ke lungisa kisalu ya yandi ya kusamuna.

8-9. a) Yinki kuminá Ezekiele ntangu Yehova zonzá na yandi na “kutelama”? b) Wa’ faso Yehova pesá dyaka Ezekiele ngolo na kusamuna na bantu ya yintu-ngolo?

⁸ Yehova zonzá na Ezekiele: ‘Mwana ya muntu, telama samu munu tuba na nge.’ Mambu yayi na mpeve ya Nzambi pesá Ezekiele ngolo yina yandi vandá na yawu nsatu samu na kutelama. Ezekiele sonikaka: ‘Mpeve kwizilaka munu mpe telemisaka munu.’ (Ezk. 2:1, 2) Na manima, na kati ya kisalu ya yandi ya kusamuna, ni “diboko” ya Nzambi to mpeve ya yandi ya santu vandá twadisa Ezekiele. (Ezk. 3:22; 8:1; 33:22; 37:1; 40:1) Mpeve ya Nzambi pesá Ezekiele ngolo ya kulungisa kisalu yina ba pesak’ yandi: kusamuna na bantu ‘ya yintu-ngolo mpe ntima-ngolo.’ (Ezk. 3:7) Yehova zonzá na Ezekiele: ‘Munu me kumisa luse ya nge ngolo kaka mutindu baluse ya bawu mpe mbunzu ya nge ngolo kaka mutindu bambunzu ya bawu. Munu me kumisa mbunzu ya nge mutindu diama, ngolo kuluta ditadi ya sileksi. Kuwa bawu boma ve mpe kutekita ve samu na baluse ya bawu.’ (Ezk. 3:8, 9) Ya vandá mutindu Yehova vandá zonza na Ezekiele: ‘Kubika ve yintu-ngolo ya bantu yayi lembisa nge. Mu ke pesa nge ngolo.’

⁹ Na manima, mpeve ya Nzambi natá Ezekiele na kisika yina yandi zolá samuna. Ezekiele sonikaka: ‘Diboko ya Yehova vandaka ngolo na zulu ya munu.’ Ya baká Ezekiele bilumbu 7 samu na kuzaba mbote-mbote bamambu yina yandi zolá kwenda samuna. (Ezk. 3:14, 15) Na manima, Yehova natak’ yandi na kisika mosi. Mpe kuna ‘mpeve kotaka na kati ya yandi.’ (Ezk. 3:23, 24) Ezekiele vandá ya kubongama samu na kubanda kisalu ya yandi.

BETO KE KUZWÁ NGOLO NA NZILA YA MPEVE YA SANTU

10. Yinki beto ke na yawu nsatu samu na kulungisa kisalu ya beto ya kusamuna, mpe samu na yinki?

¹⁰ Bubu yayi, yinki beto ke na yawu nsatu samu na kulungisa kisalu ya kusamuna? Beto kanisa na mambu yina kuminá Ezekiele. Tekila yandi banda kusamuna, mpeve ya Nzambi pesak’ yandi ngolo yina yandi vandá na yawu nsatu. Mutindu mosi na Ezekiele, beto mpe lenda lungisa kisalu ya beto ya kusamuna kaka na ngolo ya mpeve ya Nzambi. Samu na yinki? Samu Satana ke nwanisá beto samu na kukanga kisalu ya beto ya kusamuna. (Luz. 12:17) Na meso ya bantu mingi, beto lenda telama ve na mantwala ya Satana. Kasi na kisalu ya beto ya kusamuna, beto ke nungak’ yandi. (Luz. 12:9-11) Wa’ faso? Ntangu beto ke samuná, beto ke lakisá ti beto ke ve na boma ya Satana. Bambala nyonso beto ke samuná, beto ke pesá Satana mbata. Beto ke biká ve kusamuna ata bambeni ke na kwamisá beto. Yinki ya ke na lakisaka? Ya ke na lakisá pwelele ti Yehova ke pesá beto ngolo na nzila ya mpeve ya yandi ya santu, mpe yandi ke ndimá beto.—Mat. 5:10-12; 1 Pi. 4:14.

