Beto lenda zinga ntangu nyonso

1. Ntangu beto ke kanisá na nsilulu ya luzingu ya ntangu nyonso yina Yehova me pesa beto, yinki ya ke salá beto?

YEHOVA me pesa nsilulu ti ba yina ke tumamá na yandi ke kuzwa “luzingu ya seko.” (Rom. 6:23) Ntangu beto ke kanisá na yina Yehova ke sala samu na beto, luzolo ya beto na yandi ke kumá dyaka ngolo. Kanisa ntete: samu Tata ya beto ya mazulu zola beto mingi, yandi zola ata kima kabula beto na yandi.

2. Wa’ faso nsilulu ya luzingu ya ntangu nyonso ke sadisá beto?

² Nsilulu ya luzingu ya ntangu nyonso ke sadisá beto na kukanga ntima na bamambu yina beto ke kutaná na yawu. Ata bambeni zonza ti ba ke kufwa beto, beto ke bika ve kusadila Yehova. Wapi yina ke mosi ya bamambu yina ke salá ti beto kangama kaka na Yehova tii na lufwa? Ni kuzaba ti Yehova ke vumbula beto na lufwa, mpe ke pesa beto bweso ya kufwa dyaka ve. (Yoa. 5:28, 29; 1 Ko. 15:55-58; Ebr. 2:15) Samu na yinki beto ke ya kundima ti, ya tsyeleka, beto lenda zinga ntangu nyonso? Beto tala mwa bamambu yina ke pesá beto kiminu yayi.

YEHOVA KE ZINGÁ NTANGU NYONSO

3. Samu na yinki beto ke na kiminu ti Yehova lenda sala ti beto zinga ntangu nyonso? (Nkunga 102:12, 24, 27)

³ Luzingu ke katuká na Yehova, mpe yandi mosi ke zingá ntangu nyonso. Na yawu, beto zaba ti yandi lenda sala ti beto mpe zinga ntangu nyonso. (Nku. 36:9) Beto tala mwa baverse yina ke lakisá ti ya ke ve na kilumbu yina Yehova vandá ve, mpe ya ke vanda ve na kilumbu yina yandi ke vanda ve. Nkunga 90:2 ke zonzá ti Yehova ke zingá “katuka mvula na mvula tii mvula na mvula.” Nkunga 102 mpe ke zonzilá dikanisi mosi. (Tanga Nkunga 102:12, 24, 27.) Mpe mbikudi Abakuki zonzá mambu yayi samu na Tata ya beto ya mazulu: ‘O Yehova, nge ke zingaka kwandi ve katuka mvula na mvula? O Nzambi ya munu, Santu ya munu, nge ke fwaka ve.’—Aba. 1:12.

4. Kana ya ke mpasi na beto na kubakula ti Yehova ke zingá ntangu nyonso, ya zolá kwamisa kwandi beto? Zonzila yawu.

⁴ Ya ke kwandi mpasi na nge na kubakula (comprendre) ti Yehova ke zingá “mvula na mvula”? (Iza. 40:28) Nge ke ve nge mosi. Na yina me tadila Nzambi, Elihu zonzaka: ‘Muntu lenda bakula ve ntalu ya bamvula ya yandi.’ (Yobi 36:26) Kasi, kana beto ke na lembaná kubakula mambu, ya zola zonza ve ti mambu yango ke ve ya tsyeleka. Na kifwani, beto ke zabá ve mbote-mbote yinki ke salá ti nsemo (lumière) vanda. Kasi ya zola zonza kwandi ti ya kele ve? Ve. Mutindu mosi, ya lenda vanda mpasi na beto bantu na kubakula ti Yehova ke zingá ntangu nyonso. Kasi ya zola zonza ve ti yandi ke zingá ve ntangu nyonso. Kana beto ke na lembaná kubakula mambu na yina me tadila Nzambi, ya zola zonza ve ti mambu yango ke ve ya tsyeleka. (Rom. 11:33-36) Tekila bima yina ke pesá nsemo mutindu ntangu na bambwetete vanda, Nzambi vandaka. Yehova ke zonzá na beto ti, ya tsyeleka, yandi ke ‘Muntu yina salaka ntoto na ngolo ya yandi.’ Ntembe ve, tekila ‘yandi lambula zulu,’ yandi vandaka. (Yer. 51:15; Bis. 17:24) Wapi mambu ya nkaka ke salá ti beto ndima ti beto lenda zinga ntangu nyonso?

