Wa’ faso Yehova ke sadisá beto na kukanga ntima na kilengi?

1-2. a) Wapi byuvu beto ke tala? b) Yinki ke na lakisá ti Yehova ke na nsatu ya mingi ya kusadisa beto?

YEHOVA lenda sadisa beto na kukanga ntima na bamambu ya beto, mpe na kusadila yandi na kilengi. Yinki Yehova ke salá samu na kusadisa beto? Wa’ faso beto lenda kuzwa lubakusu yina Yehova ke pesaka? Ni byuvu yayi beto ke zonzila. Kasi, tekila beto zonzila yawu, beto tala ntete kyuvu ya nkaka: Yehova ke kwandi na nsatu ya mingi ya kusadisa beto?

² Mambu yina ntumwa Polo sonikilá bakristo ya Baebre, lenda sadisa beto na kuzwa mvutu na kyuvu yayi. Polo sonikaka: “Mfumu kele kisadisi ya munu mpe mu ke vwanda ve na boma ya kima.” Buku mosi yina ke zonzilá bamambu ya Biblia ke zonzá ti, na verse yayi, “kisadisi” ke lakisá muntu yina ke na kimá mbangu samu na kwenda bakisa muntu yina ke na sosá ba sadisa yandi. Kanisa mwa fioti: Yehova ke na kimá mbangu samu na kwenda sadisa muntu yina ke na mpasi. Ntembe ve, ni yawu yandi ke salaka. Mambu yayi ke na lakisá ti Yehova ke na nsatu ya mingi ya kusadisa beto. Na Yehova pene-pene na beto, beto lenda kanga ntima na kilengi.

3. Wapi bamambu tatu Yehova ke salá samu na kusadisa beto na kukanga ntima na kilengi?

³ Wa’ faso Yehova ke sadisá beto na kukanga ntima na kilengi na kati ya bampasi? Na kuzwa mvutu, beto tala mwa kitini ya buku ya Izaya. Samu na yinki? Samu ti bamambu mingi yina Yehova natá Izaya na kusonika ke na lunganá na bisadi ya Nzambi bubu yayi. Dyaka, Izaya ke zonzilá Yehova na mutindu yina ke ve mpasi na kusimba. Na kifwani, na kikapu 30, yandi ke sadilá kifwani ya kitoko samu na kulakisa mutindu Yehova ke sadisá bisadi ya yandi. Yandi soniká ti, samu na kusadisa beto, Yehova ke 1) wá beto mpe ke pesá bamvutu na balusambu ya beto, 2) yandi ke twadisá beto mpe 3) yandi ke sakumuná beto bubu yayi, mpe yandi ke sala yawu na mantwala. Beto tala bafaso tatu yina Yehova ke sadisá beto.

YEHOVA KE WÁ BETO

4. a) Yinki Yehova zonzá samu na bazwife ya ntangu ya Izaya, mpe yinki yandi biká kumina bawu? b) Wapi kivuvu Yehova pesá na ba yina vandá ya kukangama na yandi? (Izaya 30:18, 19)

⁴ Na kubanda ya kikapu 30 ya buku ya Izaya, Yehova ke zonzá ti bazwife ke ‘bana ya yintu-ngolo,’ yina ke ‘bwelaka disumu na zulu ya disumu.’ Yandi me bwela: ‘Bawu kele bantu yina ke zolaka ve kuwa nsiku ya Yehova.’ (Iza. 30:1, 9) Samu bantu ya Izraele mangá kuwa, Izaya zonzá ti Yehova zolá bika ba tala mpasi. (Iza. 30:5, 17; Yer. 25:8-11) Ni yawu salamá ntangu bantu ya Babilone katulá bawu na bwala ya bawu mpe natá bawu na Babilone. Kasi na kati ya bawu, ya vandá na ba yina vandá ya kukangama na Yehova. Mpe Izaya vandá na nsangu yina zolá pesa bawu kivuvu. Yandi zonzá na bawu ti ya ke na kilumbu yina Yehova ke vutula bawu na Izraele. (Tanga Izaya 30:18, 19.) Mpe ni yawu yandi salaka. Yehova vutulá bawu na bwala ya bawu. Kasi, bamvula mingi lutá tekila yandi sala yawu. Ni yawu Yehova lakisá ntangu yandi zonzaka: ‘Yehova ke vingila na kukanga ntima nyonso samu na kulakisa beno ntima ya mbote.’ Bantu ya Izraele lutisá bamvula 70 na Babilone, tekila ndambu na kati ya bawu vutuka na Yeruzalemi. (Iza. 10:21; Yer. 29:10) Ntangu ba vutuká na bwala ya bawu, mansangasa ya kilengi baká kisika ya mansangasa ya mawa.