11. Yinki mpeve ya Nzambi ke sala samu na beto, mpe wa’ faso beto lenda kuzwa yawu ntangu nyonso?

¹¹ Ntangu beto ke na kanisá na mutindu Yehova kumisá ngolo mbunzu ya Ezekiele, ya ke longá beto yinki? Ya ke na lakisá beto ti na ngolo ya mpeve ya Nzambi, beto lenda nunga mambu ni mambu ya mpasi yina beto lenda kutana na yawu na kisalu ya kusamuna. (2 Ko. 4:7-9) Yinki beto lenda sala samu na kuzwa ntangu nyonso mpeve ya Nzambi? Beto me bonga kusambila ntangu nyonso, na kiminu ti Yehova ke kuwá balusambu ya beto. Yesu longá bilandi ya yandi na kubika ve ‘kulomba, kusosa, mpe kukonkota na mwelo (to porte).’ Mpe Yehova ke ‘pesa mpeve ya santu na ba yina ke lombaka yandi yawu.’—Luke 11:9, 13; Bis. 1:14; 2:4.

EZEKIELE DIKISÁ KIMINU YA YANDI NA MAMBU YA NZAMBI

12. Mutindu ke na lakisak’ yawu Ezekiele 2:9–3:3, wapi kisika mukanda katuká, mpe yinki vandá na kati ya yawu?

¹² Ntembe ve, mpeve ya Nzambi pesá Ezekiele bukindi ya kulungisa kisalu ya yandi ya kusamuna. Kasi, ya suká ve kuna. Kiminu ya Ezekiele kumá mpe ngolo na nzila ya mambu ya Nzambi. Na kimona-meso, Ezekiele talá diboko yina vandá ya kusimba rulo to mukanda. (Tanga Ezekiele 2:9–3:3.) Mukanda yango katuká wapi kisika? Yinki vandá na kati? Wa’ faso ya sadisá Ezekiele? Beto tala yawu. Mukanda yango katuká na kiti ya kimfumu ya Nzambi. Ntangu ya nkaka, Yehova sadilá mosi ya bambazi 4 yina Ezekiele talá ntete na kimona-meso, samu na kupesa yandi yawu. (Ezk. 1:8; 10:7, 20) Mukanda yango vandá na bamambu mingi ya ngolo yina Ezekiele zolá zonza na bazwife ya yintu-ngolo yina vandá na Babilone. (Ezk. 2:7) Mambu yango vandá ya kusonama na manima mpe na mantwala ya mukanda.

13. Yinki Yehova zonzá na Ezekiele na kusala na mukanda, mpe samu na yinki ya vandá sukadi mutindu miel?

¹³ Yehova zonzá na Ezekiele na kudya mukanda yango mpe ‘kufulusa yawu na kivumu ya yandi.’ Ezekiele tumamaka. Yandi kudyá mukanda yango nyonso. Yinki zola zonza kitini yayi ya kimona-meso? Ezekiele zolá tula na ntima nsangu yina yandi zolá zonza na bantu ya Izraele. Nsangu yina zolá kota na kati ya yandi, mpe kunata yandi na kusamuna. Ntangu Ezekiele kudyá mukanda yango, mambu ya ngitukulu salamaka. Yandi kwizá tala ti ya ‘vandaka sukadi mutindu mafuta ya nyosi,’ to miel. (Ezk. 3:3) Samu na yinki? Samu, na Ezekiele, kuzonza na nkumbu ya Yehova vandá bweso ya kitoko mingi. (Nku. 19:8-11) Yandi vandá na kilengi na kuzaba ti Yehova soolak’ yandi mutindu mbikudi ya yandi.

14. Yinki sadisá Ezekiele na kuvanda ya kubongama na kisalu yina ba pesak’ yandi?

¹⁴ Na manima, Yehova zonzá na Ezekiele: ‘Mambu nyonso yina munu ke tubila nge, tula yawu na ntima mpe kuwa yawu.’ (Ezk. 3:10) Yehova vandá zola ti Ezekiele tula bamambu yina vandá na kati ya mukanda na yintu ya yandi, mpe yandi kanisa mbote-mbote na yawu. Ntangu Ezekiele salak’ yawu, kiminu ya yandi kumá dyaka ngolo. Mpe yandi vandá na nsangu ya ngolo yina yandi zolá zonza na bantu ya Izraele. (Ezk. 3:11) Na bamambu yayi na ntima mpe na yinwa, Ezekiele vandá ya kubongama samu na kubanda kisalu ya kusamuna mpe kumanisa yawu.—Tala Nkunga 19:14.