YEHOVA YIDIKÁ BETO SAMU BETO ZINGA NTANGU NYONSO

5. Wapi luve kento na bakala ya ntete vandá na yawu?

⁵ Na bima nyonso yina Yehova yidiká na zulu ya ntoto, kaka ni bantu yandi salá na dikanisi ti ba ke kufwa ve. Yehova pesá bawu luve ya kuzinga ntangu nyonso. Kasi yandi zonzá na Adami: ‘Nge fwana kudya ve mbuma ya yinti ya kuzaba mambu ya mbote na ya yimbi, samu kilumbu yina nge ke kudya yawu, nge ke kufwa ya tsyeleka.’ (Kub. 2:17) Kana Adami na Eve kuwá Yehova, ba zolá kufwa ve. Beto lenda kanisa ti na manima ya mwa ntangu, Yehova zolá pesa bawu bweso ya kudya mbuma ya ‘yinti ya luzingu.’ Kupesa bawu yawu zolá zonza ti ba ke ‘zinga ya mankululu.’b—Kub. 3:22.

6-7. a) Yinki ke na lakisá dyaka beto ti Yehova yidiká ve bantu samu ba kufwa? b) Wapi bamambu nge ke na nsatu ya kulungisa? (Tala bizizi.)

⁶ Bantu ya mayela me kwiza tala ti bamambu yina muntu ke bumbá na yintu luzingu ya yandi nyonso, ke kaka fioti na kutala mambu nyonso yina yintu ke na makoki ya kubumba. Ya ke mambu ya kukamwa. Na 2010, journal mosi zonzá ti bamambu yina yintu ya beto lenda bumba lenda kuma na lutangu ya ba gigabytes 2,5 millions. Ya zola zonza bamambu nyonso yina muntu lenda tala na télé na kati ya ba heures 3 millions, to bamvula kuluta 300. Ntangu ya nkaka, yintu ya beto lenda bumba bamambu kuluta lutangu yayi. Ya ke na lakisá ti Yehova salá ve yintu ya beto samu ya bumba bamambu kaka ya bamvula 70 to 80.—Nku. 90:10.

⁷ Yehova yidiká mpe beto na nsatu ya mingi ya kuzinga kaka. Biblia ke zonzá ti Yehova ‘tulaka nkutu na ntima ya beto ngindu ya kuzinga mvula na mvula.’ (Lon. 3:11) Ni na yawu beto ke talá lufwa mutindu mbeni. (1 Ko. 15:26) Ntangu beto ke beelá, beto ke kangá ve maboko samu na kuvingila lufwa. Beto ke kwendá na l’hôpital, mpe beto ke baká manganga samu na kubeluka. Beto ke salá nyonso yina beto ke na ngolo ya kusala samu na kufwa ve. Mpe ntangu muntu yina beto ke zolá ke kufwá, ata ya vanda kiboba, ya ke salá beto mpasi mingi. Mpe mpasi yina lenda vanda na kati ya bantangu mingi. (Yoa. 11:32, 33) Beto ke na makoki ya kulongoka kaka, mpe beto ke na nsatu ya mingi ya kuzinga ntangu nyonso, samu ti ni mutindu yina Tata ya beto ya luzolo yidiká beto. Nyonso yayi ke na lakisá ti yandi ke sala ti beto zinga ntangu nyonso. Kasi beto ke na bamambu ya nkaka yina ke na lakisá ti beto lenda zinga ntangu nyonso. Beto tala yina Yehova salá na ntama, mpe yina yandi ke na salá bubu yayi, yina ke na lakisá ti dikanisi ya yandi ya ntete me soba ve.

DIKANISI YA YEHOVA ME SOBA VE

8. Yinki Izaya 55:11 ke na lakisá beto na yina me tadila dikanisi ya Yehova samu na beto?

⁸ Ata Adami na Eve sumukaka mpe ya natá lufwa tii na bana ya bawu, Yehova me soba ve dikanisi ya yandi. (Tanga Izaya 55:11.) Yandi ke kaka na dikanisi ti bantu ya kukangama na yandi zinga ntangu nyonso. Beto lenda zonza yawu ntangu beto ke talá bamambu yina Yehova me zonza mpe me sala samu na kulungisa dikanisi ya yandi.