5. Wa’ faso Izaya 30:19 ke pesá beto ngolo?

⁵ Bubu yayi, beto lenda zwa ngolo na mambu yayi: ‘Ya tsyeleka yandi ke lakisa nge ntima ya mbote ntangu nge ke dila samu na kulomba lusadusu.’ (Iza. 30:19) Izaya ke na zonzá na beto ti Yehova ke kuwa ntangu beto ke bondila yandi, mpe yandi ke pesa mvutu na mbangu na balusambu ya beto. Izaya me bwela: ‘Yandi ke pesa nge mvutu kaka na ntangu yandi ke wa yawu.’ Bamambu yayi ke na lakisá ti Yehova ke na nsatu ya mingi ya kusadisa ba yina ke bokilak’ yandi ntangu ba ke na mpasi. Kuzaba yawu ke sadisa beto na kukanga ntima na kilengi.

6. Wa’ faso mambu yina Izaya zonzá ke na lakisá ti Yehova ke wá balusambu ya mosi na mosi ya bisadi ya yandi?

⁶ Yinki verse yayi ke na lakisá dyaka beto na yina me tadila balusambu ya beto? Yehova ke wá mbote-mbote balusambu ya mosi na mosi na kati ya beto. Samu na yinki beto lenda zonza yawu? Na kitini ya ntete ya kikapu 30 ya buku ya Izaya, Yehova ke sadilá “beno,” samu ti yandi ke na zonzá na dikanda ya yandi nyonso. Kasi na verse 19, yandi ke sadilá “nge,” samu yandi ke na zonzá na mosi na mosi na kati ya bawu. Izaya sonikaka: ‘Nge ke dila ve ata fioti,’ ‘ya tsyeleka yandi ke lakisa nge ntima ya mbote,’ mpe ‘yandi ke pesa nge mvutu.’ Yehova ke Tata ya luzolo. Na yawu, ntangu mwana ya yandi ke ya kulemba, yandi ke zonzá ve na yandi: “Nge me bonga kuvanda ngolo mutindu mpangi ya nge.” Kasi yandi ke talá mosi na mosi ya beto. Mpe yandi ke tulá dikebi na balusambu yina mosi na mosi na kati ya beto ke salaka.—Nku. 116:1; Iza. 57:15.

7. Wa’ faso Izaya na Yesu lakisá ti ya ke mfunu na kutatamana na kusambila?

⁷ Ntangu beto ke zonzá na Yehova mambu yina ke na kwamisá beto, yandi lenda pesa beto ngolo samu na kukanga ntima. Kasi ya lenda vanda ti mambu ya beto ke na manisá ve. Na yawu, beto lenda vanda na nsatu ya kulomba na Yehova bambala mingi ngolo ya kukanga ntima. Yandi mosi ke na zonzá na beto na kusala yawu. Ya ke na talaná na mambu yayi Izaya zonzaka: ‘Beno pemisa Yehova ve.’ (Iza. 62:7) Yinki mambu yayi zola zonza? Yehova zola beto sambila yandi bambala mingi, beto bika ve yandi pema. Mambu yina Izaya zonzá ke na bambukilá beto kifwani yina Yesu pesá na Luke 11:8-10, 13, ntangu yandi vandá zonzila mambu ya lusambu. Yesu zonzá na beto na kutala “ve nsoni na kutatamana na kulomba” mpe na kubika ve “kulomba” samu na kuzwa mpeve ya santu. Beto lenda bondila mpe Yehova samu yandi sadisa beto na kubaka mikanu ya mbote.