BETO KE DIKISÁ KIMINU YA BETO NA MAMBU YA NZAMBI

15. Samu na kulemba ve, yinki beto me bonga ‘kutula na ntima’?

¹⁵ Samu na kulemba ve na kisalu ya kusamuna, beto mpe me bonga kudikisa kiminu ya beto ntangu nyonso. Beto me bonga ‘kutula na ntima’ mambu nyonso yina ke katuká na yinwa ya Yehova. Bubu yayi, Yehova ke zonzá na beto na nzila ya Biblia. Wa’ faso beto lenda sala ti mambu ya Nzambi simba ntangu nyonso ntima mpe makanisi ya beto, mpe ya nata beto na kusala bamambu ya mbote?

16. Yinki beto fwana sala na mambu ya Nzambi, mpe wa’ faso beto lenda sala ti ya kota na kati ya ntima ya beto?

¹⁶ Ntangu beto ke kudyá mpe ke pemá, nzutu ya beto ke kuzwá ngolo. Mutindu mosi mpe, ntangu beto ke longoká mambu ya Nzambi mpe beto ke kanisá na yawu, kiminu ya beto ke kumá ngolo ya kulutila. Beto zimbana ve kileso yina beto ke na longoká na mukanda yina Ezekiele kudyaka. Yehova zola ti beto ‘fulusa mambu ya yandi na kivumu ya beto.’ Ya zola zonza kuzaba yawu mbote-mbote. Beto lenda sala yawu na nzila ya lusambu, kutanga Biblia mpe kuyindula na yawu. Na kubanda, beto ke sambilá samu ntima ya beto bongama na kuyamba makanisi ya Nzambi. Na manima, beto ke tangá mambu ya Biblia. Na kumanisa, beto ke baká ntangu ya kuyindula to kukanisa mbote-mbote na mambu yina beto me tanga. Kusala yawu ke buta yinki? Kuyindula ke sadisa beto na kuzaba mbote-mbote mambu ya Nzambi, mpe na manima ya ke sala ti kiminu ya beto kuma dyaka ngolo.

17. Samu na yinki ya ke mfunu na kuyindula na bamambu yina beto ke tangá na Biblia?

¹⁷ Samu na yinki ya ke mfunu mingi na kutanga mpe na kuyindula mambu ya Nzambi? Kusala yawu ke pesa beto ngolo ya kusamuna nsangu ya Kimfumu ya Nzambi bubu yayi. Mpe na bilumbu yina ke kwiza, beto ke vanda na bukindi na kuzonzila nsangu ya ngolo yina Yehova lenda pesa beto. Dyaka, ntangu beto ke kanisá na bifu ya mbote ya Yehova, kindiku ya beto na yandi ke kumá dyaka ngolo. Ya ke sala ti beto kuzwa kima ya sukadi mutindu miel: kizunu na ntima mpe kilengi.—Nku. 119:103.

BETO KE NA NYONSO YINA BETO KE NA YAWU NSATU SAMU NA KULEMBA VE

18. Yinki bantu ke zaba, mpe samu na yinki?

¹⁸ Ezekiele vandá mbikudi, kasi beto ve. Ata mpili yina, beto ke bika ve kusamuna nsangu yina Yehova me tula na Biblia tii na ntangu yina yandi ke zonza ti ya me lunga. Ntangu kilumbu yina Yehova ke sambisa bantu ke kuma, bantu ya kisika yina beto ke samuná ke zonza ve ti ba zonzilá ve bawu, to ti Nzambi kipeke ve bawu. (Ezk. 3:19; 18:23) Na ntangu yina, ba ke zaba ti nsangu yina beto vandá zonza vandá katuka na Nzambi.

19. Yinki ke pesa beto ngolo ya kulungisa kisalu ya kusamuna?

¹⁹ Yinki ke pesa beto ngolo ya kulungisa kisalu ya beto ya kusamuna? Ni bamambu tatu yina pesá Ezekiele ngolo. Beto ke biká ve kusamuna samu beto zaba ti ni Yehova ke filisá beto. Beto ke zwá ngolo na nzila ya mpeve ya Nzambi, mpe beto ke dikisá kiminu ya beto na mambu ya yandi. Na lubakusu ya Yehova, beto ke na nyonso yina beto ke na yawu nsatu samu na kulungisa kisalu ya beto ya kusamuna, mpe kulemba ve “tii na nsuka.”—Mat. 24:13.