9. Wapi nsilulu Nzambi me pesa beto? (Danyele 12:2, 13)

⁹ Yehova me pesa nsilulu ti yandi ke vumbula bantu ya kufwa, mpe ke pesa bawu bweso ya kuzinga ntangu nyonso. (Bis. 24:15; Tite 1:1, 2) Yobi, muntu ya kukangama na Nzambi, vandá ya kundima ti Yehova ke na nsatu mingi ya kuvumbula ba yina ke ya kufwa. (Yobi 14:14, 15) Mbikudi Danyele zabá ti Yehova ke vumbula bantu ya kufwa, mpe ba ke vanda na bweso ya kuzinga ntangu nyonso. (Nku. 37:29; tanga Danyele 12:2, 13.) Bazwife na ntangu ya Yesu zabá mpe ti Yehova lendá pesa “luzingu ya seko” na bisadi ya yandi. (Luke 10:25; 18:18) Yesu zonzilá nsilulu yayi bambala mingi. Yandi mosi mpe, Tata ya yandi vumbulak’ yandi na lufwa.—Mat. 19:29; 22:31, 32; Luke 18:30; Yoa. 11:25.

10. Masolo ya bantu yina ba vumbulá na lufwa ke na lakisá beto yinki? (Tala kizizi.)

¹⁰ Ni Yehova ke pesá luzingu, mpe yandi ke na ngolo ya kuvutula bantu na luzingu. Yandi sadilá mbikudi Eli samu na kuvumbula na lufwa mwana ya mufwidi mosi ya Sarefati. (1 Mf. 17:21-23) Na manima, na ngolo ya Nzambi, mbikudi Elize vutulá na luzingu mwana ya kento mosi ya Shunemi. (2 Mf. 4:18-20, 34-37) Masolo yayi mpe masolo ya nkaka ya bantu yina vumbuká na lufwa, ke na lakisá ti Yehova ke na ngolo ya kuvumbula bantu na lufwa. Ntangu yandi vandá awa na ntoto, Yesu lakisá ti Tata ya yandi pesak’ yandi ngolo ya kusala yawu. (Yoa. 11:23-25, 43, 44) Bubu yayi yandi ke na zulu, mpe ‘Nzambi pesaka yandi lulendo (to lutumu) nyonso na zulu mpe na ntoto.’ Ya zola zonza ti, yandi lenda lungisa nsilulu yina yandi pesá ti “bantu nyonso na bandyamu” ke vutuka na luzingu, mpe ke vanda na bweso ya kuzinga ntangu nyonso.—Mat. 28:18; Yoa. 5:25-29.

11. Wapi mutindu munkayulu ya Yesu ke fungulá beto nzila ya kuzwa luzingu ya ntangu nyonso?

¹¹ Samu na yinki Yehova biká Mwana ya yandi yina yandi ke zolá mingi kufwa na mutindu ya mpasi? Yesu pesaka mvutu ntangu yandi zonzaka: ‘Tsyeleka, Nzambi zolaka mingi bantu. Ni yawu yina, yandi fidisaka Mwana ya yandi kaka mosi, samu ti konso muntu yina ke kwikila yandi kufwa ve, kasi kuzwa luzingu ya seko.’ (Yoa. 3:16) Samu yandi pesá Mwana ya yandi mutindu munkayulu samu na masumu ya beto, Yehova pesá beto bweso ya kuzwa luzingu ya ntangu nyonso. (Mat. 20:28) Ntumwa Polo lakisá mfunu ya mambu yayi ntangu yandi sonikaka: ‘Ya tsyeleka, mutindu lufwa kwizaka na muntu mosi, mutindu mosi mpe, mvumbukulu na lufwa me kwiza na muntu mosi. Bantu nyonso ke kufwaka samu ti bawu kele ya kukangama na Adami. Mutindu mosi mpe, bantu nyonso ke kuzwa luzingu samu ti bawu kele ya kukangama na Kristo.’—1 Ko. 15:21, 22.

12. Wapi mutindu Yehova ke sadila Kimfumu ya yandi na kulungisa dikanisi ya yandi samu na beto?

¹² Yesu lomgá bilandi ya yandi na kusambila samu ti Kimfumu ya Nzambi kwiza, mpe luzolo ya yandi salama awa na ntoto. (Mat. 6:9, 10) Mosi ya bamambu yina Nzambi zola kulungisa, ni kusala ti bantu zinga ntangu nyonso awa na ntoto. Ni na yawu Yehova me tula Yesu mutindu Mfumu ya Kimfumu ya yandi. Yandi me vukisa bantu 144000 awa na ntoto samu ba sala kintwadi na Yesu na kulungisa dikanisi ya yandi.—Luz. 5:9, 10.