YEHOVA KE TWADISÁ BETO

8. Na ntama, wa’ faso mambu yina ke na Izaya 30:20, 21 lunganaka?

⁸ Tanga Izaya 30:20, 21. Na mvula mosi na ndambu yina basoda ya Babilone zungá Yeruzalemi, mpasi ya bana ya Izraele kumá mutindu kwanga na dimpa. Ya vandá talana bisika nyonso. Kasi na baverse 20 na 21, Yehova zonzá na bazwife ti, kana ba balula ntima mpe ba soba ndyatulu ya bawu, yandi ke vuukisa bawu. Izaya bokilá Yehova ‘Longi ya bawu ya Nene,’ mpe yandi zonzá na bazwife ti Yehova ke longa bawu mutindu ya mbote ya kusadila yandi. Mambu yayi lunganá ntangu ba vutuká na bwala ya bawu. Yehova lakisá ti yandi vandá Longi ya Nene samu na bawu, mpe yandi twadisá bawu samu ba vutukila kusambila yandi na mutindu ya mbote. Bubu yayi, beto ke na kilengi mingi na kuvanda na Yehova mutindu Longi ya beto ya Nene.

9. Zonzila nzila mosi yina Yehova ke sadilá samu na kutwadisa beto.

⁹ Na baverse yayi, Izaya ke na sadilá kifwani ya nkaka. Yandi ke zonzá ti beto ke mutindu balongoki yina Yehova ke longá na bafaso zole. Ya ntete, Izaya me zonza: ‘Nge ke tala Longi ya nge ya Nene na meso ya nge mosi.’ Na kifwani yayi, mulongi ke na mantwala ya balongoki ya yandi. Ya ke bweso ya nene samu na beto bubu yayi na kuvanda balongoki ya Yehova. Wa’ faso Yehova ke longá beto? Yandi ke salak’ yawu na nzila ya kimvuka ya yandi. Beto ke na vutulá matondo mingi na yina kimvuka ya Yehova ke na lakisá beto nzila ya kulanda. Beto ke kuzwá malongi na balukutakanu ya kimvuka, na balukutakanu ya nene, na nzila ya mikanda ya beto, na JW télédiffusion, mpe na bafaso ya nkaka. Nyonso yayi ke sadisá beto na kukanga ntima na kilengi.

10. Wa’ faso beto ke wá ‘ndinga mosi na manima ya beto’?

¹⁰ Izaya ke zonzilá nzila ya zole yina Yehova ke sadilá samu na kutwadisa beto. Yandi zonzaka: ‘Makutu ya nge ke wa ndinga mosi na manima ya nge.’ Awa, Izaya ke zonzá ti Yehova ke mutindu mulongi yina ke na manima ya balongoki ya yandi, mpe yandi ke na lakisá bawu nzila. Bubu yayi, beto ke na wá ndinga ya Yehova na manima ya beto. Wa’ faso? Ndinga ya Yehova ke na kati ya Biblia, mpe ba sonikak’ yawu bamvula mingi na manima. Na yawu, ntangu beto ke tangá Biblia, ya ke mutindu beto ke na wá ndinga ya Yehova na manima ya beto.—Iza. 51:4.

11. Yinki beto me bonga kusala, mpe samu na yinki?

¹¹ Yinki beto lenda sala samu na kuzwa bambote na malongi yina Yehova ke pesá beto na nzila ya kimvuka ya yandi? Izaya zonzilá bamambu zole. Ya ntete, ‘nzila yawu yayi.’ Ya zole, ‘beno landa yawu.’ (Iza. 30:21) Ya me lunga ve kaka na kuzaba “nzila.” Beto me bonga mpe ‘kulanda yawu.’ Bubu yayi, beto ke na Biblia mpe kimvuka ya Yehova ke sadisá beto na kuzaba yawu. Nyonso yayi ke sadisá beto na kuzaba yinki Yehova zola beto sala. Dyaka, beto ke longoká kusadila malongi yina beto ke kuzwaka. Beto me bonga kusala bamambu zole yayi samu na kukanga ntima na kilengi. Yehova ke sakumuna beto kaka si beto longoka mpe beto sadila malongi yina beto ke kuzwá samu na kukanga ntima na kilengi.