13. Yinki Yehova ke na lungisá bubu yayi, mpe yinki beto me fwana kusala?

¹³ Bubu yayi, Yehova ke na vukisá “nkonga ya nene ya bantu” mpe yandi ke na bongisá bawu samu na kuzinga na lutumu ya Kimfumu ya yandi. (Luz. 7:9, 10; Zaki 2:8) Bubu yayi, yinza ke ya kukabuka. Ya ke na bamvita mpe bantu mingi ke na ntima ya yimbi. Ata mpili yina, bantu ya kimvuka ya nene ke na salá bangolo ya bawu nyonso samu na kukatula na kati ya bawu bamambu nyonso yina ke kabulá bantu. Na bamambu yina ba ke salá, ba ke lakisá ti ba me kumisa bambele ya bawu ya bamvita bima ya kusala bilanga. (Mika 4:3) Ba ke kotá ve na bamvita. Na kisika ya kufwa bantu, ba ke sadisá bawu na kuzwa ‘luzingu ya tsyeleka.’ Ba ke salak’ yawu ntangu ba ke longá bantu mambu ya Nzambi, mpe bamambu yina yandi ke na nsatu ya kulungisa. (1 Tim. 6:19) Bantu ya makanda ya bawu lendá kwamisa bawu samu ba ke sadilá Yehova. Mpe ba lenda kutana na bamambu ya mbongo samu ba ke lakisá ti ba ke na manima ya Kimfumu ya Nzambi. Kasi Yehova ke salá ti bisadi ya yandi vanda na nyonso yina ba ke na yawu nsatu. (Mat. 6:25, 30-33; Luke 18:29, 30) Nyonso yayi ke na lakisá ti Kimfumu ya Nzambi ke ya tsyeleka, mpe ya ke bika ve kulungisa dikanisi ya Nzambi.

BILUMBU YA KITOKO NA MANTWALA

14-15. Wapi mutindu nsilulu ya Yehova ya kukatula lufwa samu na ntangu nyonso ke lungana?

¹⁴ Bubu yayi Yesu ke Mfumu na mazulu, mpe yandi ke lungisa bansilulu yina Yehova me pesa beto. (2 Ko. 1:20) Kubanda na 1914, yandi ke na yalá na kati ya bambeni ya yandi. (Nku. 110:1, 2) Na mwa ntangu fioti, Yesu na ba yina ke yala na yandi ke manisa kununga bambeni ya bawu, mpe ba ke kufwa bantu ya yimbi nyonso.—Luz. 6:2.

¹⁵ Na kati ya bamvula 1000 yina Yesu ke yala, bantu ya kufwa ke vutuka na luzingu, mpe bantu nyonso na ntoto yina ke tumama na Yehova ke kuma bantu ya kulunga. Na manima ya kumeka ya nsuka, ba yina nyonso Yehova ke tala ti ba ke bantu ya lunungu ‘ke baka ntoto, mpe ba ke zinga ya mankululu na zulu ya yawu.’ (Nku. 37:10, 11, 29) Beto ke vanda na kilengi ntangu Nzambi ke ‘mwangisa lufwa, mbeni ya nsuka.’—1 Ko. 15:26.

16. Wapi yina ke mambu ya ntete yina ke natá beto na kusadila Yehova?

¹⁶ Na disolo yayi beto me tala ti, kivuvu ya beto ya kuzinga ntangu nyonso ke ngolo samu ya ke katuká na Biblia. Kivuvu yayi lenda sadisa beto na kuvanda kaka ya kukangama na Yehova na bilumbu ya nsuka ya mpasi yayi. Kasi samu na kusepelisa Yehova, beto me bonga ve kukangama na yandi kaka samu na kuzinga ntangu nyonso. Mambu ya ntete yina ke salá ti beto kangama na Yehova mpe na Yesu, ni luzolo ya ngolo yina beto ke na yawu samu na bawu. (2 Ko. 5:14, 15) Luzolo yayi ke natá beto na kulanda kifwani ya bawu, mpe kukabula na bantu ya nkaka kivuvu yina beto ke na yawu. (Rom. 10:13-15). Ntangu beto ke longoká kukabula mpe kutula bansatu ya bampangi na mantwala, beto ke pesá Yehova nsatu ya kuvanda ndiku ya beto ntangu nyonso.—Ebr. 13:16.

17. Yinki me tala mosi na mosi ya beto? (Matayi 7:13, 14)

¹⁷ Beto ke vanda kwandi na kati ya bantu yina ke kuzwa luzingu ya ntangu nyonso? Yehova me fungula beto nzila samu na yawu. Kasi, ni beto ke soola kuvanda kaka na nzila yina ke natá na luzingu. (Tanga Matayi 7:13, 14.) Luzingu ke vanda wa’ faso ntangu beto ke zinga ntangu nyonso? Beto ke zonzila yawu na disolo yina ke kwiza.