YEHOVA KE SAKUMUNÁ BETO

12. Faso Izaya 30:23-26 ke na lakisak’ yawu, wapi mutindu Yehova zolá sakumuna dikanda ya yandi?

¹² Tanga Izaya 30:23-26. Wa’ faso mbikudulu yayi lunganá samu na bazwife ntangu ba vutuká na bwala ya bawu? Yehova pesá bawu bima mingi yina ba vandá na yawu nsatu samu na kuzinga mpe kusadila yandi. Yandi pesá bawu bima mingi ya kudya. Ya kulutila, yandi pesá bawu nyonso yina ba vandá na yawu nsatu samu na kuvanda pene-pene na yandi, mpe kuvutukila kusadila yandi na mutindu ya mbote. Balusakumunu yina ba kuzwá lutilá nyonso yina ba kuzwá na ntama. Verse 26 ke lakisá ti Yehova pesá bawu nsemo (to lumière) ya kulutila. Ya zola zonza ti yandi sadisá bawu na kuzaba mbote-mbote mambu ya yandi. (Iza. 60:2) Balusakumunu ya Yehova sadisá bawu na kusadila yandi na kilengi mpe bukindi ‘samu ntima ya bawu vandaka mbote.’—Iza. 65:14.

13. Wa’ faso mbikudulu yina ke zonzilá kuvutukila kusambila Yehova ke na lunganá bubu yayi?

¹³ Buku ya Izaya ke zonzilá wapi mutindu bisadi ya Yehova zolá vutukila kusambila yandi na mutindu ya mbote. Mbikudulu yayi ke na lunganá kwandi bubu yayi? Ee. Wa’ faso? Banda 1919, ba millions ya bantu me basika na Babilone ya nene, kimvuka ya mabuundu nyonso ya luvunu. Yehova me nata bawu na kisika ya kulutila kitoko na yina yandi pesá bantu ya Izraele. Yandi me nata bawu na paradiso ya kimpeve. Paradiso yango kele yinki?

14. Yinki ke paradiso ya kimpeve, mpe banani ke na kati bubu yayi? (Tala Yina ya zola zonza.)

¹⁴ Banda 1919, bakristo yina ba tulá mafuta ke zingá na paradiso ya kimpeve.b Ba yina ke na kivuvu ya kuzinga na ntoto, “mameme ya nkaka,” me kota mpe na paradiso yango. Mpe ba ke na kuzwá balusakumunu mingi yina me katuka na Yehova.—Yoa. 10:16; Iza. 25:6; 65:13.

15. Wapi kisika kele paradiso ya kimpeve?

¹⁵ Wapi kisika kele paradiso ya kimpeve bubu yayi? Bisadi ya Yehova ke na bisika nyonso na ntoto. Na yawu, paradiso ya kimpeve ke bisika nyonso. Bubu yayi, kisika ni kisika beto kele, beto lenda vanda na kati ya paradiso ya kimpeve kana beto ke salá nyonso samu na kusambila Yehova na mutindu yina yandi ke zolaka.

16. Yinki beto me bonga kusala samu na kutala kaka kitoko ya paradiso ya kimpeve?

¹⁶ Samu na kubikana na kati ya paradiso ya kimpeve, beto me fwana kulakisa ti beto ke sepelá na kuvanda na bampangi ya beto na yinza nyonso. Wa’ faso beto lenda sala yawu? Beto me bonga kutula meso na bifu ya mbote ya bampangi ya beto, kasi ve na mwa bifu ya bawu ya yimbi. (Yoa. 17:20, 21) Samu na yinki ya ke mfunu na kusala yawu? Kanisa na kifwani yayi. Na kisika ya kitoko yina ba me kunda bayinti mingi, bayinti lenda vanda ve faso mosi. Mutindu mosi mpe, na bimvuka ya Bambangi ya Yehova, ya ke na bantu ya mutindu na mutindu. (Iza. 44:4; 61:3) Beto me bonga kusala nyonso na kutula meso ya beto na kitoko ya “kisika” yina beto kele, kasi ve na mwa bifu ya yimbi yina ke na “bayinti.” Beto me bonga kusala nyonso samu mwa bifu ya beto ya yimbi to ya bampangi sala ve ti beto tala dyaka ve kitoko ya bumosi ya dikanda ya beto.

17. Yinki mosi na mosi na kati ya beto lenda sala samu na kutula bumosi na kati ya kimvuka?

¹⁷ Yinki mosi na mosi na kati ya beto me bonga kusala samu na kubumba bumosi ya beto? Beto me bonga kuvanda bantu yina ke tulá kizunu. (Mat. 5:9; Rom. 12:18) Ntangu nyonso yina beto ke salá bamambu samu na kuvanda na kizunu na bampangi ya kimvuka, beto ke kumisá dyaka kitoko paradiso ya kimpeve. Beto ke zimbaná ve ti ni Yehova me benda mosi na mosi ya ba yina ke na kati ya paradiso ya kimpeve samu na kusadila yandi. (Yoa. 6:44) Kanisa na kilengi yina ya ke salá Yehova na kutala bangolo yina beto ke salá samu kizunu na bumosi vanda na kati ya bisadi ya yandi ya ntalu.—Iza. 26:3; Aga. 2:7.

18. Na yinki beto me bonga kuyindula, mpe samu na yinki?

¹⁸ Yehova ke sakumuná mingi bisadi ya yandi bubu yayi. Wa’ faso beto lenda benda bambote na bima yina Yehova ke pesá beto? Beto me bonga kukanisa mbote-mbote na bamambu yina beto ke longoká na Biblia mpe na mikanda ya beto. Kulongoka mpe kuyindula ke sadisa beto na kukulisa bifu ya mbote ya bakristo. Mpe ya ke nata beto na kuvanda ‘na luzolo beto na beto mutindu bampangi yina ke zolasanaka.’ (Rom. 12:10) Ntangu beto ke yindulá na bambote yina Yehova ke pesá beto bubu yayi, kindiku ya beto na yandi ke kumá dyaka ngolo. Mpe ntangu beto ke kanisá na bamambu yina Yehova ke na bumbilá beto samu na bilumbu yina ke kwiza, ya ke bumbá kivuvu ya beto ya kusadila yandi samu na ntangu nyonso. Nyonso yayi ke sadisá beto na kusadila Yehova na kilengi.

BETO SALA NYONSO SAMU NA KUBIKANA KAKA YA KUKANGAMA

19. a) Mutindu Izaya 30:18 ke zonzak’ yawu, na yinki beto lenda vanda ya kundima? b) Yinki ke sadisa beto na kukanga ntima na kilengi?

¹⁹ Yehova ‘ke telama’ samu na beto ntangu yandi ke kufwa yinza yayi ya yimbi. (Iza. 30:18) Beto zaba ti Yehova ke “Nzambi ya lunungu.” Na yawu, ntangu kilumbu yina yandi me soola ke kwiza, yandi ke vingila dyaka ve na kumwangisa yinza yayi. (Iza. 25:9) Beto ke na vingilá na ntima ya yinda nyonso kilumbu yina Yehova ke vuukisa beto. Tekila ya kwiza, beto ke sala nyonso samu na kubika ve kusepela na bweso ya kusambila, kulongoka, kusadila mambu ya Nzambi, mpe kuyindula na balusakumunu yina Yehova ke pesá beto. Kana beto sala yawu, Yehova ke sadisa beto na kukanga ntima na kilengi na kisalu ya yandi.